Waghri Booli Bible
ಆದಿಕಾಂಡ 19
ಸೊದೋಮ್ ಗೊಮೋರನು ಪಾಪ್‌
ಯೊ ಬೇಜ಼ಣ ದೂತನೆ ಖ್ಹಾಂಜ಼್‌ನಿ ವಖ್ಹ್‌ತೆ ಸೊದೋಮ್‌ನ ಆವಖ್ಹತರ್ ಲೋಟಕರಿ ಏಕ್‌ಜ಼ಣೊ ಸೊದೋಮ್ ಗಾಮ್ನ ದರ್ವಾಜಕನ ಬೇಠೋಥೊ. ಇನೆ ಇವ್ಣುನ ದೇಖಿನ್ ಉಠಿಭೀರಿನ್ ಝು಼ಕಿನ್‌ಖ್ಹಲಾಮ್‍ ಕರಿನ್, “ಗುರುಜಿವೊ, ತುಮಾರ ದಾಸನ ಘರೆ ಅಯ್‍ರ್ಹೀನ್ ಹಾತ್ ಗೋಡ ಧೊಯಿನ್‌; ಆ ರಾತೆ ಮಾರ ಘರ್‌ಮ ರ‍್ಹೀನ್ ವ್ಹಾಣೆ ತುಮಾರಿ ಚಾ಼ಲ್‌ಕುಚ಼್ ಕರೆಜಾ಼ಯ್” ಕರಿಬೋಲ್ಯೊ. ಇವ್ಣೆ, “ಇಮ್‌ ಕಾಹೆ, ಮಾರಗ್‌ನಿ ಚೌ಼ಕ್‌ಮಾಸ್ ಹಮೆ ಆ ರಾತ್ ಕಾಡೇಸ್” ಕರಿ ಬೋಲ್ಯ. ತದೆ ಇನೆ ಇವ್ಣುನ ಘಣು ಜು಼ಲಮ್‌ ಕರ‍್ಯೋತೆಖ್ಹಾಜೆ ಇವ್ಣೆ ಇನಾಕನ ರ‍್ಹಾವನ ಮಾನಿಲಿದ. ಇವ್ಣೆ ಘರೆ ಆವದಿನ್ ಇನೆ ಶೋಡಕೊಂತೆ ರೋಟೊ ಕರೀನ್ ಮಿಝ಼್‍ವಾನ್ ಕರಾಖ್ಹತರ್ ಇವ್ಣೆ ಖಾಣುಖಾದ. ಇವ್ಣೆ ಖ್ಹುವಾನ ಅಗಾಡಿ ಲಡ್ಕಾವ್‍ಬಿ ಬುಢಾವ್‍ ಖ್ಹಮೇದ್ ಸೊದೋಮ್ ಖ್ಹಯೇರ್‌ವಾಳು ಖ್ಹಾರುಸ್ ಘರ್‌ನ ವಘೇರೊ ಕೋಂಡಿನ್, ಲೋಟನ, “ಆ ರಾತೆ ತಾರಕನ ಆಯಾತೆ ಅದ್ಮೇವ್‌ ಕಿಜ಼್ಜಾ ಛಾ಼? ಇವ್ಣುನ ಭಾರ್ ಬುಲೈಲೀನ್ ಆವ್; ಇವ್ಣೇಥಿ ಭೋಗ್ ಕರ‍್ನು” ಕರಿ ಚಿಕ್ರೀನ್ ಬೋಲ್ಯು. ಲೋಟ ಇವ್ಣಕನ ಭಾರ್ ಆಯಿನ್ ಇನ ಪೀಠೆ ಬಾಕಲ್ ಲಗಾಡಿನ್, “ದೋಸ್ತಿವೊ, ಆ ಖರಾಬ್ ಕಾಮ್‍ ನಕೊಕರೋ. ಖ್ಹಮ್‌ಜೊ಼, ಮನ ಬೇ ಕವಾರಿ ಛೋ಼ಕ್ರಿಯೆ ಛಾ಼. ಇವ್ಣುನತೋಬಿ ತುಮುನ ಲಯಿನ್ ದೆವ್ಸ್; ಇವ್ಣುನ ದಿಲ್ಮ ಆವಾತೆ ತಿಮ್ ಕರೆಜಾ಼ಯ್; ಕತೋಬಿ ಯೊ ಅದ್ಮೆವ್ನ ಶಾತ್ಬಿ ನಾಕರ‍್ನು” ಕರಿ ಬೊಲ್ಯೊ. ಇವ್ಣೆ ವಾಟ್‍ ಮ್ಹೇಲ್‌ ಕರಿ ಬೋಲಿನ್, “ಆ ಹೈರೋತೆ ಕೆಹೋಕಿ ಎಕ್ ಪರ್‌ದೇಖ್ಹ್‌ಥೊ ಅಯಿನ್ ಹಮ್ಕೆ ನ್ಯಾವ್‍ಣೊ ಬಣಾನ ಕರಸ್; ಯೊ ಅದ್ಮೆವ್ನ ಖರಾಬ್ ಕರಾಥೀಬಿ ಘಣು ತುನಾಸ್ ಖರಾಬ್ ಕರ್ಶು” ಕರಿ ಬೋಲಿನ್ ಲೋಟನ ಉಪ್ಪರ್‌ಪಡಿ ಬಾಕಲ್‍ನ ತೋಡಾನ ಖನ್ನೆ ಆಯ. ಕತೋಬಿ ಮ್ಹೈಥಾತೆ ಯೊ ಅದ್ಮೆವ್‌ನೆ ಲೋಟನ ಖೇಚಿ ಘರ್‌ಮ ಘಾಲಿಲೀನ್‌ ಬಾಕಲ್ ಮೂಚಿಲಿದು. ನ್ಹಾನ ಮೋಟಾವ್‌ ಕರಿ ದೇಖ್ಯಕೊಂತೆ ಭಾರ್‌ಥೂತೆ ಅದ್ಮೇವ್‌ನ ಡೋಳ ಭುಂಬ್‌ಳ ಕರ‍್ಯ. ಇವ್ಣುನ ಬಾಕಲ್ ಖೆವುಕರಿ ಮಾಲುಮ್ ನಾಪಡ್ನುತೆ ತಿಮ್ ಕರಿನಾಖ್ಯ.
ಲೋಟ ಸೊದೋಮ್‌ನ ಮ್ಹೇಲ್ಯೊತೆ
ತದೆ ಯೊ ದೂತಾವ್ನೆ ಲೋಟನ, “ಹಜ್ಜಾ಼ ತುನ ಬಿಜು಼ಕೋಣ್ ಛಾ಼? ಜ಼ಮೈಯೇನಾಬಿ ಪರ್ಖ್ಹ ಅಜು಼ ತಯೇಡ ಲಡ್ಕಾವ್ನಾಬಿ ಖ್ಹಯೇರ್‌ಮ ತುನ ಛಾ಼ತೆ ಖ್ಹಾರಸ್ನ ಗಾಮ್‌ಥಿ ಭಾರ್ ಬುಲೈಲಿನ್ ಜಾ಼. ಶನಕತೊ ಹಮೆ ಆ ಝ಼ಗೋನ ನಾಶಕರಾನ ಐರ‍್ಹಾಸ್. ಹಜ಼್ಜವಾಳಾನಿ ಬಾರೇಮ ಘಣುಮೋಟು ಅಪರಾದ್‌ ಯೆಹೋವನ ಛಿಮಾಯುತೆ ಇನಖ್ಹಾಜೆ ಅವ್ಣುನ ನಾಶ ಬಣಾವನಖ್ಹಾಜೆ ಇನೆ ಹಮೂನ ಮೋಕ್ಲಿರಾಖ್ಯೊಸ್” ಕರಿಬೋಲ್ಯು. ತದೆ ಲೋಟನೆ ಭಾರ್‌ಜೈನ್ ಇನ ಛೋ಼ರಿಯೇನ ವ್ಯಾಹ ಕರ‍್ನುಕರಿ ಥೋತೆ ಜ಼ಮೈಯೇನ ಆ ವಾತೆ ಖ್ಹಮ್‌ಜಾ಼ಡ್ಯೊ. “ತುಮೆ ಉಠೀನ್‌ ಆ ಝ಼ಗೋನ ಮ್ಹೇಲಿನ್ ನಿಕ್‌ಳೊ. ಯೆಹೋವದೇವ್‌ ಆ ಗಾಮ್ನ ನಾಶ್‌ ಕರ್‌ಶೆ” ಕರಿ ಬೊಲ್ಯೊ. ಕತೋಬಿ ಇವ್ಣೆ ಲೋಟನ ನಕ್ಲೆ ಕರುಕರಸ್ ಕರಿಲ್ಹಾಜ್ಯು. ದನ್ ನಿಕ್ಳಾನ ಅಗಾಡಿ ಯೊ ದೂತಾವ್ನೆ ಲೋಟನ, “ತೂ ಉಠೀನ್‌ ತಾರಿ ಬಾವಣ್ಣಾಬಿ ಛೋ಼ರಿಯೇನಾಬಿ ಒಗ್ಗಿ ಬುಲೈಲಿನ್ ನಿಕಳ್‌; ಗಾಮ್ನ ಹುವಾನಿ ನಿಶಥ್ಥಿ ತೂಬಿ ನಾಶ್‌ಹುಯಿಜೈಶ್‌” ಕರಿ ಬೋಲಿನ್ ಉತ್ವಾಳಿ ಕರ‍್ಯು. ಯೊ ಧೇರ್‌ಕರಾಖ್ಹತರ್‌ ಯೆಹೋವ ದೇವ್‌ ಇನ ಗೋರ್‌ ಕರ‍್ಯೊತೆಖ್ಹಾಜೆ ಯೊ ಅದ್ಮೇವ್‌ನೆ ಇನಾಬಿ ಇನಿ ಬಾವಣ್ಣಾಬಿ ಲಡ್ಕಾವ್ನಾಬಿ ಹಾತ್‌ಧರೀನ್ ಖ್ಹಯೇರ್‌ನ ಭಾರ್ ಲಯಿನ್ ಮ್ಹೇಲ್ಯು. ಇವ್ಣುನ ಭಾರ್ ಲಯಿನ್ ಇವ್ಣಾಮ ಏಕ್‌ ದೂತನೆ, “ನಾಶಿಜಾ಼ ಜಾನ್‌ ಬಚೈ಼ಲೇ ಪೀಠೆಫರೀನ್ ನಕೊದೇಕ್‌; ಆ ತಬರ್‌ಖಾಮ ಕಿಜ್ಜಾ಼ಬಿ ನಾಭೀರೆವ್ಣುತೆ ಪಹಾಡ್ನ ತಬರ್‌ಖಾಮ ನಾಶಿಜಾ಼; ತೂಬಿ ನಾಶ್‌ ಹುಯಿಜಿಶ್‌” ಕರಿಬೋಲ್ಯೊ. ಇನ ಲೋಟಾನೆ, “ಪ್ರಭು, ಯೊ ಮಾರೇಥಿ ಹುವಾಕೊಯ್ನಿ; ತು ತಾರ ದಾಸನ ಉಪ್ಪರ್ ದಯ ರಾಖಿನ್ ಮಾರಜಾನ್ನ ಬಚಾ಼ಡ್ಯೊತೆ ಘಣಿ ಮೋಟಿ ಮದತಸ್. ಯೊ ಘಣಿ ದೂರ್ ಛಾ಼ತೆಖ್ಹಾಜೆ ಮೆ ಪಹಾಡ್ನ ನಾಶಿಜ಼ವ್‌ಕೊಯ್ನಿ; ಮೇ ನಾಶಿ ಜಾ಼ವಾನ ಅಗಾಡಿಸ್ ಮರಿಜೈ಼ಶ್. ಹಂದೇಕ್‌, ಹಿಜ್ಜಾ಼ ಏಕ್‌ಖ್ಹಯೇರ್‌ ಖನ್ನೆ ಐರ‍್ಹೂಸ್; ಯೊ ನ್ಹಾನು; ಹಿಜ್ಜಾ಼ತೋಬಿ ಜಾ಼ವಾನ ಹುಕುಮ್‌ ಹುಯುತೊ ಮಾರೊ ಜಾನ್‌ ಬಚಿಜಾ಼ಶೆ. ಯೊ ಖ್ಹಯೇರ್‌ ನ್ಹಾನು ಕಾಹೇಕಿ ಶು” ಕರಿಬೋಲ್ಯೊ. ಇನೆ ಜವಾಬ್ ದಿದೋಕಿ, “ಅನಿ ಬಾರೇಮಾಬಿ ತಾರಿ ಬಿಂತಿನ ಚ಼ಲೈದೆವ್ಸ್‌. “ದೇಕ್‌; ತೂ ಬೋಲ್ಯೊತೆ ಯೊ ಖ್ಹಯೇರ್‌ನ ನಾಶ್‌ ಕರೀಶ್‌ಕೊಯ್ನಿ. ಒಗ್ಗಿಮ ಹಿಜ಼್ಜ ಜೈ಼ನ್ ಬಚಿಜಾ಼; ತು ಯೊ ಖ್ಹಯೇರ್‌ನ ಪೋಚ಼ಲಗು ಮೇ ಶಾತ್ಬಿ ಕರಾನ ಕೋಹೊಯ್ನಿ” ಕರಿಬೋಲ್ಯೊ. ಲೋಟನೆ ಇನಖ್ಹಾಜೆ ಯೊ ಖ್ಹಯೇರ್‌ನ ‘ಚೋಗರ್‌’ ಕರಿ ನಾಮ್‌ಹುಯು.
ಸೊದೋಮ್ ಅಜು಼ ಗೊಮೋರನು ನಾಶ್‌
ಲೋಟ ಚೋಗರ್‌ ಛಿಮಾಲಗು ಚಾ಼ಂದ್ ನಿಕ್‌ಳಿರ‍್ಹೋಥೊ. ತದೆ ಯೆಹೋವದೇವ್ನೆ ಸೊದೋಮ್ ಗೊಮೋರಪರ್‌ ಸೋರ್ಗಥೊ ಆಗ್‌ ರಂಜ಼ಕ್‌ನ ವರ್ಖ್ಹಾಯೊ. ಯೊ ಅಖ್ಖ ಖ್ಹಯೇರ್‌ನಬಿ ಅಶ್‌ಪೀಶ್‌ನು ತಬರ್ಖಾವ್‌ನಬಿ ಖ್ಹಯೇರ್‌ಮ ಥೂತೆ ಅದ್ಮಿವ್‌ನಾಬಿ ಧರ್ತಿಪರ್‌ಥೂತೆ ಖ್ಹಾರುಸ್ ಅನಾಜ಼್‌ನಾಬಿ ನಾಶ್‌ಕರಿನಾಖ್ಯೊ. ಲೋಟಾನಿ ಬಾವಣ್‍ ಇನ ಪೀಠೆ ಆವಾನಿ ವಖ್ಹ್‌ತೆ ಪಾಛಿಫರಿನ್ ದೇಖಿ. ಇನಖ್ಹಾಜೆ ಯೊ ಮೀಟ್‌ನು ಖಮ್‌ ಹುಯಿಗಿ. ಹೈಕಡ್‌ ಅಬ್ರಹಾಮ್‌ ವ್ಹಾಣೆಉಠಿನ್ ಯೊ ಯೆಹೋವದೇವ್‌ಕನ ಭೀಯೊಥೋತೆ ಝ಼ಗೋಕನ್ ಪಾಛೊ಼ ಆಯೊ. ಸೊದೋಮ್ ಅಜು಼ ಗೊಮೋರಭಣಿಬಿ, ಇನ ಅಶ್‌ಪಿಶ್‌ನು ಖ್ಹಾರುಸ್ ತಬರ್‌ಖ ಭಣಿಬಿ ದೆಖಾನಿವಖ್ಹ್‌ತೆ, ಅಯ್ಯೋ, ಧುವ್ವೊ ಆಗ್‍ನಿ ಪೋಯ್‌ ಉಪ್ಪರ್ ಉಡುಕರ್ತುಥು. ದೇವ್‌ನೆ ಯೊ ತಬರ್‌ಖಾನು ಖ್ಹಯೇರ್‌ನ ನಾಶ್‌ಕರಾನಿ ವಖ್ಹ್‌ತೆ ಲೋಟ ಜಿವ್ಣು ಕರುಕರ್ತೊಥೋತೆ ಖ್ಹಯೇರ್‌ನಾತೊ ಬರ್‌ಬಾತ್‌ ಕರ‍್ಯೊ, ಕತೋಬಿ ಅಬ್ರಹಾಮ್‌ನ ಯಾದ್ ಕರಿಲಿನ್ ಲೋಟನ ಛು಼ಕೈನ್ ಬಚಾ಼ಡ್ಯೊ.
