Waghri Booli Bible
ಆದಿಕಾಂಡ 17
ಖ್ಹತ್ನ, ಒಪ್ಪಂದನು ಖ್ಹಣೇದ್
ಅಬ್ರಾಮ್‌ ನೌಉಪ್ಪರ್‌ ಖ್ಹಡ್‌ಚಾ಼ರಿಖ್ಹ್‌ ವರಖ್ಹ್‌ವಾಳೊ ರ‍್ಹವಾನಿ ವಖ್ಹ್‌ತೆ ಯೆಹೋವ ದೇವ್ ನೆ ಇನಿ ದರ್ಶನ್‌ಮ, “ಮೇ ಸರ್ವಶಕ್ತ ದೇವ್ ಮಾರ ಖ್ಹಾಮ್ಣೆ ಖೋಟ್‌ಕೊಂತೆ ಚಾ಼ಲಿಲೆ. ಮೇ ತಾರಿ ಜೋ಼ಡ್ಮ ಒಪ್ಪಂದ ಕರಿಲೇವುಸ್‌; ಘಣೇಥಿ ಘಣು ಪಿಳ್ಗಿನ ತುನ ದೆವುಸ್‌” ಕರಿ ಬೊಲ್ಯೊ. ಅಬ್ರಾಮ್‌ ಆಡ್‌ಪಡಾಖ್ಹತರ್‌ ದೇವ್ ಇನಿಜೋಡ್ಮ ವಾತ್‌ಬೋಲಿನ್, “ಮೇ ತಾರಿಜೋ಼ಡ್ಮ ಎಕ್ ಒಪ್ಪಂದ ಕರಿಲೇವುಸ್‌; ಯೊ ಶಾತ್‌ಕತೊ ತೂ ಕೈಯೇಕ್ ಜ಼ಗ್ಜಾ಼ತ್ನ ಶುರುನೊ ಪರ್ಖ್ಹೊ ಹುಯಿರ‍್ಹೀಶ್. ಅನಪಾರ್‌ ತುನ ಅಬ್ರಾಮ್‌ಕರಿ ನಾಮ್‌ ಕೋರ‍್ಹಿಶೇನಿ, ತುನ ಅಬ್ರಹಾಮ್‌ ಕರಿ ನಾಮ್‌ ರ‍್ಹಿಶೆ. ಶನಕತೊ ತುನ ಕೈಏಕ್‌ ಜ಼ಗ್ಜಾ಼ತ್ನ ಶುರುವಾತ್ನೊ ಪರ್ಖ್ಹೋ ಬಣೈರಾಖ್ಯೊ. ತುನ ಘಣೇಥಿಘಣು ಪಿಳ್ಗಿನ ದಿಶ್ ತಾರೇಥಿ ಜ಼ಗ್‌ಜಾ಼ತ್‌ಖ್ಹಾರು ಉಬ್‌ಜಿನ್ ರಾಜ಼ವ್‌ಖ್ಹಾರು ಪೈದ ಉಷೆ. ಮೇ ತುನಾಬಿ ತಾರಿ ಖ್ಹಾರಿ ಪಿಳ್ಗಿನಾಬಿ ದೇವ್ ಹುಯಿರ್ಹಿಶ್. ಅಜು಼ ಮಾರಿ ಒಪ್ಪಂದನ ತಾರಖ್ಹಾಜೇಬಿ ತಾರಿ ಪಿಳ್ಗಿನು ಖ್ಹಾರುಸ್ ಮುಂಡೀನ್‌ಮುಂಡಿನ ಖ್ಹಾಜೇಬಿ ಹಮೇಶಾನು ಒಪ್ಪಂದಕರಿನ್ ಘಟ್‌ರಾಖಿಶ್. ಅಲಕ್‌ ದೇಖ್ಹ್‌ವಾಳೊ ಹುಯಿರೋತೆ ತೂ ಕಾನಾನ್‌ ದೇಖ್ಹ್‌ನು ಜ಼ಮೀನ್ ಅಖ್ಖುಸ್ ತುನಾಬಿ ತಾರ ಲಡ್ಕಾನಾಬಿ ಹಮೇಶ ರ‍್ಹವಾನು ಶೊತ್‌ಬಣೈದೀನ್, ಮೇ ಕದೆಕದೇಬಿ ಇವ್ಣುನ ದೇವ್ ಹುಯಿರ್ಹಿಶ್” ಕರಿ ಬೊಲ್ಯೊ. ಆನಾಹುಯಿನ್ ದೇವ್ನೆ ಅಬ್ರಹಾಮ್‌ನ, “ತೂತೋ ಮಾರಿ ಒಪ್ಪಂದನ ಪಾಡಿಚಾ಼ಲ್ನು. ತೂಸ್ ಖಲಿಕಾಹೇತೆ ತಾರ ಲಡ್ಕಖ್ಹಾರು ಮುಂಡೀನ್‌ಮುಂಡಿಲಗೂಬಿ ಪಾಡಿಚಾ಼ಲ್ನು. ತುನಾಬಿ ತಾರ ಲಡ್ಕಾನಾಬಿ ಪಾಡಿಚಾ಼ಲ್ನುತೆ ಆಸ್ ಮಾರಿ ಒಪ್ಪಂದನಿ ಖ್ಹಣೇದ್; ತುಮಾರಮ ಛಾ಼ತೆ ಖ್ಹಾರಾಸ್ ಪರ್ಖ್ಹಾನಬಿ ಖ್ಹತ್ನಹೋಣು. ತೂಬಿ ಖ್ಹತ್ನ ಹೋಣು ಶನಕತೊ ಯೋಸ್ ತುಮುನಾಬಿ ಮನಾಬಿ ಹುಯೂತೆ ಒಪ್ಪಂದನು ಖ್ಹಣೇದ್ ಹುಯಿರ‍್ಹಿಶೆ. ಶನಕತೊ ಅಗಾಡಿ ಮುಂಡೀನ್‌ಮುಂಡಿ ಹುಯಿನ್ ಆವ್‌ಶೇತೆ ಖ್ಹಾರುಸ್‌ಜ಼ಣು, ತುಮಾರ ಹರೇಕ್ ಪರ್ಖ್ಹ ಲಡ್ಕಾನಬಿ , ಆಟ್‍ದನ್ ಹುವಾದಿನ್ ಖ್ಹತ್ನಕರಾವ್ಣು; ಘರ್ಮ ಪೈದಹುವವಾಳೊ ರ‍್ಹವೊ, ತಾರಿ ಪಿಳ್ಗಿ ಕಾಹೆತೆ ಅಲ್ಹಾವ್‌ನ ಲಡ್ಕರ‍್ಹವೊ, ಅಲ್ಹಾವ್‍ಥಿ ಮೋಲ್‍ಲಿದುಹುಯು ರ‍್ಹವೊ; ಇವ್ಣುನಾಬಿ ಖ್ಹತ್ನಹೋಣು. ತಾರ ಘರ್ಮ ಪೈದಹುವವಾಳನಬಿ, ತೂ ಮೋಲ್‍ಲಿದಹುಯನಾಬಿ, ಖ್ಹತ್ನಹೋಣು. ಅಮ್ ಮೇ ಕರೂತೆ ಒಪ್ಪಂದನು ಖ್ಹಣೇದ್ ತುಮಾರ ಶರೀರ್‌ಮಾಸ್ ರ‍್ಹೀನ್, ಹಮೇಶಾನಿ ಒಪ್ಪಂದನ ದೆಖಾಡ್‌ಷೆ. ಖ್ಹತ್ನಕರಾವಕೊಂತೆ ಪರ್ಖ್ಹಾನ ಮಾರಿ ಒಪ್ಪಂದಾನ ಝಿಟ್ಕಾರನಿತರ ಹುವಾಸ್, ಇನಖ್ಹಾಜೆ ಇನ ಖೂಮ್‌ಥಿ ಭಾರ್‌ ಕಾಡಿನಾಕ್‌ಣು.” ಕರಿಬೋಲ್ಯೊ. ಆನಾಹುಯಿನ್ ದೇವ್ನೆ ಅಬ್ರಹಾಮ್‌ನ, “ತೂ ಅನಪಾರ್‌ ತಾರಿ ಬಾವಣ್ಣ ಸಾರಯ ಕರಿ ನಾ ಪುಕಾರ‍್ನುತೆ ಸಾರ ಕರಿ ಪುಕಾರ‍್ನು. ಮೇ ಇನ ಅಶೀರ್ವಾದ್‌ಕರೀನ್, ಇನೇಥಿ ತುನ ಏಕ್‌ ಛಿಯ್ಯಾನ ದೆವುಸ್‌. ಮೇ ಇನ ವಾರ್ಖ್ಹೊ ದಿದೋತೆ ಇನಖ್ಹಾಜೆ ಇನೇಥಿ ಕೈಯೇಕ್ ಜ಼ಗ್ಜಾ಼ತ್ನ ಆಯಹುಯಿನ್, ಖ್ಹಾರ ರಾಜ಼ವ್‌ಬಿ ಇನೇಥಿ ಉಬ್‌ಜಿ ಆವ್‌ಶೆ ಕರಿ ಬೊಲ್ಯೊ. ಅಬ್ರಹಾಮ್‌ನೆ ಆಡ್‍ಪಡಿನ್ ನಾಶೀನ್, ಖ್ಹೋ ವರಖ್ಹ್‌ವಾಳನ ಛಿಯ್ಯೊ ಪೈದ ಉಷೇಕಿ ಶು? ಖ್ಹಡ್‌ಚಾ಼ರಿಖ್ಹ್‌ನಿ ಸಾರ ಜ಼ಣ್‌ಶೆ ಕಿಶು? ಕರಿ ದಿಲ್ಮ ಕರಿಲಿದೊ. ಅಬ್ರಹಾಮನೆ ದೇವ್ನ, ಇಷ್ಮಾಯೇಲ್‌ ಛಾ಼ನಿ? ಯೋಸ್ ತಾರ ಆಶೀರ್ವಾದ್‌ಮ ರ‍್ಹಯೊತೊ ಬಶ್‌ಕೊಯ್ನಿಕಿಶು? ಕರಿ ಬೊಲ್ಯೊ, ದೇವ್ನೆ, “ಇಮ್‌ಕಾಹೆ, ತಾರಿ ಬಾವಣ್‍ ಹುಯಿರ‍್ಹಿತೆ ಸಾರಮಸ್‌ ತುನ ಏಕ್‌ ಛಿಯ್ಯೊ ಪೈದ ಕರ್ಷೆ. ಇನ ‘ಇಸಾಕ’ ಕರಿ ನಾಮ್‌ ಮ್ಹೇಲ್ನು. ಇನಿ ಜೋ಼ಡ್ಮಬಿ ಮಾರಿ ಒಪ್ಪಂದಾನ ಇನಿ ಪಿಳ್ಗಿನ ಜೋಡ್ಮ ಹಮೇಶಾಥಿ ಭಿರಾಖುಸ್. ಇಷ್ಮಾಯೇಲ್‌ನಿ ಬಾರೇಮ ತೂ ಕರ‍್ಯೊತೆ ಬಿಂತಿನ ಖ್ಹಮ್‍ಜಿರಾಖ್ಯೊಸ್ ಇನಾಬಿ ಆಶೀರ್ವಾದ್‌ ಕರಿರಾಖ್ಯೋಸ್; ಇನ ಭಡೈನ್ ಘಣೇಥಿ ಘಣು ಲಡ್ಕಾವ್ನ ದೆವುಸ್‌. ಯೊ ಭಾರಜ಼ಣ ರಾಜ಼ವ್ನ ಅಧಿಪತಿ. ಅಜು಼ ಇನೇಥಿ ಮೊಟು ಜ಼ಗ್‌ಜಾ಼ತ್‌ ಹುವಾನಿತರ ಕರಿಶ್. ಕತೋಬಿ ಯೊ ಮಾರಿ ಒಪ್ಪಂದಾನ ಇಸಾಕನಿ ಜೋ಼ಡ್ಮಾಸ್ ಕರಿಲೆವುಸ್‌; ಆವ್‌ಶೇತೆ ವರಖ್ಹ್‌ ಆಸ್ ಹಗಾಮ್ಮ ಸಾರ ಇನ ಜ಼ಣ್‌ಶೆ” ಕರಿಬೋಲ್ಯೊ. ತದೆ ದೇವ್ ಅಬ್ರಹಾಮ್‌ನಿ ಜೋ಼ಡ್ಮ ವಾತ್‌ಬೋಲಾನು ಖ್ಹತಮ್‌ಕರೀನ್ ಇನಕಂಥು ಪಡೈಗಯೊ.
ಯೋಸ್ ದನ್ನೆ ಅಬ್ರಹಾಮ್‌ನೆ ಇನೊ ಛಿಯ್ಯೊ ಇಷ್ಮಾಯೇಲ್‌ನಾಬಿ ಇನ ಘರ್ಮಥಾತೆ ಖ್ಹಾರಸ್ ಪರ್ಖ್ಹಾವ್‌ನಾಬಿ, ಕತೊ ಘರ್ಮ ಪೈದಹುವವಾಳನ ಖಲಿ ಕಾಹೆತೆ, ಯೊ ಮೋಲ್ ಲಿದಹುಯನಾಬಿ ದೇವ್ನಿ ಹುಕುಮ್‌ನಿ ಘೋಣಿಸ್ ಖ್ಹತ್ನ ಕರಾಯೊ. ಅಬ್ರಹಾಮ್‌ನ ಖ್ಹತ್ನ ಹುವಾನಿವಖ್ಹ್‌ತೆ ಇನ ನೌಉಪ್ಪರ್‌ ಖ್ಹಡ್‌ಚಾ಼ರಿಖ್ಹ್‌ ವರಖ್ಹ್‌ ಹುಯಿರ‍್ಹುಥು. ಇಷ್ಮಾಯೇಲ್‌ನ ಖ್ಹತ್ನ ಹುವಾನಿವಖ್ಹ್‌ತೆ ಇನ ಥೇರಾ ವರಖ್ಹ್‌ ಹುಯಿರ‍್ಹುಥು. ಅಬ್ರಹಾಮ್‌ನಾಬಿ ಇನೊ ಛಿಯ್ಯೊ ಇಷ್ಮಾಯೇಲ್‌ನಾಬಿ ಎಕ್ಕಸ್‌ ದನ್ಮ ಖ್ಹತ್ನ ಹುಯು. ಇನ ಘರ್ಮಥೂತೆ ಖ್ಹಾರಸ್ ಪರ್ಖ್ಹಾವ್‌ನಾಬಿ ಕತೊ ಘರ್ಮ ಪೈದಹುವವಾಳನ ಖಲಿ ಕಾಹೆತೆ ಅಲ್ಹಾವ್‍ಥಿ ಮೋಲ್ ಲೀದಹುಯನಾಬಿ ಇನಿ ಜೋ಼ಡ್ಮ ಖ್ಹತ್ನ ಹುಯು.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.