1 करिंथ 5

मंडळीला अनैतिक मंदी

1इल्ला माटा इने दिंटल्या वच्चीनाद की, मी दिंटल्या व्यभिचार आयताद. वगा मनशी वान आब्बान इंगोगो वडती संगाने अनैतिक संबंध फेटताड. इल्लोन व्यभिचार याद यहुदी लेनोरला पण काद. 2इंगा तरी मीर गर्वता फुगाशीनार, पण मीर दान कसोम शोक शेय्यार? यव्वाड इल्ला फनी शेशीन्या वान मीदिंटल्योंकेल तिस्काडाल सुंटीर. 3नीन जरी फय रूपता मीनडमा लेन तरी आत्मा रूपता तर नीन आंदे उंडान. आंदु उंडीगास पण येवाड इल्लोन वाईट फनी शेशीनाड, वान विरुद्ध नीन आज्ञा इच्काडनान, 4यप्पुड मीर प्रभु येशुन फेरता वगातळा जमा आयतार, आप्पुड मना प्रभु येशुन सामर्थ्यता नाद आत्मा मी संगा उंटाद, 5मीमलान इल्लोन मन्सुलाद फय नाश कसोम शैतानकी इच्काडना; दिन कसोम की, प्रभुन दिन्मुला वान आत्माद तारण कावाला. 6मीद घमंड शेशेद शिंगार लेद. मिक येरका लेद येम की रव्वासा खमीर पूर्ण फिस्कीने फिंडीन खमीर शेस्काडताद? 7तिशी फेकेस काडना इ फाता खमीरनी, स्वतःन शुद्ध शेयांडा दिन कसोम की मीर कोत्ताद फिस्कीने फिंडी कावाला की मीर अखमीरी उंडार येनटीक की मनाद पण वल्हांडण येवाड ख्रिस्त उंडाड, अर्पण आइनाड.

अनैतिकता कसोम न्याय

8दिन दांडा मनाम मनाद वल्हांडण फंडगा वाईट इंगा दुष्टताता निंडीने फाता खामिरता लेद तर विश्वासूपणा इंगा सत्यता निंडीने बेखमीर रोट्याता पाळादाम.

9नीन मीक ना पत्रला राशीनान की व्यभिच्यारी मंदी संगा संबंध फेटाकुंडा. 10नाद आनेद अर्थ इल्ला बिलकुल लेकुंड्या की मीर इ दुन्यामलोन व्यभिचारी, लोभी, लुबाडीच्चेतोर इंगा मूर्तीपूजकला संगा संबंध फेट्टाके उंडा; इल्ला कावाराद की मिक दुन्याम नुस बैटीक फोवाबेक आय्यी. 11पण इप्पुड, नीन मीक राशीनान की, येवाराना ख्रिस्तला तम्मुड आनीनोड व्याभिचारी, लोभी इंगा मूर्तीपूजक, तीट्टेतोड, तगेतोड इंगा लुबाडीच्चेतोड उंटे तर वानसंगा सबंध फेटाकुंडा; इल्लोन मनशी संगा रोट्ट्याबी तीनाकुंडा. 12यव्वार बैटूटोर उंडार मंडळीलोन्टोर लेर वारदी न्याय शेशद नाद येम फनी? मिक वारदे न्याय शेय्यादाद येम यव्वार मंडळीलोन्टोर उंडार? 13पण द्यावार बैटूटोरदी न्याय शेस्ताड दिन कसोम

'मीर मीदिंटल्योन्केल आ दुष्ट मनशीन बैटीक तिस्काडना'. 1