పవిత్ర్ బైబిల్‍
అపొ 24
పౌల్‍ ఫర్‍ నింద నాఖను
తెదె యూవ్నే ఫాచ్ ధన్నా బాద్మా ప్రముఖ్‍ యాజక్‍ హూయిరోతే అననీయబి, థోడుజణు ష్యాణాబి, తెర్తుల్లు కరి న్యాయం బోలావళో కైసరయనా ఆయిన్‍, పౌలుఫర్‍ ల్యాయుతే ఫీరాద్‍నా అధిపతినా మాలం కరాయా. పౌలు బులైమంగైన్‍ తెర్తుల్లు ఇనాఫర్‍ నేరం నాఖానూ సురు కరీన్‍ ఆం బోలానిక్ల్యా. మహా గౌరవంనో ఫేలిక్సా, హామే తారేతి కేత్రెకి షాంత్‍నా ఆలోచన కరూ కరీయేస్‍, బుజు ఆ దేహ్‍ఃనూ అద్మీయేనూ కీడ్‍ తారు విమర్షథీ దిద్దావం కరాస్‍ కరి ఒప్పిలిన్‍, హామే కేత్రూకూ రకం నూబి, జోగోవ్‍మాబి పూర్ణ కృతజ్ఞతథీ ఒప్పు కరీయేస్‍. మే తూనా ఛండాల్‍ నా ఛడావ్నూ తిమ్‍ హామే ధర్రాస్యు కరీన్‍ బీలియేతె ఇనా తూ ఆగడీంతర సాంత్‍థీ హఃమ్‍జ్నూ కరి వేడుకరుస్‍. ఆ అద్మి ఖారబ్‍జోణ్నూ, ఆ ములాక్‍మా ఛాతే యూదుల్‍ హఃరవ్‍నా లఢాయేనా హూషీ కరావవాళో, నజరేత్‍మా మతంనూ లఢాయేన్ కరిన్ నాయకుడ్‍ హుయిరోస్‍ కరి హామే హఃమ్‍జ్యా. బుజు ఆ దేవాలయంనా అపవిత్ర కరానా కోషీష్‍ కర్యో ఇనాహఃజే హామే ఆనా ధర్‍లీధా.1 తూ అనా విమర్షించ్యా తో హామే ఆనాఫర్‍ నాఖ్యాతే ఇంజామ్ హాఃరూబి తూనాస్‍ మాలంహూస్యే. యూదుల్‍ హాఃరూ ఏక్ హూయిన్‍ ఆ వాతె హఃరు హాఃఛీస్‍ కరి బోల్యా.
పౌల్‍ ఫెలిక్స్ అగాఢి వాత్‍ బోలను
తెదె అధిపతి పౌలునా ష్యాత్‍బి బోల్‍ని కరి సైగ్‍ కరమా, యో అమ్‍ బోల్యొ, తూ గ్హణా వరహ్‍ఃథూ ధరీన్‍ ఆ అద్మియేవ్‍నా నెయ్యో హుయిరోస్‍ కరి మాలంకరీన్‍, మే హిమ్మాత్‍తీ బోలుకరూస్‍. యెరూషలేమ్‍మా ఆరాధించనా గయోతే ధన్‍ థూ ధరీన్‍ ఖాలి భార రోజాస్‍ హూయా కరీన్‍ తూ విచారించిన్‍ మాలం కరాజై. దేవాలయ్‍మాహో, సభ జోగొమాహో, హాఃయార్‍ మాహో, బుజు మే కినేతిబి వాదనల్‍ కరానుహో, అద్మీయేనా భరైన్‍ భేహఃడానూ హో ఇవ్నే దేఖ్యాకోయిని. బుజు ఇవ్నే హంకే మారఫర్‍ నాఖ్యాతే ఇంజామ్‍నా తరా కనా రుజువుకర్సే కోయిని. ధర్మషాస్త్రమాబి, ప్రవక్తల్‍నూ గ్రంధాల్‍మా లిఖైరూతే హాఃరూబి నమ్మిన్‍, ఇవ్నే మతభేదం కరి నామ్‍ మ్హేందూ ఆ వాట్‍ ప్రకార్‍ అప్ను పితరుల్నూ దేవ్నా సేవించుకరుస్‍ కరి తూమార హఃమే ఒప్పి లేంగ్రూస్‍. అంనితరస్‍ నీతిమంతుడ్‍ వాళానాబి, అవినీతి వాళానాబి పునరుత్థాన్‍ హూస్యే కరి ఆవ్నే నిరీక్చించు కరాతిం మేబి దేవ్‍కనా నిరిక్చించిన్‍, అంనితర మేబి దేవ్‍కనాబి, అద్మీయేకనాబి కేదెబి మారు మన్‍ నిర్దోషుతార రావానటేకె మే షీకిలేంగ్రూస్‍.
