పవిత్ర్ బైబిల్‍
అపొ 3
ఏక్ లంగ్డనాబి గరీబ్‍ అద్మినా అష్యల్ కరను
ఏక్ ధన్నే పేతురుబి, యోహాన్‍ ప్రార్దన కరానూ వహఃత్‍ దొప్పారే తీన్‍ భజేనా ప్రార్థన కరానటేకె దేవాలయంనా జౌంగ్రతొ, ఫైదాహుయు మొదుల్తూ నికీన్‍ లంగ్డుహూయిరూతే ఏక్ అద్మినా థోడు జణు హర్‍ రోజ్‍ ఢోహిలీన్‍ కుప్సురత్‍ కరి దేవాలయ్‍నూ ధర్వాజు కనా బేహాఃఢస్‍, ఎజ్గా యో దేవాలయ్‍మా జవవాళవ్‍కనా భిక్‍ మాంగ్తుథూ. తెదె ఆ లంగ్డు యో పేతురుబి, యోహాన్‍ దేవాలయంమా జవానూ దేఖీన్‍ భిక్‍ మాంగమా యో వాట్‍ ఖుబ్సూరాత్‍ తూ, పేతురుబి, యెహాన్‍ ఇనా అసేల్‍తి దేఖీన్‍, పేతురు యో లంగ్డతి, “హామార మణీ ఇమ్మాస్‍ దేఖ్‍” కరి బోల్యొ. యో ఇవ్నే కంతూ ష్యాత్‍బి మళ్‍స్యే కరి ఇవ్నా మణీ దేఖ్యో. ఎత్రమా పేతురు రూపు ఘేణు “హామార కనా ఘేణు రూపుకోయిని పన్కి హామార కనా ఛాతేస్‍ తున దేంక్రూస్‍, నజరేయుడ్‍నో క్రీస్తును నామ్తీ ఛాల్‍” కరి గాచ్చిన్‍ బోల్యో, ఇను ఖావాత్‍ ధరీన్‍ ఉఠ్టాడ్యో. ఎగ్గిస్‍మా ఇను గోఢానూ ఆంగ్లీయే తోడీ తాఖాత్‍ ఆయి. యో లట్‍కరీన్‍వుటీన్‍ భీరీన్‍ ఛాల్యో. ఛాల్తోహూయిన్‍, కుధ్‍తోహూయిన్‍, దేవ్నా స్తుతిస్తోహూయిన్‍ ఇవ్నేతి దేవాలయంమా గయో. యో ఛాల్తోహూయిన్‍ దేవ్నా స్తుతింఛనూ ప్రజల్‍ ఖారు దేఖీన్‍, ఖుప్సురాతె దేవాలయ్‍నూ ధర్వాజుకనా భిక్‍ మాంగ్తుథూతే ఆస్‍ కరి హఃణద్‍ ధరీన్‍, ఇనా జర్‍గ్యుతే హాఃరు దేఖిన్‍ ఇవ్నే గబ్రాయిన్‍ హాషం హూయు.
