Vagiri Vathe Bible
ఆది 21
ఇస్సాక్ ఫైదాహువను
యెహోవా యో బోల్యోతిమ్‍ సారా ఫర్‍ గోర్‍ కరీన్‍. యో కర్యొతే వాగ్దానంనా సారా ఫర్‍ కర్యో. కిమ్‍కతో దేవ్ అబ్రాహామ్ బుడోమా సారా బేజిణి హుయిన్‍ ఇనా ఏక్ ఛియ్యోనా జణి. అబ్రాహామ్‍తి దేవ్ బోల్యోతే వహాఃత్‍మా ఆ హుయు. అబ్రాహామ్ ఇని బావణ్ సారాతి ఇనా పేద్దాయోతే ఇనా ఛియ్యానా ఇస్సాక్ కరి నామ్‍ మేంద్యో. దేవ్ అబ్రాహామ్‍నా దిదోతే ఆజ్ఞాదొదోతె ప్రకారమ్‍ ఇనె ఇనో ఛియ్యో ఇస్సాక్నా ఆఠ్మను ధన్నే సున్నతి కర్యో. అబ్రాహామ్ను ఛియ్యోహుయోతె ఇస్సాక్నా ఫైదాకర్యోతెదె ఇను ఉంబర్‍ హోః వరహ్ః. తెదే సార “దేవ్ మన ఆహ్‍ఃణి ఆవదిదో. మారు సంగతి మాలంహుయుతే హాఃర మారేతి మలీన్‍ ఖుషితి ఛా” బోలి. యో అజు “సారా ఇనా లఢ్కనా దూద్‍ దిసేకరి అబ్రాహామ్‍తి కోన్‍ బోల్చె హుయుతో బుడోహుయుతే మే ఇనా ఏక్ ఛియ్యో జణిన్‍ దిదీకోయిన్నా?” బొలి. యో లఢ్కు మోటుహుయిన్‍ దుద్‍ మేందిన్‍. ఇస్సాక్ దిద్‍ బులిన్‍ ధన్ అబ్రాహామ్ ఘాను మోటు హాఃణు కర్యో.
హాగర్నాబి, ఇష్మాయేల్నా బేన బోలిమొక్లను
తెదే అబ్రాహామ్‍నా ఐగుప్తుయువాలి హుయుతే హాగర్‍తి ఫైదాహుయోతె ఛియ్యోనా ఇస్సాక్నా మజాక్‍ కరను సారా దేఖిన్‍. యో అబ్రాహామ్‍తి అమ్‍ బోలి. “ఆ కామ్కరావలి ఇనా ఛియ్యాన బోలిమోక్లాల్‍. సానకాతో ఆ కామ్కరవాలినో ఛియ్యో మారో ఛియ్యా ఇస్సాక్తి మలిన్‍ వారసుడితార ర్హావనా హుసే కోయిని.” ఆ వాత్ హాంమ్జోతె అబ్రాహామ్ ఇనో ఛియ్యో ఇష్మాయేల్నా బట్టి ఘాణు బాధ పడ్యో. హుయుతొ దేవ్ “ఆ ఛోగ్రానటేకె, తారి కామ్కకరవాలిటేకె థూ బాధ పడ్నోకో. ఆ హాఃబర్మా సారా తూనా బోల్యితిమ్‍ కర్‍. సానకాతో ఇస్సాకుతి హుసేతె సంతానమాస్‍ తూన వారసుల్‍ హుస్‍. హుయుతోబి ఆ కామ్కకరవాలి ఛియ్యోబి తారు సంతానమ్‍ అనటేకె మే ఇనాబి ఏక్ జాత్‍ తరా కరిస్‍” కరి అబ్రాహామ్‍తి బోల్యో. అనటేకె అబ్రాహామ్ వ్హాణే హువకోయిన్తే అగాడి ఉట్టిన్‍ రోటా, పాణి బర్యోతే ఛాంబడాను తిత్తి కరిన్‍ ఇనా హాగర్‍ భావ్డాఫర్‍ మేంద్యో. యో ఛోగ్రనా ఇనా దినాదిదో. యో జైయిన్‍ బెయేర్షెబా ఝాడిమా జైయిన్‍ ఎజ్గా పార్తి ర్హాయి. యో ఛాంబడాను తిత్తిమా పాణి హుయిజావ్వామా యో లఢ్కాన ఎక్ డాగ్‍ హేట్‍ మేందిదీ. “యో లఢ్కాను మరణ్‍ దేఖాను మారు వల హుసేకోయిని” ర్హాయిజైయిన్‍ తోడు దూర్‍జాయిన్‍ ఇనా హాఃడక్‍ బేసీ. ఎజ్గా గట్టిన్‍తి రోయి. దేవ్ యో లఢ్కాన ఆవాజ్‍ హాఃజో. తెదే దేవ్ను దూత ఆకాష్‍ మాతు హాగర్‍నా బోలయో. “హాగరూ, తూన అయుతే మీన్హాత్‍ సాత్‍? ఢార్‍ నోకో. యో లఢ్కాన ఛాతే జోగోమా దేవ్ ఇనా ఆవాజ్‍ హాంజో. తూ ఉట్టిన్‍ యో లఢ్కాన ఉపార్‍ ఉట్టాడ్‍. ఇనా హీమత్‍ బోల్‍. సానకాతో మే ఇనా ఏక్ మోటు జాతితార భడ్డాయిస్‍” కరి ఇనేతి బోల్యో. తెదే దేవ్ ఇనా ఢోల కోలవాతిమ్‍ కర్యో. ఇనా హాఃమే ఛాతే ఏక్ పాణి ఊటనా దేఖి. యో జైయిన్‍ ఛాంబడను తిత్తినా పాణి బరిన్‍ యో లఢ్కనా పిడ్డాయి. దేవ్ యో లఢ్కనకేడె ఛా. యో భడ్డిన్‍ మోటుహుయో. యో ఝాడిమా ర్హాహిన్‍ అష్యాల్తి బాణల్తి హాల్డే సీకిలిదో. యో పారాను ఝాడిను జొగొమా ర్హాయోతెదే ఇని ఆయా ఐగుప్తు దేహ్‍ఃమాతు ఏక్ ఛిగ్రినా లాయిన్‍ ఇనా య్హా కరి.
