लूक 6

शब्बाथदी पालन

मत्तय 12:1-8; मार्क 2:23-28

1आंन्ट्यागा ईळा आय्या की, वगा शब्बाथ दीनामला येशुड शेलानेळ यळीन्याआन वान शिष्यल् कनसल् तैम्पी शेतल्या चोळाशी तिंटुडीर.1 2आप्पुड परुशयांलोंटोर आनीर, “शब्बाथ दिनामला येम योग्य लेद, आदी मिर याला शेस्तार?” 3येशुड वारीक आन्या, “यप्पुड दाविद आन वानबरोबर मंदिक आकाल आईन्या आप्पुड वार येम शेशीनाड ईदी मीर शास्त्र लेख ला वाचायाले येम? 4वाड द्यावार ईटला फो आन समर्पित रोट्याल याजकांन शिवाय यवारच तिनेद योग्य लेद आवी वार यळा तिनीर आन मनाबरोबर उंडीनोरक् वार्कबी ईच्चीर.”2 5इंगा येशु ड वारीक आन्या, “मनशी कोडकु शब्बाथ प्रभु उंडाळ.” 6ईळा आय्या की, दुसरा वगा शब्बाथ दिनामला येशुड यहुदी सभास्तानला व्हो आन शिकामतीदेंक आन्ट्या. यवानद उजवा शेई सुकाशिंद यीळा आंद ऊंड्या. 7येशुड शब्बाथ दिनामला यवारक् बागा शेस्ताड येम ईदी सुशेईच्चागा काही नियमशास्त्र लोंट्योर शिक्षक आन परुशी वानमिंदा धानाम फटी उंडीर. ईचांग की वारीक आरोप फैटदैंक येमतरी कारण शिक्काबेक. 8गान वाड वारी विचारल् तेलस्कुनी सुकाशिन शेत ऊंडीनोड मनशिक आन्या, “लेईआन आंदार मुंदारा निला फड,” आन हा मनशी लेशी आंद निला फड्या. 9येशुड वारीक आन्या, “नीन मिक आडगतान, शब्बाश दिनामला या गोष्टील शेशेय परवानगी ऊंडाद? बागा शेशेद की वाईट शेशेद? याद कायदेशीर ऊंडाद, वगानक जेम वाचाशेद येम वांद नाश शेशेद?” 10आन्ट्यागा वाड सभाला हा आंदार तीक सुशा आन आन्या, “नी शेई फेदाद शेई.” आप्पुड वाड आळा शैशा आन वांद शेत बागा आय्या. 11इंगा परुशी आन नियमशास्त्रलोंट्यो शिक्षक सना किरलिर आन येशुन विषयी येम शेशाक वच्ची ही विषयी वगामेगारक चर्चा शेशेदेंक आंटीर.

बारा प्रेषित

मत्तय 10:1-4; मार्क 3:13-19

12हा दिवसला ईला आय्या की, येशुड प्रार्थना शेशेईचागा कोंडामींदा व्हो. वाड आदी मबु द्यावारद प्रार्थना शेसदेन्क घालवाशा. 13यप्पूड फदु फुट्या, आप्पुड वाड शिष्यलनी स्वतादैगारा कुतेश्या. वाड वारदांट्ल्या बारा जनन निवडाशा आन वारिक 'प्रेषित' ईळा फेर ईच्या. 14शिमोन वानिक पेत्र ईदी सुद्धा फेर ईचा वाड अंद्रिया (प्रेत्रन तंमुड), याकोब आण योहान, फिलीप्प, बर्थलमय, 15मत्तय, थोमा, अल्फीन कोडकु याकोब, शिमोन वानीक जिलोत आंटार, 16याकोब कोडकु यहूदा आन यहूदा इस्कर्यौत, यवार मूंदारा विश्वासघात शेशेतोड यल्या.

17येशु वारबरोबर कोंडामींदेळ किंदा दिग्या आन सपाट जागामिंदा निला व्हड्या इंका वान अनुयायील व्हेदा समुदाय आंद वच्चा आन यहुदीया प्रांत, यरुशलेम ऊर, सोर आन सिदोन समुद्र थट शहर, कडेळ ईळा सना मंदि आंद वचीरनीर. 18वार आंद येशु द ईनदैक आन रोगामगोन बागा आयदेंक वच्चीनीर आन यवारक्. अशुद्ध आत्माद् बाधा ऊंड्या वारीक पण हा पिढान मोकळा शेशीर. 19आंता मंदी घोळका वानिक स्पर्श शेसदेन्क सुस्तुंड्या, कारण वानदांटळेल सामर्थ वस्तुंड्या आन आंदारक आदी बागा शेसस्तुंड्या.

धन्यवाद इंगा दुखोद्गार

मत्तय 5:1-12

20यंकसार येशुड मना शिष्याल् तीक सुशा आन आन्या, “हे दिनमनशी, मीर धन्य ऊंडार कारण द्यावार राज्य मीद ऊंडाद.

21हे मीर यवार इप्पुड आकालकोन्योर ऊंडार, वार मिर धन्य ऊंडार, कारण मीर तृप्त ऐय्यार. हे मीर यवार इप्पुड येडस्तार, आदी मीर आशीर्वादित ऊंडार कारण मीर नग्यार. 3

22यप्पूड मन्शी कोडकु गोन मंदि मीद द्वेष शेशार आन येपुन वार मना समाजनुट मिक धुराम शेशार आन मिद निंदा शैशार आन मीद फेर वार चुकीद आंका कुकेश्यार आन मन्शी कोडकु ईचागा मीक नाकाराशीर, आप्पुड मीर धन्य ऊंडार.

23हा दिनामला एला अवते आनंद शेशी उड्याल मत्तना, कारण खेरेमे स्वर्गला मिद प्रतिफळ व्हेदाद ऊंडाद! कारण वार पुर्वजल् पण संदेष्ट्याल् क आळे शैशीर.

24पण श्रीमंतलोर, मीक दुःख काबेक् कारण मीक पौल आंता सुख शिक्कीन्द उंडाद.

25यवार मिर तृप्त उंडार मिक दुःख काबेक, कारण मीर आकालनोर आय्यार. यवार इप्पुड नग्गतार वारीक दुःख आवान कारण मिर शोक शेशार आन येडश्यार.

26यप्पूड आंदार मिबद्दल बागा आन्यार आप्पुड मीक दुःख आवान कारण वार अब्बागारल खोट्टी संदेष्ट्याल्योंटोर क यीळे शेशीनार.”

शत्रुमिंदा प्रीती

मत्तय 5:38-48

27“परंतु मिर ईनेतोरक् निन शेपतान, मी शत्रुमिंदा प्रिती शेईना. यवार मिद व्देष शेश्तार, वारद् बागा शैईना. 28यवार मीक श्राप ईस्तार वारीक आशीर्वाद ईना. यवार मीद अपमान शैस्तार वार ईच्चागा प्रार्थना शैईना. 29जर यवार मी वगा शम्पाक मततार तर वानमुंदारा दुसरा पण शाम्पा शैई. जर यवार मी बंटाल तुस्कुंटार तर वानिक नीद कुर्ता पण येतकेन व्ह्यदेंक मना शैयाक. 30यवार मीक आडगुतार वार आंदारक ई आन यवार मीद वस्तू जग्गी तुस्कुटाड वानदैगारा इंगा आडगाक. 31आन यळा मंदी मीसंगा वागायाबेक आनकेन मीद ईच्छा ऊंटाद आंळे मीरपण वागायना.”

32“मीमींदा यवार प्रिती शेसतार वारमींदा प्रिती शेयडा, तर दांट्ल्या मीद उपकार तो यम? कारण पापी मंदिपण मनामिंदा प्रिती शेशेतोर मींदा प्रिती शेस्तार. 33मीद यवार बागा शेश्तार, वारद् जर मीर बागा शेश्तार तर मीक येम फायदा? पापी पण ईळे शैश्तार. 34यवार तिकेळ मीक परत शिक्की ईळा आशा ऊंटाद, वारीक जर उसना ईस्टार तर मिक येम फायदा? पापीपण परत शिक्काबेक ही उद्देश गोन दुसरा पापीक उसना ईस्ताड. 35परंतु मिर मना शत्रूमींदा प्रिती शेईना आन वारद बागा शैईना आन निराश न आता उसना ईना आंटे मीद प्रतिफळ व्हेदाद आयी आन मीर परम कोडकु आय्यार कारण वाड अनुपकारी आन वाईट विरमीदां दया शेशेतोड ऊंडाड.4 36यळा मी परमेश्वर आब्बाड दयाळू ऊंडाळ आळा मीरपण दयाळू ऊंडना.”

