పవిత్ర్ బైబిల్‍
అపొ 4
పేతుర్నా, యేహన్నా మహాసభమా లీన్‍ జావను
పేతురు యోహాను ప్రజల్‍తి వాత్‍ బోల్తుర్హవమా, థోడుజను యాజకుల్‍బి, దేవాలయంనూ మోటోబి, సద్దూకయ్యుల్‍బి, ఇవ్నే ప్రజల్‍నా బోధించుకరాతేబి, యేసునా బట్టిన్‍, మరీహూయు జీవిన్ ఉట్‍స్యే కరి ప్రచార్‍ కరానూ దేఖిన్‍ ఇవ్నా ఘాణు ఛండాల్‍ ఆయూ. అనహఃజే ఇవ్నా జబర్‍జస్తీతి ధరీన్‍ బందించిన్‍, హాఃమ్‍జ్‍ హూయిజవమా బెంమ్మనూ ధన్‍తోడీ కావ్లీమా ఠాణమా రాక్యు. పన్కి ఇవ్ను వాక్యంనా హాఃమ్‍జ్యుతే ఇవ్నే కెత్రూకి జణు దేవ్నా విష్వాసించ్యు. ఇవ్నామా ఖాలీ మరధ్‍మానాస్‍ ఫాఛ్‍హజార్‍ అద్మి. బుజేక్‍ ధన్నే ఇవ్ను అధికారుల్‍బి, మోటోవ్‍బి, షాస్త్రుల్‍బి ఖారు యెరుషలేమ్‍ భరైయు. ప్రధాన్‍ యాజకుడ్‍ హూయోతే అన్న కయాప, యోహాన్‍బి, అలెగ్జాండర్‍, ప్రధాన్‍ యాజకుణ్‍నూ బంధుల్‍ ఖారూబి, ఏజ్గా థూ. ఇవ్నే అపొస్తోల్నా హాఃరవ్నా ఇఛ్మా భీరకాఢీన్‍ తుమే కింకరుకురాస్‍ కేవు థాకత్‍తి కేవు నామ్తి కరురాస్‍, కెహూ నామ్‍నూ బట్టిన్‍ ఆనా కరుకరాస్‍ కరి పుఛావమా,
పేతురు పవిత్రాత్మతి భరైన్‍ అమ్‍ బోల్యొ, ప్రజల్‍నూ అధికారుల్‍, షాణ, యో లంగఢానా హుఃద్రాయోతే యో అసేల్‍ కామ్నా గూర్చీబి, హామ్నా పరీక్చించుకరస్‍? ఆ కినేతి అచ్చు హూయోకీ మాలంకర్నూకరీ ఛానా? తుమే ఖారూబి, ఇష్రాయేల్‍నూ అద్మీయేబి మాలంకర్నుతే ష్యాత్‍ కతో, తుమె సిలువ నాఖ్యతే, మరీహూయమథూ దేవ్‍ ఉఠ్టాడ్యోతె నజరేయుడ్‍నో యేసు క్రీస్తు నామ్‍తిస్‍ ఆ హుఃద్రిన్‍ తూమార హాఃమేస్‍ హీభిర్యోస్‍. ఘర్‍ బాంధవళా తుమె నకో కరి ఫేఖీదిదాతే ఫత్‍ర్వో ఆస్‍. యో ఫత్‍ర్వో హాంకే కోణోనా ముఢ్‍క్యనా ఫత్‍ర్వో హుయు యో యేసుస్‍.
బుజు కినేతిబి రక్చణ మళ్‍స్యేకోయిని; ఆ నామ్‍తిస్‍ అప్నె రక్చణ లేను పన్కీ ఆకాష్‍నా హేట్‍ అద్మీయేనా దేవాయ్‍ర్యుతే బుజు కేవు నామ్‍తిబి రక్చణ కోమల్సేని.
