Vagiri Vathe Bible
ఆది 29
యాకోబ్ లాబాను కన జావను
యాకోబ్ నిక్లీన్‍ ఓంద్యే అద్మియేను దేహ్‍ఃనా గయో. ఇనె దేఖ్యొతెదె ఖేతర్‍మా ఏక్‍ బావ్డి దేఖ్కాయు. ఎజ్గా ఇనకనా మ్హేంఢా మందొ హుఃఖాయిన్‍ ఛా. చారవాళు ఇవ్ను మందల్‍నా యో బావ్డిను పాణి మేన్చే. ఏక్‍ మోటో ఫాత్రో యో బావ్డి ఫర్ మూచినాకిన్‍ ఛా. ఎజ్గా మందహాఃరు ఆయోతేదే యో బావ్డి ఫర్‍తు యో పత్రో కాడిన్‍, మేంఢాన పాణి మేందిన్‍ ఫరిన్‍ బావ్డి పర్‍ పత్రోన మేందిదా. యాకోబ్ ఇవ్నా దేఖిన్‍ “భైయ్యే, తూమే కెజ్గా వాల?” కరి పుఛ్చావమా ఇవ్నే “హామే హారాను వాల” బోల్య. యో “నాహోరు ఛియో లాబాన్ తూమ్నా మాలంనా?” కరి ఇవ్నా పుఛ్చాయుతో ఇవ్నే “ఓ హామ్నా మాలం” బోల్యో. “యో ఆష్యాల్‍ ఛాన?” కరి పుఛ్చాయుతేదె ఇవ్నే “ఆష్యాల్‍ ఛా, హాదేక్‍, ఇని ఛోరి రాహేల్‍ మేంఢాన కెడే ఆంకోరాస్‍” కరి బోల్యా. యో “హాదేగ్‍, అజు ఘాణు ధన్ ఛా, పషువుల్న ఎక్‍జోగొ కారను వహాఃత్‍ హుయుకోయిని, మేంఢనా పాణి మేందిన్‍, జైయిన్‍ ఇనా ఛారవో” కరి బోల్యోతెదే, ఇవ్నే “మంద హాఃరనా పార్ వాతోడి యో హామరు వల హుసేకోయిని. బావ్డి ఫర్ మాతు ఫాత్రో పట్కాయిన్‍. తేదెస్‍ హామే మేంఢాన పాణి మేంచు” బోల్యా. యో ఇవ్నేతి అజు వాత్‍ బోల్తా ర్హమా రాహేలు ఇను భా మేంఢా మందనా బోలయిలిన్‍ ఆయిన్‍. యో ఇనా ఛారవ్తి రోంకరాస్‍. యాకోబ్ ఇను మామొ హుయుతే లాబాన్ ఛోరి రాహేలు, ఇను మేంఢాన దేఖితెదే, యో హాఃదే జాయిన్ బావ్డి ఫర్ ఫత్రో పట్టాయిన్‍ ఇను మామొ లాబాన్ మేంఢా పాణి మేంద్యో. యాకోబ్ రాహేలునా బుచ్చా దిన్‍ గాట్టిన్తి రోయో. యాకోబ్ యో ఇను భాను మాయ మాత్రా కరి, రిబ్కా ఛియ్యాన కరి రాహేలుతి బోల్యోతేదే యో మిలవ్తి జైయిన్‍ ఇనా భాన బోలి. లాబాన్ ఇను బేన్ ఛియో యాకోబ్ హాఃబర్‍ హాఃమ్జోతేదె ఇనా మాలనటేకె మిలవ్తో ఆయిన్‍ ఇనా ధాపయిన్‍ బుఛ్చాదిన్‍ ఇనో ఘేర్‍కన లీన్ గాయో. యాకోబ్ ఆ వాత్‍ లాబాన్‍తి బోల్యో. తెదే లాబాన్ “హాఃఛ్చిస్‍ థూ మారు హాఃడ్‍క్యు మారు బోట్టి” కరి బోల్యో. యాకోబ్ మాహినో ధన్ ఇనా కన ర్హాహిన్‍ బాద్మా,
లాబాను ఛోరియేన యాకోబ్ య్హా కరిలెవ్వాను
