Vagiri Vathe Bible
ఆది 9
నోవహుతి దేవ్ను నిబంధన
దేవ్‍ నోవహున ఇనా ఛీయ్యాన ఆషీర్వాదించో. “తుమే భడీన్‍ జమీనా భరొ. ఝాడిను జాన్వార్‍ హాఃరనా ఆకాష్‍ను జీన్వార్‍ హాఃరనా జమీన్‍ఫర్‍ నాహాఃతే హార్యేక్ కీడనా ధర్యావ్‍ను మాస్లా హాఃరనా తుమ్నా లోబడ్సే, యో తుమ్నా దేకిన్‍ ఢార్‍సే. జాన్‍తి హలతే హార్యేక్ జీన్వార్‍ తుమ్నా హాఃణు హుసే. హార్యు ఝాడ్‍హా దిదోతిం హాంకే మే యోహాఃరు తుమ్నా దేంకురుస్. హుయుతో బోట్టిన ఇను ల్హోయితి తుమే నాఖాను, ల్హోయిస్ ఇను జాన్. అజు తుమ్నా జాన్ హుయితే తుమరు ల్హోయిను లెక్క పుచ్చాయిస్‍. ఇను గురించి హార్యేక్ జాన్వార్‍న హార్యేక్ అద్మి లెక్క పుచ్చాయిస్‍. హార్యేక్ అద్మి, కతో ఇను భైయినా మర్రాక్యుతే హార్యేక్ అద్మిన యో అద్మి జాను లెక్క పుచ్చాయిస్‍. దేవ్‍ ఇను రూప్‍మా అద్మినా కర్యో అనటేక్ అద్మి కోన్‍ మరకదేస్కి , ఇనాబి అద్మిస్‍ మరకిదిసే. తుమే భడ్డిన్‍ ర్హావో. తుమే జమీన్‍ ఫర్‍ ఘాను సంతాన్ జాణిన్‍ భడ్డావో” కరి ఇవ్నేతి బోల్యో. దేవ్‍ నోవహు, ఇనా ఛీయ్యాతి వాత్‍ బోల్తో, “హఃజో, మే తుమరేతె, తుమ్నా బద్మా ఆస్తే తుమరు హాఃదన్తి, తుమర కెడే ఛాతే హార్యేక్ జాన్వార్‍తి, యో జీన్వార్‍వో దండావో, తుమర కెడే ఛాతే హార్యేక్ జాన్వార్‍వో, ఝాజ్‍మాతు బదర్‍ ఆయుతే హార్యేక్ జామిన్‍ను జీన్వార్‍ మారు నిబంధనా గట్ట్ కరుకురుస్‍. మే తుమరేతి మారు నిబంధనా కరుకురాస్, జాన్ ఛాతె హాఃరు ఆ పాణిను వల కేదెబి నాషనమ్‍ హుసుకొయిని. జమీనా నాష్ కరనాటేకె అజు కెదేబి వరదల్ ఆవ్సేకొయిని” బోల్యో. బుజు దేవ్‍ “మన, తుమ్నా, తుమరకేడె ఛాతే జీన్వార్‍ హాఃరవ్ను ఇచ్మా మే పిఢిపిఢినా కర్యోతే నిబంధనా హాఃనద్‍ ఆస్‍, మొబ్బుమా మారు కులంబి రాక్యో, యోమనబీ, జమీన్నా, ఇచ్మా నిబంధనా హాఃనద్‍నితరా ర్హాసే. జమీన్‍ ఫర్‍ మే మోబ్బునా లాయోతెదె యోకులంబి మబ్బుమా దెఖ్కావ్సె. తేదె మన, తుమ్నా, జీన్వార్‍ హాఃరనా ఇచ్మా ఛాతె మారు నిబంధననా హాఃయల్‍ కర్లీస్‍ అనటేకె ఆంగ్తాన్‍వాలన నాషనమ్‍ కరనటేకె అం కేదెబి పాణి వరద ఆవ్సేకొయిని. యో కులంబి మబ్బుమా ర్హాసే. మే ఇన దేఖిన్‍ దేవ్నా, జమీన్‍ ఫర్‍ ఛాతే హాఃరు ఆంగ్తాన్‍మా జాన్ ఛాతే హార్యేక్నా ఇచ్మా ఛాతే కేదెబి రాహితె నిబంధనా హాఃయాల్‍ కర్లిస్‍” బోల్యొ. అజు దేవ్‍ “మన, జమీన్‍ ఫర్‍ ఛాతే జాన్ ఛాతే వాలన ఇచ్మా మే కర్యోతే నిబంధనా హాఃనద్‍ ఆస్‍” కరి నోవహుతీ బోల్యొ.
నోవహు ఇను ఛియ్యా
ఝాజ్‍ మాతు ఆయిన్‍ నోవహును ఛియ్యా షేము, హాము, యాపెతు. హాము కనానునా భా. ఆ తీన్జణ నోవహు ఛియ్యా, అవ్ను ఖాందన్‍ జమీన్‍ హాఃరు ఫైలాయు. నోవహు ఖేతార్‍ వాడి కరను సురుకర్యో, ద్రాక్చాను బాగ్‍ నాక్యో. యో ద్రాక్చా రహ్క్ పీన్‍ నిషా ఆయిన్‍ ఇను ఘేర్మా లుంగ్డా కొయినితిమ్‍ పడిన్‍ థొ. తెదే కనాను భా హుయోతే హాము, ఇను భా లుంగ్డా కొయినితిమ్‍ పడీన్‍ ర్హావను దేఖిన్‍, బాదర్‍ ఛాతే ఇను బే భైయ్యేవునా ఆవాత్ బోల్యొ. తెదే షేము, యాపెతు, ఏక్ లుంగ్డు లీలిన్‍ ఇవ్ను బేను భుజ్‍ ఫర్‍ మ్హేందీన్ పీటేతు చాలిన్‍ జైయిన్‍ ఇను భా ఉగాడో ర్హావమా లుంగ్డతి ఢాప్యా. ఇవ్ను మ్హోఢా అజేఎక్‍ బజు పరిన్‍ ఛా, అనటేకె ఇవ్నే ఇను భా ఉగాడో ర్హావను దేఖ్యకొయిని. తెదె నోవహు మత్తుమాతు నికిలిన్‍ ఇన న్హానో ఛియ్యో కర్యొతె ఇనా మాలంకర్లీన్‍. “కనాను షపించబడవాలొ హుయిన్ ఇను భైయ్యేన దాసుడ్నితరా హుసే” కరి బోల్యొ. అజు ఇనె “షేమును దేవ్‍హుయోతె యెహోవా స్తుతించి బడనుహువదా. కనాను ఇనకనా కామ్ కరవాలో హుసే. దేవ్‍ యాపెతునా భడావ్సే. ఇనె షేము ఢేరమా జీవ్సె. ఇనకనా కనాను కామ్ కరవాలో హుయిన్ ర్హాసే” కరి బోల్యొ. యో పాణివరద హుయుజావనా బాద్మా నోవహు తీన్‍ హోః అడ్డాయీహ్‍ః వరహ్ః జీయ్యో. నోవహు జీయ్యోతె నౌవ్‍ హోః అడ్డాయీహ్‍ః వరహ్ః జీయ్యో; తేదెయో మరిగో.
Vagiri Vathe Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.