యూవ్నే హాఃరు పేతురు, యోహాన్‍నూ హిమ్మత్‍ దేఖిన్‍, ఆవ్నే పడ్యాకోయిన్తే మాముల్‍ అద్మీయే కరి అర్ధం కరీన్‍, హాషంహూయిన్‍, అవ్నే యేసునా కేడె ర్హయ్యా హూయాస్‍ కరి హాఃణత్‍ ధర్యా. హుయుతో ఖూద్రిగయోతే యో లంగఢుబి ఇవ్నా కేడేస్‍ హుబ్రిర్హావమా ఇవ్నా కాయిబి బోలాన కోహుయుని. తెదె యూవ్నే హాఃరవ్నా సభనా బాధర్‍ జవోకరీ ఆజ్ఞా దీన్‍, ఇవ్నే ఇవ్నేస్‍ అమ్‍ వాత్‍ బోలిలీదు. ఆ అద్మీయేనా అప్నె ష్యాత్‍ కర్నూ? ఇవ్నా హాతె అధ్బుతంనూ మహీమ హూయిరూస్‍ కరి హాఃరవ్నా మాలం. ఇనా అప్నె కాహెకరి బోలన కోహుస్యేని. హూయితోబి ఆ అద్మీయేమా నా ఫైలావ్‍నూ తిమ్‍, అజు కెధేబి ఆ నామ్తి కేవు అద్మీయేనాబి వాత్‍ బోలానా దేనూతిమ్‍ ఇవ్నా ఢార్వాను కరి బోల్లిదు.
తెదె ఇవ్నా బులైమంగైన్, తుమే యేసునూ నామ్తి నా బోధించ్‍నూ, ఇనా గూర్చి వాతె నా బోల్‍నూ కరి ఇవ్నా ఆజ్ఞాదిదూ. ఇనటేకె పేతురుబి యోహాన్‍ ఇవ్నా దేఖీన్‍, దేవ్ను వాత్‍ నా హాఃజీన్‍ తూమారు వాత్‍ హాఃజనూ దేవ్ను డోలామా న్యాయమస్‍నా? తూమేస్‍ బోలొ. హామే హాఃజాతే, ధేఖ్యతే ఇనా గూర్చి బోల్యాకోయిన్తే ర్హవనా కోహూస్యేని కరి ఇవ్నా జబబ్‍ దిదా. ప్రజల్‍ ఖారు జర్‍గ్యుతే ఇనా దేఖీన్‍, దేవ్నా మహీమ కర్తుర్హయు. అనటేకే సభలో ఛాతే అద్మియే ప్రార్ధన కర్యు, ఇవ్నా కిమ్‍ షిక్చించ్నుకీ మాలంకోహుయుని, ఇనటేకె ఇవ్నా ఖాలీ ఢార్యిన్‍ మ్హేంద్యుదూ. హుఃద్రావనూ సూచక క్రియ కినూ విషయంమా హూయుకీ యో ఛాళీఖ్‍ః వరఖ్‍ఃతిబీ ఘను వరఖ్‍ఃనో.
విష్వాసుల్‍ ఏక్‍హుయిన్‍ ప్రార్థన కరను
యోహన్‍ పేతుర్. కావ్లీమతూ ఛుటీన్‍ ఇవ్నా అద్మీయే కనా ఆయిన్, ప్రధాన యాజకుల్‍బి, మోటా ఇవ్నేతి బోల్యాతే వాతె ఖారు ఇవ్నా మాలంకరాయు. ఇవ్నే హాఃజిన్, ఏక్ దిల్తి దేవ్నా అమ్‍ ప్రార్దన కర్యు మహా ప్రభువు తూ ఆకాష్‍నా, జమీన్‍నా ధర్యావ్‍నా ఇనుమనూ హాఃరవ్నా కర్యోతేబి తూస్‍.
