Waghri Booli Bible
ಆದಿಕಾಂಡ 46
ಯಾಕೋಬ ಅಜು಼ ಇನು ಕುಟುಂಬ್‌ ಈಜಿಪ್ಟ್‌ನ ಗಯೂತೆ
ಯಾಕೋಬನೆ ಇನಾಕನ ಥೂತೆ ಖ್ಹಾರೂಸ್ ಲೀನ್ ಚಾ಼ಲ್‌ಕುಚ಼್‌ಕರಿನ್ ಬೇರ್ಷೆಬನ ಆಯೊ. ಹಿಜ್ಜಾ಼ ಇನೊ ಬಾ ಇಸಾಕನೊ ದೇವ್ನ ಖ್ಹಾಮ್ಣೆ ಬಲಿಅಖ್ಖು ಸಮರ್ಪಣ್‌ಕರ‍್ಯೊ. ಯೊ ರಾತ್‌ ದೇವ್ ಯಾಕೋಬನ ಖ್ಹೋಣ್ಯಾಮ ಆಯಿನ್, “ಯಾಕೋಬ, ಯಾಕೋಬ” ಕರಿ ಪುಕಾರಖ್ಹತರ್ ಇನೆ “ಹಾ ಛೂ಼” ಕರಿ ಬೊಲ್ಯೊ. ತದೆ ದೇವ್‌ನೆ, “ಮೇಸ್ ದೇವ್, ತಾರೊ ಬಾನೊ ದೇವ್ ಮೇಸ್ “ತೂ ಘಾಟ್ ಉತ್ರೀನ್ ಡರ್‌ಕೊಂತೆ ಈಜಿಪ್ಟ್ ದೇಖ್ಹ್‌ನ ಜಾ಼; ಹಿಜ್ಜಾ಼ ತಾರೇತಿ ಘಣು ಜ಼ಗ್‌ಜಾ಼ತ್‌ ಹುವಾಂತರ ಕರೂಸ್‌. ಮೇಸ್ ತಾರಿಜೋ಼ಡ್ಮ ಈಜಿಪ್ಟ್‌ನ ಆವುಸ್‌. ಹಿಜ್ಜಾ಼ಥು ತುನ ಬುಲೈಲೀನ್ ಪಾಛೊ಼ ಆಯಿಶಸ್ ಅಯಿಶ್. ತೂ ಮರಾನ ದನುಮ ಯೋಸೇಫ ತಾರಾಕನ ರ‍್ಹೀನ್ ತಾರ ಡೋಳ ಮೂಚ಼್‌ಶೆ” ಕರಿ ಬೊಲ್ಯೊ. ಇನಾಪಾರ್ ಯಾಕೋಬ ಬೇರ್ಷೆಬಥೊ ನಿಕ್‌ಳ್ಯೊ. ಫರೋಹನೆ ಇನ ಬುಲೈಲಿನ್ ಆವಾನಖ್ಹಾಜೆ ಮೋಕ್‌ಲ್ಯೋತೆ ರಥಾವ್‌ಮ ಯಾಕೋಬನ ಛಿಯ್ಯಾ ಇನೊ ಬಾ ಯಾಕೋಬನ ಅಜು ಇವ್ಣಿ ಬಾವ್ಣೆ ಲಡ್ಕಾವ್ನ ಬೆಖ್ಹಾಡಿಲೀನ್ ನಿಕ್‌ಳ್ಯಾ. ಯಾಕೋಬಬಿ, ಇನು ಘರ್‌ವಾಳುಖ್ಹಾರುಬಿ ಇವ್ಣು ಢಾಂಡು ಮೇಂಢುಖ್ಹಾರುಬಿ ಇವ್ಣೆ ಕಾನಾನ್ ದೇಖ್ಹ್‌ಮ ಕಮಾಯುಥೂತೆ ದೌಲತ್‌ನಾಬಿ ಲೀನ್ ಈಜಿಪ್ಟ್ ದೇಖ್ಹ್‌ನ ಆಯೊ. ಅಮ್ ಯಾಕೋಬನೆ ಇನ ಪರ್ಖ್ಹಾ ತಯೇಡ ಲಡ್ಕಾವ್‍ನಾಬಿ , ನಾತಿಪೋತಿನಾಬಿ ಇನಿ ಅಖ್ಖಿ ಪಿಳ್ಗಿನಾಬಿ ಜೋ಼ಡ್ಮಾಸ್‌ ಬುಲೈಲಿನ್ ಈಜಿಪ್ಟ್ ದೇಖ್ಹ್‌ನ ಆಯೊ. ಈಜಿಪ್ಟ್‌ನ ಆಯಾತೆ ಯಾಕೋಬ ಅಜು಼ ಇನ ಲಡ್ಕ ಹುಯಿರಾತೆ ಇಸ್ರಾಯೇಲ್‌ವಾಳನು ನಾಮ್‌ಖ್ಹಾರು; ಯಾಕೋಬ ಅಜು಼ ಇನೊ ಪೈಲ್ಹೋಟೊ ಛಿಯ್ಯೊ ರೂಬೇನ್. ರೂಬೇನ್ನ ಲಡ್ಕ; ಹನೋಕ್, ಫಲ್ಲೂ, ಹೆಚ್ರೋನ್, ಕರ್ಮೀ, ಸಿಮೆಯೋನ್ನ ಲಡ್ಕ; ಯೆಮೂವೇಲ್, ಯಾಮೀನ್ , ಓಹದ್, ಯಾಕೀನ್, ಚೋಹರ್, ಅಜು಼ ಕಾನಾನ್ಯನಿ ತಯೇಡಮ ಪೈದಹುಯೋತೆ ಸೌಲ. ಲೇವಿನ ಛಿಯ್ಯಾ; ಗೇರ್ಷೋನ್, ಕೆಹಾತ್, ಮೆರಾರೀ. ಯೆಹೂದನ ಲಡ್ಕ; ಏರ್, ಓನಾನ್, ಶೇಲಾಹ, ಪೆರೆಚ್‌, ಜೆರಹ, ಕತೋಬಿ ಏರ್ ಅಜು಼ ಓನಾನ್ ಕರಿ ಅವ್ಣೆ ಕಾನಾನ್ ದೇಖ್ಹ್‌ಮಾಸ್ ಮರಿಗಯ. ಪೆರೆಚನ ಲಡ್ಕ; ಹೆಚ್ರೋನ್, ಹಾಮೂಲ್. ಇಸ್ಸಾಕಾರನ ಲಡ್ಕ; ತೋಲಾ, ಪುವ್ವಾ, ಯೋಬ್, ಶಿಮ್ರೋನ್ ಹುಯಿರ‍್ಹಾಥ. ಜೆಬುಲೂನನ ಲಡ್ಕ; ಸೆರೆದ್, ಏಲೋನ್, ಯಹ್ಲೇಲ್‌ ಹುಯಿರ‍್ಹಾಥ. ಅವ್ಣೆಖ್ಹಾರು ಲೇಯನಿ ಪಿಳ್ಗಿವಾಳು. ಇನೆ ಯಾಕೋಬಥಿ ಅವ್ಣುನಾಬಿ , ದೀನ ಕರಿ ಛೋ಼ರಿನಾಬಿ ಪದ್ದನ್‌ ಅರಾಮ್ಮ ಜ಼ಣಿ. ಇನೇಥಿ ಪೈದಹುಯುತೆ ಪರ್‌ಖ್ಹೊ ತಯೇಡಲಡ್ಕವ್ ತೀನ್‌ಉಪ್ಪರ್ ಡೋಡಿಖ್ಹ್‌ ಜ಼ಣು. ಗಾದನ ಲಡ್ಕ; ಚಿಪ್ಯೋನ್, ಹಗ್ಗಿ, ಶೂನಿ, ಎಚ್ಚೋನ್, ಏರೀ, ಅರೋದೀ, ಅರೇಲೀ; ಅಶೇರನ ಛಿಯ್ಯಾ: ಇಮ್ನಾ, ಇಷ್ವಾ, ಇಷ್ವೀ, ಬೆರೀಗಾ, ಅವ್ಣಿನ್ಹಾನಿ ಭೇನ್‌ ಸೆರಹ ಹುಯಿರ‍್ಹಿಥಿ. ಬೆರೀಗನ ಲಡ್ಕಹುಯಿರಾತೆ ಹೆಬೆರ್, ಮಲ್ಕೀಯೇಲ್. ಅವ್ಣೆ ಖ್ಹಾರು ಲಾಬಾನನೆ ಇನಿ ಛೋ಼ರಿ ಲೇಯನ ದಿದೋತೆ ಜಿಲ್ಪನಿ ಪಿಳ್ಗಿವಾಳು. ಅನೇಥಿ ಯಾಕೋಬನ ಹುಯುತೆ ಲಡ್ಕಾವ್‌ಬಿ, ನಾತಿಪೋತಿಬಿ, ಮಳೈನ್ ಖ್ಹೋಳ ಜ಼ಣು. ಯಾಕೋಬನಿ ಬಾವಣ್ ರಾಹೇಲನ ಲಡ್ಕ, ಯೋಸೇಫ, ಬೆನ್ಯಾಮೀನ್‌. ಈಜಿಪ್ಟ್ ದೇಖ್ಹ್‌ಮ ಯೋಸೇಫನ ಓನ್‌ ಖ್ಹಯೇರ್‌ನು ಯಾಜಕ ಪೋಟೀಫೆರನಿ ಛೋ಼ರಿ ಆಸನತ್‌ ಕರಿ ನಾಮ್‌ವಾಳಿಮ ಫೈದಹುಯಾತೆ ಮನಸ್ಸೆ ಅಜು಼ ಎಫ್ರಾಯಿಮ್. ಬೆನ್ಯಾಮೀನ್ನ ಲಡ್ಕ; ಬಿಳಾ, ಬೆಕೆರ್, ಅಶ್ಬೇಲ್, ಗೇರಾ, ನಾಮಾನ್, ಏಹೀ, ರೋಷ್, ಮುಪ್ಪಿಮ್, ಹುಪ್ಪೀಮ್, ಆರ್ದ್. ಆ ಚೌ಼ಧಜ಼ಣ ರಾಹೇಲಥಿ ಯಾಕೋಬನ ಹುಯುತೆ ಪಿಳ್ಗಿವಾಳು. ದಾನನೊ ಛಿಯ್ಯೊ: ಹುಶೀಮ್. ನಫ್ತಾಲಿನ ಲಡ್ಕ; ಯಹೇಲ್, ಗೂನೀ, ಯೇಚೇರ್, ಶಿಲ್ಲೇಮ್ ಹುಯಿರ‍್ಹಾಥ. ಅವ್ಣೆ ಲಾಬಾನನೆ ಇನಿ ಛೋ಼ರಿ ರಾಹೇಲನ ದಿದೊತೆ ಬಿಲ್ಹನಿ ಪಿಳ್ಗಿವಾಳು. ಇನೇಥಿ ಯಾಕೋಬನಹುಯುತೆ ಲಡ್ಕಾಬಿ ನಾತಿ ಪೋತಿಬಿ ಖ್ಹಾತ್ಜ಼ಣ. ಯಾಕೋಬನಿ ವ್ಹವೆಕಾಹೇತೆ ಯಾಕೋಬಥೀಸ್ ಪೈದಹುಯಿನ್ ಇನಿಜೋ಼ಡ್ಮ ಈಜಿಪ್ಟ್‌ದೇಖ್ಹ್‌ನ ಗಯೂತೆ ಪೂರ ಛೋ಼ ಉಪ್ಪರ್ ತೀನೀಖ್ಹ್‌ ಜ಼ಣು. ಇವ್ಣೇಸ್‌ಕಾಹೇತೆ ಈಜಿಪ್ಟ್‌ದೇಖ್ಹ್‌ಮ ಯೋಸೇಫನ ಪೈದಹುಯಾತೆ ಬೇಜ಼ಣ. ಈಜಿಪ್ಟ್‌ದೇಖ್ಹ್‌ನ ಗಯೂತೆ ಯಾಕೋಬನು ಕುಟುಂಬ್‌ವಾಳು ಖ್ಹಾರು ಪೂರ ಖ್ಹಡ್‌ತೀನಿಖ್ಹ್‌ ಜ಼ಣು.