అబ్రాహామ్ అబీమెలెకున నిబంధనా
యో ధన్మా అబీమెలెకున, ఇను సైన్యాధిపతి ఫీకోలూ మలిన్‍ అయిన్‍ అబ్రాహామ్‍తొ వాత్ బోల్యా. “థూ కర్యోతే కామ్‍ హాఃరుమా దేవ్ తునా కెడే ఛా. తూ మన , మారో ఛియ్యోకరి, మార నాత్యన ఠాగయిస్‍ కోయినికరి దేవ్ను నామ్‍ ఫర్‍ మన వాగ్దానమ్‍ కర్‍. మే తునా దేఖాడ్యుతె యోస్‍ నిబంధనా విష్వాస్‍న మార ఫర్‍. థూ అలాదు దేహ్ః ఛాతే ఆ దేహ్‍ఃమా ఫర్‍ దేఖాడ్‍” బోల్యో. అనటేకె అబ్రాహామ్ “మే వాగ్దానమ్‍ కరిస్‍” బొలయో. అబీమెలెకున దాసుల్‍ జబర్దేస్తి నా కర్లిదోతె అబ్రాహామ్ను హుయుతె పాణి బావ్డినా గూర్చి అబ్రాహామ్ ఇను నిరహ్ఃతి బోల్యో. ఇనా అబీమెలెకునా “ఆ కామ్‍ కోన్‍ కర్యుకి మన మాలంకోయిని. థూబి ఇను విషయమ్‍ మన సాత్బి బోల్యొకొయిని. మన సంగతి ఆస్‍ ధన్నె మాలంహుయు” బోల్యో. అబ్రాహామ్ మ్హేంనా ధండానా బులయిన్‍ అబీమెలెకునా దిదొ. ఇవ్నె బేజణ అమ్నితార ఏక్ నిబంధనా కర్లిదా. బద్మా అబ్రాహామ్ ఇను గళో మాతు హాఃత్‍ టైండా మేంఢి కాడిన్‍ అలాదు ర్హాక్యో. యో దేకిన్‍ అబీమెలెకున అబ్రాహామ్‍తి “థూ హాఃత్‍ టైండా మేంఢి అలాదు కరిన్‍ ర్హాక్యో. ఇను అర్థమ్‍ సాత్‍?” కరి పుఛ్చాయో. ఇనా అబ్రాహామ్ “ఆ బావ్డినా మే కోదవ్వానటేకె సాబుత్ తరా ఆ హాఃత్‍ టైండా మేంఢి థూ లీలేను” బోల్యో. ఇమ్‍ ఇవ్నే బేజాణ ఏజ్గా ఏక్ నిబంధనా కర్లిదా అనటేకె యో జొగొ “1బెయేర్షెబా” కరి నామ్‍ ఆయు. బెయేర్షెబామా ఇమ్‍ ఎక్ నిబంధనా కర్లిదుతే బద్మా అబీమెలెకున ఉట్టిన్‍ ఇను సైన్యాధిపతి ఫీకోలుతే మలిన్‍ ఫిలిష్తీయుల్‍ దేహ్‍ఃనా ఫరిన్‍ గయా. అబ్రాహామ్ బెయేర్షెబామా ఎక్ తమరిస్క ఝాడను గాడ్యో. ఎజ్గా కెదేబి దేవ్‍హుయుతే యెహోవా నామ్‍ ఫర్‍ ప్రార్థన కర్యో. అబ్రాహామ్ ఫిలిష్తియుల్‍నా దేహ్‍ఃమా ఘాణు ధన్ అలాదు దేహ్ఃవాలతార థో.
Source notes (1)
- Footnote మూల భాషమా నిబంధన బావ్డి కరి అర్థం
Vagiri Vathe Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.