Alkitab Bahasa Wondama
1 Tesalonika 5:11
Verse 11 is marked below, with the whole chapter around it. Read from the start
Tataram voria so Syen riama pa
Maneta pa mia, kasa amambui maso mia va nanapi raria toini Syen nari riama pa. Aso matau menduina to tindija mo, toapa Syen nie raria jani nari ria tandor, masi ariri viamananapi riama nana diru.1 Nana rabua siniotu pasia nari senggavo e setojo, “Jasi vura vesie tutiri manasi,” apa na rabua jana, kariria pai nari tiere sia tutiri tandor vea, masi ariri vavi pesi tiere pota nana dio diavi pa – siniotu jasia ma nari kasa sembavuru kariria jani va. Vape maneta pa mia ma, metenam nana vekumuar pai va, amamo raria jani dionae metandor va ariri viamananapi pai riama pa. Mia vura ma siniotu vetenam nana sasaar pai, ariri venanari viate e sren pai. E tata ma siniotu vetenam nana vekumuar va, ariri venanari kariria pai. Apajoma kasa tatena vea ariri siniotu vevesiei va. Vape nari tataram tane sanepaja pasi e sitindija to karakuai. Nana diru pa siniotu pasia setatara vitopi nari vie diadi pa aso setena pana. E nana diru jani kota mamo siniotu pa setunu sua tutiri senanari sasara. Vape tata ma siniotu vetenam nana raria vesasaar, apavo diadi so tatawan tane tarai pasi. Nari tasanemitiar maso Syen to karakuai, tutiri tasanemipai siniotu vevesiei pasia tutiri tasanemitiar tawana to karakuai mo toapa Allah nari diono vesie pai maso tata. Ninesi ma sivava ariri pimamuna vena vori tata nana tatovavera so kumuar pai pa.2 Aso Allah diri tata ave tasamuai hukuman pai va, vape ave tasamuai vesie pai nanapi tane Syen Yesus Kristusi, vioru so tata to manau, ave amamo nana rabua nari ria sovera ma pa, masisi aja tatenam rami, pivai tamboru to manau, nari tatenam tutiri kota. Apavo ariria mamo metono kavo sanepaja so mia vaveri e menggarakuai vaveri mia, masi ariri menanaripi nana kasau nine pa.
Kavo sanepaja vemanau tutiri tabea
Maneta pa mia, amasau vesiri mo ave metatuana siniotu venanaripi na kasau rabua mia pasia, Syen diri sia to manau ave amamo setadidina e setono kavo sanepaja maso mia. Metono ariri sia nana tatuana pai mo e sane vesie sia aso mesanemipai vitosi senanarisi pa. Metenam nana mari pai vei vea tutiri siniotu vevesiei.
Amatono kavo sanepaja maso maneta mia kota ave amamo menggavo suara siniotu vekambarai nanaripi pasia. Metonae siniotu vematai pasia senggarakuai sene sane raro pasi. Mesanemipai siniotu vene sanetiar vepaja va pasi. Memberuana mariat pai maso siniotu vura. Masisi esi nienari kariria maso mia mamo, metarama ave mesovera kariria tutir kariria vape moja, amana mesasera vei vea ave menanari vesie pai, maso maneta vesanemitiar pasia e siniotu vura.
Tindija mamo tawana mesanemi pa sietate, e membe nadi vei vea. Metopana vesie pai nana pi vura, aso jani ma Allah miajara nana Kristus Yesusi so mia.
Mesoete nanaripi nana Wainunu Sren pai vape moja. E mesanemi tura kavo Wainunu Sren pai tiopana pasi vape moja. Metato kavo saserai metadiawa pasi e nari menda usara viate pasi. Membe kasau vurusu pi saserai vekariria pasi.
Amambe nadi maso Allah matauni diono mari ma vesie pai maso tata, ave dionae metenam na sren pai vevata mo. Amambe nadi ave Allah dieram mia vetutira, nana mene wainunu pai, tenam pai e tarai pai, ave amamo kasa metenam na sasara pai va, nana rabua tane Syen Yesus Kristusi riama pa. Allah vesau mia to manau pai, andi nari nienari ariri pi kievora pasi aso kiorusara pana.
Maneta pa mia, membe nadi maso ama!
Metopana vesie maso maneta vesanemitiar pasia tutiri sanepaja.
Nana paja Syen, isau tutiri mo ave amamo metap surat ninei maso maneta vesanemitiar pasia vura.
Amambe nadi ave tane Syen Yesus Kristusi diono vesie pai maso mia.
Source notes (2)
- Cross-reference Mat. 24:43; Luk. 12:39; 2Ptr. 3:10
- Cross-reference Yes. 59:17; Ef. 6:13-17
Alkitab Bahasa Wondama. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.