దేవాలయంమా పేతురును బోధ
యో పేతురు, యెహాన్‍నా సేడే లగ్గీర్హవనూ అద్మీయే ఖారు హాషంహూయిన్‍, సోలొమోన్‍నూ మండపంమా కనా ఛాతే ఇవ్నా కనా మీలవ్తుహుయిన్‍ ఆయు. పేతురు యో ఖారు దేఖిన్‍ ప్రజల్‍తి అమ్‍ బోల్యొ ఇష్రాయేల్‍నూ ప్రజల్‍ తుమే ఆనా గూరించి ష్యాన హాషం హూంక్రస్‍? హామారు ఖుద్ను థాకత్‍, భక్తీనాబి ఛలావనా తాఖత్‍ దిదాతిమ్‍ తుమే ష్యాన హామార మణీ ఇమాస్‍ దేకుకరాస్‍? అబ్రాహామ్ను, ఇస్సాక్‍, యాకోబు కరి ఇవ్నూ దేవ్‍, కతో అప్నో పితరుల్‍నూ దేవ్‍ ఇను సేవ కరవళో యేసునా మహిమ పరిఛిరాక్యోస్‍, పన్కి తుమే ఇనా అధికారుల్నా ధరైయా, పిలాతు ఇనా ఛోడ్నాఖనాఖాజె నిర్ణయించ్యోతేదె తుమే ఇనఖామే ఇనా నోకో కరి బోల్యా. తుమే పవిత్రుడ్‍, నీతిమంతుడ్‍ హూయోతే ఇనా నోకో మేంద్‍ కరి బోలిన్‍, ఇనబదుల్‍ ఏక్ హంత్‍కుణ్‍నా మేందో కరి తుమే కోర్యా. తుమే జీవాధిపతినా మర్రాక్య పన్కి, దేవ్‍ ఇనా మరణ్‍మతూ జీవాఢ్యో ఇనా హమేస్‍ సాక్చుల్‍. హమ్నా యేసును నామ్‍మా విష్వసం ఛా ఇనటేకెస్‍, తుమ్నా మాలంహూయోతే ఆనా దేకుకరాతే ఆనా అసేల్‍ హూయు. యేసును నామ్‍, ఆనా హూయుతే విష్వాసంమస్‍ ఆనా పూర్తి స్వస్థత హూయు.
భైయ్యే తుమేబి తుమారు అధికారుల్‍ ఇనా మాలంకోయింతే కర్యా కరి మన మాలం. హూయితోబి దేవ్‍ ఇనో క్రీస్తు ష్రమ పఢ్‍స్యే కరి ప్రవక్తల్‍ హాఃరేతి దేవ్‍ బోలాయోతే యో వాతె అమ్‍ నేరవేర్చో. తుమే తుమారు పాప్‍ ఓపిలిన్‍ దేవ్నా బణే పార్యాతో తుమారు పాప్‍ క్చమించాబడ్సే. ఇంకర్యతో తుమ్నా ప్రభువు సముఖంమాతు అగాడిస్‍ ఆత్మయను తాఖాత్‍ పోందస్సు. హాఃరవ్నా తగీన్‍నూ ధన్‍ ఆవ్సెకరీ దేవ్‍ ములక్‍ను భోజొమాతు ఇను పరిసుద్ధ ప్రవక్తల్‍నాహాతె బోల్యొ, తెప్తోడి యేసు స్వర్గంమా ర్హవనూ హాఃఛి. మోషే అమ్‍ బోలిమోకిల్యో ప్రభువు హూయోతే దేవ్‍ మారున్‍ జోణ్‍నూ ఏక్ ప్రవక్తనా తూమారు భైయ్యేమతూ తూమారటేకె ఫైధాకర్షే; యో తూమారేతి ష్యాత్‍ బోల్యుతోబి తుమే ఇని వాత్‍ హాఃజ్ను. యో ప్రవక్తనూ వాత్‍ హాఃమ్‍జ్యా కోయింతే ఇవ్నా దేవ్ను ప్రజల్‍మతూ దూర్‍హుయిన్‍ నాషనం హూయిజాస్యే. బుజు సమువేలుతి ధరీన్‍, కేత్రు జణు ప్రవక్తల్‍ ప్రవచించ్యాకీ ఇవ్నే హాఃర ఆ ధన్‍నా గూర్చీ ప్రఛార్‍ కర్యా. యో ప్రవక్తల్‍నా, దేవ్‍ అబ్రాహామ్‍తి తారు పేట్నూ లఢ్‍క్వాతి జమీన్‍ ఫర్‍ ఛాతే హాఃరు ఖాంధాన్‍నా ఆషీర్వదించబడ్‍స్యే కరి బోలిన్‍, తూమారు పితరుల్‍తి కర్యాతే వాత్నా తుమే వారసుల్‍ ఛా. దేవ్‍ ఇనా సేవ కరవళోన ఎంచీలిన్‍, తుమారమా హార్యేక్‍నా ఇను ఖరాబ్‍మతూ ఫరావనాటేకె బుజు తుమ్నా ఆషీర్వదించనాటేకె ఇనా అగాఢీ తుమార కనా బోలీమోక్‍ల్యో కరి బోల్యొ.
పవిత్ర్ బైబిల్‍. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.