Vagiri Vathe Bible
ఆది 23
సారా మరణ్, ఘోరెడు
సారా ఏక్ హోః తీన్ కామ్ డోడీహ్ః వరహ్ః జీవి. కనాను దేహ్‍ఃమా హెబ్రోనా కరి బోలవాతే కిరియత్‍ “1ఆర్బా” కరి జోగొమా యో మరిగి. తెదే అబ్రాహామ్‍ సారాటేకె బాధ పడనటేకె, దేఖానటేకె అయో. బాద్మా అబ్రాహామ్‍ మరిగుతే ఇను బావణ్‍ కంతు ఉట్టిన్‍ హేతు వారసుల్తి అమ్ వాత్‍ బోల్యో, “మే తుమారు ఇచ్మా ఎక్ అలాదు దేహ్ఃవాలతార ఛావ్‍. మరిగితే మారి బావణ్‍ మారు ఢోల హాఃమే ఛా. మరిగుతె మార వాలన గడనటేకె మన ఏక్ స్మసాన జమీనా హుఃద్తి దేవొ” బోల్యొ. ఇన హేతు వారసుల్‍ అమ్ బోల్యా, హామే బోలియేతే హాఃమ్జ్. “థూ హమారు ఇఛ్మా ఏక్ మహారాజొనితరా ఛా. హామరు స్మసాన జమీన్‍యే ఘాణు పవిత్రంను ఇనా మరిగితే తార వాలనబి గఢ్. మరిగితే తారి బావణ్‍ గఢానటేకె హామరమా కోన్‍ ఇను జామిన్‍ తునా దేవ్వానటేకె దీస్‍కొయిని కరి బోల్సేకోయిని.” తెదే అబ్రాహామ్‍ ఉట్టిన్‍ యో దేహ్‍ః అద్మితిహుయుతే హేతు వారసుల్‍ హాఃమే హాఃలమ్‍ కర్యో. “మరిగితె మారి బావణ్‍నా గాఢ్ను విషయంమా తుమే మారేతి మలిన్‍ మారు వాత్‍ హాఃమ్జిన్‍. సోహరు ఛియోహుయుతే ఎఫ్రోనునా మార బణే వాత్‍ బోల్. ఇను జమీన్‍ కానరినా ఛాతే మక్పేలా గుహనా మన ధాకరి ఇనేతిబోలొ. యో మారు హుద్ను స్మసానంతి ర్హావనటేకె ఇనా హాఃరు మోల్‍ మన ఎచ్కరి బోలో” కరి బోల్యో. యో ఎఫ్రోను హేతు సంతతి ఇవ్నా ఇఛ్మా బేసిన్‍ థో. హిత్తీయుహుయోతే ఎఫ్రొను యో హాఃయర్‍ ధర్వాజుమా ఆయిన్‍ హాఃరను హాఃమే హేతు సంతతి వాల్నా హాఃజుతు రవమా అబ్రాహామ్‍నా అమ్ బోల్యో. “హాఃయబ్‍, ఇమ్‍ కాహే. మే బోలుతే హాఃమ్జ్. యో ఖేతార్‍నా ఇన్మా ఛాతే గుహనబి తుమ్నా దేంకురుస్‍. మారు అద్మియేను హాఃమే ఇనా దేంకురుస్‍. మరిగితే తారి బావణ్‍ గఢానటేకె తుమ్నా దేంకురుస్‍,” తెదే అబ్రాహామ్‍ యో దేహ్‍ః అద్మియేనా హాఃమే హాఃలమ్‍ కర్యో. “ తునా నఛ్చుతే మారు వాత్‍ హఃమ్జో. యో కెతార్నా పైసా దిస్‍. మార కన పైసా లీలా. తెదే మారి బావణ్‍ ఎజ్గా గఢిస్‍” కరి హాఃరును హాఃమే హాఃజవతిమ్‍ బోల్యో. ఇనా ఎఫ్రోను అమ్ జవాబ్‍ దిదో. “హాఃయబ్‍, హఃజ్‍. యో జమీన్‍ మోల్‍ ఛార్‍ హోః తులాల్ను రూపు దిదుతొ బాయిస్‍. యో మాత్రమ్‍ మొత్తమ్‍ తూన మన ఘాణు? మరిగితే తారి బావణ్‍ గఢ్‍లా” బోల్యొ. అబ్రాహామ్‍ ఎఫ్రోను బోల్యుతే వాత్‍ హఃమ్జో. హేతు ఛియ్యాన హాఃమ్జవ్వాతిమ్‍ ఎఫ్రొన్‍ బోల్యోతే మోల్‍ కాతో తూకమ్‍ ప్రకార్‍ ఛార్‍ హోః తులాల రూపున అబ్రాహామ్‍ గణిన్‍ ఇనా దిదొ. ఇమ్‍ తార మమ్రే బగల్ ఛాతె మక్పేలామా ఎఫ్రోను ఖేతర్‍, ఇనమా ఛాతె గుహ, యో ఖేతర్‍మా ఇను సరిహద్దుమా ఛాతే ఝాడతీబి, యో గామ్‍ ధర్వాజు అవ్వాను ఇవ్నే హాఃర హాఃమే హేతు వారసుల్‍ సమక్చంమా అబ్రాహామ్‍ లీలిదో. ఇను బాద్మా అబ్రాహామ్‍ కనాను దేహ్‍ఃమా హెబ్రోను కరి బోలయిన్‍ మమ్రే బగల్ ఛాతే మక్పేలా ఖేతార్‍మా గుహమా ఇను బావణ్‍ సారాన గాడ్యొ. అంనితార యో ఖేతార్‍నా, ఇన్మా ఛాతే గుహనా స్మసానమ్‍ టేకె అబ్రాహామ్‍ హేతు సంతతివాలతి దేవ్వాను వల యో ఇను హుఃదు హుయు.
Source notes (1)
- Footnote మూల భాషమా చార్‌ హఃయరే మల్యుతె కరి అర్థమ్‌
Vagiri Vathe Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.