Vagiri Vathe Bible
ఆది 28:15
Verse 15 is marked below, with the whole chapter around it. Read from the start
ఇస్సాక్‍ యాకోబ్‍నా బోలయిన్‍ “థూ కనాన్‍ ఛోగ్రిమా కినాబి య్హా కర్ను. థూ పద్దనరామ్‍మా ఛాతే తారి ఆయాన భా హుయుతే బెతూయేల్‍ ఘేర్నా జైయిన్‍ ఎజ్గా తారో మామొ ఛోర్రియేమా ఎక్న య్హా కర్లా తాహాఃత్‍ హుయుతే దేవ్ తూన ఆషీర్వదించిన్‍, థూ కెత్రుకి జాత్ హువ్వతిమ్‍ తూన సంతానమ్‍ భాడ్డావ్సే, తూన భాడ్డాయిన్‍ థూ అలాదు దేహ్‍ఃమా ఛాతే, కాతో దేవ్ అబ్రాహామ్నా దిన్‍ దేహ్‍ఃనా థూ వారసత్వమ్‍ పొందతిమ్‍ కరిస్. 1యో తూన తారొ సంతానంనా అబ్రాహామ్నా దిదోతె ఆషీర్వాదంనా దిషే ఇమ్మస్‍ హువదా” కరి ఆసీష్‌ కరిన్‌ బోలిమొక్ల్యొ. యో పద్దనరాముమా ఛాతే లాబాను కన జావ్వాన తయార్‍ హుయో. లాబాన్‍ సిరియా వాలో బెతూయేల్‍ ఛియ్యో యాకోబ్, ఏషావు ఆయా హుయితే రిబ్కా భైయ్‍.
ఏషావు బుజు ఏక్ య్హా కరను
ఇస్సాక్‍ యాకోబ్‍నా దీవించిన్, పద్దనరాముమా య్హా కర్లీన్‍ ఆవనా ఇనా ఎజ్గా బోలిమొక్లనా ఇనా దీవించొ తెదె “థూ కనాన్‍ దేహ్‍ఃను ఛొగ్రీమా కినాబి య్హా నొకొకరీస్” కరి ఇనా బోల్యొకరి ఏషావు మాలంహుయు. యాకోబ్ ఇను ఆయాభాను వాత్‍ హాఃమ్జిన్‍ పద్దనరాముకనా చలీగొకరి ఏషావు మాలంకర్యోతెదె, ఆ కాహేతిమ్‍ కనాన్‍ను ఛొగ్రియేమా ఇను భా ఇస్సాక్‍నా ఇష్టమ్‍ కొయినికరి ఏషావు మాలంకర్లిదొ. యో ఇష్మాయేల్‍ కన జైయిన్‍, ఇనా ఛాతే బావణే కాహెతిమ్‍ అబ్రాహామ్‍ ఛియ్యోహుయోతె ఇష్మాయేల్‍ ఛోర్రినాబి, నెబాయోతు భేన్‍హుయితే మహలతునాబి య్హా కర్లిదో.
బేతాల్మా యాకోబ్ హోఃణె లెవ్వను
యాకోబ్ బెయేర్షెబాకంతూ నిక్లీన్‍ హారాన్‍ బణే జాథొ ఏక్ జొగొ రాత్ హుమా ఎజ్గా యో రాత్ ర్హాహిజాయిన్‍, ఎజ్గా ఫత్రామా ఏక్నా ఇనా దిండ్‍తార కరీన్‍, హుఃత్యో. తెదె ఇనా ఏక్ హోఃణె ఆయూ. ఇన్మా ఏక్ నిచిని జమీన్‍ ఫర్ ఉబ్రిన్‍ ఛా. ఇను కనారి ఆకాష్‍నా లగ్గిన్‍ ఛా. ఇనఫర్‍ దేవ్ను దూతయే ఛడ్తూ ఉత్రుతూహుయీన్‍ థూ. యెహోవా ఇనా ఉప్పర్‍ ఉబ్రీన్ “మే తారొ భా హుయుతె అబ్రాహామ్నా దేవ్, ఇస్సాక్ను దేవ్ హుయోతె యెహోవా. థూ హుఃత్యోతె ఆ జమీన్నా తునబీ తారు సంతాన్నా దీస్‍. తారు సంతానమ్‍ జమీన్‍ ఫర్ లెక్కమా రేతిను కాక్రీయేనుతరా భడ్సే. థూ ఛార్ దిక్కునా భారవ్సే. జమీన్‍ ఫర్ ఖాందాన్‍ హాఃరు తారు భణేతి, తారు సంతానమ్‍ భణేతి ఆషీర్వాదమ్‍ పొంద్చే. హాదేగ్‍ మే తారకెడే ర్హహీన్‍, థూ జైయితె హర్యేక్ జొగొమాబీ తూన బఛ్చాయిన్‍ ఆ దేహ్‍ఃనా తూన అజు బులాయిస్‍. మే తారేతి బోల్యొతే కరతోడి తూన మ్హేందిస్‍ కొయిని” కరి బోల్యొ. యాకోబ్ నిందర్‍ మతూ ఉట్టీన్‍ “హాఃఛ్చీస్‍ యెహోవా ఆ జోగోమా ఛా. యో మన మాలంకోయిని” ర్హయిగొ. యో ఢరీన్‍ “ఆ జొగొ ఘణు ర్‍ లాగు. యో దేవ్ను మందిరమ్‍ పన్కి అజుకెవు కాహే. స్వర్గంను దార్వాజు ఆస్‍” ర్హయిగో. వ్హాణె హుయుతేదె యాకోబ్ ఉట్టీన్‍ యో షిణారునా కర్లిదోతే ఫత్రో లీలిన్‍ ఇనా స్తంభమ్‍తరా ఉబ్రాకాడీన్‍ ఇను కనారి ఫర్ తేల్‍ నాక్యొ. యో యో జోగోనా బేతేల్2 కరి నామ్‍ మ్హేంద్యో. పన్కీ మొదుల్‍ యో గామ్‍ నామ్‍ లూజు. తెదె యాకోబ్ “మే ఫరీన్‍ మారొ భాను ఘర్కనా జత్తన్తి ఆవ్నుతిమ్‍ దేవ్ మారకేడె ర్హయిన్‍, మే జంకురూతె ఆ వాట్మా మన బఛ్చాడీన్‍, మే జంకురూతె బుజు ఘర్కనా ఖావన హాఃణు పేర్లేవనా లుంగ్డనా మన దిదోహుయో యెహోవా మన దేవ్‍హుయిన్‍ ర్హాసె. యోస్‍ కాహే, స్తంభంతి మే ఉబ్ర్ రాక్యొతె యో ఫత్రో దేవ్ను మందిరమ్‍ హుసె. థూ మన దిదోతే హాఃరుమా దహ్‍ఃమాను భాగ్‍ తున దీస్‍” కరి మొక్లిదిదొ.
Source notes (2)
- Footnote మూల భాషమా దేవ్ అర్థమ్
- Footnote బేతేల్ కతో దేవ్ను ఘర్ కరి అర్థమ్
Vagiri Vathe Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.