Skip to content
BibleKenya

Alkitab Bahasa Wondama

1 Tesalonika 4

Tenam vionae Allah sane pa vesasie

Manau pa, maneta pa mia, amasau e amatono kavo sanepaja maso mia nanapi Syen Yesus: Amataniau mia to manau nanapi toanetoi nari metenam ave metonae Allah sane pa vesasie. Vevata metenam ariri jana to manau. Vape amasau so menanaripi vevata mo rawai ea. Aso menduini pi vioisara pasi amatonasi maso mia nanapi Syen Yesus sano pa to manau. Ninei ma Allah nie majar paina: Ave amamo metenam nana sren pai, toapa membe kasau vurusu kavo vavi pai, ave amamo mua pa siri-siri nana rabua mia, kioro vavi pesi e vie diadi vinie so i tutiri tienam nanapi sren e siemuai tatuana nana siniotu pasia. Metenam usara mene majar so tarai vekariria pai vape moja, ariri siniotu vetatara Allah pasia senanarisi pa. Nanapi vava ninesi, siniotu senanari sasara maso sene maneta pai, pivai setawi kota vape moja. Aso Syen nari diono hukuman maso siniotu venanari sasara vetoapa jasi. Papopa kavo pasi vura amanggavo to karakuai e amatono kavo sanepaja so mia to manau. Allah siau tata, ave amamo tatenam nana kariria pai va, vape tatenam nana sren pai. Apavo siniotu vetawa irara aniau ninei, i ma tiawa irara siniotu va, vape tiawa irara Allah viono Wainunu Sren maso mia pai. Nanapi mesanemipai maneta pasia, kasa amambui maso mia ea va, aso Allah matau dieniniau mia to manau ave amamo mesanemipai vaveri mia. E vava nine ma menanari maso mene maneta vesanemitiar vura na Makedonia vetutira to manau. Vape amasau maso mia to vesie mo, ave mesanemipai vaveri mia riwanea. Meto sasera to karakuai ave amamo metenam tutiri manasi e kasa kuoto siniotu vevesiei sene kavo pasi va. Ariria mamo menanaripi so mia mesari ave amamo metono marabati maso siniotu vevesiei va, ariri amatopana pareta pai maso mia to manau pa. Masisi metenam toapa jana, kasa metavakir maso siniotu vevesie va, ave mesau pisia, e siniotu vesanemitiar va pasia, nari setatuana mia.

Syen Yesus riama pa

Maneta pa mia, amamajar ave menduini nanapi siniotu vevoru to manau pasia, ave amamo mesanemi pa sikariria vape moja, ariri siniotu vevesiei sepir sanetiar va maso sobata pai. Tasanemitiar toapa Yesus vioru to manau e tienam sovera ea. Apavo tasanemitiar kota toapa Allah nari diono siniotu vevoru pasia setenam sovera ea nanapi Yesus, ave amamo setenam tutiri. Nanapi vava jani, ninei ma Syen nie aniau paina, amamajar amatopani maso mia: Nana raria Syen Yesus riama pa, aja vetenam rami ne tata, kasa tasamuai Yesus papo va rawai nana siniotu vesanemitiar vevoru to manau pasia.1 Siniotu rora baba pai nari dumi tutiri raupui vebaba e Allah nie tabura pai riotu ariri pareta. Avori matau Syen Yesus viar nana rora wa, e siniotu vevoru nana Kristusi pasia nari sesobata sia papo, manau na jana, aja vetenam rami ne tata nana raria jani, nari Allah rusasana tata so arepa pa raropa tutiri sia ave tasamuai Syen na rora wa. Avori tamasoi tutiri Syen to woroi-woroi. Apavo menggarakuai mesanemi pasi vavera tutiri aniau nanapi tenam sovera ea pai.

Source notes (1)
  1. Cross-reference 1Kor. 15:51-52

Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.