Vagiri Vathe Bible
ఆది 7
వరదల్
యెహోవా ఆ పిఢివాలమా తూస్‍ మార హాఃమె నీతిమంతుడ్‍ హుయీన్‍ ర్హావను దేఖ్యొతొ అనటేకె తూబి తారు ఘర్‍వాలబీ ఝాజ్‍మా జవో. పవిత్ర జాన్వార్‍మా హర్యేక్ జాత్ను పోతుల్‍ ఫర్‍హొః హాఃత్, టైండా హాఃత్‍బి, పవిత్ర్ కాహేతె జాన్వార్‍మా హార్యేక్ జాత్ను టైండా, పర్‍హొఃబీ బేబీ ఆకాష్ను జీన్వార్మా హార్యేక్ జాత్మా పర్‍హొః హాఃత్‍బీ టైండా హాఃత్, తూ జమీన్‍ పర్‍ ఛాతే అక్కుపర్ సంతతీనా జాన్తీ బచ్చాడతిమ్‍ తారకన రాఖిలిజొ; సానకాతో అజు హాఃత్ ధన్మా మే ఛాలీ ఈహ్ః రాత్‍ ధన్‍ జామిన్‍ పార్‍ పాణి వర్‍హాఃయిస్‍, మే కర్యేతె హాఃరు జీన్‍వార్‍ జామిన్‍పర్‍ ర్హావకోయిన్తిం కరిస్‍ కరి నోవహోతి బోల్యో. ఇనా యెహోవా బొల్యోతిం నోవహు హాఃరు కర్యో. యో వరదల్ జామిన్‍పర్‍ అయుతేదె నోనహునా ఛో హోః వర్హాక్‍వాలో. తేదె నోవహుబి ఇనాకెడే ఇనా ఛీయ్యా ఇని బావణ్‍ ఇను ఓవ్‍యే యో వరదల్ మాతు చుక్కావనటేకె యో ఝాజ్‍మా గయా. - దేవ్ నోవహున బొల్యోతిం పవిత్ర జాన్‍వార్న ఆపవిత్ర జాన్‍వార్న, జీన్‍వార్నబి జమీన్‍ పార్‍ గహ్‍ఃతె హాఃరమా, పార్‍హ్‍ః టైండా జోడుజోడుతార ఝాజ్‍మా ఛాతే నోవహు కన ఆయు. హాఃత్ ధన్‍హుయుతే బాద్మా యో వరదల్ జమీన్‍పార్‍ ఆయు. నోవహు హుంబర్‍ ఛో హోః వరహ్ః బే మ్హేయినా హాఃత్రామను ధన్‍ మోటు వరదల్ ఊటల్ హాఃరు యో ధన్సె చుట్యు, ఆకాష్ను తూముల్‍ చుట్యుగు. ఛాలిహ్‍ః ధన్యే ఛాలిహ్‍ః రాత్యే జమీన్‍ఫర్‍ ఘాను పాణి పడ్యు. యో ధనే నోవహుబి, ఇను ఛీయ్యా షేముబి హాముబి యాపెతుబి నోవహుగ్ను బావణ్‍ ఇవ్నాకేడె ఇని తీన్‍ ఓవ్‍యే యో ఝాజ్‍మా గయా. అవ్నేస్‍ కాహే; యోయో జాత్ను తారిక హార్యేక్ జాన్వార్‍బి, యోయో జాత్ను హార్యేక్ దంఢ్వాన, యోయో జాత్ను తారిక జమీన్‍ ఫర్ నహ్‍ఃతె హార్యేక్ కీడన, యోయో జాత్ను తారిక జీన్‍వార్‍, కెత్రుకి రకంను హార్యేక్ పిట్టలే మహి గయూ. జాన్ ఛాతె హాఃరు ఆంగ్తామా బేబే బేబే ఝాజ్‍మా ఛాతే నోవహు కన గయూ. గయూతె హాఃరుబి దేవ్ ఇనా బొల్యోతిం హాఃరు ఆంగ్తాన్‍మా ఫర్‍హోఃబి టైండాబి గయూ; తేదె యెహోవా ఝాజ్‍మా ఇనా ముచినాఖ్యో. యో వరదల్ ఛాలిఈహ్‍ః ధన్యే జమీన్‍ ఫర్ ర్హావకోయిన్తిం, పాణినా బడ్డహిన్‍ ఝాజ్‍నా తేలతిం కరిన్‍ యో జమీన్‍ఫర్‍తు ఉపార్‍ ఉట్యో. పాణి జామిన్‍ ఫర్ ఘాను వర్‍హాఃయో తేదె ఝాజ్‍నా పాణిపార్‍ చాల్యు. యో పాణి జమీన్‍ఫర్‍ ఘానుహుయిన్‍ ఆకాష్ను హాఃరు హేట్‍ ఛాతే ఉచు ఫ్హాడ్యే హాఃరు డుబిగు. పంద్రా మూరల్‍ ఉచు పాణి ఘాను హుయు అనటేకె ఫ్హాడ్యే డుబిగు. తేదె జీన్వార్‍హో దంఢాహో జాన్వార్‍హో జమీన్‍ ఫర్ నాహ్‍ఃతె కీడహో జమీన్‍ఫర్‍ జీంకోరతె హఃరు ఆంగ్తాన్‍హో హాఃరు ఆద్మియేహో మరిగా. హుఃక్కు జమీన్‍ ఫర్ ఛాతే హాఃరమా నాక్మా దమ్ ఛాతె హాఃరు మరిగు. ఆద్మియేతి ఛాతే దండా కీడా ఆకాష్ను జీన్వార్‍న జమీన్‍ఫర్‍ జాన్వార్‍ హాఃరు ర్హాసేకోయిని, యో జమీన్‍ ఫర్ ర్హావకొయిన్తిం, యో నోవహు ఇనాకేడె యో ఝాజ్‍మా ఛాతేస్ ర్హాహిగు. ఏక్ హోః అడ్డాయిక్‌ ధన్‍తోడి పాణి జమీన్‍ పార్‍ జాహాఃత్ పడ్తుర్హాయు.
Vagiri Vathe Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.