థోడు వరహ్‍ఃనా బాద్మా మే మారు స్వంత అద్మీయేనా దాన్‍ ధరమ్‍ కానుకల్‍ ధినఖనాటెకె ఆయోథో. మే సుద్ధి కర్‍లీన్‍ ఆం అప్పగించు కరుతో ఇవ్నే దేవాలయ్‍మా మన దేఖ్యు. మే గల్లో తార కర్యోకోయిని, మారేతి గలాఠా హుయుకోయిని. ఆసియాతూ ఆయూతే థోడు యూదుల్‍ థూ. మారఫర్‍ యూవ్నగాని ష్యాత్‍బి హూసేతో యూవ్నేస్‍ ఆయిన్‍ మారఫర్‍ ఇంజామ్ నాఖూకరాస్‍. నైతో, మే మహాసభనా హఃమే భిర్యోతే తెదె, మర్యుహూయు పునరుత్థాన్‍నూ గూర్చి ఆజ్‍ ఇవ్నా హాఃమే విమర్షించ బడుకరుస్‍ కరి, ఇవ్నా ఇఛ్మా భిరిన్‍ మే ఘట్‍ చిక్రీన్‍ బోల్యోతె ఆ విషయంనా టేకె తప్ప మారు అజు ఖయు ఇంజామ్ మాలంకర్యు హూస్యెతో ఆవ్నే తోబి బోలాజై.
తెదే ఫేలిక్సు ఆ వాట్‍నా గూర్చి అసెల్తీ మాలం హుయిన్‍ రోమ అధికారి లూసియ ఆయోతెదె తూమారు సంగతి మే ఏన్‍ కరీన్‍ మాలంకరీస్‍ కరి బోలిన్‍ విమర్షనా భిరకాడు నాఖ్యు. బుజు ఇనా కావ్లీమా ఏకేలనా రాఖీన్‍, ఇనా సేవ కరన ఇనూ అద్మీయేనా ఆడే నకో బోలొ కరి అధికారి హూకం దిదో.
పౌల్‍ ఫేలిక్సు అజు ద్రుసిల్లా హాఃమే లీన్‍ జావాను
థోడుధన్నా బాద్మా ఫేలిక్సు యూదుల్నిహుయీతె ద్రుసిల్లా కరి ఇని బావణ్‍తి ఆయిన్‍ పౌలునా బులైమంగైన్‍ క్రీస్తుయేసునూ విష్వాసంనా హాఃజే యో బోదించమా హాఃమాస్తా ర్హయా. తెదె యో న్యాయంనా గూర్చిన్‍బి ఆషా నిగ్రహ్‍నూ గూర్చీన్‍బి బుజు ఆవాజాసేతె న్యాయ ధన్నా హాఃజేబి బోదించు కరాతో ఫేలిక్సు ఢరీన్‍ అత్రు బైస్‍ అజు జా; మన వహాఃత్‍రైతో తునా బులైమంగైస్‍ కరి బోల్యొ. ఇనబాద్‍మా పౌలుతి ఇనా ధన్‍ మళ్‍స్యే కరి ఆఖ్ కరీన్‍ ఇనా గణితర బులైన్‍ ఇనేతి సంభాషణ్‍ కర్తోర్హయో.
బే వరహ్‍ఃనా బాద్మా ఫేలిక్సునా బదుల్‍ పోర్కిబి ఫేస్తు ఆయు. తెదె ఫేలిక్సు యూదుల్‍నా హాతె అచ్చో అద్మి కరి బోలైలేను కరి ఆహ్‍ః కరీన్‍ పౌలునా బంధకంస్‍ మ్హేంధిన్‍ గయో.
Source notes (1)
- Footnote హామే ఇనా నియమ షాస్ర్తం ప్రకారమ న్యావ్‍ కరను దేక్యా పన్కి లుసి కరి రోమ అధాకరి హామ్నా ఢారయిన్ ఇనా లిన్‍ అయో ఇనా ఫార్ కేవుబి తప్పు ర్హాయుతో తార ఖామే ర్హాక్ను కరి హమ్నా గుర్‍ఖాయో
పవిత్ర్ బైబిల్‍. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.