Vagiri Vathe Bible
ఆది 8
వరదల్ కమ్ హువ్వను.
దేవ్‍ నోవహునా, ఇనాకెడే ఝాజ్‍మా ఛాతే హార్యేక్ జీన్‍వార్నా, దంఢా హాఃరన హాఃయల్‍ కర్లిదో. దేవ్‍ జమీన్ పర్‍ వ్యారో ఆవ్వన్‍తార కరమా పాణి కంహువను హుయు. జాహాఃత్ పాణి ఊటల్ ఆకాష్‍ను కిటికిల్‍నా మూఛ్చయుగు. ఆకాష్‍మాతు పడుకురతే జాహాఃత్ పాణి ఉబ్రిగు. తెదే పాణి జమీన్ ఫర్తూ డిలేడిలే కంహువ్వను హుయు. ఢోడ్ హోః ధన్యే బాద్మా పాణి కంహుయు. హాఃత్మాను నో హాఃత్‍రమాను ధన్ అరారాత్‍ను ఫ్హాడ్ ఫర్‍ ఝాజ్‍ ఉబ్రుగు. ధహ్‍ః మైహినొ తోడి పాణి డిలే కంవుతు ఆయు. ధహ్‍ఃమను మైహినొ ఆగాడి ధన్నా ఫ్హాడ్‍బి కనారి దేఖాయు. ఛాల్‍ ఈహ్‍ః ధన్నా బద్మా నోవహు ఝాజ్‍ను కిటికి ఖాడిన్‍ ఏక్ కంగ్లానా బదార్‍ మేంద్యో. యో బాదర్‍ జాయిన్‍ జమీన్‍ఫర్‍ మాతు పాణి హుఃఖవతోడి అమ్‍ ఇమ్‍ పార్తు ర్హాయు. జమీన్‍ఫర్‍ పాణి కంహుయుకి కోయిని దేఖకనటేకె యో ఇనాకన తూతె ఏక్ పార్యావో బదార్‍ మేంద్యో. జమీన్ హాఃరు పాణి రవ్వమా యో ర్హావనటేకె జోగొ కోయిని అనటేకె యో ఝాజ్‍మా ఛాతే ఇనాకన ఫరిన్‍ ఆయు. యో హాత్‍ చీదు కరిన్ ఇన ఝాజ్‍ లీన్‍గయో. యో ఆజు హాఃత్‍ ధన్ ర్హాహిన్‍ యో పార్యావోన ఝాజ్‍ మాతు బదార్‍ మేంద్యో. హాఃజేనుటేపార్ యో ఇనాకన ఫరిన్‍ ఆయు. ఇను బాకమా తేదెస్‍ తోడ్యుతె ఒలీవను ఫాలో థూ. అనా బట్టిన్‍ పాణి జమీన్ ఫర్‍ హుఃకయుగు కరి నోవహు మాలం కర్యో. యో అజు హాఃత్‍ ధన్ ఉబ్రిన్‍ యో పార్యావో బదార్‍ మేంద్యో. యో ఇనా ఫరిన్‍ ఆయుకోయిని. ఛో హోః ఏక్మాను వరహ్ః ఆగాడిను మైహినో అగాడి ధన్నా పాణి జమీన్ ఫర్‍ మాతు హుఃకాయుగు. నోవహు ఝాజ్‍ను ధర్వాజ్‍ కడిన్‍ దేఖమా హుఃకాయుతే జమీన్ దేఖయు. బే మైహినా హాఃత్‍ ఉపార్‍ ఈహ్‍ః ధన్నా జమీన్ పొడితార హుయుగు. తేదె దేవ్‍ నోవహుతి, “తోబి, తారకెడే తారి బావణ్‍, తారు ఛీయ్యా, ఓవ్‍యే ఝాజ్‍ మాతు బాదర్‍ ఆవో. జీన్వార్‍ దండావ్నజమీన్‍ ఫర్‍ నాహాఃతే హార్యేక్ జాత్‍ కీడనా, హాఃరు ఆంగ్తాన్‍ ఛాతే హార్యేక్ జీన్వార్‍ తారకెడే ఛాతే హార్యేక్ జాన్వార్‍ తూ కేడెలిన్‍ ఆవ్‍. యో జామిన్‍ ఫర్‍ ఘాణు హుయిన్‍ జమీన్ ఫర్‍ భడాను” కరి బోల్యో అనటేకె నోవహు, ఇనాకెడే ఇనా ఛీయ్యా ఇని బావణ్‍, ఇను ఓవ్‍యే బదార్‍ ఆయా. హార్యేక్ జాన్వార్‍, నాహాఃతే హార్యేక్ కీడు, జమీన్ ఫర్‍ ఫరుకురాతే హాఃరు ఇనుఇను జాత్ను ప్రకార్‍ యో ఝాజ్‍ మాతు బదార్‍ ఆయు.
నోవహు బలిదేవ్వాను
తేదె నోవహు యెహోవాన పవిత్రహుయుతే దంఢావ్నా హాఃరు పవిత్రహుయుతే జాన్వార్‍ హాఃరు మాతు తోడు లీన్‍ బలిపీఠమ్ కన బలఖీన్ బలి దిదో. తెదే యెహోవా యో ఆష్యాల్‍ వాఖ్‍ ఖుంగిన్‍ “ఇవ్ను దిల్మా అడ్డానిపార్‍ థూ కరబ్‍ బణే థా. అజు కెదేబి అద్మియేను బట్టిన్‍ జమీన్‍నా ఖారబ్‍ కరిస్‍కోయిని. మే హాంకే కర్యోతిం జాన్‍ ఛాతే ఇనా అజు కెదేబి నాష్‍ కరిస్‍కొయిని. జమీన్ ర్హావతోడి గింజా గడ్డాతే వహాఃత్‍, వాడ్డను వహాఃత్‍, తాడ్‍కో, థండ్‍ను వహాఃత్‍, రాత్‍ ధన్ ర్హావకొయిన్‍తిం ర్హాసేకొయిని” కరి ఇను దిల్మా ర్హాహిగో.
Vagiri Vathe Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.