Waghri Booli Bible
ಆದಿಕಾಂಡ 11
ಬಾಬೆಲ್‌ ಗುಮಜ಼್
ತದೆ ಜಗತ್ನ ಖ್ಹಾರಸ್‌ನ ಎಕ್ಕಸ್ ಬೋಲಿ; ಎಕ್ಕಸ್‌ವಾತೆ ಥೂ. ಬೋಲಿಮ ಪರಕ್‌ಶಾತ್‌ಬಿ ಕೋಥೂನಿ. ಅದ್ಮೇವ್‌ ಪೂರಬ್‌ ದಿಕ್ಮ ಚಾ಼ಲ್ತುಜಾ಼ವಾನಿ ವಖ್ಹತ್‌ಮ 1ಶಿನಾರ್‌ ದೇಖ್ಹ್‌ನು ಬಲ್‌ಡಾನು ತಬರ್‌ಖೊ ದೇಖಿನ್ ಹಿಜ಼್ಜಾಸ್ ರ‍್ಹಿಗಯು. ಇವ್ಣೆಖ್ಹಾರುಸ್, “ಆವೊ, ಅಪ್ಣೆ ಈಟ್‌ ಬಣೈನ್ ಅಛ್ಛಿನಿತರ ಭುಂಜಿಯೆ” ಕರಿ ಏಕ್‌ಥಿ ಎಕ್ ಬೋಲಿಲಿದು. ಇವ್ಣೆ ಬಂಡಾನ ಬದಲ್ ಈಟ್‌ನ, ಚು಼ನ್ನಾನ ಬದಲ್ ಡಾಂಬರ್‌ಥಿ ಕಾಮ್‌ಕರ‍್ಯು. ಇವ್ಣೆ, “ಆವೊ, ಎಕ್ ಖ್ಹಯೇರ್ ಭಾಂದಿಯೆ ಆಬ್‌ನ ಛೀಮಾಖ್ಹರ್ಕು ಎಕ್ ಗುಮಜ಼್‌ನ ಭಾಂದಿನ್ ಮೊಟು ನಾಮ್‌ ಕಮೈಯೇ; ಅಮ್ ಕರ‍್ಯುತೊ ಧರ್ತಿಪರ್ ಅಪ್ಣೆಖ್ಹಾರು ಛಿಡ್‌ಕೈಜಾ಼ವಖ್ಹರ್ಕು ಉಶೆಕೊಯ್ನಿ” ಕರಿ ಇವ್ಣ ಇವ್ಣಾಮ ಬೋಲಿಲಿದು. ಅದ್ಮೆವ್‌ನೆ ಭಾಂದು ಕರ್ತುಥೂತೆ ಯೊ ಖ್ಹಯೇರ್‌ನಾಬಿ, ಗುಮಜ಼್‌ನಾಬಿ ದೇಖಾನ ಯೆಹೋವ ದೇವ್‌ ಉತ್ರಿನ್ ಆಯೊ. ಯೆಹೋವ ದೇವ್ನೆ ದೇಖಿನ್, “ಅವ್ಣೆ ಎಕ್ಕಸ್ ಜ಼ಗ್‌ಜಾ಼ತ್; ಅವ್ಣುನ ಖ್ಹಾರಾಸ್ನ ಎಕ್ಕಸ್‌ಬೋಲಿ, ಆ ಅವ್ಣೆ ಶುರುವಾತ್‌ಮಾಸ್‌ ಕರಾನಿ ಖ್ಹೂಜ಼್ ಅವ್‌ಡಿ. ಅನಪಾರ್‌ ಅವ್ಣೆ ಶಾತ್‌ ಹೋಣುತೊಬಿ ಕರಾಖ್ಹರ್‌ಕು ಛಾ. ಅವ್ಣಾಮ ಏಕ್‌ನಿ ಬೋಲಿ ಏಕ್‌ನ ಮಾಲುಮ್‌ ನಾಪಡ್ನುತೆ ತಿಮ್‌ ಅವ್ಣಿ ಬೋಲಿನ ಕಲಾವ್ಣಿ ಕರಿನಾಖಿಯೇ ಆವೊ” ಕರಿಬೋಲ್ಯೊ. ಅಮ್ ಯೆಹೋವನೆ ಯೋಸ್ ಪರಕ್ಮ ಇವ್ಣುನ ಧರ್ತಿಪರ್ ಖ್ಹಾರುಸ್ ಛಿಡ್‌ಕಿನಾಖ್ಯೊ. ತದೆ ಇವ್ಣೆ ಯೊ ಖ್ಹಯೇರ್ ಭಾಂದಾನ ಭೀರಾಖಿದಿದು. ತಮಾಮ್‌ ಜಗತ್‌ನು ಬೋಲಿನ ಯೆಹೋವ ದೇವ್ನೆ ಹಿಜ್ಜಾ಼ ಕಲಾವ್ಣಿಕರೀನ್, ಇವ್ಣುನ ಧರ್ತಿಪರ್ ಛಿದ್‌ರೈನಾಖಿದಿದೊತೆ ಇನಖ್ಹಾಜೆ ಯೊ ಖ್ಹಯೇರ್‌ನ “ಬಾಬೆಲ್‌” ಕರಿ ನಾಮ್‌ಹುಯು.
