పవిత్ర్ బైబిల్‍
అపొ 22
భైయ్యేహో, భాతి యూవ్నే, మే హాంకే బోలుకరుతే వాతేనా ధ్యాన్‍ దేవో. యో హెబ్రీ భాషామా వాతె బొలానూ ధేఖిన్‍, యూవ్నే అజు గ్హణు గఛ్చుప్‍ హూయుగు. తెదె యో ఆం బోలానిక్యో.
మే కిలికియమనూ తార్సుమా పైదాహూయోతే యూదయనో. కానీ ఆ హఃయార్‍మా గమలీయేల్‍నూ గోఢాకనా వధీన్‍, మారొ భానూ ధర్మషాస్ర్తంనూ నిష్ఠమా షిక్చితుడుహుయిన్‍, తుమె హఃరూ ఆజ్‍ ఛాతె ప్రకార్‍ దేవ్నా హఃజే ఎన్నిర్హాక్యోస్‍, ఆ వాటే ఛాతే మర్ధమానో, రాంఢేవ్‍నా బంధించీన్‍, ఠాణావ్‍మా ఘాలావ్‍తో హుయిన్‍, మరణ్నా ఇవ్నా హాఃతావ్‍తో థో. ఇనూ గూర్చీ ప్రధాన యాజకుడ్‍బి, ష్యాణా హాఃరాబి మన సాబుత్‍ హూయిరుస్‍. మే ఇవ్నా హాఃజే భైయ్యేవ్‍కనా పత్రికల్‍ లీన్‍, ధమస్కుమనూ ఇవ్నాబి బందీంచిన్‍ షిక్చించనా హాఃజే యెరూషలేమ్‍మా లీఆవ్‍నూ కరి ఏజ్గా గయోథో.
పౌల్‍ ఇనె బద్లతె బారెమా బోలను
మే నీకిన్ ధమస్కునా సేడె కరి గయోతేదె ధోఫర్నూ వోహాఃత్‍మా ఆబ్‍మథూ ఏక్ మోటు ఊజాళు మార ఆస్పీష్‍ భళానిక్ల్యు. తెదె మే మట్టిఫర్‍ పడీగయో, తెదె మన “సౌల్‍, సౌల్‍ మన ష్యాన తూ హాఃతాంక్రస్‍” కరి ఏక్ ఘళునూ ఆవాజ్‍నా మే హాఃమ్‍జ్యో. ఇనటేకె మే ప్రభు, తూ కోన్‍ కరి పుఛావమా యో “మే తూ హాఃతావ్‍ంగ్రతే నజరేయుడ్‍నో యేసు” కరి మరేతి బోల్యు. మార కేడె థూతే ఇవ్నా యో ఉజాళు యూవ్నా దేఖ్కాయు పన్కీ, మన హాఃమ్‍జాయుతే ఆవాజ్‍ ఇవ్నా హాఃమ్‍జ్యుని. తెదె ప్రభునా మే ష్యాత్‍ కరూ కరి పుఛవమా, ప్రభు తూ వూటిన్‍ ఆగడీ ధమస్కుమా జా; ఏజ్గా తూనా ష్యాత్‍ కరానూ ఛాకీ యో హాఃరు తూనా ఏజ్గా బోలావ్‍స్యే కరి మారేతి బోల్యొ. మన యో ఊజాళు దేకమా మే కాణో హుయిగో, మారకేడె ర్హవాళు మన ఛలైలిన్‍ ధమస్కుమా ఆయా.
యత్రమా ధర్మషాస్ర్తం ప్రకార్‍ ఛాలుకరాతే ఏక్ భక్తిపరుడ్‍ యూదుల్ అఖ్కాతి అచ్చు నామ్‍ కమైరాక్యోతే అననీయ కరి ఏక్ జణో మారకనా ఆయి హిబ్రీన్‍, సౌల్‍ భైయ్‍, ఢోలానూ నజార్‍ లా కరి బోలిన్‍, యో క్చణామస్‍మన నజార్‍ ఆయిన్‍, ఇనా మే దేక్యో. తెదె యో అప్ను పితరుల్‍నో దేవ్‍ ఇనూ చిత్తంనా మాలంకరానాబి, యో నీతిమంతుడ్‍నా దేఖానాబి, ఇనూ మ్హోఢానూ వాతె హాఃమ్‍జానా హాఃజే తున నియమించిరాక్యోస్‍; తూ దేక్యోతే యో, హాఃమ్‍జ్యోతె యో అద్మీయే అఖ్కావ్‍నా హాఃమే ఇనా సాబుత్‍ హుయిరైస్‍. ఇనహాఃజే తూ ష్యాన ఆలస్యం కరస్‍? వుటీన్ దేవ్నా ప్రార్ధన కరీన్‍, బాప్తీస్మమ్‍ లీన్‍ తారు పాప్‍నా ధోయ్‍లా కరి బోల్యొ.
