పవిత్ర్ బైబిల్‍
అపొ 23
పౌలు మహాసభనూ అద్మీయేనా ధేఖిన్ భైయ్యేవో, మే హాంకేతోడి కేవల్‍ ఏక్ అషల్ మన్‍తి దేవ్నా హాఃమే ఛాలుకర్తోతో కరి బోల్యొ. ఇనహాఃజే ప్రధానయాజక్‍ అననీయ ఇనా మోఢాఫర్‍ మారోల కరి ఇనా ఖందే బిర్యుతే యూవ్నా ఆజ్ఞాదిదో, పౌలు ఇనా దేఖీన్‍ చున్నో మార్యుతే భీత్‍, దేవ్‍ తూనా మార్సే; తూ ధర్మషస్త్రం ప్రకార్‍ పుచ్‍తాచ్‍ కరన బేసీన్‍, ధర్మషస్త్రంనా విరుద్దంథీ మన మారానా ఆజ్ఞా దీదోనా కరి బోల్యొ.
తెదె ఖందే బిర్యుతే ఇవ్నే తూ దేవ్నూ ప్రధానయాజక్‍నా దూషించజైనా
ఇనాహాఃజే పౌలు భైయే యో ప్రముఖ్‍ యాజక్‍ కరి మన మాలం కోయిని, తారు ప్రజల్నా అధికారినా నింద కరజైనా కరి లీఖైర్యూస్‍ కరి బోల్యొ.
యూవ్నామా ఏక్ భాగ్‍ సద్దూకయ్యుల్‍, బుజేక్‍ భాగ్‍ పరిసయ్యుల్‍ ఛాకరీ పౌలు ఏన్‍ కరీన్‍ భైయ్యేవో, మే పరిసయ్యుడ్‍నో ఖాంధాన్‍నో; అప్నా ఛాతే నిరీక్చణనా టేకెబి, బుజు మర్యాహుయా జీవానూటేకేబి మన పుచ్‍తాచ్‍ కరూకరాస్‍ కరి సభమా ఘట్‍ చీక్రీన్‍ బోల్యొ.
సద్దూకయ్యుల్‍ మర్యాహుయానూ జీవిన్ ఉటానూ కోయిని కరి, దేవ్నూ దూతబి, ఆత్మబి కోయిని కరి బోలస్‍ పన్కి, పరిసయ్యుల్‍ భేహేబి ఛా కరి ఒప్పిలేస్‍. తెదె ఏక్ మోటు లఢాయ్‍ హూయుగు; పరిసయ్యుల్‍నూ బాజుమా ఛాతే షాస్ర్తుల్‍మా థోడు జణు వుటీన్ ఆ అద్మీమా హమ్నా కాయిబి ఖొః దేఖాయు కోయిని; ఇనేతి ఏక్ ఆత్మస్‍కీ దేవ్నూ దూతాస్‍కీ వాత్‍ బోలుహూస్యేతో బోల్యుస్‍బి హూస్యే కరి లఢాయ్‍ కర్‍లిదు. ఇమ్‍ లఢాయ్‍ ఘణు హుయుగు తెదె ఇవ్నే పౌలునా ఛీర్‍నాక్‍స్యే షీకీ కరి సహస్రాధిపతి ఢరీజైన్‍ తుమే జైన్‍ ఇవ్నామతు ఇనా జబర్‍జస్తితి ధర్లీఆయిత్రవో సైనికుల్నా ఆజ్ఞాదిదో.
యో రాతే ప్రభువు ఇనా కనా హిభ్రిన్‍ హిమ్మత్‍థి ర్హా, యెరూషలేమ్‍మా మార గూర్చి కిమ్‍ బోల్యోకీ ఇమ్మస్‍ రోమ్‍మాబి సాక్చ్యం బొలానూ ఛా కరి బోల్యొ.
వ్హాణు హుయుతేదె యూదుల్‍ హఃరు మలిన్‍, అప్నె పౌలునా మర్రాఖతోడి ఖాణు పాణీబి లీస్యు కోయిని కరి హోఃగత్‍ లీదా.