తూ పవిత్రాత్మతి హామారొ భా హూయోతే తారో సేవకుడ్‍ హూయోతే దావీద్‍నా హాతె బోల్యొ. యూదుల్‍ ఖాయేతే ఇవ్నే సాన చీకురూకురాస్‍? ప్రజల్‍ ష్యాన కామే ఆవకోయిన్తే హూఃజ్‍ కరూకరాస్‍?
ప్రభునాఫర్‍, క్రీస్తునాఫర్‍, ఆమేహాఃమే ధర్తిను రాజుల్‍ ఉట్యూ, అధికారుల్‍ ఖారు ఏక్ హూయిన్‍ కూడిగయూ.
హేరోద్‍బి పొంతి పిలాతు అన్యుల్‍తి ఇష్రాయేల్‍ ప్రజల్‍తి ఆ హాఃయార్‍మా హాఃచిస్‍ మా జామహుయు. తూ అభిషెంచ్యోతె తారు పరిసుద్ధ సేవకుడ్‍ యేసుతి దావోతి కేవు జరగ్‍నూ కరి తారు హాత్‍బి తారు సంకల్పం అగడీ నిర్ణయించ్యాకీ. యో ఖారు కరనటేకె ఇవ్నే జామహుయు. ప్రభు ఆ వోహఃత్‍మా ఇవ్ను ధమ్‍కావ్నీ దేఖీన్‍, తారు దాసుల్‍ ఘను హీమ్మత్‍తి తారు వాక్యం బోధించనా తాఖాత్‍ ధా. రోగ్‍వాళాన అసేల్‍ కరానబి, తారు పరిసుద్ధ సేవకుడ్‍ హూయోతే యేసునూ నామ్తి సూచకక్రియాల్‍బి, గోప్పకార్యాల్‍ కరానబి తారు హాత్‍ లంబో కరిరాక్యోస్‍,
తెదె ఇవ్నే ప్రార్థన కరుస్‍కరా ఇవ్నే భేఠాతే జోగో హాలీన్‍ రైగు తెదె ఇవ్నే ఖారు పవిత్రాత్మతి భరావమా, దేవ్ను వాక్యం ఘణు హీమ్మత్‍తి బోధించ్యా.
విష్వాసుల్ను దవ్లత్నా భాగ్‍ పాడను
విష్వాసించుతే ఖారు జణు ఏక్కాస్‍ దీల్తి, ఏక్ ఆత్మతి ర్హయా. కోన్బి ఇవ్నా కనా ఛాతే కేవుబి మారు కరి కోసోఛానీతీమ్‍ హాఃరు జణు మలీన్‍ పంచిలేతా థా. ఏత్రేస్‍ కాహేతిమ్‍ అపొస్తుల్‍ థాకత్‍ ప్రభు హూయోతే యేసు జీవిన్ ఉఠ్యెతే బారేమా సాక్చ్యం బోలానికిల్యా. ఇవ్నా హాఃరవ్‍ఫర్‍ దేవ్ను ఆషీర్వాద్‍ ఘణుస్‍ ఆయూ. ఇనటేకె ఇవ్నమా కినాబి కాయిబి కమ్‍ర్హయు కోయిని. జమీన్‍వో, ఘర్‍వో ర్హవ్వాలుహో హాఃరు ఏచీన్‍, యో రఫ్యా లాయిన్‍ అపొస్తుల్నా ఇవ్నే హారేక్నా ఇవ్ను ఇవ్నూ అవసరమ్‍ రవ్వాయెత్రు బాగ్‍ పాడీ దేతూర్హయూ.
కుప్రమా పైధాహూయోతె లేవియుణ్నూ యోసేపు కరి ఏక్ థో. అపొస్తుల్‍ ఇనా బర్నబా కతో కరవ్వాను నామ్ను అర్ధమ్‍. యో జమీన్‍వాళొ హూయిరైన్‍ ఇనా ఏచిన్‍ ఇను రఫ్యాలాయిన్‍ అపొస్తుల్‍నూ దిదొ.
పవిత్ర్ బైబిల్‍. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.