Skip to content
BibleKenya

Alkitab Bahasa Wondama

2 Tesalonika 3

Amasau ave membe nadi so ama

Manau pa, maneta pa mia, membe nadi so ama, ave Syen nie kavo pai ma saira miesiepar vei vea e siniotu pasia sesamuaisi tutiri sane vesie e setatuani, masi ariri vevediadi maso mia to manau pa. Membe nadi kota, ave amamo Allah dionae amataisu vurusu siniotu viono variriwi pasia e vekariria pasia, aso siniotu pa esia sesanemitiar maso Syen nie Kavo pai, vape esia ma aja sesanemitiar maso Syen nie Kavo pai varami. Vape Syen ma kior usara kavo vitopi tiopanasi pa. Nari dionae mesanemi pasi sikarakuai e dieram vedioro mia nana Bilis pai. E amasanemitiar to karakuai mo maso Syen, toapa aja menanaripi e nari menanari vitosi amataniau wasi maso mia vei vea pa.

Amambe nadi maso Syen ave diedidini mia ave menduini rawai mo toapa Allah sanepai mia e ave amamo metanota vea nana rabua mesamuai marior ariri Kristusi nana raria siemuai marior pa.

Tata ma nari tananaripi

Maneta pa mia, nana Syen Yesus Kristus sano pa, amatono pareta ave membe kasau vurusu maneta venanaripi va pasia vura, e vekambarai verausara aniau amatopana maso sia pasi. Aso matau menduina toapa nari menda usara amane rara tenam nei, aso amanggawawaru va so amananaripi nana rabua amana tutiri mia pa. Amambaiti pisia amasamuai pasi vura nana siniotu vevesiei. Diru sasaar ma, amato sasera e amananaripi to karakuai ave amanggambarai amatono marabati maso mia. Vata mo pana, amambe sasara va, masisi amasau so mia ve metono pisia, vape amananari jana va, aso amamajar amambe ria maso mia ave amamo diadi so menda usarasi. Nana rabua amana tutiri mia pa, amatono pareta toapa nine, “Siniotu vekambarai nanaripi pai, kasa diapi va.”

Amatopana ninesi aso amatadiawa, toapa esia na rabua mia setenam e senggawawaru. Senanari piesa va, vape senanaripi vei vea so senggoto siniotu vevesiei sene kavo pasi. Nanapi Syen Yesus Kristus sano pa, amatono pareta e amatono kavo sanepaja maso siniotu jasia, ave amamo senanaripi tutir manasi e sesasera pisia maso sia mesari. E maneta pa mia, memanau nanaripi viate pai vape moja. Masisi esi kiembarai ria usara pi vitosi amatopanasi pa nana surat ninei, membe kasau vurusu siniotu vetoapa jani, e membe maneta tutiri vape moja, ave amamo miemaja. Vape metatori ariri siniotu menggasiowa vape moja, vape metono kavo sanepaja so i vea ariri mene mambeneta. Syen paini vie umaja na mari ma vesie pai maso tata. Amambe nadi maso I e diono mari ma vesie pai maso mia vei vea nanapi vava saserai. Syen nia tutiri maneta pa mia vura. Nana jau, Paulusi, itopana tabea maso mia. Ivui tabea ninei na vara nesi mesari. Ninesi ma siveruana nana ine surat pasi vura: ninesi ma ine aivuire pasi na. Ive nadi maso tane Syen Yesus Kristusi diono vesie pai maso mia vura!

Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.