Alkitab Bahasa Wondama
1 Tesalonika 3
Timotiusi tiopana Kavo Vesie pasi
Ama ma kasa amasoeta ea va, ave amamo amato amasamuai mia, apavo amanggutu ave jau tutiri Silasi amumasoi mesari na Atena.1 Avori amatanatu Timotiusi, tane maneta pai, nienaripi tutiri ama maso Allah ave amamo tiopana Kavo Vesie nanapi Kristusi pai, ave dionae mene sane raro pasi sikarakuai e diono kavo sanepaja nanapi mene sanetiar pai, ave amamo siniotu nana rabua mia, sesisui sia na sene sanetiar pasi vape moja, aso marior ninesi. Matau menduina, toapa marior jasi sisua nana Allah nie tato pai so tata. Nana rabua amamasoi tutiri mia pa, amatopa maso mia toapa nari tamarior. E vevata mo jasi sive diadi to manau, ariri menduina pa. Apajoma, jemiasa Timotiusi, aso jo iruina mene sanetiar maso Kristus pai. Imatai Bilis pai siotour mia to manau, e amane pi saserai amananari pasi sinai vei vea pe. Rabua nine ma Timotiusi siovera ea nana mia to manau e tiopana kavo vesasie pai maso ama nanapi toanetoi mesanemitiar maso Kristus pa e mesanemipai vavera pa. I ma tiopa sasara maso ama toapa tawana mesanemipai usara viate nanapi ama nana mesanemi pasi. E meto mesamuai ama, masi vaveri tutiri amato amasamuai mia kota.2 Apavo maneta pa mia, nanapi amane marior e kariria saserai pasi, amasanemi ne sietate aso raupui nana mene sanetiar pasi maso Kristus. Rabua nine ma amasanemi riruina amatenam ea, aso metosa to karakuai nanapi Syen. Amatopana vesie vesiri maso Allah, aso metonae amasanemi ne sietate mo na aropo Allah. Diru sasaar ma amambe nadi maso i tutiri sane vetutira, ave amamo amasajo mendemi pasi ea ave amatono pi vitosi simandi na mene sanetiar maso Kristus pa. Amambe nadi maso Allah Tatamami pai mesari, tutir tane Syen Yesus susieva ria maso ama ave amamo amasamuai mia! E amambe nadi ave Syen dionae mesanemipai vaveri mia, tutiri siniotu vura rawai ea, apajoma mene sanepaja pai piam ea, masi ariri amasanemipai mia pa. Amambe nadi ave Syen dionae mesanemi pa sikarakuai, apajoma membe sren e membe sasara va na aropo Allah Tatamami pai, nana kasau tane Syen Yesus riama tutiri nie siniotu veve sren pasia vura.
Source notes (2)
- Cross-reference Kis. 17:15
- Cross-reference Kis. 18:5
Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.