2 Tesalonika 1

1Maneta na kuaruvi vesanemitiar nana Tesalonika pa mia, nana Paulusi, Silasi e Timotiusi amambui surat ninei maso mia venana Allah Tatamami pai e Syen Yesus Kristusi!1 2Amambe nadi maso Allah Tatamami pai tutiri Syen Yesus Kristusi, surono vesie pai, e mari ma vesie pai maso mia.

Amatopan vesie tutir amambe nadi pai

3Maneta pa mia, tawana amatopana vesie pai maso Allah aso mia. Vevata mo nari amananari toapa jana, aso mesanemitiar maso Kristus rawai ea, e mesanemipai vaveri mia rawai ea. 4Apajoma tawana amatopa nanapi mia maso Allah nie kuaruvi jasia nana rabua amandama e amasajo sia pa. Nanapi amasamuai sano vebaba, amatopanusara toanetoi metanota vea e mesanemitiar maso Kristus nana rabua metere kariria tutiri marior pasi pa. 5Pi jasi vura siveruana toapa Allah kutu kavo to tindija mo. Mesamuai marior pai aso menggor usara maso Allah, apajoma dietor mia ma vevata diadi so mesua nana uta Allah vie pareta ariri Raja pa. 6I ma nari nienari vetindija pai, e nari siovera marior pai so siniotu viono marior maso mia pasia. 7E Allah nari diono mari pai maso mia venana rabua nine mesamuai marior pa, tutir ama kota. Jasi nari sive diadi nana raria Syen Yesus viar nana rora wa e vieruana nie tarai pai tutiri nie siniotu rora pasia, nana nie paja pai, e nana adia veveviar pai raro pa. 8Viar mesu ave diono hukuman pai maso siniotu vetawa irara Allah pasia e vekambarai vekor usara Kavo Vesie pasia nanapi tane Syen Yesus. 9Siniotu jasia nari sesamuai hukuman voru pai to woroi-woroi mo, kie sia so vorira wa nana aropo Syen pa e vurusu nie paja na sasaar pimasa pai. 10Jasi vura nari siveruana nana raria riama wa, Nie kaiwasa pasia sesanandiki e siniotu vesanemitiar pasia vura, setatuani. Mia kota nari menana tutiri Allah nie kaiwasa pai, aso mesanemitiar kavo amatopana maso mia pasi to manau.

11Apavo tawana amambe nadi so mia, ave amamo tane Allah dionae diadi so metenam ariri nie majar pa, apavo siau mia. Amambe nadi maso Allah, diono nie paja pai ave amamo menanari pi viate meto menanari pasi vura, e metono ariri nanaripi pasi vura aso mesanemitiar maso Kristus pana. 12Apavo tane Syen Yesus sano pa siemuai sanandika pimasa nanapi mia e mesamuai sanandika pimasa nanapi Yesus kota, aso tane Allah e Syen Yesus Kristusi surono vesie pai maso mia to manau.