Vagiri Vathe Bible
లూకా 21
విధవరాల్‍ నాఖితె కాణుకుల్‍
(మార్కు 12:41,44)
కాణీకి నాఖనూ పెట్టిమా దౌవ్లత్‍వాళు కాణుకల్‍ నాఖూకరతే యూవ్నా యేసు ఏన్‍ కరీన్‍ దేక్యొ.
ఏక్‍ గరీబ్‍ విధవరాల్‍ బే న్హాను ఫైసాను ఇనమా నాఖానూ ధేఖిన్‍, ఆ గరీబ్‍ విధవరాల్‍ ఖారవ్తీబి ఘణు నాఖికరి తుమారేతి హాఃఛి బోలుకరూస్‍. ఇవ్నే హాఃరు ఇవ్నకనా ఛాతే కేత్రుకీ ధౌలత్‍మా థోడు నాక్యు పన్కి, ఆ విధవరాల్‍ ఇనూ గరీబ్‍మాబి ఇనకనా ఛాతే ఇనూ జీవ్నూ ఖారుస్‍ నాకీ దిదీ కరి బోల్యొ.
ఒలీవ ఫాడ్ను ప్రసంగం
(మార్కు 13)
థోడుజణు కేత్రుకి సుందర్ను ఫత్రావ్‍హూః, బుజు ఇవ్నే దిదుతే కానుకల్‍తీ బంధాయ్‍రూతే ఆలయంనా దేఖిన్‍ వాతే బోలుకరమా, యేసు యువ్నేతి, ఆ ఫత్రాతీ బంధాయ్‍రూతే ఇనా తూమే దేఖుకరస్‍నీ, ఇనమా ఫత్రాఫర్‍ ఫత్రా వుభర్సేకోయిని తీమ్‍ పడిజాస్యేతే ధన్ ఆంక్రస్‍ కరి బోల్యొ.
మిన్హత్‍బి హింసల్‍
తేదె యూవ్నే హాఃరు బోధకుడ్‍ ఆ హాఃరు కెదే హూస్యే హాఃరు హువానటెకే కేహూ సుచాన వాతలిస్‍, కరి పుఛ్చావమా.
తూమే మోసం నా హూణుతీమ్‍ దేఖీలేవో! కెత్రూకి జణు ఆయిన్‍ యో క్రీస్తు మేస్‍ కరి, ధన్ కందే ఆయిత్రు కరి బోల్‍స్యే, యూవ్నాకేడె నోకోజాస్యు. తూమే యుధ్దాల్‍ని వాతే, కలహాల్ని వాతే ఖంజ్యా తేదె తూమే ఢరోనకో; ఆ అగడీ జరగ్‍నూస్‍, కాని అంతం యగ్గీస్‍ ఆవ్‍స్యే కోయిని కరి బోల్యొ.
బుజు దేఖ్ ఫర్‍ దేఖ్, రాజ్యం ఫర్‍ రాజ్యం వుట్‍స్యే కరి బోల్యొ. ఎజ్గ ఎజ్గా మోటు భుకంపాల్‍ హూస్యే, తెగుల్‍, ఖాళ్‍ దూకళ్‍ ఆవ్‍స్యే, కేత్రేకీ ఘాణు ఢరవనూ సూచనల్‍ వాజ్లామతూ ఫైదాహూసే. ఆ ఖారు హూవనా ఆగఢీ, తూమ్నా ఇవ్నే జబర్‍ జస్తీతీ ధరీన్‍హీంసింసే, మార నామ్తీ రాజవ్‍నూ ఖామే, అధిపతుల్‍నూ ఖామే లీన్‍ జైన్‍ సమాజ మందిరంమా ఠాణవ్‍మ ధరైన్‍ తూమ్నా ఖాతవ్‍స్యే. ఆ ఖారు సాబుత్‍నితర తూమ్నా దేఖౌస్యే. ఇనటేకె తూమే ష్యాత్‍ బోల్‍నూ కరి ఆగఢీస్‍ సోఛీలేవో నకో కరి దీల్‍మా రైజవో.
తూమారు వైరేవ్‍ ఖార పాఛుఫారాయిన్ వాతే పేఢానటేకె, తూమారు వాతేనా కాహే కరి బోలానాబీ యూవ్నా కోహూస్యేని. ఇమ్ను వాతేనూ ఆఖ్కాల్‍ తూమ్నా దీష్‍ కరి బోల్యొ. ఆయా భా న హతేఖు, భైయ్యే భందుల్‍హాతే దోస్తుల్‍నా హతేఖు, తూమే సాత్రువునా ధరౌస్యే; తూమరమా థోఢ అద్మీయే మరైనాక్‍స్యే. మారు నామ్‍మాతి అద్మీయే తూమ్నా ద్వేషింసే. పన్కితూమార ముఢ్‍క్యామనూ ఏక్‍ కేఖ్‍ఃబి హల్‍స్యే కోయిని కరి బోల్యొ.
తూమారు ఓర్పుతీస్‍ తుమారు జాన్నా భచయ్‍లీలేవో.