ಶೇಮ್‌ನಿ ಪಿಳ್ಗಿ
(1. ಪೂರ್ವ 1:24-27)
ಶೇಮ್‌ನ ಖಾನ್‌ದಾನ್ನಮಾಥ: ಪಾಣಿನು ತೋಫಾನ್‌ಜೈನ್ ಬೇ ವರಖ್ಹ್‌ನ ಬಾದ್ಮ ಶೇಮ್‌ ಖ್ಹೊ ವರಖ್ಹ್‌ನೊ ಹುಯಿನ್ ಅರ್ಪಕ್ಷದನ ಪೈದಕರ‍್ಯೊ. ಶೇಮ್‌ ಅರ್ಪಕ್ಷದನ ಪೈದಕರಾನ ಬಾದ್ಮ ಪರ್ಖ್ಹೊ ಅಜು಼ ತಯೇಡ ಲಡ್ಕಾನ ಪೈದಕರೀನ್ ಪಾಚ಼್‌ಖ್ಹೊ ವರಖ್ಹ್ ಬಚಿರ‍್ಹೊ. ಅರ್ಪಕ್ಷದನೆ ಪಾಚ಼್‌ಉಪ್ಪರ್‌ ಡೋಡಿಖ್ಹ್‌ ವರಖ್ಹ್‌ವಾಳೊ ಹುಯಿನ್ ಶೆಲಹನ ಪೈದಕರ‍್ಯೊ. ಅರ್ಪಕ್ಷದನೆ ಶೆಲಹನ ಪೈದಕರಾನ ಬಾದ್ಮ ಪರ್ಖ್ಹೊ ತಯೇಡ ಲಡ್ಕಾವ್ನ ಪೈದಕರೀನ್ ಚಾರ್‌ಖ್ಹೊ ತೀನ್ ವರಖ್ಹ್ ಬಚಿರ‍್ಹೊ. ಶೆಲಹ ಡೋಡಿಖ್ಹ್‌ ವರಖ್ಹ್‌ವಾಳೊ ಹುಯಿನ್ ಎಬರನ ಪೈದಕರ‍್ಯೊ. ಶೆಲಹ ಎಬರನ ಪೈದಕರಾನ ಬಾದ್ಮ ಪರ್ಖ್ಹೊ ತಯೇಡ ಲಡ್ಕಾವ್ನ ಪೈದಕರೀನ್ ಚಾರ್‌ಖ್ಹೊ ತೀನ್ ವರಖ್ಹ್ ಬಚಿರ‍್ಹೊ. ಎಬರ ಚಾರ್‌ಉಪ್ಪರ್‌ ಡೋಡಿಖ್ಹ್‌ ವರಖ್ಹ್‌ವಾಳೊ ಹುಯಿನ್ ಪೆಲೆಗನ ಪೈದಕರ‍್ಯೊ. ಎಬರನೆ ಪೆಲೆಗನ ಪೈದಕರಾನ ಬಾದ್ಮ ಪರ್ಖ್ಹೊ ತಯೇಡ ಲಡ್ಕಾವ್ನ ಪೈದಕರೀನ್ ಚಾರ್‌ಖ್ಹೊ ಡೋಡಿಖ್ಹ್‌ ವರಖ್ಹ್ ಬಚಿರ‍್ಹೊ. ಪೆಲೆಗ ಡೋಡಿಖ್ಹ್‌ ವರಖ್ಹ್‌ವಾಳೊ ಹುಯಿನ್ ರೆಗೂವನ ಪೈದಕರ‍್ಯೊ. ಪೆಲೆಗನೆ ರೆಗೂವನ ಪೈದಕರಾನ ಬಾದ್ಮ ಪರ್ಖ್ಹೊ ತಯೇಡ ಲಡ್ಕಾವ್ನ ಪೈದಕರೀನ್ ಬೇಖ್ಹೊ ನೌ ವರಖ್ಹ್ ಬಚಿರ‍್ಹೊ. ರೆಗೂವನೆ ಬೇಉಪ್ಪರ್‌ ಡೋಡಿಖ್ಹ್‌ ವರಖ್ಹ್‌ವಾಳೊಹುಯಿನ್ ಸೆರೂಗನ ಪೈದಕರ‍್ಯೊ. ಸೆರೂಗನೆ ರೆಗೂವನ ಪೈದಕರಾನ ಬಾದ್ಮ ಪರ್ಖ್ಹೊ ತಯೇಡ ಲಡ್ಕಾವ್ನ ಪೈದಕರೀನ್ ಬೇಖ್ಹೊ ಖ್ಹಾತ್ ವರಖ್ಹ್ ಬಚಿರ‍್ಹೊ. ಸೆರೂಗ ಡೋಡಿಖ್ಹ್‌ ವರಖ್ಹ್‌ವಾಳೊಹುಯಿನ್ ನಾಹೋರನ ಪೈದಕರ‍್ಯೊ. ಸೆರೂಗನ ನಾಹೋರನ ಪೈದಕರಾನ ಬಾದ್ಮ ಪರ್ಖ್ಹೊ ತಯೇಡ ಲಡ್ಕಾವ್ನ ಪೈದಕರೀನ್ ಬೇಖ್ಹೊ ವರಖ್ಹ್ ಬಚಿರ‍್ಹೊ. ನಾಹೋರನೆ ಎಕ್ಕಮ್‌ ಡೋಡೀಖ್ಹ್‌ ವರಖ್ಹ್‌ವಾಳೊಹುಯಿನ್ ತೆರಹನ ಪೈದಕರ‍್ಯೊ. ನಾಹೋರ ತೆರಹನ ಪೈದಕರಾನ ಬಾದ್ಮ ಪರ್ಖ್ಹೊ ತಯೇಡ ಲಡ್ಕಾವ್ನ ಪೈದಕರೀನ್ ಏಕ್‌ಖ್ಹೊ ಎಕ್ಕಮ್‌ವೀಖ್ಹ್‌ ವರಖ್ಹ್ ಬಚಿರ‍್ಹೊ. ತೆರಹನೆ ಖ್ಹಡ್‌ತೀನಿಖ್ಹ್‌ ವರಖ್ಹ್‌ವಾಳೊ ಹುವಾನ ಬಾದ್ಮ ಅಬ್ರಾಮ, ನಾಹೋರ್‌, ಹಾರಾನ್‌ಕರಿ ಲಡ್ಕಾವ್ನ ಪೈದಕರ‍್ಯೊ.
