Waghri Booli Bible
ಆದಿಕಾಂಡ 45
ಯೋಸೇಫ ಕೋಣ್‌ಕರಿ ಇನ ಭೈಯೇನ ಮಾಲುಮ್ ಕರಾಯೋತೆ
ಯೋಸೇಫ ಅನ ಖ್ಹಮ್‌ಜಿನ್ ಇನಾಕನ ಭಿಯರ‍್ಹಾವಳನ ಖ್ಹಾಮ್ಣೆ ದುಖ್ ಖ್ಹಮಾಳನ ಕೊಹೋಯ್ನಿತೆ, ಖ್ಹಾರಾನ ಮಾರಕಂಥು ಭಾರ್ ಮೋಕ್ಲೊ” ಕರಿ ಚಿಕ್‌ರ‍್ಯೊ. ಯೋಸೇಫನೆ ಇನ ನ್ಹಾನಮೋಟ ಭೈಯೇನ ಇನು ಖ್ಹಣೇದ್‌ ಮಳಾನಿತರ ಕರಾನಿ ವೇಳ್ಮ ಬಿಜು಼ ಕೋಣ್ಬಿ ಖನ್ನೆ ಕೋಥೂನಿ. ಯೊ ಜೋ಼ರೇಖ್ಹು ರೋಯೊತೆ ಇನಖ್ಹಾಜೆ ಈಜಿಪ್ಟ್‌ವಾಳಾನಾಬಿ, ಫರೋಹನ ಘರ್‌ವಾಳನಾಬಿ ಯೊ ಅವಾಜ಼್‌ ಖ್ಹಮಜ಼್‌ಪಡ್ಯು. ತದೆ ಯೋಸೇಫ್‌ನೆ, ಇನ ನ್ಹಾನ ಮೋಟ ಭೈಯೇನ, “ಮೇ ಯೋಸೇಫ, ಮಾರೊ ಬಾ ಬಿಜೂ಼ಬಿ ಛಾ಼ಕಿಶೂ?” ಕರಿ ಬೋಲಾಖ್ಹತರ್ ಇವ್ಣೆ ಇನ ಖ್ಹಾಮ್ಣೆ ಅಕ್‌ಬಕೈನ್ ಫೇಡ್‌ದ್ಯಾವಾನ ಕೋಹುಯುನಿ. ಅಜು಼ ಯೋಸೇಫನೆ, “ಮಾರ ಖನ್ನೆ ಆವೊ” ಕರಿ ಭೈಯೇನ ಬೋಲಾಖ್ಹತರ್ ಇವ್ಣೆ ಖನ್ನೆ ಆಯಾ. ಇನೆ ಇವ್ಣುನ “ಈಜಿಪ್ಟ್ ದೇಖ್ಹ್‌ನ ವೇಚಿನಾಖ್ಯಾತೆ ತುಮಾರೊ ನ್ಹಾನೊ ಭೈ ಯೋಸೇಫ ಮೇಸ್. ಮನ ತುಮೆ ಇಮ್ ವೇಚಿನಾಖ್ಯಾತೆ ಇನಖ್ಹಾಜೆ ವೇಚ಼್‌ಣೆಥಿ ದುಖ್ ನಕೊ ಕರೊ. ದೇವ್ನೆಸ್ ತುಮೂನ ಬಚಾ಼ಡಾನಖ್ಹಾಜೆ ಮನ ತುಮಾರೇಥಿ ಅಗಾಡಿ ಹಜ್ಜಾ಼ ಮೋಕ್‌ಲ್ಯೊ. ದೇಖ್ಹ್‌ಮ ಕಾಳ್‌ದುಕಾಳ್ ಆಯಿನ್ ತದೇಸ್‌ ಬೇ ವರಖ್ಹ್ ಹುಯ್ಗ. ಬಿಜೂ಼ಬಿ ಪಾಚ಼್‌ ವರಖ್ಹ್‌ಲಗು ಬಿತ್ ಕರಾನರ‍್ಹವೋ, ವ್ಹಾಡ್‌ವಾನರ‍್ಹವೋ, ಮೋಕಕೊಯ್ನಿ. ತುಮಾರಿ ಖಾನ್‌ದಾನ್‌ ಜ಼ಮೀನ್‌ಪರ್‌ ಬಚಾ಼ನಿತರಾಬಿ ತುಮೆ ಆ ಖತ್ರಾಮ ಜಾನ್‌ ಬಚಾ಼ಯೊ, ಘಣು ಅದ್ಮಿ ಹುವಾನಿತರಾಬಿ ದೇವ್ನೆ ಮನ ಅಗಾಡಿ ಮೋಕ್‌ಲ್ಯೋತೆ. ಖ್ಹಚಂಬಿ ಮನ ಮೋಕ್‌ಲ್ಯಾತೆ ತುಮೆ ಕಾಹೆ, ದೇವ್‌ನೇಸ್ ಮನ ಫರೋಹನೋ ಬಾ ಬಣಾಯೊ, ಅಜು಼ ಮಂತ್ರಿ ಬಣೈನ್‌ಬಿ, ಇನಿ ಮಹೇಲ್‌ಮ ಮೋಟೊ ಅದಿಕಾರಿ ಕರೀನ್‌, ಈಜಿಪ್ಟ್ ದೇಖ್ಹ್‌ನಪರ್ ಅಖ್ಖೀಸ್‌ ಅದಿಕಾರ್‌ಬಿ ದೀರಾಖ್ಯೋಸ್. ತುಮೆ ಜ಼ಲ್ದಿ ಮಾರ ಬಾಕನ ಜೈ಼ನ್ ಇನ, ‘ತಾರೊ ಛಿಯ್ಯೊ ಯೋಸೇಫ ಅಮ್ ಬೊಲ್ಯೊ ಕರೊ ಬೋಲೊ, ದೇವ್ನೆ ಮನ ಈಜಿಪ್ಟ್ ದೇಖ್ಹ್‌ಪರ್ ಮೋಟೊ ಅದಿಕಾರಿ ಕರಿರಾಖ್ಯೋಸ್. ತೂ ಠೇರ್‌ ನಕೋತೆ ಮಾರಾಕನ ಆವ್. ತೂ ಗೋಷೆನ್ ತಬರ್‌ಖಾಮ ಜಿವ್ಣುಕರೇಜಾ಼ಯ್. ತೂಬಿ, ತಾರ ಲಡ್ಕಾವ್‌ಬಿ, ನಾತಿ ಪೋತಿಬಿ, ಮೇಂಢುಢಾಂಡುಬಿ, ಬಿಜು಼ ಖ್ಹಾರುಬಿ ಮಾರಾಕನ ರ‍್ಹಿಶೆ. ಆ ಕಾಳ್‌ ದುಕಾಳ್ ಖತಮ್ ಹುವಾನ ಬಿಜೂ಼ಬಿ ಪಾಚ಼್‌ವರಖ್ಹ್‌ ಜಾ಼ವ್ಣು. ಇನಖ್ಹಾಜೆ ತುನಾಬಿ ತಾರ ಘರ್‌ವಾಳನಾಬಿ ತುನಛಾ಼ತೆ ಖ್ಹಾರೂಸ್ ಗರೀಬ್ ನಾಹೋಣುತೆ ತಿಮ್ ಹಜ್ಜಾ಼ ತುಮುನ ಪಾಳೂಸ್‌’ ಕರಿ ಬೋಲುಕರಸ್‌ ಕರಿ ಖ್ಹಮ್‍ಜಾ಼ಡೊ. “ಮೇ ಖ್ಹುದ್ ತುಮಾರೇಥಿ ವಾತ್ ಬೋಲಿರಾಖ್ಯೋಸ್ನಿ, ಇನಖ್ಹಾಜೆ ತುಮೇಬಿ ದೇಕ್‌ಶು. ಮಾರಿ ಪೀಟ್‌ನ ಪೈದಹುಯೋತೆ ಬೆನ್ಯಾಮೀನ್‌ಬಿ ದೇಕ್‌ಶೆ. ಈಜಿಪ್ಟ್‌ದೇಖ್ಹ್‌ಮ ಮನಾಛಾ಼ತೆ ಮರ‍್ಯಾದಿ ಇಜ಼್ಜತ್‌ನಾಬಿ ತುಮೆ ದೆಖ್ಯಾತೆ ಅಖ್ಖೂಸ್ ಬಾನ ಖ್ಹಮ್‍ಜಾ಼ಡೊ, ಒಗ್ಗೀಸ್ ಇನ ಹಜ್ಜಾ಼ ಬುಲೈಲೀನ್ ಆವೊ” ಕರಿ ಬೊಲ್ಯೊ. ತದೆ ಇನೊ ಭೈ ಬೆನ್ಯಾಮೀನ್ನ ಗಳುಬಥೈನ್‌ ರೊಯೊ. ಬೆನ್ಯಾಮೀನನಾಬಿ ಇನು ಗಳುಬಥೈನ್‌ ರೊಯೊ. ಆನಾಹುಯಿನ್ ಇನೆ ಹರೇಕ್ ಮೋಟ ಭೈಯೇನಾಬಿ ಬುಚ್ಚಕರೀನ್‌ ಇವ್ಣುನ ಬಥೈಲೀನ್ ರೋಯೊ. ತದೆ ಇವ್ಣೆ ಇನಿಜೋ಼ಡ್ಮ ವಾತೆಬೋಲ್ಯ. ಯೋಸೇಫನ ಭೈಯೇ ಆಯಾತೆ ವಾತೆ ಫರೋಹನ ಘರ್‌ವಾಳಾನ ಮಾಲುಮ್ ಪಡಾಮ ಫರೋಹನಾಬಿ ಇನ ಘರ್‌ವಾಳನಾಬಿ ಖ್ಹುಷಿಹುಯು. ಫರೋಹನೆ ಯೋಸೇಫನ ಬುಲೈನ್, “ತೂ ತಾರ ಭೈಯೇನ ಖ್ಹಮ್‌ಜಾ಼ಡ್ನುತೆ ಶಾತ್‌ಕತೊ, ‘ತುಮಾರ ಗಧೇಡವ್‌ಪರ್ ಖ್ಹಾಮಾನ್‌ಅಖ್ಖು ಢೊಯಿಲೀನ್‌ ಕಾನಾನ್ ದೇಖ್ಹ್‌ನ ಜೈ಼ನ್, ತುಮಾರ ಬಾನಾಬಿ, ಘರ್‌ವಾಳನಾಬಿ ಮಾರಾಕನ ಬುಲೈಲೀನ್ ಆವೊ. ಈಜಿಪ್ಟ್ ದೇಖ್ಹ್‌ಮ ತುಮುನ ಅಛ್ಛಿ ಜ಼ಮೀನ್ನ ದೆವುಸ್‌. ತುಮೆ ಆ ದೇಖ್ಹ್‌ಮ ಅಛ್ಛು಼ ಖಾವಾನ ತುಮುನ ಮಳ್‌ಶೆ. ಅಜು಼ ಈಜಿಪ್ಟ್ ದೇಖ್ಹ್‌ಥು ಘೋಡಾನು ರಥ್‌ಖ್ಹಾರು ಲೀಜೈ಼ನ್ ತುಮಾರಿ ಬಾವಣ್ ಲಡ್ಕಾ ಅಜು಼ ಬಾನಬಿ ಬುಲೈಲೀನ್‌ಆವೊ. ತುಮಾರಿ ಆಸ್ತಿ ಪಾಸ್ತಿನಿ ಬಾರೇಮ ತುಮೆ ಮಾಥು ನಕೋಖಡೈಲೆವೊ. ಈಜಿಪ್ಟ್ ದೇಖ್ಹ್‌ಮಛಾ಼ತೆ ಘಣು ಅಛ಼್ಛು ರಾಛು಼ಖ್ಹಾರು ತುಮಾರುಸ್” ಕರಿ ಬೊಲ್ಯೊ. ಯಾಕೋಬನ ಛಿಯ್ಯಾ ಯೋಸ್ ಪರಕ್ ಕರ‍್ಯ. ಫರೋಹನ ಹುಕುಮ್‌ನಿ ಪರಕ್ಕಸ್‌ ಯೋಸೇಫ್‌ನೆ ಇವ್ಣುನ ಘೋಡಾನು ರಥ್‌ಖ್ಹಾರೂಬಿ ಜಾ಼ವಾನಿ ವಾಟ್ಪರ್ ಖಾವಾನ ಖಾಣುಬಿ ದೆವಾಡ್ಯೊ. ಯೊ ನಾಹುಯಿನ್ ಹರೇಕ್ ಜ಼ಣಾನಾಬಿ ಕಿಮ್ಮತ್‌ನು ನವು ಲುಂಗ್ಡು ದಿದೊ. ಬೆನ್ಯಾಮೀನ್ನಾತೋಬಿ ತೀನ್‌ಖ್ಹೊ ರೂಪಾನ ಕಾಖ್ಹ್‌ನ ಅಜು಼ ಪಾಚ಼್‌ ಜೋ಼ಡು ಲುಂಗ್‌ಡುದಿದೊ. ಇನ ಬಾನಖ್ಹಾಜೆ ಈಜಿಪ್ಟ್ ದೇಖ್ಹ್‌ನು ಅಛ಼್ಛು ರಾಛು಼ಅಖ್ಖು ದಖ್ಹ್‌ ಗಧೇಡಾಪರ್ ಢೊವಾಡಿನ್, ದಖ್ಹ್‌ ಗಧೇಡಿಪರ್ ಇನೊ ಬಾ ಆವಾನಖ್ಹಾಜೆ ಹೋಣುತೆ ಅಖ್ಖು ಅನಾಜ಼್, ರೋಟ ಅಜು಼ ಬಿಜು಼ಖ್ಹಾರು ಖಾಣನ ದೀಮೋಕ್‌ಲ್ಯೊ. ಇಮ್ಮಸ್ ಇನ ಭೈಯೇನ, “ತುಮೆ ವಾಟ್ಪರ್ ಲಡೈನಕೋಕರ್‌ಶು” ಕರಿ ಅಕ್ಕಲ್ ಬೋಲಿನ್ ಇವ್ಣುನ ಮೋಕ್‌ಲ್ಯೊ. ಇವ್ಣೆ ಚ಼ಲೆಗಯ. ಇವ್ಣೆ ಈಜಿಪ್ಟ್ ದೇಖ್ಹ್‌ಮ್ಹೇಲಿನ್ ಕಾನಾನ್‌ದೇಖ್ಹ್‌ಮ ಇನ ಬಾ ಯಾಕೋಬ್‌ಕನ ಆಯಾ. ಇನ, “ಯೋಸೇಫ್ ಬಿಜೂ಼ಬಿ ಬಚಿರ‍್ಹೋಸ್ ಯೊ ಈಜಿಪ್ಟ್ ದೇಖ್ಹ್‌ನೊ ಪ್ರಧಾನ ಅದಿಕಾರಿ ಹುಯಿರೋಸ್” ಕರಿ ಬೋಲಖ್ಹತರ್, ಯೊ ಖ್ಹಮ್‌ಜಿನ್ ಖ್ಹೊಪೋಪಡಿಗೊ. ಅಜು಼ ಇವ್ಣುನ ವಿಶ್ವಾಸ್ ಕರ‍್ಯೋಸ್‌ಕೊಯ್ನಿ. ಇನಪಾರ್ ಯೋಸೇಫ್‌ನೆ ಬೋಲಿ ಮೋಕ್‌ಲ್ಯೋತೆ ವಾತೆಖ್ಹಾರಿ ಖ್ಹಮ್‌ಜಿನ್, ಯೊ ಜಾ಼ವನಖ್ಹಾಜೆ ಯೋಸೇಫ್‌ಭಣಿಥು ಆಯೂತೆ ರಥ್‌ಖ್ಹಾರು ದೇಖ್‌ತಾನ ಯಾಕೋಬನು ದಿಲ್ಮ ಖ್ಹುಶಿಹುಯು. ಯೊ ಕಾಹೆತೆ ಇನ ನವೊ ಜಾನ್‌ ಆವಾಂತ್ರ ಹುಯು. ತದೆ ಯಾಕೋಬನೆ, “ಮಾರೊ ಛಿಯ್ಯೊ ಯೋಸೇಫ ಜಿವ್‌ತೊ ಛಾ಼. ಮನ ಎತ್ರೇಸ್ ಬಶ್‌. ಮೇ ಮರಾನ ಅಗಾಡಿ ಜೈ಼ನ್ ಇನ ದೇಖೂಸ್” ಕರಿ ಬೊಲ್ಯೊ.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.