Waghri Booli Bible
ಆದಿಕಾಂಡ 16
ಹಾಗರ್‌ಬಿ ಇಸ್ಮಾಯೇಲ್
ಅಬ್ರಾಮ್‌ನಿ ಬಾವಣ್ ಸಾರಯನ ಲಡ್ಕಕೋಥಾನಿ. ಇನ ಈಜಿಪ್ಟ್ ದೇಖ್ಹ್‌ವಾಳಿ ಹಾಗರ್‌ಕರಿ ದಾಸಿಥಿ. ಅಮ್‌ರ‍್ಹಾವಪರ್ ಸಾರಯನೆ ಅಬ್ರಾಮ್‌ನ, “ಯೆಹೋವನೆ ಮನ ಲಡ್ಕ ಕೋದಿದೋನಿನಿ; ತೂ ಮಾರಿ ದಾಸಿಹುಯಿರ‍್ಹೀತೆ ಹಾಗರ್‌ಕನ ಜಾ಼ವ್ಣು; ಅಮ್ ಏಕ್‌ವೇಳ್ ಇನೇಥಿ ಮನ ಲಡ್ಕ ಉಷೆ” ಕರಿ ಬೋಲಖ್ಹತರ್ ಅಬ್ರಾಮ್‌ನೆ ಇನಿ ವಾತ್ನ ಖ್ಹಮ್‍ಜಿಗೊ. ಅಬ್ರಾಮ್‌ ದಖ್ಹ್‌ ವರಖ್ಹ್ ದನ್ ಕಾನಾನ್ ದೇಖ್ಹ್‌ಮ ಜಿವ್ಣುಕರಾನ ಬಾದ್ಮ ಇನಿ ಬಾವಣ್ ಸಾರಯನೆ ಈಜಿಪ್ಟ್‌ವಾಳಿ ಹಾಗರ್‌ಕರಿ ದಾಸಿನ ಇನೊ ಬಾವ್ರಿ ಅಬ್ರಾಮ್‌ನ ಬಾವಣ್‍ಬಣೈ ದಿನಾಖಿದಿದಿ. ಅಬ್ರಾಮ್‌ ಹಾಗರ್‌ನ ಮಳಾಖ್ಹತರ್ ಯೊ ಬೇಜೂನಿ ಹುಯಿ. ಇನೆ ಬೇಜೂನಿ ಛೂ಼ಕರಿ ಮಾಲುಮ್ ಕರಿಲಿನ್, ಇನೆ ಯಜಮಾನಿನ ಫಿಕ್ಕರ್ ಕರಿಕೊಯ್ನಿ. ತದೆ ಸಾರಯ ಅಬ್ರಾಮ್‌ನ, “ಮಾರಿಗೋಳ್ ತಾರಪರ್ ಪಡಾದೆ; ಮಾರಿ ದಾಸಿನ ತುನ ಬಾವಣ್ ಕರಿದಿದೀತೆ ಎತ್ರೇಸ್; ಯೊ ಬೇಜೂನಿ ಕರಿ ಮಾಲುಮ್ ಕರಿಲೀನ್ ಮನ ಫಿಕ್ಕರ್ ಕರಾಕೊಯ್ನಿ. ತಾರಬಿ ಮಾರ ಇಚ಼್‌ಮ ಯೆಹೋವಾಸ್ ನ್ಯಾವ್ ಫೇಡಾವದೆ” ಕರಿ ಬೋಲಿ. ತದೆ ಅಬ್ರಾಮ್‌ನೆ, “ತಾರಿ ದಾಸಿ ತಾರ ಹಾತ್ಮ ಛಾ಼ನಿ; ತಾರದಿಲ್‍ಮ ಆವಾತೆ ತಿಮ್‍ಕರ್” ಕರಿಬೋಲ್ಯೊ. ತದೆ ಸಾರಯನೆ ಇನ ಖ್ಹತಾವಖ್ಹತರ್ ಯೊ ನಾಶಿಚ಼ಲಿಗೈ. ಯೋಹೈರಿತೆ ರೇತ್‍ನ ತಬರ್‌ಖಾಮ ಶೂರ‍್ನಿ ವಾಟೆ ಪಾಣಿನೊ ಚೇಜ಼್‌ಭಾರಕನ ರ‍್ಹವಾನಿ ವಖ್ಹ್‌ತೆ ಯೆಹೋವನ ದೂತನೆ ಇನ ಮಳಿನ್ , “ಸಾರಯನಿ ದಾಸಿಹುಯಿರ‍್ಹೀತೆ ಹಾಗರ್‌, ಕಿಜ್ಜಾ಼ಥಿ ಆಯಿ? ಕಿಜ್ಜಾ಼ ಉಳೀಜಾ಼ಸ್?” ಕರಿ ಬೋಲಖ್ಹತರ್ ಇನೆ, “ಮಾರಿ ಯಜಮಾನಿ ಹುಯಿರ‍್ಹೀತೆ ಸಾರಯಕಂಥು ನಾಶಿವಳಿಜ಼ವ್‌ಸ್‌” ಕರಿ ಬೋಲಿ. ಇನ ಯೆಹೋವನ ದೂತನೆ, “ತೂ ಯಜಮಾನಿಕನ ಪಾಛಿಫರಿಜೈನ್ ಇನ ಹಾತ್‍ಹೇಟ್ ರ‍್ಹೇ, ಕರಿ ಬೊಲ್ಯೊ. ಆ ನಾಹುಯಿನ್ ಯೆಹೋವನ ದೂತನೆ ಇನ, “ತುನ ಘಣುಲಡ್ಕಾ ಹುವಾನಿತರ ಕರುಸ್; ತಾರಿ ಪಿಳ್ಗಿ ಗಣ್ತಿ ನಾಹೋಣುತೆ ಎತ್ರೆ ಜಾ಼ಖ್ಹತ್ ಉಷೆ” ಕರಿ ಬೊಲ್ಯೊ. ಯೆಹೋವನ ದೂತನೆ ಇನ “ತೂ ಬೇಜೂನಿ ಹುಯಿನ್; ತುನ ಛಿಯ್ಯೊ ಪೈದ ಉಷೆ; ಯೊ ಛಿಯ್ಯಾನ ‘ಇಷ್ಮಾಯೇಲ್‌’ ಕರಿ ನಾಮ್ ಮ್ಹೇಲ್ನು ಶನಕತೊ ಯೆಹೋವ ದೇವ್ ತಾರಿ ವದೇಖ್ಹ್‌ನಿ ಚಿಕ್ರಾಣ್ಣ ಕಾನ್‌ದಿದೊ. ಯೊ ಅದ್ಮಿ ಝಾ಼ಡೀನ ಗಧೇಡನಿತರ ರ‍್ಹಿಶೆ. ಯೊ ಖ್ಹಾರಸ್‌ಪರ್‌ ಹಾತ್‌ಪಾಡ್‌ಶೆ. ಅಜು಼ ಅಖ್ಖುಜ಼ಣುಬಿ ಇನ ವಿರೋದ್ ಹುಯಿರ‍್ಹಿಶೆ. ಇನ ನ್ಹಾನ ಮೋಟ ಭಯೇನ ಖ್ಹಾಮ್ಣೇಸ್‌ರ‍್ಹೀನ್ ಜಿವ್ಣುಕರ್ಶೆ” ಕರಿ ಬೋಲಿನ್ ಗಯೊ. ಇನಪಾರ್ ಹೈರಿತೆ ಇನಿ ಜೋ಼ಡ್ಮ ವಾತ್‌ಬೋಲ್ಯೋತೆ ಯೆಹೋವ ದೇವ್ನ, “ಮನ ದೇಖ್ಯೊತೆ ದೇವ್ ತೂ” ಕರಿ ನಾಮ್ ಮ್ಹೇಲಿ; ಶನಕತೊ, “ಮನ ದೇಖ್ಯೊತೆ ಇನ ಮೇ ದೇಖಿ” ಕರಿ ಬೋಲಿ. ಆ ಏಕ್‌ ಖೇಣಿಥಿ ಹಿಜ಼್ಜಾನಿ ಬಾವ್ಡಿನ ಲಹೈರೋಯಿಕರಿ ನಾಮ್‌ಹುಯು ಕತೊ “ಮನ ದೇಖಾವಳೊ ಜಾನ್ನ ಸ್ವರೂಪ್‌ನಿ ಬಾವ್ಡಿ” ಕರಿ. ಯೊ ಕಾದೇಶ್‌ನಾಬಿ ಬೆರೆದ್‌ನಾಬಿ ಬೀಚ್ಮ ಛಾ಼. ಹಾಗರ್‌ನೆ ಅಬ್ರಾಮ್‌ಥಿ ಏಕ್‌ ಛಿಯ್ಯಾನ ಜ಼ಣಿ. ಅಬ್ರಾಮ್‌ನೆ ಹಾಗರಥಿ ಪೈದಹುಯೋತೆ ಛಿಯ್ಯಾನ ಇಷ್ಮಾಯೇಲ್‌ ಕರಿ ನಾಮ್‌ಮ್ಹೇಲ್ಯೊ. ಹಾಗರ್‌ ಇಷ್ಮಾಯೇಲ್‌ನ ಜ಼ಣಾನಿ ವಖ್ಹ್‌ತೆ ಅಬ್ರಾಮ್‌ನ ಛೋ಼ಉಪ್ಪರ್‌ ಚಾರೀಖ್ಹ್‌ ವರಖ್ಹ್ ಹುಯಿರ‍್ಹುಥು.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.