Waghri Booli Bible
ಆದಿಕಾಂಡ 18
ಅಬ್ರಹಾಮ್‌ನ ಛಿಯ್ಯೊ ದ್ಯವಾನ ವಾಗ್ದಾನ್
ಅಬ್ರಹಾಮನ ತಡ್ಕಾನಿ ವಖ್ಹ್‌ತೆ ಮಮ್ರೆನ ಮೋರೆ ತೋಪ್‌ಮಾನು ಇನ ಡೇರಾಮ ಜಾ಼ವನಿ ವಾಟ್‌ಪರ್‌ ಬೆಠೋರ‍್ಹವಾನಿ ವಖ್ಹ್‌ತೆ ಯೆಹೋವನೆ ಇನ ದರ್ಶನ್‌ ದಿದೊ. ಕಿಮ್‌ಕತೊ, ಯೊ ಡೋಳಪಾಡಿನ್ ದೇಖಾಖ್ಹತರ್‌ ಇನಖ್ಹಾಮ್ಣೆ ಕೋಣ್‌ಕಿ ತೀನ್‌ಜ಼ಣ ಪರ್ಖ್ಹ ಭಿಯಾಥ. ತದ್ನು ತದೇಸ್‌ ಇವ್ಣುನ ಮಳಾನಖ್ಹಾಜೆ ಯೊ ಘರ್‌ಕಂಥು ನಾಶಿಜೈನ್ ಡುಗಿನ್ ಖ್ಹಲಾಮ್‌ಕರೀನ್, “ಗುರುಜಿವೋ, ದಯ ರ‍್ಹವಾದೆ, ಮಾರ ಘರ್‌ನ ಭೀಡೆಕರಿ ಸೇವಕಕನ ಆಯಕೊಂತೆ ತುಮೆ ಆಗಾಡಿ ನಕೊ ಜಾ಼ವೊ. ಮೇ ತುಮಾರೊ ಸೇವೆ ಕರಾವಾಳೊ ಹುಯಿರ‍್ಹೋಸ್. ಪಾಣಿ ಮಂಗೈದೇವ್‌ಸ್; ತುಮಾರ ಗೋಡ ಧೋಯಿಲೀನ್ ಝಾ಼ಡ್‌ಣ ಛಾ಼ಳೆ ಅರಾಮ್‌ ಕರಿಲೆವೊ. ಥೋಡು ಖಾಣು ಲೀಆವ್‌ಸ್, ಖಾದಾತೊ ಶಕತ್ ಆವ್‌ಶೆ ತದೆ ತುಮೆ ಅಗಾಡಿ ಜ಼ಯೇಜಾ಼ಯ್‌” ಕರಿ ಬೋಲಖ್ಹತರ್‌ ಇವ್ಣೆ, “ತೂ ಬೋಲ್ಯೊತೆ ತಿಮ್ಮಸ್ ಹುವಾದೆ” ಕರಿ ಬೋಲ್ಯ. ತದೆ ಅಬ್ರಹಾಮ್ ಡೇರಮಥೀತೆ ಸಾರಕನ ಮಿಲೈಜೈ಼ನ್‌ ಇನ, “ಛಾ಼ಣ್ಯಹುಯ 1ಆಟಾನ ಘೂಂದಿನ್ ಜ಼ಲ್ದಿ ರೋಟ ಕರ್‌” ಕರಿ ಬೊಲ್ಯೊ. ಇನಪಾರ್ ಅಬ್ರಹಾಮ್ ನಾಶಿಜೈನ್ ಝೂ಼ಂಡ್‌ಮಾಥು ಪಲ್ಯಹುಯ ಕವ್‌ಳ ಕೆಲ್ಡಾನ ಲಯಿನ್ ಆಳ್ನ ಹಾತ್ಮದಿದೊ. ಆಳ್ನೆ ಜ಼ಲ್ದಿ ಪಲ್ಯಹುಯ ಕೆಲ್ಡಾನ ಕತ್ರಿನ್‌ ಖಾಣು ಪಿಕಾಯೊ. ಇನಪಾರ್ ಆಬ್ರಹಾಮ್‌ನೆ ಜಾನ್ವರ್‌ನ ದೂದ್ ಧೈಬಿ ಬೋಟಿನಾಬಿ ಲೀಐನ್ ಯೊ ಅದ್ಮಿಖ್ಹಾರನ ನಾಖಿ ಖಡಾಯೊ. ಇವ್ಣೆ ಝಾ಼ಡ್‌ಹೇಟ್‌ ಖಾಣು ಖಾವಲಗೂಬಿ ಯೊ ಖನ್ನೆ ಭಿರೀನ್ ಉಪಚಾರ್‌ ಕರ‍್ಯೊ. ಇನಕೇಡೆಥು ಇವ್ಣೆ ಅಬ್ರಹಾಮ್‌ನ, “ತಾರಿ ಬಾವಣ್‍ ಸಾರ ಕಿಜ಼್ಜ ಛಾ಼?” ಕರಿ ಬೋಲಖ್ಹತರ್‌ ಇನೆ “ಹುಜ್ಜಾ಼ ಡೇರಾನ ಘರ್ಮಛಾ಼” ಕರಿ ಬೊಲ್ಯೊ. ತದೆ ಇವ್ಣಾಮ ಏಕ್‌ಜ಼ಣಾನೆ, “ವಳ್ಯಾವತೆ ವರಖ್ಹ್‌ ಆಸ್ ದನ್ಮ ಪಾಛೊ಼ಫರಿ ತಾರಕನ ಐಶ್; ಆವಾದಿನ್ ತಾರಿಬಾವಣ್‌ ಸಾರನ ಛಿಯ್ಯೊ ರ‍್ಹಿಶೆ” ಕರಿಬೋಲ್ಯೊ. ಯೊ ವಾತ್ ಬಾಕಲ್‌ನ ಪೀಠೆಥೀತೆ ಸಾರನ ಕಾನ್ಮಪಡ್ಯು. ಅಬ್ರಹಾಮ್‌ಬಿ ಸಾರಬಿ ಘಣಭುಡಾ ಹುಯಿರ‍್ಹಾಥ; ಸಾರನ ಮುಟ್‌ಭೀರಿಗಯುಥು. ಅಮ್‌ ರ‍್ಹವಾಮ ಇನೆ, “ಮಾರಿನಿತರಾನಿ ಭುಡೀಯಾನ ಬಾವ್ರಿನ ಮಳಾನ ಉಷೇಕಿ ಶು?” ಮಾರೊ ಯಜಮಾನ್‌ಬಿ ಭುಡೋನಿ ಕರಿ ಇನುಯೋಸ್ ಹಾಶಿ. ಯೆಹೋವ ದೇವ್ ಅಬ್ರಹಾಮ್‌ನ, “ಸಾರನೆ ಹಾಶಿನ್, ಭುಡಿಯ ಹುಯಿರಿತೆ ಮೇ ಲಡ್ಕುಜ಼ಣಾನ ಉಷೇಕಿ ಶು ಕರಿ ಹಾಶಿನ್ ಬೋಲಿತೆ ಕಿಮ್?” ಯೆಹೋವನ ಹೋಯಿಕೊಂತೆ ಖೆವುಛಾ಼? ಮೇ ಬೋಲ್ಯೊತೆ ತಿಮ್ಮಸ್ ಆವ್‌ಶೇತೆ ವರಖ್ಹ್‌ ಆಸ್ ಹಗಾಮ್ಮ ಮೇ ತಾರಕನ ಆವಾದಿನ್ ಸಾರನ ಛಿಯ್ಯೊ ರ‍್ಹಿಶೆ” ಕರಿ ಬೊಲ್ಯೊ. ತದೆ ಸಾರ ಡರಿನ್, “ಮೇ ಹಾಶಿಕೊಯ್ನಿನಿ” ಕರಿ ಬೋಲ್ತಾನ ಇನೆ ಇಮ್‌ ನಕೊ ಬೋಲ್, ತುನೆ ಹಾಶಿತೆ ಖ್ಹಾಚಿಸ್” ಕರಿಬೋಲ್ಯೊ.
