Alkitab Bahasa Wondama
2 Tesalonika 2
Siniotu Vekariria
Maneta pa mia, nanapi tane Syen Yesus Kristusi riama pa, e nanapi nari sioruiri tata ave tamasoi tutiri, amasau mo maso mia,1 sawawara mesanemi vavera e mesanemi sasera mia vape moja, aso metadiawa raupui pesa nanapi Syen Yesus, nie raria pai riama to manau. Masisi siniotu pasia setojo tonine, raupui jani vieva nana kavo pesa toapa Wainunu pai tiopani, ite nana aniau pesi, ite nana surat amambui pesi, vape mesanemitiari va. E kota siniotu vevesie pesia setawi mia vape moja. Aso aja Raria Syen riama varami pa, nari vava ninei vie diadi papo, siniotu vepau pasia nari sepovera e sembavuru Kristus; E nari siniotu vekariria jani vieruana nie tarai pai, vevata Allah nari dionie sua so neraka pai e niai. I ma nari dio vavera Allah e tiopa tieriai rawai nana pi saserai vura siniotu pasia sesom pasi. E kota nari miesoi nana Anio Syen pai e vieruana nie tarai ariri Allah.2 Mesanemipai toapa itopanasi vura maso mia to manau nana rabua aja ina tutir mia rami pa. E nine ma menduini pi vitosi sirut tawana siniotu vekariria pai, apajoma aja vieruana nie tarai pai varami. Nana raria Allah diria pai, siniotu vekariria jani nari vieruana nie tarai pai. Siniotu Vekariria jani nienari kariria tutiri manana to manau, vape paja pesi aja rut tawani rami. Nari raria pesi mamo Allah riera paja verut tawana siniotu vekariria pai, nana raria jani siniotu vekariria pai vieruana nie tarai pai, vape Syen Yesus nari muni nanapi nie sore wojou pai, e dionae niai nana rabua Syen riama nana nie sasaar pimasa pai.3 Siniotu Vekariria jani nari riama nanapi paja pimasa nana Bilis pai. Nari diono pitandor saserai e vava verawai vionu tutir awitituwa.4 I ma nari nienari pi saserai vekariria so viawititu siniotu pasia e nari senai, aso setawa irara e senggambarai senda usara aniau vetindija nana Allah vekor vesie maso sia pai. Apavo Allah dionae senanari pi veve sasara pai, apajoma nari sesanemitiar maso pi veve vata va pasi. Allah nienari jasi ave siniotu pasia vura sesanemi vesie so senanaripi vekariria e sesanemitiar aniau vetindija pai va, nari Allah diono hukuman pai maso sia.
Allah diri mia ave mesamuai vesie pai
Maneta, Syen sanepaja pa mia! Amatopana vesie maso Allah nanapi mia vei vea, aso nana retena pa Allah diri mia to manau, ave amamo mesamuai vesie pai, nanapi Allah nie Wainunu pai dionae membe sren aso mesanemitiar maso aniau vetindija. Toapa jana mamo Allah siau mia nanapi Kavo Vesie amatopana maso mia pai, ave amamo diadi so menggoto nie sasaar pimasa pai, nana tane Syen Yesus Kristusi. Apajoma, maneta pa mia, metosa to karakuai e mendu tawana aniau amatopana maso mia nanapi amanggavora e amambui pasi. Amambe nadi maso tane Syen Yesus Kristusi mesari, tutiri Allah tatamami pai surono mesanemi vesie e suronae mesanemi pasi sikarakuai, ave amamo diadi so menanaripi e metopana kavavo viate pai. Aso Allah sanepai tata, e aso Nie sanepaja pai ma dionae tanggarakuai, tutiri tapir sanetiar maso nie viate pai.
Source notes (4)
- Cross-reference 1Tes. 4:15-17
- Cross-reference Yeh. 28:2; Dan. 11:36
- Cross-reference Yes. 11:4
- Cross-reference Mat. 24:24
Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.