యెరూషలేమ్ను నాస్నంను బారెమా
యెరూషలేమ్‍నూ ఆష్పీస్‍ సైనికుల్‍ కోంఢ్లేవనూ దేఖ్యతో తేదె ఇనూ నాషనం హూవనూ కందే ఆయిరూస్‍ కరి మాలంకర్‍లేవో. తేదె యూదయమా రవ్హాళు ప్హాహఢేవ్‍మా మీలైలెనూ; ఇనా ఇఛ్మా రవ్హాళు భాధర్‍ మీలైలేనూ; గామేవ్‍మా రవ్హాళు యెరూషలేమ్‍మా నా ఆవ్‍నూ. వాక్యంమా లిఖైర్యూతే ఖారు ఖాచ్ఛీ హూస్యేతే షిక్చనూ ధన్. యో ధనూవ్‍మా భేజీనీ బాయిక్వానాబి ఛేరవళి బాయిక్వాన కేత్రేకీ ష్రమ, బుజు జమీన్‍ ఫర్‍ ఘణు ముసిభత్‍బి, ఆ అద్మీయేఫర్‍ ఇనుఛంఢాల్‍ ఆవ్‍స్యే. యూవ్నే తల్‍వార్‍తిస్‍ పడీజాస్యే. ఠాణవ్‍మా ధరైన్‍ అన్యుల్‍నా ఖామే జాస్యు; అన్యుల్‍నూ ధన్ ఖాతంహూవతోఢీ యెరూషలేమ్‍ అన్యుల్‍ నా హాతే ఖూంధలావ్‍స్యే.
అద్మినా ఛియ్యో ఆవను
బుజు సూర్య ఛంధర్‍మా, షుక్కర్‍మా సూచనల్‍ దేఖౌస్యే, ధర్యావ్‍ను జూఖాళోను ఆవాజ్‍తి ధర్తీక్హారు ఢరవాళనా ష్రమ అవ్‍స్యే. ఆకాష్‍మాను షక్తిహాఃరూ హల్జాసె, ఇనటేకె ములక్‍ ఫర్‍ ఆవ్సెతే లఫట్‍నా దేఖీన్‍ ఢరిజేన్‍ అద్మీయే హాఃరు గభ్రాయిజైన్‍ పఢీజాస్యే. తెదె అద్మినొ ఛియ్యో ప్రభావంతీ కేత్రేకీ తేజాస్సుతీ మబ్బుమతు ఆవ్‍స్యేతే తుమే దేఖ్సూ. ఆ ఖారు జరగనూ సురుహూయు తేదె తూమే ధైర్యం లాయిలీన్‍వు బ్హీర్హాయిన్‍ తూమారు ముఢ్‍క్వా ఉఫర్‍ పళ్ళేవో. తూమారు రక్చణ కందే ఆయిరూస్‍ కరి బోల్యొ.
ఖజ్జూర్ను జాఢను పాటమ్‍
(మార్కు 13:28,29)
బుజు యో యూవ్నేతి ఆ ఉపమానంనా బోల్యొ. అంజురంనూ జాఢూబి, అజు ఖార జాఢనబి దేఖ్యో. యో జాఢవ్‍నూ ఇగ్గూర్‍ పుటీర్యూతో తడ్కను ధన్ ఆయు కరి తూమే మాలంకర్లేస్‍ కాహేనా. ఇమ్మస్‍ తూమే ఆ ఖారు జర్యుగు తేదె దేవ్‍నూ రాజ్యంబి కందే ఆయిరూస్‍ కరి మాలంకర్‍లేవొ.
యో హాఃరు హువతోడి ఆ ఫిడి అద్మీయే మట్‍స్యే కోయిని కరి ఖఛ్చితంగా బోలుకరుస్‍. ఆకాషబీ జమీన్‍ మటీజాస్యే పణికీ మారీ వాతే కేదేబి మట్‍స్యేకోయిని కరి బోల్యో.
ప్రభు ఆవను బారెమా ఇంతజార్‍ దేహాఃను
(మత్త 24:34-51; మార్కు 13:30-37)
తూమారు దిల్‍ ఏక్‍ వోఖాత్‍ ఖావన్‍ ఫీవన్‍నూ మత్తుతీ, ఆములక్‍నూ టేకే పస్తావ్‍తా ర్హయ్యాతో, యో ధన్ క్హాఢల్‍ కరి తూమార ఉఫర్‍ నా ఆవ్‍నూతీమ్‍ తూమే జత్తన్‍ హూయిజవొ. యో ధన్ జమీన్‍ ఫర్‍ రవ్హళ ఖారవ్నాఫర్‍ ఖాఢల్‍ కరి ఆవ్‍స్యే. ఇనటేకె తూమే జరగజస్యేతే ఆ ఖారవ్‍మతూ ఛుకైలీన్‍, అద్మీనొ ఛియ్యోనా హాఃమె ఉభ్రనా థాకత్‍వాళా హూవనటేకె కెధేబి ప్రార్ధన కర్తహూయిన్‍ హోషార్‍తీ ర్హవో.
యో హర్‍ ధన్ ధన్నూ ఆలయంమా వాతే బోల్తొహూయిన్‍, రాత్‍నూ ఓలివనూ ఫాహాఢ్‍నా కనా జాతోర్హయ్యో. వ్హానే హఃత్రే అద్మీయే హాఃరు ఇనూ వాతే హఃమ్జనటేకె దేవాలయంమా ఇనకనా ఆవ్తా ర్హయ్యా.
Vagiri Vathe Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.