Waghri Booli Bible
ಆದಿಕಾಂಡ 47
ಫರೋಹಥಿ ಯಾಕೋಬ್‍ನ ಸ್ವಾಗತ್‌
ತದೆ ಯೋಸೇಫನೆ ಫರೋಹಕನ ಅಯಿನ್‌, “ಮಾರೊ ಬಾಬಿ, ಭೈಯೇಬಿ ಢಾಂಡ ಮೇಂಢ ಆಜು಼ ಖ್ಹಾರೀಸ್‍ ಶೊತ್‌ನಲೀನ್ ಕಾನಾನ್ ದೇಖ್ಹ್‌ಥು ಗೋಷೆನ್ ತಬರ್ಖಾನ ಆಯಿರ‍್ಹಾಸ್” ಕರಿ ಖ್ಹಮ್‌ಜಾ಼ಡ್ಯೊ. ಅತ್ರೇಸ್ ಕಾಹೆತೆ ಇನ ಭೈಯೇಮ ಪಾಚ಼್ ಜ಼ಣಾನ ಬುಲೈಲಿ ಆಯಿನ್ ಫರೋಹಕನ ಭೀರಾಖ್ಯೊ. ಫರೋಹನೆ, “ತುಮಾರು ಕಾಮ್‌ಶಾತ್‌?” ಕರಿ ಇವ್ಣುನ ಪುಛಾ಼ವಖ್ಹತರ್‌ ಇವ್ಣೆ, “ತಾರ ಆಳ್‌ ಹುಯಿರ‍್ಹಾತೆ ಹಮೆ ಹಮಾರ ಬಾಬ್‌ದಾದನಿ ಘೋಣಿ ಮೇಂಢ ಚ಼ರಾವವಾಳ” ಕರಿ ಬೋಲ್ಯ. ಕಾನಾನ್ ದೇಖ್ಹ್‌ಮ ಕಾಳ್‌ದುಕಾಳ್ ಜಾ಼ಖ್ಹತ್‌ಥೂತೆ ಇನಖ್ಹಾಜೆ ತಾರ ಆಳ್‌ನು ಮೇಂಢ ಢಾಂಡವ್ನ ಚಾ಼ರೊಮಳ್ಯೊಕೊಯ್ನಿ. ಇನಖ್ಹಾಜೆ ಆ ದೇಖ್ಹ್‌ಮ ಥೋಡ ದನ್‌ರ‍್ಹಿಯೇ ಕರಿ ಆಯಾ. ಹಮೆ ಗೋಷೆನ್ ತಬರ್‌ಖಾಮ ಜಿವ್ಣು ಕರಾನ ಹುಕುಮ್ ದೇ” ಕರಿಬೋಲ್ಯ. ತದೆ ಫರೋಹನೆ ಯೋಸೇಫನ, “ತಾರೊ ಬಾಬಿ, ಭೈಯೇಬಿ ತರಾಕನ ಅಯಿರ‍್ಹಾಸ್‌”. ಈಜಿಪ್ಟ್ ದೇಖ್ಹ್‌ ತಾರ ಖ್ಹಾಮ್ಣೆ ಛಾ಼; ಇನಾಮಥು ಅಛ್ಛು಼ ಭಾಗ್‌ಮ ತಾರೊ ಬಾಬಿ ಅಜು಼ ಭೈಯೇಬಿ ಜಿವ್ಣುಕರಾನಿತರ ಕರ್‌; ಗೋಷೆನ್ ತಬರ್‌ಖಾಮ ಹೋಣುತೊ ಜಿವ್ಣುಕರಾದೆ; ಇವ್ಣಾಮ ಕೋಣ್‌ತೋಬಿ ತಾಖತಿ ಉಶೇತೊ ಇವ್ಣುನ ಮಾರ ಢಾಂಡ ಮೇಂಢಾನ ಮಂಧಾನ ದೇಖಿಲ್ಯಾವನ ಮ್ಹೇಲ್” ಕರಿ ಬೊಲ್ಯೊ. ತದೆ ಯೋಸೇಫ ಇನೊ ಬಾ ಯಾಕೋಬನ ಬುಲೈಲೈನ್‌ ಫರೋಹಕನ ಖ್ಹಾಮ್ಣೆ ಭೀರಾಕ್‌ತನ, ಯಾಕೋಬನೆ ಫರೋಹನ ಆಶೀರ್ವಾದ್ ಕರ‍್ಯೊ. ಇನ ಫರೋಹನೆ, “ತುನ ಹಮ್ಕೆ ಕೆತ್ರಾ ವರಖ್ಹ್?” ಕರಿ ಪುಛಾ಼ಯೊ. ಯಾಕೋಬನೆ ಫರೋಹನ, “ಮಾರು ಲೋಕನು ಗಖ್ಹತ್‌ ಮಾರ‍್ಯೊತೆ ಹಗಾಮ್ ಎಖ್ಹೊ ಡೋಡಿಖ್ಹ್‌ ವರಖ್ಹ್. ಮೇ ಜಿವ್ಯೋತೆ ಹಗಾಮ್ ಥೋಡಾಬಿ ಆಜು಼ ವದೇಖ್ಹ್‌ ಕುಢಾಪಮಥು; ಕತೋಬಿ ಮಾರ ಗುರುಗುರಬ್‌ಲ್ಯ ಜಿವ್ಯಾತೆ ಖ್ಹಾರ ವರಖ್ಹ್ ಮನ ಕೊಹುಯನಿ” ಕರಿ ಬೊಲ್ಯೊ. ಪಾಛೊ಼ ಇನೆ ಫರೋಹನ ಆಶೀರ್ವಾದ್ ಕರೀನ್ ಇನ ಖ್ಹಾಮ್ಣೆಥೊ ಚ಼ಲೇಗಯೊ. ಫರೋಹನಿ ಹುಕುಮ್‌ನಿ ಪರಕ್ ಯೋಸೇಫನೆ ಇನ ಬಾನಬಿ ಭೈಯೇನಾಬಿ ಈಜಿಪ್ಟ್ ದೇಖ್ಹ್‌ಮ ಜಿವ್ಣುಕರಾನ ಘಣು ಅಛ್ಛು಼ಥೂತೆ ರಾಮ್ಸೇಸ್‌ ತಬರ್‌ಖಾಮ ಶೊತ್‌ನ ದಿದೊ. ಯೋಸೇಫನೆ ಬಾನಾಬಿ ಭೈಯೇನಾಬಿ ಬಾನ ಘರ್ವಾಳ ಖ್ಹಾರಾಸ್ನ ಇವ್ಣ ಇವ್ಣ ಕುಟುಂಬ್‌ಮ ಮಳ್ಯಾಹುಯಾನಿ ಗಣ್ತಿನಿ ಪರಕ್ ಖಾಣುದೀನ್ ಇವ್ಣುನ ಪಾಳ್ಯೊ.
ಘಣು ಮೊಟು ಕಾಳ್‌ದುಕಾಳ್
ಕಾಳ್‌ದುಕಾಳ್ ಘಣು ಥೂತೆ ಇನಖ್ಹಾಜೆ ದೇಖ್ಹ್‌ನ ಖೆವ ಭಾಗ್‌ಮಾಬಿ ಖಾಣು ಮಳ್‌ತೂಥುಕೊಯ್ನಿ. ಯೊ ಕಾಳ್‌ದುಕಾಳ್ನ ಖ್ಹಾಜೆ ಈಜಿಪ್ಟ್ ದೇಖ್ಹ್‌ ಅಜು಼ ಕಾನಾನ್‌ದೇಖ್ಹ್ ಇಮ್ಮಸ್ ನಾಶ್‌ ಹುಯಿಗಯುಥು. ಯೋಸೇಫನೆ ಈಜಿಪ್ಟ್ ಅಜು಼ ಕಾನಾನ್ ದೇಖ್ಹ್‌ಮಾಬಿ ಅನಾಜ಼್ ವೇಚಿನ್ ಆಯೂತೆ ಪೈಶಾಥಿ ಫರೋಹನಿ ಕಣ್ಗಿಭರ‍್ಯೊ. ಈಜಿಪ್ಟ್‌ನು ಅಜು಼ ಕಾನಾನ್ನು ಪೈಶಖ್ಹಾರು ಖತಮ್ ಹುಯಿಜಾ಼ವಾದೀನ್ ಈಜಿಪ್ಟ್‌ವಾಳು ಯೋಸೇಫಕನ ಆಯಿನ್, “ಹಮಾರ ಪೈಶಾ ಖತಮ್‌ಹುಯ್ಗು; ತೂ ಹಮುನ ಖಾಣು ದೆವ್ಣು; ಹಮೆ ತಾರ ಡೋಳಾನ ಖ್ಹಾಮ್ಣೆ ಮರ‍್ಯಾತೊ ಶನು ಫಾಯಿದೊ?” ಕರಿ ಬೋಲ್ಯು. ಇನ ಯೋಸೇಫನೆ, “ತುಮಾರು ಢಾಂಡುಮೇಂಢು ಲೀನ್‌ಆವೊ ಪೈಶ ನಾರ‍್ಹಿಯುತೊ ಗಧೇಡು, ಬೋಕ್ಡು ಲೀನ್ ಆವೊ, ಅನಾಜ಼್ ತುಮುನ ದೆವುಸ್‌” ಕರಿ ಬೊಲ್ಯೊ. ಇವ್ಣೆ ಯೋಖ್ಹಾರು ಯೋಸೇಫಕನ ಲೀನ್ ಆವಾಖ್ಹತರ್, ಇನೆ ಇವ್ಣು ಘೋಡವ್‌ನಾಬಿ, ಢಾಂಡು ಮೇಂಢುಬಿ, ಗಧೇಡವ್‌ನಾಬಿ ಲೀಲಿನ್‌ ಇವ್ಣುನ ಅನಾಜ಼್ ದಿದೊ. ಯೊ ವರಖ್ಹ್ ಇವ್ಣು ಢಾಂಡು ಮೇಂಢುಖ್ಹಾರುಬಿ ಲೀಲಿನ್‌ ಅನಾಜ಼್ ದೀನ್ ಇವ್ಣುನ ಬಚಾ಼ಡ್ಯೊ. ಯೊ ವರಖ್ಹ್ ನಿಕ್ಳಿನ್ ಇನವಾರ್‌ಲ್ಯ ವರಖ್ಹ್‌ಮ ಇವ್ಣೆ ಇನಾಕನ ಆಯಿನ್, “ಹಮಾರ ಪೈಶಾ ಖತಮ್‌ಹುಯಿಗು; ಹಮಾರ ಢಾಂಡಮೇಂಢ ಖ್ಹಾರು ಯಜಮಾನ್ನ ಕಬ್‌ಜಾ಼ಮ ಹುಯಿಗು; ಅಮ್‌ರ‍್ಹಾವಪರ್ ಹಮಾರಿ ಜ಼ಮೀನ್‌ಬಿ , ಹಮಾರು ಶರೀರ್ ಮ್ಹೇಲಿನ್ ಬಿಜು಼ ಶಾತ್ಬಿ ಕೋ ಬಚಿರ‍್ಹೂನಿ ಕರಿ ಹಮಾರ ಯಜಮಾನ್ನ ಲಪಾಡಿಯೇಕೊಂತೆ ಖ್ಹಮ್‌ಜಾ಼ಡೆಸ್” ಕರಿ ಬೋಲ್ಯು. ಹಮೆ ಶನ ತುಮಾರ ಡೋಳಾನ ಖ್ಹಾಮ್ಣೆ ಮರ‍್ನು; ಹಮಾರಿ ಜ಼ಮೀನ್ ಶನ ಪಾಳ್‌ಪಡ್ನು ; ಹಮುನಾಬಿ ಹಮಾರಿ ಜ಼ಮೀನ್ನಾಬಿ ಲೀಲಿನ್‌ ಅನಾಜ಼್ ದೆ; ಹಮೆ ಹಮಾರಿ ಜ಼ಮೀನ್ನ ಫರೋಹನ ದಿನಾಖಿದೀನ್ ಇನ ಗುಲಾಮ್ ಹುಯಿಜ಼ಯ್ಯೆಸ್. ಹಮೆ ಮರ‍್ನುನಾತೆ ಬಚ್ಣು಼ಕತೊ ಅಜು಼ ಜ಼ಮೀನ್ ಪಾಳ್‌ನಾಪಡ್ನುತೆ ತೂ ಹಮೂನ ಬಿತ್‌ನ ಪಂಡಾ ದೇವ್ಣು” ಕರಿ ಬೋಲ್ಯು. ಅಮ್ ಯೋಸೇಫನೆ ಈಜಿಪ್ಟ್ ದೇಖ್ಹ್‌ನು ಖ್ಹಾರಿಸ್ ಜ಼ಮೀನ್ ಫರೋಹನ್ನ ಮಳಿಗು. ಅಜು಼ ಹರೇಕ್ ಈಜಿಪ್ಟ್‌ವಾಳು ಇವ್ಣು ಗದ್ದೆ ಜ಼ಮೀನ್‌ಖ್ಹಾರು ವೇಚಿನಾಖ್ಯು. ಕಾಳ್‌ದುಕಾಳ್ ಈಜಿಪ್ಟ್‌ಮ ಘಣುಥೂತೆ ಇನಖ್ಹಾಜೆ ಇವ್ಣಖ್ಹಾರಾನಿ ಜ಼ಮೀನ್‌ಪರ್‌ ಫರೋಹನು ಕಬ್‌ಜ಼ಹುಯ್ಗು. ಯೋಸೇಫನೆ ಈಜಿಪ್ಟ್ ದೇಖ್ಹ್‌ನು ಎಕ್ ಕೋಣ್ಹಿಥು ಧರೀನ್ ಬಿಜೇಕ್ ಕೋಣ್ಹಿಲಗೂಬಿ ಥೂತೆ ಅದ್ಮೆವ್‌ನ ಗುಲಾಮ್ ಬಣಾಯೊ. ಯಾಜಕವ್ನಿ ಜ಼ಮೀನ್ ಖಲಿ ಇನೆ ಮೋಲ್‌ಕೋಲಿದೋನಿ. ಶನಕತೊ ಇವ್ಣುನ ಫರೋಹಥಿ ಪಿಂಚ್‌ನಿ ಮಳ್‌ತುಥು. ಯೊ ಪಿಂಚ್‌ನಿಥಿ ಜಿವ್ಣು ಕರುಕರ್ಥೂತೆ ಯೊ ಯಾಜಕಾವ್‌ನೆ ಇವ್ಣಿ ಜ಼ಮೀನ್ನ ವೇಚ್ಯುಕೊಯ್ನಿ. ಯೋಸೇಫನೆ ಅದ್ಮೆವ್‌ನ, “ಮೇ ಆಜ಼್‌ನೊ ದನ್ ತುಮುನಾಬಿ ತುಮಾರಿ ಜ಼ಮೀನ್ನಾಬಿ ಫರೋಹನಖ್ಹಾಜೆ ಮೋಲ್‌ಲೀಲಿದೊ ಕರಿ ಮಾಲುಮ್‌ಕರಿಲೆವೊ, ಹಂದೇಕ್‌, ಬಿತ್‌ನಖ್ಹಾಜೆ ತುಮುನ ಪಂಡಾ ದೀರಾಖ್ಯೋಸ್‌; ಜ಼ಮೀನ್‌ಮ ಬಿತ್‌ಕರೊ. ವ್ಹಡಾವ್‌ಣಿನ ದನ್‌ಮ ಪಾಚ಼್‌ಮಾನು ಎಕ್ ಭಾಗ್‌ ಫರೋಹನ ಜಾ಼ವ್ಣು. ಉಭ್‌ರ‍್ಯುಹುಯು ಚಾರ್‌ಭಾಗ್ ತುಮಾರು. ಇನ ಬಿತ್‌ನೆನಾಬಿ ಅಜು಼ ತುಮಾರ ಘರ್‌ವಾಳಾನ ಖ್ಹಾಜೇಬಿ, ಕುಟುಂಬ್‌ವಾಳನ ಜಿವ್ಣಾನಖ್ಹಾಜೆ ರಾಖಿಲೆವೊ” ಕರಿಬೋಲ್ಯೊ. ಇನಖ್ಹಾಜೆ ಇವ್ಣೆ, ಹಮಾರ ಜಾನ್ನ ಬಚಾ಼ಡ್ಯೊ. ಹಮಾರೊ ಮಾಲಿಕ್ ಹುಯಿರೋತೆ ತುಮಾರಿ ಗೋರ್‌ ಹಮಾರಪರ್‌ ರ‍್ಹವಾದೆ; ಹಮೆ ಫರೋಹನಖ್ಹಾಜೆ ಗುಲಾಮ್ ಹುಯಿರ‍್ಹಿಯೇಸ್” ಕರಿಬೋಲ್ಯು. ಪಿಕಾವ್ಣಿಮ ಪಾಚ಼್‌ಮಾನು ಎಕ್ ಭಾಗ್‌ ಫರೋಹನ ಜಾ಼ವ್ಣುಕರಿ ಬೋಲಾನು ಯೋಸೇಫನೆ ಈಜಿಪ್ಟ್ ದೇಖ್ಹ್‌ನು ಎಕ್ ನಿಯಮ್ ಬಣಾಯೊ. ಹಮ್ಕೆಲಗೂಬಿ ಯೊ ಇಮ್ಮಸ್ ಛಾ಼. ಯಾಜಕವ್ನಿ ಜ಼ಮೀನ್ ಖಲಿ ಫರೋಹನ ಕಬ್‌ಜಾ಼ಮ ಹುಯುಕೊಯ್ನಿ.
