Waghri Booli Bible
ಆದಿಕಾಂಡ 12
ದೇವ್ನೆ ಅಬ್ರಾಮ್‌ನ ಬುಲಾಯೋತೆ
ಯೆಹೋವ ದೇವ್ನೆ ಅಬ್ರಾಮ್‌ನ, “ತೂ ತಾರ ಶೊಂತ್‌ ದೇಖ್ಹ್‌ನಾಬಿ, ಮಾಯಮಾತ್ರನ ಅಜು಼ ಬಾನ ಘರ್‌ನ ಮ್ಹೇಲಿನ್ ಮೇ ವತಾಳುತೆ ದೇಖ್ಹ್‌ನ ಚ಼ಲ್ಯೊಜಾ಼ ಮೇ ತುನ ಮೋಟೊ ದೇಖ್ಹ್‌ ಬಣಾವುಸ್‌, ಮೇ ತುನ ಆಶೀರ್ವಾದ್‌ ದೆವುಸ್‌, ತಾರ ನಾಮ್ನ ಮೊಟು ಕರುಸ್‌, ತೂ ಆಶೀರ್ವಾದ್‌ನು ನಿಧಿ ಹುಯಿರಿಶ್. ತುನ ಆಶೀರ್ವಾದ್‌ ಕರವಾಳನ ಮೇ ಆಶೀರ್ವಾದ್‌ ದೆವುಸ್‌; ತುನ ಹೇಟ್‌ಲಿ ನಜ಼ರ್‌ಥಿ ದೇಖವಾಳಾನ ಮೇ ಶಾಪ್ ದೆವುಸ್‌. ತಾರೇಥಿ ಧರ್ತಿನು ಖ್ಹಾರಸ್ ಖಾನ್‌ದಾನ್ನ ಆಶೀರ್ವಾದ್‌ ಉಶೆ” ಕರಿಬೋಲ್ಯೊ. ಯೆಹೋವ ದೇವ್ನೆ ಬೋಲ್ಯೋತೆ ಪರಕ್ಮಾಸ್ ಅಬ್ರಾಮ ಚ಼ಲೇಗಯೊ. ಲೋಟಾಬಿ ಇನ ಜೋ಼ಡೆಗಯೊ. ಅಬ್ರಾಮನೆ ಹಾರಾನ್‌ ಖ್ಹಯೇರ್‌ನ ಮ್ಹೇಲಿನ್ ಜಾ಼ವನಿವಖ್ಹ್‌ತೆ ಪಾಚ಼್‌ಉಪ್ಪರ್‌ ಖ್ಹಡ್‌ತೀನಿಖ್ಹ್‌ ವರಖ್ಹ್‌ನೊ ಹುಯಿರ‍್ಹೊಥೊ. ಅಬ್ರಾಮನೆ ಇನಿ ಬಾವಣ್‍ ಸಾರಯನಬಿ, ಇನೊ ನ್ಹಾನ ಭೈನೊಛಿಯ್ಯೊ ಲೋಟನಾಬಿ, ಇನೇಬಿ ಲೋಟಬಿ ಹಾರಾನ್‌ಮ ಕಮಾಯತೆ ಖ್ಹಾರೀಸ್‍ ಶೊತ್‌ನಾಬಿ, ದಾಸ, ದಾಸಿನಾಬಿ ಲೀನ್‌ ಕಾನಾನ್‌ ದೇಖ್ಹ್‌ನ ನಿಕ್‌ಳ್ಯೊ. ಇವ್ಣೆ ಕಾನಾನ್‌ ದೇಖ್ಹ್‌ನ ಛಿಮಾನಿವಖ್ಹ್‌ತೆ, ಅಬ್ರಾಮನೆ ಯೊ ದೇಖ್ಹ್‌ಮ ಫರ್‌ತೊಹುಯಿನ್ ಶೆಕೆಮ್‌ ಝ಼ಗೋಮರ‍್ಹವಾನು ಪರಿಶುದ್ದ ‘ಮೋರೆ’ ಝಾ಼ಡಲಗು ಆಯೊ. ಯೊ ಹಗಾಮ್ಮ ಕಾನಾನ್ಯವಾಳು ದೇಖ್ಹ್‌ಮ ಥು. ಹಿಜ್ಜಾ಼ ಯೆಹೋವ ದೇವ್ನೆ ಅಬ್ರಾಮ್‌ನ ದರ್ಶನ್‌ಮ, “ಮೇ ಆ ದೇಖ್ಹ್‌ನ ತಾರಿ ಪಿಳ್ಗಿವಾಳನ ದೆವುಸ್‌” ಕರಿಬೋಲ್ಯೊ. ಇನ ದರ್ಶನ ದಿದೋತೆ ಯೆಹೋವದೇವ್ನ ಅಬ್ರಾಮ್‌ನೆ ಚಾ಼ಚ಼ರ್‌ನ ಭಂದಾಯೊ. ಯೊ ಹಿಜ್ಜಾ಼ಥೋ ನಿಕ್ಳಿನ್ ಬೇತೇಲ್‌ನು ಪೂರಬ್‌ಮಛಾ಼ತೆ ಟಿಮ್ಮಾಕನ ಅಯಿನ್ ಇನೊ ಡೇರೊನಾಖಿನ್‌ ರ‍್ಹಿಗಯೊ. ಹಿಜ಼್ಜಾಥು ಪಶ್ಚಿಮ್ ದಿಕ್ಮ ಬೇತೇಲ್‌, ಪೂರಬ್‌ಮ ಆಯಿಕರಿ ಗಾಮ್‌ಥು. ಹಿಜ್ಜಾ಼ಬಿ ಅಬ್ರಾಮನೆ ಚಾ಼ಚ಼ರ್‌ನ ಭಂದೈನ್ ಯೆಹೋವನ ಆರಾದನೆ ಕರ‍್ಯೊ. ಇನವಾರ್ ಅಬ್ರಾಮ್‌ನೆ ಹಿಜ್ಜಾ಼ಥೊ ನಿಕ್ಳಿನ್ ಕಾನಾನ್‌ ದೇಖ್ಹ್‌ನು ದಕ್ಷಿಣ್‌ ತಬರ್‌ಖಾನ ಚಾ಼ಲ್ತೊಹುಯಿನ್ ಗಯೊ.
ಈಜಿಪ್ಟ್‌ಮ ಅಬ್ರಾಮ
ಯೊ ವೇಳ್ಮ ಧರ್ತಿಪರ್ ಘಣು ಕಾಳ್‌ದುಕಾಳ್‌ಥೂತೆ ಇನಖ್ಹಾಜೆ, ಅಬ್ರಾಮ್‌ನೆ ಈಜಿಪ್ಟ್‌ದೇಖ್ಹ್‌ಮ ಚ಼ಲೇಗೊ. ಯೊ ಕಾಳ್‌ದುಕಾಳ್ ಘಣು ಕಠಣ್‌ ಥು. ಯೊ ಈಜಿಪ್ಟ್ ದೇಖ್ಹ್‌ನ ಖನ್ನೆ ಆವಾನಿ ವಖ್ಹ್‌ತೆ ಇನಿ ಬಾವಣ್‍ ಹುಯಿರ‍್ಹೀತೆ ಸಾರಯನ, “ಖ್ಹಮಜ಼್‌, ತೂ ಘಣಿ ಶನ್‌ಗಾರ್‌ನಿ ತಯೇಡಕರಿ ಮನ ಮಾಲುಮ್‌; ಈಜಿಪ್ಟ್ ದೇಖ್ಹ್‌ವಾಳು ತುನ ದೇಖಿನ್, ಆ ಹೈರಿತೆ ಅನಿ ಬಾವಣ್‌ಕರಿ ಮಾಲುಮ್‌ ಕರಿಲೀನ್‌ ಮನ ಮಾರಿನಾಖಿನ್‌ ತುನ ಬಚಾ಼ಡೆಜಾ಼ಯ್‌. ಇನಖ್ಹಾಜೆ ತೂ ಮನ ನ್ಹಾನಿ ಭೇನ್‍ಕರಿ ಇವ್ಣುನ ಬೋಲ್; ಅಮ್‌ ಬೋಲಿತೊ ತಾರೇಥಿ ಮನ ಅಛ಼್ಛುಉಷೆ, ಮೇ ತಾರಖ್ಹಾಜೇಥಿ ಮರಿಶ್‌ಕೊಂತೆ ಬಚಿಶ್” ಕರಿ ಬೊಲ್ಯೊ. ಅಬ್ರಾಮ್‌ ಈಜಿಪ್ಟ್ ದೇಖ್ಹ್‌ನ ಆವಾನಿ ವಖ್ಹ್‌ತೆ ಈಜಿಪ್ಟ್‌ವಾಳು ಇನ ಜೋ಼ಡ್ಮಥೀತೆ ತಯೇಡನ ದೇಖಿನ್ ಘಣಿ ಶನ್‌ಗಾರ್‌ವಾಳಿ ಕರಿ ಬೋಲಿಲಿದು. ಫರೋಹನ ಆಸ್ಥಾನ್ನ ಅದಿಕಾರಿಯೇವ್ನೆ ಯೊ ಹೈರೀತೆನ ದೇಖಿನ್ ರಾಜ಼ನ ಖ್ಹಾಮ್ಣೆ ಖ್ಹರಾವಖ್ಹತರ್‌ ಫರೋಹನೆ ಯೊ ತಯೇಡಾನ ಮಹೇಲ್‌ಕನ ಬುಲೈಮಂಗೈನ್‌ ಆ ಹೈರೀತೆನಖ್ಹಾಜೆ ಅಬ್ರಾಮ್‌ನ ಮದತ್ ಕರ‍್ಯು. ತದೆ ಅಬ್ರಾಮ್‌ನ ಢಾಂಡು, ಮೇಂಢು, ಗಧೇಡ ಗಧೇಡಿವ್‌ಖ್ಹಾರು, ದಾಸದಾಸಿಖ್ಹಾರು, ಊಟ್‌ಖ್ಹಾರು ಮಳ್ಯು. ಕತೋಬಿ ಯೆಹೋವ ದೇವ್ನೆ ಫರೋಹನಾಬಿ ಇನ ಘರ್‌ವಾಳನಾಬಿ ಅಬ್ರಾಮ್‌ನಿ ಬಾವಣ್‍ ಸಾರಯನಖ್ಹಾಜೆ ಘಣು ಖ್ಹತಾಪ್ಣಿದೀನ್ ಖ್ಹತಾಯೊ. ತದೆ ಫರೋಹಾನೆ ಅಬ್ರಾಮ್‌ನ ಬುಲೈಮಂಗೈನ್‌, “ತೂ ಶನಾ ಅಮ್‌ ಕರ‍್ಯೊ? ಯೊ ತಾರಿ ಬಾವಣ್‌ಕರಿ ಮನ ಶನಾ ಖ್ಹಮ್‌ಜಾ಼ಡ್ಯೊಕೊಯ್ನಿ? ನ್ಹಾನಿ ಭೇನ್‍ಕರಿ ಶನಾ ಬೊಲ್ಯೊ? ಅಮ್‌ ಬೋಲ್ಯೊತೆ ಇನಖ್ಹಾಜೆ ಹೈರಿತೇನ ಬಾವಣ್‌ಕರಿ ಮೆ ರಾಖಿಲ್ಯಾವನಥೋನಿ ಹಂದೇಕ್ ತಾರಿ ಬಾವಣ್‍! ಬುಲೈಲೀನ್ ಜಾ಼” ಕರಿಬೋಲ್ಯೊ, ಫರೋಹನೆ ಅಬ್ರಾಮ್‌ನಿ ಬಾರೇಮ ಇನು ಚಾ಼ಕ್ರಿವಾಳನ ಹುಕುಮ್‌ ದೇವಖ್ಹತರ್‌ ಇವ್ಣೆ ಅಬ್ರಾಮ್‌ನಾಬಿ, ಇನಿ ಬಾವಣ್ಣಾಬಿ ಇನಥೂತೆ ಅಖ್ಖಾಸ್ನ ಖ್ಹಮೇದ್ ಮೋಕ್ಲಿದಿದು.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.