లాబాన్ “థూ మారు మాయమాత్ర అనటేకె పుకాట్మా మన కామ్ కరిస్నా? తూన సాత్‍ జీతమ్‍ వోను బోల్‍” కరి యాకోబ్‍నా పుఛ్చాయో. లాబాన్నా బే ఛోరియే ఛా. మోటిను నామ్‍ లేయా, న్హానిను నామ్‍ రాహేలు. లేయాను ఢోల కంజోర్ను థూ. రాహేలు హుఃబ్‍సురాతి ఛా. యాకోబ్ రాహేలునా ఫ్యార్‍ కరిన్‍ “తారి న్హాని ఛోరినటేకె తూన హాఃత్‍ వరహ్ః కామ్ కరిస్‍ బోల్యో.” అనటేకె లాబాన్ “ఇనా ఆలాదనా దేవ్వాను బదుల్‍ తూన దేవ్వాను అష్యల్‍ కాహేన, మార కన ర్హా” కరి బోల్యో. యాకోబ్ రాహేలునటేకె హాఃత్‍ వరహ్ః కామ్ కర్యో. హుయితో యో ఇనా ఫ్యార్‍కరనా వల యో ఇనా ఘాణు కమ్‍ ధన్ దేఖాయు. బాద్మా యాకోబ్ “మారు ధన్ హాఃతమ్‍ హుయు అనటేకె మే మారి బావణ్‍ కన జోంకురుస్, ఇనా మన ధా” కరి లాబాన్ పుఛ్చాయో. లాబాన్ యో జోగోమా ఛాతే ఆద్మియే హాఃరనా బులయిన్‍ య్హా హాఃణు కర్యో. రాత్‍నుటేపార్‍ ఇను మోటి ఛోరి లేయాన ఇనా కనా లీన్ గాయో. యాకోబ్ ఇనేతి యో రాత్ ర్హాయో. లాబాన్ ఇని కామ్‍కరవాలి హుయితే జిల్పానా ఇని ఛోరి లేయాన కామ్‍కరవాలిన దిదో. వ్హాణే హువ్వమా యాకోబ్ యో లేయా కరి మాలంకరిన్‍ లాబాన్‍తి “థూ మన కర్యోతే సాత్‍? రాహేలు టేకెస్‍ కాహేన మే తూన సేవ కర్యోతే? సానటేకె మన దోఖా కర్యో?” కరి బోల్యో. అన లాబాన్ “మోటితిబి ఆగాడి న్హానినా య్హా కరను హామరు దేహ్‍ఃను ఇమన్ కాహే. అగాడి యో హాఃత్‍ రాత్ హాఃతమ్‍ కార్. థూ అజు హాఃత్‍ వరహ్ః మన సేవ కర్యోతో, ఇనా బోదుల్‍ బేమ్మానినబి తూన దిస్‍” కరి బొల్యో. యాకోబ్ ఇమ్నితార లేయా వారమ్‍ హాఃతమ్‍ కరిన్‍ బాద్మా లాబాన్ ఇని ఛోరి రాహేలునాబి ఇనా బావణ్‍ కర్యో. లాబాన్ ఇను కామ్‍కరవాలి హుయితే బిల్హాన ఇని ఛోరి రాహేలున కామ్‍కరవాలిన దిదో. యాకోబ్ రాహేలుతి రాత్ ర్హాయిన్‍. యో లేయాతి రాహేలున ఘాణు ఫ్యార్‍ కరిన్‍ లాబాన్నా అజు హాఃత్‍ వరహ్ః సేవ కర్యో.
యాకోబ్ భా హువ్వాను
యో లేయాన నాఫ్యార్‍ కరమా దేఖిన్‍ యెహోవా ఇనో బేజిణి ఢాప్యో. రాహేలునా వాంజీణి ఛా. లేయా బేజిణి హుయిన్‍, ఛియ్యా జాణి “యెహోవా మారు మీన్హాత్‍నా దేఖ్యో అనటేకె మారో బావ్రి మన ఫ్యార్‍ కర్సే” ర్హాహిజాయిన్‍ ఇనా “రూబేను” కరి నామ్‍ మేంది. యో అజు బేజిణి హుయిన్‍, ఛియ్యా జాణిన్‍ “మే ఫ్యార్‍నా పొందికోయిని కరి యెహోవా హాఃమ్జో అనటేకె ఇనాబి మన దిదో” ర్హాహిజాయిన్‍ “షిమ్యోను” కరి నామ్‍ మేంది. యో అజు బేజిణి హుయిన్‍, ఛియ్యా జాణి “ఆఖరిమా మారో బావ్రి మారేతి లాగిన్‍ ర్హాసే. సానకాతో ఇనా తీన్‍ ఛియ్యాన జాణి” ర్హాహిజాయిన్‍ ఇనా “లేవి” కరి నామ్‍ మేంది. యో అజు బేజిణి హుయిన్‍ ఛియ్యా జాణిన్‍ “హాంకేను యెహోవాన స్తుతికరిస్‍” ర్హాహిజాయిన్‍ ఇనా “యూదా” కరి నామ్‍ మేంది. బద్మా యో జాణను బంద్‍హుయుగో.
Vagiri Vathe Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.