वडार
1 करिंथ 7
फेंडलीद प्रश्न
इप्पुड आय माटलु येनटी बद्दल मीर नाक पत्रला राशीन्टीर इप्पुड आटलाद उत्तर नीन इस्तान; मनशी कसोम इदी बागा उंडाद की वाड आंडीदान संगा संबंध फेट्टाने राद. गान व्यभिचारनोट वाचायदेंक प्रत्येक मनशीक वडती इंगा प्रत्येक आंडीदानकी मोगुड उंडाला. मोगुड वडतीक दानदी हक्क इय्याला; इंगा आल्ले वडती पण मोगुनकी. वडतीक दान फयमिंदा अधिकार लेकुंटाद, पण मोगुनकी उंडाद; इंगा आल्ले मोगुनकी पण वान फयमिंदा अधिकार लेकुंटाद, पण वडतीक उंटाद. मीर वगामेगारनी इडशी निल्वाकुंडा, पण मीक प्रार्थनाक वेळ शिक्काला आंकेन वगामेगार संमतीगोन काही वेळ कसोम दुराम निलुंडा इंगा वापस वगाट कांडा दिन कसोम की, सैतान मी असंयम कसोम मीमलान मोहला केडपाराद. गान नीन इदी संमती आनकेन शपतान, आज्ञा आनकेन लेद. नाद इच्छा इल्ला उंडाद की, आंता मंदी नालेका फेंडली शेस्कुनांदे उंडाला पण प्रत्येक व्यक्तीक द्यावारनुस विशेष दानलु शिक्कीनाय. वगानकी वगा प्रकारे निलचेद इगा इंगोगोनकी इंगोगो प्रकारे निलचेद.
फेंडली कानोर कसोम सलाह
दिन कसोम आंदार फेंडली कानोर इंगा विधवा आंड्योर बद्दल आंटान की, वार कसोम इल्ले उंडेद शिंगार उंडाद यल्ला नीन उंडान. पण जर वारकी दम यल्लाकुंटे तर वार फेंडली शेस्कुनाला; येनटीक की वासनाला कालेपेक्षा शिंगार उंडाद फेंडली शेस्कुनेद. इंगा फेंडली आयनोर की निन आज्ञा इस्तान, (निन लेद तर प्रभुड आज्ञा इस्ताड ) की वडती मना मोगून इडवाराद इंगा मोगुड पण वडतीन पण इडवाराद पण, जर अलगबी आयते तर फेंडली शेस्कुनाराद आल्ले निलवाला इंगा मना मोगुनसंगा वापस समेट शेस्कुनाला इंगा मोगुडपण वडतिन इडवाराद. पण इंगोगोरकी इदी प्रभु शप्पालेद, पण नीन शपतान की, जर यादाना विश्वासी तम्मुन वडती विश्वास फेट्टाकुंटे इंगा वान संगा निल्चेदेंक संमती उंटे तर वाड दान इडवाराद. इंगा या विश्वासी आंडीदान मोगुड विश्वास फेट्टाकुंटे इंगा दानसंगा निलचीदेंक समंती उंटे तर आदी वान इडवाराद. येनटीक की, विश्वास फेट्टाकुनिनोड मोगुड वडती कसोम पवित्र आताड इंगा विश्वास फेट्टाकुन्ने वडती मोगुन कसोम पवित्र आताद, लेकाते मी बीळलु बिस्काल अशुध्द उंटूनीर पण वार इप्पुड पवित्र उंडार. पण येवाड विश्वास फेट्टाड इडशी फोय्यान आंटाड तर वान फोनिंडा; येनटीक की येवाड तम्मूड इंगा शेल्याल इल्लोन बाबतीत बंधनाला लेद. पण द्यावार मनालनी शांतीला निलचेदेंक कुतेशीनाड. येनटीक की हे वडती, इदी निक येल्ला येरका उंडाद की, नु नी मोगुनदी तारण शेशाव? इंगा हे मोगुड, इदी निक यल्ला येरका उंडाद की, नु नी वडतीद तारण शेशाव?
द्यावार कुतेस्काम अनुसार नडवांडा
तर यल्ला प्रभुड प्रत्येक वगानकी फंची इच्चीनाड, इंगा यल्ला द्यावार प्रत्येक वगान फीलचीनाड, आल्ले वाड नडवाला. नीन आन्नी मंडळीलाक इल्ले आज्ञा इस्तान येवाड वगाड सुंता आय्यीने मनशी द्यावार तीकनुस फिल्चीनोड उंटे? तर वाड सुंताद चिंन्ह खोडायाराद. येवानदी सुंता कालेद इल्लोन मनशी द्यावार तीकनुस फिल्चीनोड उंटे? वाड सुंता शुस्कुनाराद. येनटीक की ना सुंताद येमाना महत्व उंडाद इंगा ना बेसुंताद येमाना महत्व उंडाद; पण द्यावार आज्ञालदी पालन शेशेदे आंता उंडाद. विश्वासी आल्ले निल्वाला यल्ला वारनी द्यावार फिल्चीन्या, यप्पुड वार ख्रिस्त येशुन मिंदा विश्वास फेट्टीर. जर नु गुलाम उंडीनाप्पुड फीलचेदेंक वच्चीनाव? तर चिंता शेयाक; पण निक स्वंतत्र आय्येद उंटे तर दानदी उपयोग शेय. येनटीक की येवाड गुलाम उंडीनाप्पुड प्रभूला फीलचीनोड उंडाड वाड प्रभूला स्वतंत्र मनशी उंडाड; आल्ले येवाड स्वतंत्र उंडीनाप्पुड फीलचीनोड उंडाड वाड ख्रिस्तन दास उंडाड. द्यावार मिमलान किंमत इच्ची कोनकेन तिस्कुनीनेद उंडाद, दिन कसोम मीर मनसुला दास कावाकुंडा. हे तम्मूडलु इंगा शेल्यांलू यवाड या स्थितीला फीलचीनोड उंडाड वाड आद्दे स्थितीला द्यावार संगा निलचेद.