పాల్ను జీందగీమా వ్యతిరేకంతీ మిన్హత్‍
ఆ కుట్రమా ఛాతే యూవ్నే భరోబర్‍ ఛాళీహ్‍ః థీబి గ్హణా థా. యూవ్నే ప్రముఖ్‍ యాజక్‍క నాబి, ష్యాణవ్‍ కనా ఆయిన్‍ హామే పౌలునా మారతోడీ హమే ష్యాత్‍బి ఛీమ్‍స్యు కోయిని కరి ఘట్‍ హోఃగత్‍ లీన్‍ ఛా. ఇనహఃజే తుమె మహాసభతి మలిన్‍, ఇనా గూర్చీ అజు గ్హణు మాలంకర్నూ కరీన్‍ ఇనా తూమార కనా లీన్‍ ఆవో కరి మనవి కర్యో; యో ఖందే ఆవనూ ఆగడీస్‍ ఇనా మర్రాఖనా సిద్దంగా ఛీయ్యే కరి బోల్యు. హుయుతో పౌల్‍ని జమై ఇవ్నే ఇనా మర్రాఖనా ఝఫీర్హతే వాత్‍ హఃమ్‍జీన్‍ కోఠడ్‍మా ఆయిన్‍ యో వాత్‍ పౌలునా బోల్యొ. ఇనహఃజే పౌల్ షతాధిపతిమా ఏక్నా బులైన్‍ ఆ ఛొగర్వనా సహస్రాధిపతికనా బులైలీన్‍జా; ఆ ఇనేతి ఏక్ వాత్‍ బొలానూ ఛాకరి బోల్యొ. షతాధిపతి ఇనా బులైలీన్‍ సహస్రాధిపతి కనా జైన్‍, ఖైది హూయోతే పౌల్ మన బులైన్‍, ఏక్ వాత్‍ బోల్నూ కరి ఛాతే ఆ న్హాన ఛోగర్వానా తార కనా బులైలీన్‍జా కరి మారేతి బోల్యొ. యో సహస్రాధిపతి ఇనూ హాత్‍ ధర్లీన్‍ ఫార్‍ బులైలీజైన్‍ తూ ష్యాత్‍ బోల్నూ కరి ఛాకీ యో వాత్‍ మారేతీ బోల్‍ కరి పుఛాయో. తెదె యో తూ పౌలునా హఃజే పూర్తిగా ఏన్‍ కరాహఃర్‍కూ ఇనా హూసీకరౌ మహాసభ కనా లీన్‍ ఆవ్నూ కరి తూనా గోజాఢనా టేకె యూదుల్‍ ఏక్ కట్టో భందైర్హస్‍. తూ యూవ్నీ వాత్‍నా ఒప్పిస్‍ నకో; యూవ్నామా ఛాళీహ్‍ః థీబి గ్హణుస్‍ అద్మీయే ఇనా హఃజే ఝపి ర్హాస్‍. ఇవ్నే ఇనా మర్రాఖతోడి యూవ్నే ఖాయిబి కోఖాస్యునికరి ఒట్టు లీరాక్యుస్‍; హాంకే తార కనా వాత్‍ లేనూ ఏదుర్‍ దేక్తాహుయిన్‍ సిద్దంగా ఛా కరీబోల్యొ. ఇనహఃజే సహస్రాధిపతి తూ ఆ వాత్‍ మన బోల్యొ కరి కినాబి నకో బోలిస్‍ కరి ఇనా ఆజ్ఞా దీన్‍ బోలి మొకల్‍ నాఖ్యో.
పౌల్ గవర్నర్ ఫెలిక్స్ కనా మొక్లతె
ఇనబాద్‍మా యో షతాధిపతిమా బేజణనా బులైన్‍, కైసరయనా జవానా ఇన్నూర్‍జణా1 సైనికుల్నా హాఃడ్‍తీనీహ్‍ః ఘోడావ్‍నా, ఇన్నూర్‍ జణా యీటెల యూవ్నా రాతే నౌ భజేనా సిద్దమ్‍ కరీన్‍,
పౌలునా ఛడైన్‍ అధిపతి హుయోతే ఫెలిక్సుకనా జత్తన్‍థీ లీజవాన టేకె ఘోడావ్‍నా సిద్దంకరో. బుజు అమ్మాస్‍ ఏక్ పత్రిక లిఖ్యో. మహా గౌరవంనో అధిపతి హుయోతే ఫేలిక్సునా క్లౌదియ లూసియ వందనాల్‍.
యూదుల్‍ ఇనా ధరీన్‍ మర్రాఖూ కరతో యో రోమీయుడ్‍ కరి మే హఃమ్‍జీన్‍ సైనికుల్‍థీ ఆయిన్‍ ఇనా చుకాయో. యూవ్నే ఇనాఫర్‍ నాఖ్యూతె నింద ష్యాత్‍కీ మాలంకర్నూ కరి మే యూవ్నా మహాసభమా ఇనా లీన్‍ ఆయో. యూవ్నే యూవ్నూ ధర్మషాస్ర్తంనా టేకెస్‍ ఇనాఫర్‍ నిందనాఖ్యా గానీ మరణ్‍ నాహో, బందీ హూవానా యో ఇనా తగీన్‍నూ క్హయూబి నేరం ఇనా హఃమే ఖొః దేఖాయుని. కానీ యూవ్నే ఆ అద్మీనాఫర్‍ కుట్ర కరజౌంగ్రస్‍ కరి మాలం హువామా, ఇనా యగ్గిస్‍ ఇనా తార కనా బోలిమొక్‍ల్యొ. నింద నాఖ్యూ హుయుతో ఇనాఫర్‍ బొలానూ వాతె తార హఃమేస్‍ బోలానా ఆజ్ఞా దిదో. ఇనహఃజే యో యూవ్నా ఆజ్ఞాదిదో తిమ్‍ సైనికుల్‍ పౌల్‍నా అంపత్రికనా లీన్‍ రాత్నూ గయూ.
బుజా ధన్నే యూవ్నే ఇనా కేడె రౌతుల్‍నా బోలిమొక్లీన్‍, యూవ్నే కోఠడ్‍మా ఫాచుపరీన్‍ ఆయూ. యూవ్నే కైసరయనా ఆయిన్‍ ఏజ్గాను అధిపతినా యో పత్రిక ఒప్పాయిన్‍, పౌలున్‍బి ఇన హఃమే భిరకాడ్యు. అధిపతి యో పత్రిక ఫడీన్‍ ఆ కేయో ఈలాఖోనూ అద్మికరి పుచ్ఛాయిన్‍ మాలంకర్లీన్‍, తారఫర్‍ నింద నాఖా వాళుబి ఆయుతేదె తారి సంగతీ ఏక్‍ధమ్‍ విచారించిస్‍ కరి బోలిన్‍, హేరోద్‍నూ హూఖంనూ మంధీర్‍మా ఇనా కావ్లీమా రాక్నూ కరి ఆజ్ఞాదిదూ.
Source notes (1)
- Footnote మూల భాషమా బే ఖోః అద్మియే
పవిత్ర్ బైబిల్‍. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.