ಸೊದೋಮ್‌ನಖ್ಹಾಜೆ ಅಬ್ರಹಾಮ್‌ನಿ ಬಿಂತಿ
ಯೊ ತೀನ್ ಅದ್ಮಿವ್‌ ಹಿಜ್ಜಾ಼ಥ ನಿಕ್ಳಿನ್ ಸೊದೋಮ್‌ಭಣಿ ದೇಖ್ಯ; ಅಬ್ರಹಾಮ್ ಇವ್ಣುನ ಮೋಕ್ಲಾನ ಇವ್ಣ ಜೋ಼ಡ್ಮಾಸ್ ಗಯೊ. ತದೆ ಯೆಹೋವ ದೇವ್ನೆ ಇನ ದಿಲ್ಮ, “ಮೇ ಕರ್ನುಕರಿ ಛೂ಼ತೆ ಕಾಮ್ನ ಅಬ್ರಹಾಮ್‌ಥಿ ಲಪಾಡನು ಬರೋಬರ್‌ಕಿಶು? ಅಬ್ರಹಾಮ್‌ಥಿ ಘಣು ತಾಖತ್‌ನು ಮೊಟು ಜ಼ಗ್‌ಜಾ಼ತ್‌ ಪೈದಹೋಣುನಿ; ಇನೇಥಿ ಧರ್ತಿನು ಅಖ್ಖೂಸ್ ಜ಼ಗ್‌ಜಾ಼ತ್‌ನಾಬಿ ಆಶೀರ್ವಾದ್‌ ಉಷೇನಿ; ಅಬ್ರಹಾಮ್ ಇನ ಛಿಯ್ಯಾವ್‌ನಾಬಿ, ಪಿಳ್ಗಿವಾಳನ ‘ತುಮೆ ನ್ಯಾವ್ ನೀತಿನ ಪಾಡಿ ಚಾ಼ಲ್ತಹುಯಿನ್ ಯೆಹೋವ ದೇವ್ನ ಮಾರಗ್‌ಪರ್‌ ಚಾ಼ಲ್ನುಕರಿ ಬೋಧನ್‌ಕರಾನಿ ಘೋಣಿ ಮೇ ಇನ ಚೂ಼ಣಿಲಿದೋನಿ; ಇವ್ಣೆ ಅಮ್‌ ಕರಾಥಿ ಯೆಹೋವ ಹುಯಿರ‍್ಹೋತೆ ಮಾರಿ ವಾಗ್ದಾನ್ ಪೂರಉಷೆಕರಿ ಬೋಲಿಲಿದೊ. ಆ ನಾಹುಯಿನ್ ಯೆಹೋವನೆ, “ಸೊದೋಮ್ ಗೊಮೋರನಿ ಖ್ಹರಪ್‌ಗೋಳ್‌ ಮನ ಖ್ಹಮಜ಼್‌ಪಡ್ಯು; ಇವ್ಣು ಪಾಪ್ನು ಕಾಮ್‌ ಕೆವ್‌ಡುಕಿ ಮೊಟು ಹುಯಿರ‍್ಹುಸ್, ಇನಖ್ಹಾಜೆ ಮೇ ಉತ್ರಿಜೈ಼ನ್ ದೇಖುಸ್, ಮನ ಛಿಮೈರ‍್ಹೀತೆ ಬಿಂತಿನಿಘೊಣೀಸ್ ಇವ್ಣೆ ಕರಿರಾಖ್ಯುಸ್ಕಿ ಕೊಯ್ನಿಕಿಕರಿ ದೇಖಿನ್ ಮಾಲುಮ್‌ ಕರಿಲೆವುಸ್‌” ಕರಿ ಬೊಲ್ಯೊ. ಯೊ ಅದ್ಮೇವ್‌ ಹಿಜ್ಜಾ಼ಥ ಸೊದೋಮ್‌ಭಣಿ ಗಯ, ಕತೋಬಿ ಅಬ್ರಹಾಮ್ ಯೆಹೋವನ ಖ್ಹಾಮ್ಣೆ ಬಿಜೂ಼ಬಿ ಥೊ. ತದೆ ಅಬ್ರಹಾಮ್ ಖನ್ನೆಐನ್, “ತೂ ಖರಾಬ್‌ ಅದ್ಮಿನಿ ಜೋ಼ಡ್ಮ ನೀತಿವಾಳನಾಬಿ ನಾಶ್ ಕರಸ್ಕಿ ಶು? ಏಕ್‌ವೇಳ್‌ ಯೊ ಖ್ಹಯೇರ್‌ಮ ಅಢೈವೀಖ್ಹ್‌ಜ಼ಣು ನೀತಿವಾಳು ರ‍್ಹಿಯುತೋಬಿ ರ‍್ಹಿಶೆ. ಇನಾಮ ಅಢೈವೀಖ್ಹ್‌ಜ಼ಣು ನೀತಿವಾಳು ರ‍್ಹಯುತೋಬಿ ಯೊ ಖ್ಹಯೇರ್ನ ನಾಶ್‌ಕರಿಷ್ ಕೊಂತೆ ಬಚಾ಼ಡಿಶ್ ಕಿಶು? ಇಮ್ನಿ ಪರಕ್ಮ ಖರಾಬ್‌ನಾಬಿ ನೀತಿವಾಳನಾಬಿ ಪರ್‌ಖ್ಯೊಕೊಂತೆ ಖರಾಬ್‌ನಿ ಜೋ಼ಡ್ಮ ನೀತಿವಾಳನಾಬಿ ಮಾರಿನಾಖನು ತಾರೇಥಿ ಕದೇಬಿ ನಾಹೊಣು; ಖ್ಹಾರಸ್ ಜಗತ್ನ ನ್ಯಾವ್ ದ್ಯವಾಳೊ ನ್ಯಾವ್ನಸ್ ಚ಼ಲಾವ್‌ಶೆ ಕೊಯ್ನಿಕಿಶು?” ಕರಿ ಬೊಲ್ಯೊ. ತದೆ ಯೆಹೋವನೆ, “ಸೊದೋಮ್ಮ ಅಢೈವೀಖ್ಹ್‌ಜ಼ಣು ನೀತಿವಾಳು ಮನ ಮಳ್ಯುತೊ ಇವ್ಣಖ್ಹಾಜೇಥಿ ಅಖ್ಖ ಖ್ಹಯೇರ್‌ನಾಸ್ ಬಚಾ಼ಡುಸ್ ಕರಿಬೋಲ್ಯೊ. ಇನ ಅಬ್ರಹಾಮ್‌ನೆ, “ಹಂದೇಕ್‌, ಮಾಟಿಬಿ, ರಾಕ್‌ಬಿ ಹುಯಿರ‍್ಹೋತೆ ಮೇ ಪ್ರಭುನಿ ಜೋ಼ಡ್ಮ ಅಬ್ಬಾಜ಼ಬ್ಬಿ ಬೋಲಾನ ಧಿಲ್‌ಪತ್ ಲೀರಾಖ್ಯೊಸ್. ಕತೋಬಿ ಏಕ್‌ವೇಳ್‌ ಅಢೈಖ್ಹ್‌ ನೀತಿವಾಳಮ ಪಾಚ಼್‌ಜ಼ಣ ಕಮ್‌ರ‍್ಹಿಯುತೊ ಯೊ ಪಾಚ಼್‌ಜ಼ಣನಖ್ಹಾಜೆ ಖ್ಹಯೇರ್ನ ಅಖ್ಖು ನಾಶ್ ಕರೀಶ್ಕಿ ಶು?” ಕರಿ ಬೋಲಖ್ಹತರ್‌ ಯೆಹೋವನೆ, “ಹಿಜ಼್ಜ ಪಾಚ಼್‌ಉಪ್ಪರ್‌ ಚಾ಼ಳೀಖ್ಹ್‌ಜ಼ಣ ನೀತಿವಾಳ ಮಳ್ಯತೊ ಇನ ನಾಶ್ ಕರುಕೊಯ್ನಿ” ಕರಿ ಬೊಲ್ಯೊ. ಅಬ್ರಹಾಮ್ ಇನಿ ಜೋ಼ಡ್ಮ ಬಿಜೂ಼ಬಿ ವಾತ್ ಬೋಲಿನ್, ಏಕ್‌ವೇಳ್‌ ಹಿಜ಼್ಜ ಚಾ಼ಳಿಖ್ಹ್ ಜ಼ಣ ಮಳ್‌ಶೆಕರಿ ಬೋಲಖ್ಹತರ್‌ ಇನೆ “ಚಾ಼ಳೀಖ್ಹ್‌ಜ಼ಣು ಮಳ್ಯುತೊ ಯೊ ಖ್ಹಯೇರ್ನ ನಾಶ್ ಕರುಕೊಯ್ನಿ.” ಕರಿಬೋಲ್ಯೊ. ಅಬ್ರಹಾಮ್‌ನೆ, “ಪ್ರಭು ಇರಾದೊ ನಕೊಕರೀಶ್; ಮೇ ಪಾಛು಼ ವಾತೆ ಬೋಲ್ನುಸ್ ಪಡ್ಯು; ಏಕ್‌ ವೇಳ್‌ ಡೋಡಿಖ್ಹ್‌ಜ಼ಣು ಹಿಜ಼್ಜ ಮಳ್‌ಶೆ” ಕರಿ ಬೋಲಖ್ಹತರ್‌ ಇನೆ, “ಹಿಜ಼್ಜ ಡೋಡಿಖ್ಹ್‌ಜ಼ಣು ಮಳ್ಯುತೊ ಇನ ನಾಶ್ ಕರುಕೊಯ್ನಿ” ಕರಿಬೋಲ್ಯೊ. ಇನೆ, “ಹಂದೇಕ್‌, ಪ್ರಭುನಿ ಜೋ಼ಡ್ಮ ವಾತ್‌ಬೋಲಾನ ಹಿಮ್ಮತ್‌ ಲೀರಾಖ್ಯೊಸ್; ಏಕ್‌ವೇಳ್‌ ವೀಖ್ಹ್‌ಜ಼ಣು ಹಿಜ಼್ಜ ಮಳ್ಯುತೊ: ಕರಿ ಬೋಲಖ್ಹತರ್‌ ಇನೆ, “ವೀಖ್ಹ್‌ಜ಼ಣು ರ‍್ಹಿಯೂತೊ ಇವ್ಣಖ್ಹಾಜೆ ಯೊ ಖ್ಹಯೇರ್ನ ಬಚಾ಼ಡುಸ್ ನಾಶ್ ಕರುಕೊಯ್ನಿ” ಕರಿಬೋಲ್ಯೊ. ಅಬ್ರಹಾಮ್‌ನೆ, “ಪ್ರಭು ಇರಾದೊ ನಾಕರ‍್ನು ಬಿಜು಼ ಎಕ್ಕಸ್‌ಹಲ್ಲ ವಾತ್ ಬೋಲುಸ್; ಏಕ್‌ವೇಳ್‌ ದಖ್ಹ್‌ಜ಼ಣು ಮಳ್ಯುತೊ” ಕರಿ ಬೋಲಖ್ಹತರ್‌ ಇನೆ, “ದಖ್ಹ್‌ಜ಼ಣಾನ ಖ್ಹಾಜೇಬಿ ಇನ ಬಚಾ಼ಡುಸ್ ನಾಶ್‌ಕೊಕರುನಿ” ಕರಿಬೋಲ್ಯೊ. ಯೆಹೋವನೆ ಅಬ್ರಹಾಮ್‌ನಿ ಜೋ಼ಡ್ಮ ವಾತ್‌ಬೋಲಾನು ಖತಮ್‌ಕರಿನ್ ಹಿಜ಼್ಜಾಥೊ ಚ಼ಲೇಗಯೊ. ಅಬ್ರಹಾಮ್ ಇನಿ ಘರ್‌ಕನ ಪಾಛೊ಼ಫರಿನ್ ಗಯೊ.
Source notes (1)
- Footnote ಖ್ಹೋಳ ಕೇಜಿ ಎತ್ರು
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.