Zabuli 99

Nguluwi ndo mndewa mkulu

1Mkulu Nguluwi kangulongoza,

wanhu wa isi zeng'ha wangukakama.

Nakekalisa hagati ha vilumbigwe viwele na mabawa,

isi yangutigasika.

2Mkulu Nguluwi ndo mkulu ako Siyoni,

kangwinuligwa hali wanhu wa isi zeng'ha.

3Weng'ha walitogole itagwa lya heye likulu lya kukabusa.

Yelile ndo heye.

4Gwa mndewa uwele na mong'ho, ulingugana kutanganika.

Nakutawiza hachi kuli Isilaeli,

nawigala kutanganika na hachi.

5Mumtogole Mkulu Nguluwi, Nguluwi wa hetwe,

mugwe chifunama hali heye.

Yelile ndo heye.

6Musa na Aluni nawali watambika wa heye,

Samweli nayali hali wala walichemile itagwa lya heye.

Nawamlilila Mkulu Nguluwi naye nakawedichila.

7Nakalonga nawo kulawa kuli izengo lya ng'hungugu,

nawebatilila nhaguso za heye na mizilo joyawapele.

8Gwa Mkulu Nguluwi, Nguluwi wa hetwe, hegwe nakuwedichila,

kwa hewo nawali Nguluwi uwele ulinguwalechela wanhu,

hanga nakuwagaza kwa nongwa za hewo.

9Mumtogole Mkulu Nguluwi, Nguluwi wa hetwe,

mfugamile kuli chidunda cha heye chelile.

Mkulu Nguluwi, Nguluwi wa hetwe, ndo yelile.