इंगोगारी दोशलू तीशेडबद्दल

मत्तय 7:1-5

37“यवारद् न्याय शैय्याकुंडा, आंटे मीदपण न्याय काक फोई. यवार मिन्दा दोष ईय्याकना आंटे मिक दोषी ठरवायाक फैय्यार. उन्गोरण क्षमा शैईना आंटे मिक क्षमा शिक्की. 38ईना आंटे मिक ईच्चार. बागा माप दाबाशी, हालवाशी शीग निंड्डी मि व्हदरामला येशार कारण या मापगोन मिर मापाशी ईच्चार हाच मापनेळ मिक परत मापाशी ईच्चार.”

39वाड वारीक वगा उदाहरण शैप्या, “वगा गुड्योळ दुसरा गुड्योंनक दावा सुपी यम? वार ईद्दारपण खड्याला फडार यम? 40यापण शिष्य वान गुरू पेक्षा थोर लेद. पण प्रत्येक शिष्य येपुड पूर्ण नेरस्ताड आप्पुड वाड गुरुनलेकाच आवताड. 41स्वतः कनलोन मुसळ ध्यानामला न फेटता नु मना तंमुनद् कन्नलोंद् कुसळ याला सुस्ताव? 42लेद आंटे नु मना कन्नलोंद मुसळ सुडांदे मना तंमुनक् यळा आन्याव की, आन्ना, नी कन्नलोंद कुसळ नाक तियान? अरे ढोंगी, प्रथम नी कन्नलोंद मूसळ ती आंन्ट्यागा निक आप्पुड नी तंमुनद् कुसळ तिशेतापुड बागा कंमशी.”

43यादच माक बागा लेद की, आदी वाईट फळ ईस्ताद किंवा यादच वाईट माक लेद की, आवी बागा फळल् ईस्ताद. 44कारण प्रत्येक माक ईदी दानी फळलगोन गुडतू फेटतार. मंदि काट्याल् झुडूपनेळ अंजीरलु गोळा शयार आळे काटेरी झुडूपनेळ वार द्राक्षल् गोळा श्यार. 45बागा मनशी वान अंतकरणला या बागा गोष्टील् साठाशिनी ऊंडाय आंवे तीस्ताड आन दुष्ट मनशी वान अंतकरणला येम वाईट ऊंडाद आद्दे बैटीक तीस्ताड कारण अंतकरणला येम निंड्डीनाद आद्दे नोरनेळ यळी.

ऐकास्काम इंगा शेस्काम

मत्तय 7:21-27

46“मीर नाक ‘प्रभू, प्रभू,’ अन्टार, पण नीन यम शप्पतान आदी मिर याला शेयार? 5 47प्रत्येक जण यवाड नादैगारा वस्ताड आन ना वचनलु ईनी आवी आज्ञाल पाळास्ताड वाड यळा ऊंडाळ ईदी नीन मिक सुप्तान. 48वाड वगा ईलु कटेळ मनशी लेका ऊंडाळ. वाड नोत तव्या आन राईमिंदा पाया कट्या. आंन्ट्यागा पुर वच्चा आन नेळाद लोंढा ईल्लमिंदा आदळाशा, पण नेळागोन आदी हालायाले, कारण आदी बागा कट्टीनद् ऊंड्या. 49पण यवाड नाई वचनल् ईंन्टाड पण आवी पाळायाले तर वाड मना 'ईल्ल पाया फेटान्दे जमीनमींदा कटीनार हा मनशीलेका ऊंडाड, हा ईल्लमिंदा नेळाद लोंढा आदळाशा आन आदी लगेच फड्या आन हा ईलुद संगेम नाश आय्या.”