Waghri Booli Bible
ಆದಿಕಾಂಡ 48
ಎಫ್ರಾಯಿಮ್ ಅಜು಼ ಮನಸ್ಸೆನ ಯಾಕೋಬನಿ ಆಶೀರ್ವಾದ್
ಥೋಡ ದನ್ ಜಾ಼ವಾದೀನ್, “ಬಾನ ಘಣು ಜಾನ್ನ ಅರಾಮ್‌ಕೊಯ್ನಿ” ಕರಿ ವಾತ್ ಯೋಸೇಫನ ಖ್ಹಮಜ಼್‌ಪಡ್ಯು. ತದೆ ಯೋಸೇಫನೆ ಮನಸ್ಸೆ ಎಫ್ರಾಯೀಮ್‌ಕರಿ ಇನ ಬೇ ಛಿಯ್ಯವ್‌ನ ಇನಜೋ಼ಡ್ಮ ಬುಲೈಲೀನ್ ಬಾಕನ ಆಯೊ. “ತಾರೊಛಿಯ್ಯೊ ಯೋಸೇಫ ತಾರಾಕನ ಆಯಿರ‍್ಹೋಸ್” ಕರಿ ಯಾಕೋಬನ ಬೋಲಖ್ಹತರ್, ಯಾಕೋಬನೆ ಖ್ಹವಾರೀನ್‌ ಬಿಛಾ಼ವ್ಣಪರ್ ಉಠಿ ಬೇಶಿಗಯೊ. ಇನೆ ಯೋಸೇಫನ, “ಸರ್ವಶಕ್ತ ಹುಯಿರ‍್ಹೋತೆ ಯೆಹೋವ ದೇವ್ ಕಾನಾನ್ ದೇಖ್ಹ್‌ನು ಲೂಜ಼್‌ಕರಿ ಖ್ಹಯೇರ್‌ಮ ಮನ ದರ್ಶನದೀನ್ ಆಶೀರ್ವಾದ್‌ಕರೀನ್, ಇನೆ ಮನ, ‘ತುನ ಭಡೈನ್ ತಾರಿ ಪಿಳ್ಗಿನ ಜಾ಼ಖ್ಹತ್ ಕರುಸ್. ಕೈಏಕ್ ಜ಼ಗ್‌ಜಾ಼ತ್ ತಾರೇಥಿ ಹುವಾನಿತರ ಕರುಸ್. ತಾರೇಥಿ ವಾರ್ ತಾರಿ ಪಿಳ್ಗಿನ ಆ ದೇಖ್ಹ್‌ನ ಹಮೇಶಾನಿ ಶೊತ್‌ ಬಣೈದೆವುಸ್‌” ಕರಿ ಬೊಲ್ಯೊ. ಮೇ ತಾರಾಕನ ಈಜಿಪ್ಟ್ ದೇಖ್ಹ್‌ನ ಆವಾನ ಅಗಾಡಿ ಹಜ಼್ಜ ಪೈದಹುಯಾತೆ ತಾರ ಬೇ ಛಿಯ್ಯಾ ಮಾರ ಲಡ್ಕಾಸ್. ರೂಬೇನ್ ಸಿಮೆಯೋನ್‌ ಮಾರ ಲಡ್ಕ ಹುಯಿರಾತೆ ತಿಮ್ಮಸ್ ಎಫ್ರಾಯಿಮ್ ಮನಸ್ಸೆಬಿ ಮಾರಛಿಯ್ಯ ಹುಯಿರ‍್ಹಾವದೆ. ಇವ್ಣ ವಾರ್ ತೂ ಜ಼ಣ್ಯೋತೆ ಲಡ್ಕ ತಾರ ಹುಯಿರ‍್ಹಾವದೆ. ಇವ್ಣೆ ಇವ್ಣ ಶೊಂತ್ ಭೈಯೇನು ಸೊತ್‌ಮ ಹಕ್‌ ಲೀಲಿನ್‌, ಇವ್ಣ ಖೂಮ್‌ನೂಸ್ ನಾಮ್ ಮ್ಹೇಲಿಲ್ಯಾವದೆ. ಶನಕತೊ ತುಮಾರಿ ಆಯಾ ರಾಹೇಲನೆ, ಮೇ ಪದ್ದನ್‌ಥು ಆವಾನಿ ವಖ್ಹತ್, ಕಾನಾನ್ ದೇಖ್ಹ್‌ಮ ಎಫ್ರಾತ್‌ನ ಜಾ಼ವಾನ ಬಿಜು಼ಥೋಡಿ ದೂರ್‌ರ‍್ಹಾವಾನಿ ವಖ್ಹ್‌ತೆ ರಾಹೇಲ ವಾಟ್‌ಪರಸ್ ಮರಿಗೈ. ಯೊ ಬೇತ್ಲೆಹೇಮ್‌ ಕರಿ ಬೋಲಾಯು. ಎಫ್ರಾತ್‌ನ ಜಾ಼ವಾನ ಮಾರಗ್‌ಪರ್ ಇನ ಮಖ್ಹಾಣ್ಯುಕರ‍್ಯೊ” ಕರಿ ಬೊಲ್ಯೊ. ಯಾಕೋಬನೆ ಯೋಸೇಫನ ಲಡ್ಕಾವ್ನ ದೇಖಿನ್‌, “ಅವ್ಣೆ ಕೋಣ್?” ಕರಿ ಪುಛಾ಼ಯೊ. ಇನ ಯೋಸೇಫನೆ, “ಆ ದೇಖ್ಹ್‌ಮ ಮನ ದೇವ್ನೆ ದಿದೋತೆ ಲಡ್ಕ” ಕರಿಬೋಲ್ಯೊ. ತದೆ ಬಾ ಯಾಕೋಬನೆ, “ಅವ್ಣುನ ಮೇ ಆಶೀರ್ವಾದ್ ಕರುಸ್; ಮಾರಕನ ಬುಲೈಲೀನ್ ಆವ್” ಕರಿ ಬೊಲ್ಯೊ. ಬುಢೊಹುಯಿಗೊತೆ ಇನಖ್ಹಾಜೆ ಯಾಕೋಬನ ಡೋಳ ಭುಂಬ್‌ಳಹುಯ್ಗಾಥ. ಯೋಸೇಫನೆ ಯೊ ಲಡ್ಕಾವ್ನ ಖನ್ನೆ ಲ್ಯಾವಾದಿನ್ ಇವ್ಣುನ ಬಥೈನ್ ಬುಚ್ಚಕರ‍್ಯೊ. ಇನಾಪಾರ್ ಇನೆ ಯೋಸೇಫನ, “ತಾರ ಮ್ಹೋಡಾನ ಪಾಛೊ಼ ದೇಖಿಶ್‌ಕರಿ ಮೇ ಹರಖ್ಹ್‌ ಕರಿರಾಖ್ಯೋಥೊಕೊಯ್ನಿ. ಹಮ್ಕೆ ತುನ ಕಾಹೆತೆ ತಾರ ಲಡ್ಕಾವ್‍ನಾಬಿ ದೇಖಾನಿಘೋಣಿ ದೇವ್ನೆ ಗೋರ್‌ ಕರ‍್ಯೊ” ಕರಿ ಬೊಲ್ಯೊ. ತದೆ ಯೋಸೇಫನೆ ಬಾನಿ ಮಾಂಡಿಪರ್‌ಥೊ ಇನ ಲಡ್ಕಾವ್ನ ಪಾಡಿಲೀನ್ ಬಾನ ಜ಼ಮೀನ್‌ಲಗು ಝು಼ಕಿನ್ ಖ್ಹಲಾಮ್ ಕರ‍್ಯೊ. ಇನಾಪಾರ್ ಯೋಸೇಫನೆ ಇನಿ ಖಾವಿಬಾಜೂ಼ಮ ಯಾಕೋಬನ ಡಾವ ಹಾತ್ನ ಖ್ಹಾಮ್ಣೆ ಎಫ್ರಾಯೀಮನಾಬಿ, ಇನಿ ಡಾವಿಬಾಜೂ಼ಮ ಯಾಕೋಬನ ಖಾವಹಾತ್‌ನ ಖ್ಹಾಮ್ಣೆ ಮನಸ್ಸೆನಾಬಿ, ಇವ್ಣ ಭೇಜ಼ಣಾನ ಇನ ಬಾಕನ ಭೀರಾಖ್ಯೊ. ಮನಸ್ಸೆ ಪೈಲ್ಹೋಟೊ ಛಿಯ್ಯೊ ರ‍್ಹಯೊತೋಬಿ , ಯಾಕೋಬನೆ ಇನೊ ಹಾತ್ ಆಡೊಪಾಡಿನ್ ನ್ಹಾನೊಹುಯಿರೋತೆ ಎಫ್ರಾಯೀಮ್‌ನ ಮುಡ್‌ಕ್ಯಾಪರ್ ಖಾವೋ ಹಾತ್, ಮನಸ್ಸೆನ ಮುಡ್‌ಕ್ಯಾಪರ್ ಡಾವೊ ಹಾತ್ನ ಮ್ಹೇಲ್ಯೊ. ಯೋಸೇಫನ ಅಮ್ ಬೋಲಿನ್ ಆಶೀರ್ವಾದ್ ಕರ‍್ಯೊ. “ಮಾರ ಗುರುಗುರಬ್‌ಲ್ಯ ಅಬ್ರಹಾಮ್, ಇಸಾಕ್ ಖೆವ ದೇವ್ನ ಪೂಜ಼ಕರ‍್ಯಾಕಿ ಯೋಸ್‌ ದೇವ್, ಅಡ್ಡಾಣಿಥು ಧರೀನ್‌ ಹಮ್ಕೆಲಗೂಬಿ ಮನ ಪಾಳ್‌ತೊ ಆಯೊ, ಹರೇಕ್ ಅವ್‌ಘಡ್‌ಥು ಮನ ಬಚಾ಼ಡ್‌ತೊಹುಯಿನ್ ಆಯೋತೆ ಯೊ ದೂತ, ಆ ಛೋ಼ಕ್ರಾವ್ನ ಆಶೀರ್ವಾದ್ ಕರಾದೆ. ಇವ್ಣೇಥಿ ಮಾರು ನಾಮ್‌ಬಿ, ಮಾರ ಗುರುಗುರಬ್‌ಲ್ಯ ಹುಯಿರ‍್ಹಾತೆ ಅಬ್ರಹಾಮ್, ಇಸಾಕನು ನಾಮ್‌ಬೀ ಘಟ್‌ಭೀರ‍್ಹಾವಾದೆ; ಅವ್ಣೆ ಜ಼ಮೀನ್‌ಪರ್ ಜಾ಼ಖ್ಹತ್‌ಹುಯಿನ್ ಘಣು ಪಿಳ್ಗಿವಾಳ ಹುವಾದೆ” ಕರಿಬೋಲ್ಯೊ. ಇನೊ ಬಾ ಖಾವೊ ಹಾತ್ನ ಎಫ್ರಾಯೀಮ್‌ನ ಮುಡ್‌ಕ್ಯಪರ್ ಮ್ಹೇಲಾನು ಯೋಸೇಫನ ಪಸಂದ್ ಕೋಲಾಗ್ಯೂನಿ. ಇನಖ್ಹಾಜೆ ಇನ ಬಾನ ಹಾತ್ನ ಎಫ್ರಾಯೀಮ್‌ನ ಮುಡ್‌ಕ್ಯಾಪರ್‌ಥು ಪಾಡಿನ್ ಮನಸ್ಸೆನ ಮುಡ್‌ಕ್ಯಪರ್ ಮ್ಹೇಲ್ಯೊ. ಇನೆ ಬಾನ, “ಬಾ, ಆಸ್ ಪೈಲ್ಹೋಟೊ ಛಿಯ್ಯೊ; ಅನ ಮುಡ್‌ಕ್ಯಪರ್ ಹಾತ್ ಮ್ಹೇಲ್ನು” ಕರಿ ಬೊಲ್ಯೊ. ಕತೋಬಿ ಬಾನೆ ಮಾನ್ಯೊಕೊಂತೆ, “ಛಿಯ್ಯಾ ಮನ ಮಾಲುಮ್‌ಲ, ಮನ ಮಾಲುಮ್; ಅನೇಥಿಬಿ ಎಕ್ ಮುಲಕ್ ಉಬಜ಼್‌ಶೆ ; ಆಬಿ ತಾಖತ್‌ವಾಳೊ ಬಣ್‌ಶೆ. ಅನಿ ಪಿಳ್ಗಿಮಾಸ್ ಘಣು ಅದ್ಮಿಖ್ಹಾರು ಪೈದಾಉಶೆ” ಕರಿ ಬೊಲ್ಯೊ. ಯೊ ದನ್ನೆ ಇವ್ಣುನ ಇನೆ ಆಶೀರ್ವಾದ್‌ಕರೀನ್, “ತುಮಾರ ನಾಮೇಥಿ ಇಸ್ರಾಯೇಲ್‌ವಾಳು ಆಶೀರ್ವಾದ್ ಲೀಲಿಶೆ. ಎಫ್ರಾಯಿಮ್ ಅಜು಼ ಮನಸ್ಸೆನಿತರ ದೇವ್ ತುಮುನಾಬಿ ಆಶೀರ್ವಾದ್‌ಕರಾದೆ” ಕರಿ ಬೋಲಿನ್ ಅಮ್ ಎಫ್ರಾಯೀಮ್‌ನ ಮನಸ್ಸೆನ ಖ್ಹಾಮ್ಣೆ ಭೀರಾಖ್ಯೊ. ತದೆ ಯಾಕೋಬನೆ ಯೋಸೇಫನ, “ಮನ ಮರಣ್ ಖನ್ನೆ ಆವ್‌ತಿರ‍್ಹಿ ; ಕತೋಬಿ ದೇವ್ ತುಮಾರಿ ಜೋ಼ಡ್ಮರ‍್ಹೀನ್‌, ತುಮುನ ಗುರುಗುರಬ್‌ಲ್ಯನ ದೇಖ್ಹ್‌ನ ಪಾಛ಼ ಆವಖ್ಹರ್ಕು ಕರ್‌ಶೆ. ಆ ನಾಹುಯಿನ್‌ ತಲ್ವಾರ್‌, ಧೂಣ್‌ಥಿ ಮೇ ಅಮೋರಿಯವಾಳಾನ ಹಾತ್‌ಮಾಥು ಛೋ಼ಡಾಯೋತೆ ಪಹಾಡ್‌ನೊ ತಬರ್‌ಖಾನ , ತಾರ ಭೈಯೇನ ದಿದೋತೆ ಭಾಗ್‌ಥೀಬಿ ಘಣು ತುನ ದೀರಾಖ್ಯೋಸ್” ಕರಿ ಬೊಲ್ಯೊ.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.