1 Timotiusi 1

Paulusi tiopana tabea maso Timotiusi na Efesus

1-2Timotiusi, ine atuma panau! Ine atuma ni au vevata mo, nanapa tane sanetiar Syen pa. Surat ninei ma, nana jau, Paulusi, ivui ariri rasul nanapi Yesus Kristusi. Ive rasul nanapi Allah nie pareta, Vekor Vesie maso tata pai, e nanapi Yesus Kristusi nie pareta, tapir sanetiar soa pai.

Ive nadi maso Allah Tatamami pai tutir Yesus Kristusi tane Syen pai, surono vesie pai, sanepaja e mari ma vesie pai maso au.1

Kavo sanepaja nanapi aniau veve sasara

3Nana raria ira so Makedonia pa, jemias tutiri karakuai maso au to manau, ave amamo muesoi na Efesus vea. Aso siniotu pa esia, setaniniau kavo aniau veve sasara pasi na wana, e nari buonae semanau aniau veve sasara pasi. 4Nari buono kavo sanepaja maso sia ave amamo semanau setitu kasau nanapi setopanusara arami e setopanusara sano usapui vemanau va pasi. Pi jasi vura nari sivediajara waririwi vei vea. E kasa sionae Allah nie nanaripi nei ria topo va. Nanaripi ninei ria topo nanapi sanetiar pai vea. 5Kavo sanepaja ninei ma nie umaja paini, ave amamo siniotu vesanemitiar pasia vura sesanemipai vaveri sia, nanapi sane vevaro rariai, sane raro veve sren, e sanetiar Syen vevata mo. 6Vape esia ma setenam ariri jana ea va to manau. Senda sasara nana kavo vavera veve vata va pasi. 7Semajar ave sembe guru veruin sasavu kavo aniau na Torat pa esia, vape matau setatara kavo senggavora pasi, pivai vava setopana to sesanemitiar mo wasi.

8Tanduini toapa hukum Torat pai ma diete, masisi tananari ariri to tindija mo. 9Tanduini kota toapa Allah diono hukum Torat pai maso siniotu vetindija pasi va, vape Allah diono hukum pai maso siniotu verawaini pasia e siniotu venanari kariria, vekorusara maso Allah va, siniotu veve tatar pasia, siniotu vetenam maso dunia vea, e siniotu vetatuan maso Allah va, siniotu vemu riwana vene tama e sinia pasia, e kota siniotu vemu siniotu. 10Allah diono hukum Torat pai maso siniotu venanari kavo vavi pasia, kota mua venanari kavo tutiri mua vevesiei, siniotu viamanana siniotu e sembovi pa, siniotu viawitituwa pasia, e siniotu vetopana kavo veve vata va na kuaruvi vekutu kavo pai, e teini nienari vava verawaina aniau vetindija pai. 11Aniau jani niana Kavo Vesie pai, andi Allah diono maso jau, ave amamo itopanasi pa, andina Kavo Vesie nana Allah vebaba e vesamuai sanandika pa.

Paulusi tiopana vesie maso Allah nie sanepaja pai

12Itopana vesie pai maso Yesus Kristus, tane Syen pai. I ma diono paja pai maso ja to manau, ave inanaripi maso i e dietor ja ve diadi so ira nanaripi ninei. 13Papopa ma ikavo kavo vekariria maso Allah, e jono marior tutir isisiajara siniotu vesanemitiari pasia to manau. Vape Allah sanepai jau, aso rabua jana ma aja isanemitiar varami, apavo iruini va ariri pi vitoini inanari pa.2 14Vape tane Syen diono nie vesie pai rawai vesiri maso jau e diono paja pai ave amamo isanemitiar maso i e isanempai siniotu vevesiei pasia. E paja ninei vieruana maso tata na rabua tambe siri tutiri Yesus Kristusi to manau pa. 15“Kristus Yesus riama so dunia nei ave riera siniotu veve tatar pasia nana sene kariria pasi!” Kavo ninei ma vata e diadi so tasanemitiari vetutira pa. E na kasau rabua siniotu vetatar pasia, ine tatar pai bieba rawai. 16Vape aso toapa jana pa, Allah sanepai jau, ave amamo Kristus Yesus vieruana nie mariat pai vetutira maso jau, siniotu veve tatar rawai mo. E nine ve ria maso siniotu vura ave sesanemitiar maso i e sesamuai tenam vata to woroi mo. 17Allah, veve Raja to woroi-woroi pai, andi tatatuani e tasom tasanandiki tawana, aso andi tienam to woroi, i ma vieruana va e miesari to! Amin.

18Timotiusi, ine atuma panau, nanaripi ninei ma joni maso au, ariri Allah nie arer nabi pasia setopana nanapi au pa. Ave amamo arer jani vie paja maso au, e puaja nanapi nanaripi viate pai. 19Suesera e nuenaripi to karakuai tutiri rut kepana sanetiar vetindija pai e tutiri sane raro veve sren pai. Aso siniotu pa esia ma senggorusara sene sane raro pasi va, apajoma sene sanetiar pa sinai. 20Na kasau rabua sia, Himeniusi tutir Aleksander sandu ma, isiwi sandu maso Bilis pai to manau, ave amamo suraniau so sumanau susisiajara Allah pa.