ಈಜಿಪ್ಟ್‌ಮ ಯಾಕೋಬ ಅಜು಼ ಇನು ಕುಟುಂಬ್‌ವಾಳು
ಯಾಕೋಬನೆ ಗೋಷೆನ್ ತಬರ್ಖಾನಿ ವಾಟ್‌ಪರ್ ಯೋಸೇಫ ಆಯಿನ್ ಇನ ಮಳ್‌ಣುಕರಿ ಖ್ಹಮ್‌ಜಾ಼ಡಾನಖ್ಹಾಜೆ ಯೆಹೂದನ ಇನಾಕನ ಅಗಾಡಿ ಮೋಕ್‌ಲ್ಯೊ. ಇವ್ಣೆ ಗೋಷೆನ್ ತಬರ್ಖಾನ ಆಯು. ಯೋಸೇಫನೆ ಇನು ರಥ್‌ ಬಣೈನ್ ಇನೊ ಬಾ ಯಾಕೋಬನ ಮಳಾನ ಗೋಷೆನ್ನ ಆಯೊ. ಬಾನ ದೇಕ್‌ತಾಸ್ನ ಇನು ಗಳುಬಥೈನ್‌ ಘಣು ವಖ್ಹತ್ ಇನೆ ರೊಯೊ. ಯಾಕೋಬ್‌ನೆ ಯೋಸೇಫನ, “ಮೇ ತಾರು ಮ್ಹೋಡು ದೇಖಿನ್‌, ತೂ ಬಿಜೂ಼ಬಿ ಜಿವ್ತೊ ಛಾ಼ಕರಿ ಮಾಲುಮ್ ಕರಿಲಿದೊ. ಹಮ್ಕೆ ಮೇ ಹಕ್ಲಾಲ್‌ಥಿ ಮರೂಸ್‌” ಕರಿ ಬೊಲ್ಯೊ. ಇನಾಪಾರ್ ಯೋಸೇಫನೆ ಇನ ಭೈಯೇನಾಬಿ ಬಾನ ಘರ್‌ವಾಳ ಖ್ಹಾರಸ್ನ ಬೋಲ್ಯೊಕಿ, “ಮೇ ಫರೋಹಕನ ಜೈ಼ನ್ ತುಮೆ ಆಯಾತೆ ವಾತ್‌ ಖ್ಹಮ್‌ಜಾ಼ಡುಸ್. ‘ಕಾನಾನ್ ದೇಖ್ಹ್‌ಮಥಾತೆ ಮಾರ ಭೈಯೇಬಿ ಬಾಬಿ, ಕುಟುಂಬ್‌ವಾಳುಬಿ ಮಾರಕನ ಆಯಿರ‍್ಹಾಸ್; ಇವ್ಣೆ ಮೇಂಢಾನಿ ಕಾವಲ್ ಕರಾನು, ಢಾಂಡ ಚ಼ರಾವಾನು ಇವ್ಣು ಕಾಮ್. ಇವ್ಣೆ, ಇವ್ಣು ಢಾಂಡ ಮೇಂಢ, ಇವ್ಣಕನ ಥೂತೆ ಖ್ಹಾರೂಸ್ ಲೈರಾಖ್ಯೂಸ್” ಕರಿ ಬೋಲೂಸ್. ಫರೋಹ ತುಮುನ ಬುಲೈನ್, “ತುಮಾರು ಕಾಮ್‌ಶಾತ್‌?” ಕರಿ ಬೋಲ್ಯೋತೊ, “ಅಡ್ಡಾಣಿಥು ಧರೀನ್ ಹಮ್ಕೆಲಗೂಬಿ ತಾರ ಆಳ್‌ಹುಯಿರಾತೆ ಹಮೆ, ಹಮಾರ ಗುರುಗುರಬ್‌ಲ್ಯಾನಿ ಪದತ್ತಿನಿತರ ಢಾಂಡ ಚ಼ರಾವವಾಳ” ಕರಿ ಬೋಲೊ. ಜಾನ್ವಾರ್ ಪಾಳವಾಳು ಈಜಿಪ್ಟ್‌ವಾಳನ ಗಲೀಜ಼್ ದೆಖಾವಸ್ ಇನಖ್ಹಾಜೆ, ಗೋಷೆನ್ ತಬರ್ಖಾನ ತುಮುನ ರ‍್ಹಾವನ ದಿಶೆ” ಕರಿ ಬೊಲ್ಯೊ.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.