Vagiri Vathe Bible
ఆది 22
దేవ్ అబ్రాహామ్న ఇస్సాక్ బలితర దా కరి బోలను
ఆ హాఃబర్ హాఃరు హుయుతే బద్మా దేవ్ అబ్రాహామ్నా పరిక్చ కర్యో. యో “అబ్రాహామ్‍” కరి బోలయోతెదే యో “బోల్ ప్రభూ” కరి బోల్యో. తెదే యో అబ్రాహామ్‍తి “థూ ఫ్యార్‍కరతే ఏక్నుఏక్ ఛియో ఇస్సాక్‍నా లిలీన్‍ మోరియా దేహ్‍ఃనా జా. ఎజ్గా మే బోలిస్తే ఏక్ ఫ్హాడ్‍ ఫర్ ఇనా దహనబలి తరా ధా” కరి బోల్యో. అనటేకె అబ్రాహామ్‍ వ్హాణేహఃత్రే హుమా ఉట్టిన్‍ ఇను గాదేడో ఫర్ జీను బందిన్‍ తయార్‍ కరిన్‍, దహనబలిటేకె లక్డియే మరిన్‍, ఇను ఛియ్యాన ఇస్సాక్‍బి బేజాణ కామ్‍ కరవాలన కెడేలిన్‍ దేవ్ ఇనా బోల్యోతె జోగో గయో. తీన్మాను ధన్‍ అబ్రాహామ్‍ దూర్‍ ఛాతే యో జోగోనా దేక్యో. ఇను కామ్‍కరవాలో “తుమే గాదేడోతి అజ్గ ర్హావో. మే మారో ఛియో ఎజ్గా జైయిన్‍ దేవ్ ఆరాధించిన్‍ ఫరిన్‍ తుమరకనా అవ్సు” కరి బోల్యో. తెదే అబ్రాహామ్‍ బదహనబలిటేకె లయోతే లక్డియే లిలీన్‍ ఇను ఛియోన ఇస్సాక్ను ముడ్‍క్యా పర్‍ మేంద్యో. ఇను వాత్మా ఆగ్‍, ఛారీ దార్లిలిదో. అజు బేజాణ మలిన్‍ ఫ్హాడ్‍ ఫర్ ఛాడ్యా. ఇస్సాక్ ఇనా భా అబ్రాహామ్నా “భా” కరి బోలయిన్‍. ఇనా అబ్రాహామ్‍ “సాత్‍లా” బోల్యో. తెదే యో “దేక్‍, అప్నా కనా ఆగ్‍ లక్డా ఛా పన్కి దహనబలిటేకె మేంఢాను చేల్కు క్యా?” కరి పుచ్చాయో. ఇన అబ్రాహామ్‍ “ఛియ్యా, దహనబలిటేకె మేంఢాను చేల్కు దేవ్ దిస్‍” కరి బొల్యో. దేవ్ అబ్రాహామ్నా బోల్యే జొగోమా ఇవ్నే గాయా. ఎజ్గా అబ్రాహామ్‍ ఎక్ బలిపీఠమ్‍ కర్యో ఇనాఫర్‍ లక్ఢా మేంద్యో. ఇస్సాక్‍నా డోరితి బంద్యో. యో బలిపీఠమ్‍ ఫర్ మేంద్యే లక్డాఫర్‍ ఇనా హాఃవడ్యో. బాద్మా అబ్రాహామ్‍ ఇను ఛియోన మర్రాకనా వాత్‍ పడిన్‍ ఛారి దార్లిదో. తెదే ఆకాష్‍ మాతు యెహోవా దూత “అబ్రాహామ్‍, అబ్రాహామ్‍” కరి బోలయు. ఇన యో “బొల్‍ ప్రభూ” బోల్యో. తెదే యో “యో ఛోగ్రా ఫర్ వాత్‍ నోకోకాక్‍. ఇనా కెవు హాఃరబ్‍ కర్నోకో. తూన ఛాతే ఏక్నుఎక్ ఛియోన మన దేవ్వానటేకె పీటే ఫర్యోకోయిని. యో దేఖమా తూన దేవ్ పర్‍ ఢార్మా, భక్తి ఛాకరి మన మాలం హుయు” కరి బోల్యొ. తెదే అబ్రాహామ్‍ దేకమా. ఆషమ్‍ హువతిమ్‍ ఎజ్గా ఛాతే ఎక్ డాగ్‍ లాడిమా అట్కిన్ ఛాతే ఎక్ మేంఢోనా ఇనా దేఖాయు. అబ్రాహామ్‍ జైయిన్‍ యో మేంఢోన ధర్లిన్‍ ఇను ఛియోను బదుల్‍ ఇనా దహనబలిటేకె దిదో. అబ్రాహామ్‍ యో జోగోన “1యెహోవా యీరే” కరి బోలయో. అనటేకె యెహోవా ఇను ఫ్హాడ్‍ ఫర్ హాఃరు దేవ్వాలో కరి వాత్‍ ఆ ఆజ్‍ తోడి ఉబ్రిన్‍ ఛా. యెహోవా దూత బేమ్మాను చోట్ ఆకాష్‍ మాతు అబ్రాహామ్‍ బోలయిన్‍ అమ్‍ బోల్యో. “థూ తారో ఏక్నుఏక్ ఛియ్యా దేవ్వానటేకె పీటే గాయోకోయినితిమ్‍ ఆ హాఃరు కర్యో. అనటేకె ప్రమాణమ్‍ కరుకూరుస్‍. మే తునా ఆషీర్వదించిస్‍. తారు వారసుల్నా ఆకాష్‍మా ఛాతే తారో తార, ధర్యావ్‍ కనారిమా ఛాతే రేతిను తార ఘాణు భడ్డాయిస్‍. తారు వారసుల్నా ఇను వైరి జమీన్న కబ్జా కర్లిస్‍. థూ మారు వాత్‍ హాఃమ్జో అనటేకె తారు సంతానమ్‍తి జమీన్‍ ఫర్ ఛాతే జాత్‍ హాఃరనా ఆషీర్వదించిస్‍.” బాద్మా అబ్రాహామ్‍ ఇను కామ్‍కరవాలన కన గాయో. ఇవ్నే హాఃర మలిన్‍ బెయేర్షెబాకు గాయా. అబ్రాహామ్‍ బెయేర్షెబామా ర్హాయో.
నాహోర్ను ఖాందన్
యో ఖాబర్ హాఃరు హుయుతే బద్మా ఇనా భైయ్ నాహోర్నా మిల్కాతి లఢ్కా హుయు కరి ఖాబర్ అబ్రాహామ్‍ మాలంహుయు. యో లఢ్కా కోన్‍ కాతో, మోటో ఛియో ఊజు, ఇనో భై బూజు, ఆరామునో భా కెమూయేలు, కెసెదు, హజో, పిల్దాషు, జిద్లాపు, బెతూయేలు. ఆ బెతూయేలు రిబ్కానా భా. అబ్రాహామ్‍ భైహుయోతే నాహోరునా యో ఆఠ్‍జాణ మిల్కాతి హుయా. ఇనా రాకిలీదోతె రెయూమాతి ఇనా తెబహు, గహము, తహషు, మయకా ఫైదయా.
Source notes (1)
- Footnote మూల భాషమా హాఃరు దెవ్వాళొ కరి అర్థమ్
Vagiri Vathe Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.