फेंडली संबंधित प्रश्नलाय उत्तरलु
इप्पुड फेंडली कानोर कसोम नाक प्रभुन तिकनुस यादुच आज्ञा शिक्का लेद; पण, विश्वासयोग्य निलचेदेंक येवान मिंदा प्रभुड दया शेशीनाड इल्ला नीन वगाड उंडान आंकेन नीन संमती इस्तान. नाक वाटास्ताद की, इप्पुड परिस्थितीलोन संकटलान सुशी इदी बागा उंडाद की येवाड यल्ला उंडाड वाड आल्ले उंडाला. जर निक वडती उंडाद तर अलग आय्येद प्रयत्न शेय्याक. जर निक वडती लेद तर नु नी कसोम वडती फुडकाक. पण जरी नु फेंडली शेस्कुंटे तर नु पाप शेय्या लेद; इंगा कुवारी आनबीडा फेडली शेस्कुंटे तर आदी पाप शेय्या लेद; पण इल्लोनटोरकी संसाराला शारीरिक दुखल आय्यी इंगा इल्लोन शारीरिक दुखल मिक कावाराद इल्ला नाद इच्छा उंडाद. पण तम्मूडलाला नीन इदी आंटान की, इदी वेळ रव्वा उंडाद. इप्पुड, यवारकी वडतुल उंडाय वार वडती लेकुन्ने लेका बतकाला; इंगा येडशेतोर येडवाक वच्चीनार इल्ला, येव्वार आनंद शेस्तार वार आनंद शेय्यानोर लेका इंगा येव्वार कोंकेन तिस्कुन्टार वार इल्ला उंडाला की वार देगार येमीच लेद. इ दुन्याम संगा व्यवहार शेशेतोर इल्ला उंडाला की दुन्यामटोर कावाराद येनटीक की इ दुन्यामदी रिती इंगा व्यवहारलु बदलास्का फोयताय. नाक इल्ला वाटास्ताद मीर दुन्यामलोन वासनालनुस मुक्त उंडाला. येवाड फेंडली कानोड उंडाड वाड प्रभुन संगा संबंधित माटलाला, आंटे मनाम प्रभून यल्ला संतुष्ट शेशाम दानदी काळजी शेस्ताड; पन येवाड फेंडली आयनोड उंडाड वाड दुन्यामलोन माटलाद, आंटे वडतिन यल्ला संतुष्ट शेय्याला दानदी काळजी शेस्ताड. इल्ला वारी भागलु आयताय येवार फेंडली कानोर इंगा कुंवारी आनबिडा उंडार आदी मनाम फयला इंगा आत्माला पवित्र उंडाला, इल्लोन प्रभुन माटला बद्दल चिंता शेस्ताद; पण याद फेंडली आयनेद उंडाद आदी दुन्याम माटलाद, आंटे मना मोगुन यल्ला संतुष्ट शेयदून दानदी काळजी शेस्ताद. इदी नीन मी फायदा कसोमे आंटान, मीमलान फसाय मताला आंकेन लेद; पण मीर विचलित कावान्दे प्रभुन सेवाला आंटी उंडाला आंकेन शपतान. जर येवारकी आना इल्ला वाटास्ताद की, वाड वान आनबिडाद हक्क मतेस्तुनाड, इंगा येवात दानदी फेंडली वय यल्ली फोयतुनाद इंगा आल्ले गरज उंडाद, तर यल्ला वानदी इच्छा उंडी आल्ला वार शेय्याला, दिंटल्या पाप लेद, वाड फेंडली शेस्कुनाला. पण यवाड फेडली शेस्कुनेद लेद इल्ला निर्णय तिस्कुनीनाड, येवानकी येमीच गरज लेद इंगा येवाड वान इच्छामिंदा अधिकार फेटताड इंगा इल्ला येवाड मना कुतुरनी कुंवारी फेट्टेद मनला ठराय मतनिन्टे तर वाड शिंगार शेस्ताड. दिन कसोम येवाड मना कुंवारी आन्बिडाद फेंडली शेशी इस्ताड वाड बागा शेस्ताड; पण येवाड फेंडली शेशीयाड वाड शेंगेम शिंगार शेस्ताड. फेंडली आयने आंडीदान मोगुड जित्ता उंडाड आड नंताक आदी वान संगा कट्टीनेद उंडाद, पण जर दान मोगुड सच्ची फो तर, फक्त प्रभूला विश्वासीने उंटे, दानदी इच्छा उंटे तर दानकी वाटाशी वान संगा आदी फेंडली शेस्कुनी शेकास्ताद. पण आदी जर फेंडली शेस्कुनांदे निलच्या तर, नाद मत इल्ला उंडाद, आदी आंडीद शेंगेम आशीर्वादित आय्यी इंगा नीन मानास्तान की, ना नोना पण द्यावारदी आत्मा उंडाद.
वडार. Copyright © 2024 Bridge Connectivity Solutions Pvt. Ltd. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.