ಮೋವಾಬ್ಯ ಅಜು ಅಮೋನಿವಾಳನು ಉಬ್‍ಜಾ಼ವ್ಣಿ
ಲೋಟ ಚೋಗರ್‌ಮ ರ‍್ಹವಾನ ಡರ‍್ಯು ಇನಖ್ಹಾಜೆ ಇನಿ ಭೇ ಛೋ಼ರಿಯೇನ ಬುಲೈಲೀನ್ ಪಹಾಡ್‌ ಪರ್ಭತ್ ಛ಼ಡೀನ್ ಹಿಜ಼್ಜಾಥೂತೆ ಏಕ್‌ ಘವಿಮ ಜಿವ್ಣುಕರ‍್ಯು. ಅಮ್‌ರ‍್ಹವಾಪರ್ ಮೋಟಿ ಛೋ಼ರಿ ಇನಿ ನ್ಹಾನಿ ಭೇನ್ನ, “ಅಪ್ಣೊ ಬಾ ಭುಡೊ ಎತ್ರೆಸ್; ಆ ಝ಼ಗೋನಿ ಪದತ್ತಿನಿ ಪರಕ್ಮ ಅಪ್ಣುನ ವ್ಯಾಹ ಕರವಾಳೊ ಪರ್ಖ್ಹೊ ಕಿಜ್ಜಾ಼ಬಿ ಕೊಯ್ನಿ; ಆವ್ ಅಪ್ಣೆ ಬಾನ ದ್ರಾಕ್ಷಿನ ರಖ್ಹ್‌ನ ಪಿಡೈನ್‌, ಇನಜೋ಼ಡೆ ಖ್ಹುಯಿನ್‌ ಅಪ್ಣ ಬಾನಿ ಪಿಳ್ಗಿನ ಬಚಾ಼ಡೆಜಾ಼ಯ್‌” ಕರಿಬೋಲಿ. ಯೊ ರಾತ್ ಇವ್ಣೆ ಬಾನ ದ್ರಾಕ್ಷಿನರಖ್ಹ್‌ ಪಿಡಾವಖ್ಹತರ್‌ ಮೋಟಿ ಛೋ಼ರಿ ಇನಿಜೋಡ್ಮ ಖ್ಹುತಿ; ಇನ ಕಯೇಪ್‌ಥೂತೆ ಇನಖ್ಹಾಜೆ ಮಾಲುಮ್ ಪಡ್ಯುಕೊಯ್ನಿ. ಇನ ಬಿಜೇಕ್‌ ರೋಜ಼್ ಮೋಟಿ ಭೇನ್ನೆ ನ್ಹಾನಿನ, “ಕಾಲ್ನಿ ರಾತ್ ಮೇ ಬಾನಿಜೋ಼ಡ್ಮ ಖ್ಹುಯಿಗಿಥಿ; ಆ ರಾತ್ಬಿ ಇನ ನಿಶಾನು ದ್ರಾಕ್ಷಿನೊ ರಖ್ಹ್‌ಪಿಡೈಯೆ; ತದೆ ತೂ ಇನಿ ಜೋ಼ಡೆ ಖ್ಹುಯಿಜಾ಼; ಅಮ್‌ತೋಬಿ ಅಪ್ಣ ಬಾನಿ ಪಿಳ್ಗಿನ ಬಚಾ಼ಡ್ಯೆ” ಕರಿ ಬೋಲಿ. ಯೊ ರಾತ್ಬಿ ಇವ್ಣೆ ಬಾನ ದ್ರಾಕ್ಷಿನೊ ರಖ್ಹ್‌ ಪಿಡೈನ್‌ ನ್ಹಾನಿ ಛೋ಼ರಿ ಇನಿಜೋಡ್ಮ ಖ್ಹುತಿ; ಇನ ಕಯೇಪ್‌ಥೂತೆ ಇನಖ್ಹಾಜೆ ಇನ ಶಾತ್ಬಿ ಮಾಲುಮ್ ಪಡ್ಯುಕೊಯ್ನಿ. ಅಮ್‌ ಲೋಟನಿ ಭೇ ಛೊ಼ರೀಯೆ ಬಾಥಿ ಬೇಜೂನಿ ಹುಯೆ. ಮೋಟಿಛೋ಼ರಿನೆ ಪರ್ಖ್ಹೊ ಲಡ್ಕುಜ಼ಣಿನ್ ಇನ “ಮೋಬಾಬ್‌” ಕರಿ ನಾಮ್‌ ಮ್ಹೇಲಿ. ಹಮ್ಕೇಲಗೂಬಿ ಛಾ಼ತೆ ಮೋವಾಬ್ಯವಾಳನ ಆಸ್ ಶುರುವಾತ್ನೊ ಪರ್ಖ್ಹೊ. ನ್ಹಾನಿ ಛೋ಼ರಿನೆ ಪರ್ಖ್ಹೊ ಲಡ್ಕು ಜ಼ಣಿನ್ “ಬೆನಮ್ಮಿ” ಕರಿ ನಾಮ್‌ ಮ್ಹೇಲಿ. ಹಮ್ಕೇಲಗೂಬಿ ಛಾ಼ತೆ ಅಮ್ಮೋನಿಯವಾಳಾನ ಆಸ್ ಶುರುವಾತ್ನೊ ಪರ್ಖ್ಹೊ.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.