Zabuli 98

Nguluwi chilongozi wa isi zeng'ha

1Mumwimbile Mkulu Nguluwi lwimbo lunyale,

kwa vila nakadita mbuli za vinduzanduza.

Moko wa heye wa kudilo uzidahe, moko wa heye welile naumha heye kusumya.

2Mkulu Nguluwi nakalajila ulohozi wa heye,

nakawalajila wanhu wa isi zeng'ha kutanganika kwa heye.

3Nakalikumbuchila igano lya kwimilila na kukundigwa kwa heye kwa Waisilaeli.

Banzi zeng'ha za isi nazona ulohozi wa Nguluwi wa hetwe.

4Isi yeng'ha itowe luchenze kwa chiwalo cha Mkulu Nguluwi,

imtogole kwa nzimbo za usangalalo.

5Mumtogole Mkulu Nguluwi kwa kutowa luchenze,

mumtogole kwa lizi linojile lya igombogombo.

6Mumtowele luchenze Mkulu Nguluwi mndewa wa hetwe,

msangalale kwa mhalamhanda na mbalati.

7Bahali ibogome na vyeng'ha viwele mumo,

isi zeng'ha na weng'ha walingikala mgati mwake.

8Hemwe nzanda mtowe vimbamba,

hemwe vidunda mwimbe hamwe kwa kusangalala.

9Visangalale hali Mkulu Nguluwi,

kwa vila kanguya kuitagusa isi yeng'ha.

Kozitagusa isi zeng'ha kwa hachi,

kowatagusa wanhu kwa kutanganika.