वडार
1 करिंथ 6
केस बद्दल उपाय
मीपैकी येवाडाना इल्ला उंडाड, येवाड मना मित्र संगा जगडाम आयते तर द्यावार पवित्र मंदी देगार फोयेद इडशी अनीतिमान मंदी न्यायालय लोंग फोयेद हिम्मत शेस्ताड? पवित्र मंदी दुन्यामदी न्याय शेश्यार इदी मीक येरका लेद येम? इंगा जर मीक दुन्यामदी न्याय शेशेद उंडाद, तर मीर येम शिन्ना-शिन्ना जगडालदी न्याय शेयदेंक पण योग्य लेर येम? मनाम द्यावार देवदुतलाद न्याय शेश्याम, इदी मीक येरका लेद येम? दिन कसोम इ जीवनलोन शिन्नाय जगडाल इडपीदेंक मीर नक्की दम फट्टाबेक? जर मिक संसारीक माटलाद न्याय शेशेद उंटे, तर येम वारने कुसना मत्यार येवार मंडळीला येमीच लेर? मीक शिग्गु कावाला आंकेन नीन इल्ला आंटान, येम खरेमे मी दिंटल्या वगाड पण बुद्धिमान शिक्काड येम येवाड मना तम्मुळलाद न्याय निवाडा शेशी? पण वगा तम्मुड यप्पुडाना इंगोगो तम्मुन मिंदा केस शेस्ताड येम, आदी पण अविश्वासी मंदी मुंदार? खरेम आंटे मीर इंदे हारास्तीर की मी नडमा केसलु चालू उंडाय, दानपेक्षा मीर स्वताने अन्याय येनटीक सहन शेय्यार? मीर फसवणूक येनटीक सहन शेय्यार? पण मीर स्वता अन्याय शेस्तार इंगा फसाय मतुतार आदी पण मना विश्वासी तम्मुळलान इंगा शेल्यांलान. अनितीमान मंदीक द्यावार राज्यद वतन शिक्काक फोई, इदी मिक येरका लेद यम? फसायाकुंडा; येवारुच व्यभिचारी, मूर्तीपूजक इंगा वडती इडशी इंगोगो आंडीदान संगा व्यभिचार शेशेतोर, विपरीत संभोग शेय्यानीचेतोर इंगा विपरीत संभोग शेशेतोर, दोंगा, लोभी, सराय तागेतोर, तिट्टेतोर इंगा लुबाडीचेतोर इरकी द्यावार राज्याद वतन शिक्काक फोई. इंगा मीपैकी यंता तरी मंदी इल्ले उंडीर;पण प्रभु येशु ख्रिस्तन फेरता इंगा मना द्यावार आत्माता कडगीनोर, पवित्र शेशीनोर इंगा नीतिमान ठराशीनोर उंडार.
फय इंगा आत्माला द्यावारदी गौरव
“आन्नी माटलु ना कसोम शिंगार तर उंडाय,” पण आन्नी माटलु ना फायदा कसोम लेव, “आन्नी माटलु ना कसोम शिंगार तर उंडाय,” पण नीन यादुच वस्तु अधीन काका फोयान. मीर आंटार वंटा कडपु कसोम उंडाद पण द्यावार आ रोंडू इटलाद नाश शेशी. पण व्यभिचार कसोम फय लेद, तर फय प्रभुन कसोम उंडाद इगा फय कसोम प्रभुड उंडाड. इंगा द्यावार प्रभुन लेप्या इंगा वाड वान सामर्थ्यता मनालनी सुध्दा लेपी. मीद फय ख्रिस्तन अवयवलु उंडाय, इदी मीक येरका लेद यम? मग नीन ख्रिस्तन अवयवलु तिस्केन आटलान वेश्यादानी अवयवलु शेयदून येम? अजिबात लेद. मीक इदी येरका लेद यम की, येवाडाना वेश्या दान संगा जुडासताड वाड दान संगा वगाट आताड? येनटीक पवित्र शास्त्र आंटाद की, वार इद्दार वगाफय आय्यार. पण येवाडाना प्रभुन संगा जुडासताड वाड वानसंगा वगा आत्मा आयफोताड. व्याभिचारनुस दुराम फारना. इंगोगोट यादबी पाप मनशी शेस्ताड आदी फय बैट्या आयताद. पण व्यभिचार शेशेतोड मना फय विरुद्धलाने पाप शेस्ताड. मीक येरका लेद येम की, मीद फय मी नोना नीलचेद याद पवित्र आत्मा द्यावार तिकनुस मिक शिक्कीनाद दानदी मंदिर उंडाद. इंगा मीर स्वतःक मालक लेर? येनटीक की मीर मोल इच्ची कोंकेन तिस्कुनीनोर उंडार; आंकेन मीर मी फयगोन द्यावारदी गौरव शेयांडा.
वडार. Copyright © 2024 Bridge Connectivity Solutions Pvt. Ltd. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.