ತೆರಹನು ಪಿಳ್ಗಿ
ತೆರಹನು ಖಾನ್‌ದಾನ್ನು ಖೇಣಿ; ತೆರಹನೆ ಅಬ್ರಾಮ, ನಾಹೋರ್‌, ಹಾರಾನ್‌ಕರಿ ಅವ್ಣುನ ಪೈದಕರ‍್ಯೊ. ಹಾರಾನ್‌ ಲೋಟನೊ ಬಾ. ಹಾರಾನ್‌ ಪೈದಾಖ್ಹ್ ಹುಯೊತೆ ಇನು ಶೊಂತ್ ಬಾಬಿಲೋನ್ನು ಊರ್‌ಕರಿ ಖ್ಹಯೇರ್‌ಮ ಇನೊ ಬಾ ಹುಯಿರೋತೆ ತೆರಹನ ಖ್ಹಾಮ್ಣೇಸ್ ಮರ‍್ಯೊ. ಅಬ್ರಾಮ್‌ಬಿ ನಾಹೋರಬಿ ವ್ಯಾಹ ಕರಿಲಿದ. ಅಬ್ರಾಮನಿ ಬಾವಣ್ಣು ನಾಮ್‌ ಸಾರಯ, ನಾಹೋರನಿ ಬಾವಣ್ಣು ನಾಮ್‌ ಮಿಲ್ಕಾ. ಆ ಹೈರಿತೆ ಹಾರಾನ್ನಿ ಛೋ಼ರಿ; ಹಾರಾನ ಮಿಲ್ಕಾನಾಬಿ ಇಸ್ಕನಾಬಿ ಬಾ ಹುಯಿರ‍್ಹೋಥೊ. ಸಾರಯ ವಾಂಝ಼್‌ಣಿಥೀತೆ ಇನಖ್ಹಾಜೆ ಇನ ಲಡ್ಕ ಕೋಥಾನಿ. ತೆರಹನೆ ಇನೊ ಛಿಯ್ಯೊ ಹುಯಿರೋತೆ ಅಬ್ರಾಮನಾಬಿ, ಅಜು಼ ಇನ ನಾತ್ಯೊಬಿ ಹಾರನನೊ ಛಿಯ್ಯೊ ಲೋಟನಾಬಿ, ಇನ ವ್ಹವ್‌ಬಿ ಅಬ್ರಾಮ್‌ನಿ ಬಾವಣ್‌ಬಿ ಹುಯಿರೀತೆ ಸಾರಯನಬಿ ಬುಲೈಲೀನ್ ಕಾನಾನ್‌ ದೇಖ್ಹ್‌ನ ಜಾ಼ವ್ಣುಕರಿ ಬಾಬಿಲೋನ್ನು ಊರ್‌ಕರಿ ಖ್ಹಯೇರ್‌ನ ಜಾ಼ವ್ಣುಕರಿ ಥಾ, ಜಾ಼ವಾನಿವಖ್ಹ್‌ತೆ ಇವ್ಣೆ ಹಾರಾನ್‌ ಖ್ಹಯೇರ್‌ನ ಅಯಿನ್ ಹಿಜ್ಜಾ಼ಸ್ ಜಿವ್ಣು ಕರ‍್ಯೊ. ತೆರಹನೆ ಬೇಖ್ಹೊ ಪಾಚ಼್‌ ವರಖ್ಹ್ ಬಚಿನ್, ಇನ ಬಾದ್ಮ ಹಾರಾನ್‌ಮ ಮರ‍್ಯೊ.
Source notes (1)
- Footnote ಬಾಬಿಲೋನ್
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.