ಯಾಕೋಬನಿ ಖ್ಹರ್ತಿನಿ ಬಿಂತಿ
ಇಸ್ರಾಯೇಲ್‌ವಾಳು ಈಜಿಪ್ಟ್ ದೇಖ್ಹ್‌ನ ಮಳ್ಯುಹುಯು ಗೋಷೆನ್ ತಬರ್‌ಖಾಮ ಜಿವ್ಣುಕರ‍್ಯು. ಹಿಜ್ಜಾ಼ ಇವ್ಣೆ ಶೊತ್ ಅಖ್ಖು ಕಮೈಲೀನ್ ಘಣು ಪಿಳ್ಗಿವಾಳುಹುಯಿನ್ ಭಡ್ಯು. ಯಕೋಬ್ ಈಜಿಪ್ಟ್‌ಮ ಖ್ಹತ್ರಾ ವರಖ್ಹ್ ರ‍್ಹಯೊ. ಯೊ ಜಿವಿರ‍್ಹೋತೆ ಪೂರ ಹಗಾಮ್ ಎಖ್ಹೊ ಖ್ಹಾತ್‌ಉಪ್ಪರ್ ಚಾ಼ಳಿಖ್ಹ್ ವರಖ್ಹ್. ಯಾಕೋಬನ ಮರಾನ ಹಗಾಮ್ ಖನ್ನೆ ಆವಾದಿನ್ ಇನೆ ಇನೊ ಛಿಯ್ಯೊ ಯೋಸೇಫನ ಬುಲೈಮಂಗೈನ್‌, ತಾರೊ ಹಾತ್ನ ಮಾರಿ ಮಾಂಡಿ ಹೇಟ್‌ ಘಾಲ್, “ಮಾರಪರ್ ತುನ ಪ್ಯಾರ್‌ ಉಶೇತೊ ತೂ ಮಾರಿ ವಾತ್ನ ಫ್ಯಾರ್‌ಥಿಬಿ, ನಿಯಥ್ಥಿ ಚ಼ಲೈದೇವ್ಣು. ಯೊ ಶಾತ್‌ಕತೊ; ಮನ ಈಜಿಪ್ಟ್ ದೇಖ್ಹ್‌ಮ ಮಖ್ಹಾಣ್ಯು ನಕೊಕರೀಶ್. ಮೇ ಮರೀನ್ ಮಾರ ಗುರುಗುರಬ್‌ಲ್ಯಾಕನ ಮಳಿಜಾ಼ವದೀನ್, ಮಾರ ಮುರ್ದಾನ ಈಜಿಪ್ಟ್ ದೇಖ್ಹ್‌ಥು ಲೀ ಜೈ಼ನ್ ಯೊ ಗುರುಗುರಬ್‌ಲ್ಯಾನು ಮಖ್ಹಾಣ್‌ಗಂಜ಼್‌ನಿ ಜ಼ಮೀನ್‌ಮಾಸ್‌ ಮಖ್ಹಾಣ್ಯುಕರ‍್ನು. ಇಮ್‌ಕರೂಸ್‌ಕರಿ ತೂ ಮಾರಿ ಮಾಂಡಿಹೇಟ್ ಹಾತ್ ಘಾಲಿನ್ ಆಣ್‌ಕರ‍್ನು” ಕರಿ ಬೋಲಿಲಿದೊ. ಇನೆ, “ತೂ ಬೋಲ್ಯೋತೆ ತಿಮ್ಮಸ್ ಕರುಸ್” ಕರಿ ಆಣ್ ಕರ‍್ಯೊ. ತದೆ ಯಾಕೋಬನೆ ಬಿಛಾ಼ವ್ಣನು ಶಿರಾಣನಿ ಬಾಜು಼ ಝು಼ಕಿನ್ ದೇವ್ನ ಖ್ಹಲಾಮ್ ಕರ‍್ಯೊ.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.