పౌల్‍ యూదుల్ కాహేతే ఇవ్నా ప్రచార్‍కరనటేకె ఎంచబడ్యో
తెదె మే యెరూషలేమ్‍మా ఫరీన్‍ ఆయిన్‍, ఆలయంమా ప్రార్ధనా కరూకరుతో మన దర్షనం ఆయూ ప్రభునా దేక్యో. తేదె యో తూ యెరూషలేమ్‍నా మ్హేందీన్‍ యగ్గిస్‍ జా; మారా హఃజే తూ దీస్‍తే సాబుత్‍ ఇవ్నే ఒప్‍స్యే కోయిని కరి మారేతి బోల్యొ. ఇనటేకె ప్రభు, మే హార్యేక్ సభ జోగొమా తూనా విష్వాసించ్యుతే యూవ్నా ఠాణావ్‍మా ఘలైన్‍ మార్తోహుయిన్‍ ర్హయోతే ఇవ్నా అసేల్తీ మాలం కరి జవాబ్‍ దిదో. బుజు తారు సాక్చి హుయిరహూయుతే స్తెఫన్‍న మర్యాక్యోతే తేదె మేబి ఇవ్నా ఖందే ఉబ్రీన్‍, ఇనా ఇమ్‍ కరన ఒప్పిన్‍, ఇనా మర్యూతే ఇవ్నా ఖూడ్తానా కవ్లీ ర్హయో కరి బోల్యొ. ఇనహాఃజే ప్రభువు తూ జా, దూర్‍ యూదుల్ కాహెతే ఇవ్నా కనా తూనా బోలీమొక్లీస్‍ కరి మారేతి బోల్యొ.
ఆ వాత్‍తోడి అష్యల్‍ హాఃమాస్తూ హుయిన్‍ ర్హయూ. యత్రమా ఆమ్నూ అద్మి జీవానూ అర్హత్‍ కోయిని, జమీన్‍ఫర్‍ నార్హనూతిమ్‍ ఇనా మార్రాక్ను కరి కైఖార్‍ మ్హేంద్యు. యూవ్నే కైఖార్‍ మ్హేమ్‍థూ హుయిన్‍ యూవ్నా ఫర్‍ లుంగఢా ఝటాక్‍థూ హుయిన్‍, ఆకాష్‍ మ్హణీ ధూళ్‍ పాడీన్‍ నాఖూకరాతో, అవ్నే అనాఫర్‍ ఆత్రే కైఖార్‍ మ్హేంధాను కారణ్‍ ష్యాత్‍ కరి మాలంకరాన హాఃజే, రోమ అధికారి ఇనా కోల్డాతీ మారీన్‍, అనా పుచ్‍తాచ్‍ కర్నూ కరీన్‍ జాయిన్‍, కోఠడోమా లీజవో కరి ఆజ్ఞాదిదో. హుయుతో తెదె ఇవ్నే పౌలునా సీంద్రావ్‍తీ భాందుకరాతో యో ఇనా ఖందే హీబ్రూతే అధికారినా దేఖీన్‍, షిక్చ నాఖ్యాకో యింతేస్‍ ఏక్ రోమీయుడ్‍నా కోల్డావ్‍తి మారనా తుమ్నా అధికార్‍ ఛానా? కరి పుఛ్చాయో.
అధికారి యో వాత్‍ హాఃమ్‍జీన్‍ రోమఅధికారి కనా ఆయిన్‍తూ ష్యాత్‍ కరుకురాస్‍? ఆ అద్మి రోమీడ్‍నో లా కరి బోల్యొ.
తెదె రోమధికారి పౌల్‍ కనా ఆయిన్‍, ఇనా దేఖిన్‍ తూ రోమీయుడ్‍నా? యో మారేతి బోల్‍కరి బోలమా, యో వోహో కరి బోల్యొ
రోమ అధికారి మే కెత్రాకీ రఫ్యా దీన్‍, యో రోమీయుడ్‍నూ నామ్‍ కమాయో; తెదె పౌలు హమరితి యో ఫైధావహ్‍ఃతూస్‍ రోమియుడ్‍ కరి బోల్యొ.
ఇనహఃజే ఇనా పుచ్‍తాచ్‍ కర్నూ కరి దేఖ్యూతే యూవ్నే ఇనా యగ్గీస్‍ మ్హేంధిదూ. బుజు యో రోమీయుడ్‍ కరి మాలంహుయు తెదె యో ఇనా బంధీంచ్యుతే ఇనాటేకె రోమ అధికారి ఢరీగో.
మహాసభనా హాఃమే పౌల్‍
బుజాధన్నే, యూదుల్ ఇనాఫర్‍ నాఖ్యూతే నింద ష్యానూకి మాలంకర్నూ కరి రోమ అధికారి ఇనా మ్హేంధిన్‍, ప్రధానయాజకుల్‍నా, మహా సభమనూ హఃరుబి మళిన్ ఏక్ జోగో ఆవ్నూ కరి ఆజ్ఞాదీన్‍, పౌలునా లీన్‍ ఆయిన్‍ ఇనా హఃమే భిరాకాడ్యు.
పవిత్ర్ బైబిల్‍. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.