Waghri Booli Bible
ಆದಿಕಾಂಡ 10
ನೋಹಾನ ಛಿಯ್ಯಾವ್ನಿ ಪಿಳ್ಗಿ
(1. ಪೂರ್ವ 1:5-23)
ನೋಹಾನ ಛಿಯ್ಯಾ ಹುಯಿರಾತೆ ಶೇಮ್, ಹಾಮ್, ಯೆಫೆತ್ ಕರಿ ಬೋಲೈಲ್ಯವಾಳನಿ ಖೇಣಿ: ಪಾಣಿನು ತೋಫಾನ್ ಹುವಾನ ವಾರ್ ಇವ್ಣುನ ಲಡ್ಕ ಪೈದಹುಯ. ಯೆಫೆತ್ನ ಛಿಯ್ಯಾ ಕೋಣ್ಕತೊ; ಗೋಮೆರ್, ಮಾಗೋಗ್, ಮಾದಯ್, ಯಾವಾನ್, ತೂಬಲ್, ಮೆಷೆಕ್, ತೀರಾಸ್ ಕರಿ ಬೋಲೈಲ್ಯವಾಳು. ಗೋಮೆರ್ನು ಛಿಯ್ಯಾ ಅಷ್ಕೆನಸ್, ರೀಫತ್, ತೋಗರ್ಮ ಕರಿಬೋಲೈಲ್ಯವಾಳು. ಯಾವಾನನ ಛಿಯ್ಯಾ- ಎಲೀಷಾ, ತಾರ್ಷೀಷ್, ಕಿತ್ತೀಮ್, ದೋದಾಕರಿ ಝ಼ಗೊವಾಳು. ಅವ್ಣೆ ದರ್ಯಾವ್ನ ಕನಾರೆನು ತಬರ್ಖಾಮ ಫೈಲೈಗಯು. ಅಜು ದೇಖ್ಹ್, ಬೋಲಿ, ಖೂಮ್ ಜಗ್ಜಾತ್ನಿ ಪರಕ್ಮ ಅವ್ಣೇಸ್ ಯೆಫೆತ್ನಿ ಪಿಳ್ಗಿವಾಳು. ಹಾಮ್ನಿ ಪಿಳ್ಗಿವಾಳು ಕೋಣ್ಕತೊ- ಕೂಷ್, ಮಿಚ್ರಯಿಮ್, ಪೂತ್, ಕಾನಾನ್ ಕರಿ ಬೋಲೈಲ್ಯವಾಳು. ಕೂಷನ ಛಿಯ್ಯಾ ಕೋಣ್ಕತೊ- ಸೆಬಾ, ಹವೀಲ, ಸಬ್ತಾ, ರಾಮ್ಹ, ಸಬ್ತಕಾ ಕರಿಬೋಲೈಲ್ಯವಾಳು. ರಾಮ್ಹನ ಛಿಯ್ಯಾ ಕೋಣ್ಕತೊ - ಶೆಬಾ, ದೆದಾನ್ ಕೂಷನೊ ಛಿಯ್ಯೊ ನಿಮ್ರೋದ ಯೊ ಧರ್ತಿಪರ್ನೊ ಪಹಿಲೊ ತಾಖತ್ವಾಳೊ ಹುಯಿರ್ಹೋಥೊ. ಯೆಹೋವನಿ ನಜ಼ರ್ಮ ನಿಮ್ರೋದ ಶಿಕಾರ್ ಕರಾಮ ಶುಸ್ತಿ ಹುಯಿರ್ಹೊಥೊ. ಇನಖ್ಹಾಜೆ “ಯೆಹೋವ ದೇವ್ನೆ ತುನ ಶಿಕಾರ್ಕರಾಮ ಶುಸ್ತಿ ಬಣಾವದೆ” ಕರಿ ಮಶ್ಲೋ ಹಮ್ಕೆಲಗೂಬಿ ಬೋಲಾನುಛಾ಼. ಶಿನಾರ್ ದೇಖ್ಹ್ಮ ಛಾ಼ತೆ ಬಾಬೆಲ್, ಯೆರೆಕ್, ಅಕ್ಕದ್, ಕಲ್ನೇ ಕರಿ ಖ್ಹಯೇರಸ್ ಇನು ರಾಜ್ಯನು ಜ಼ಮಾನಾನು ಖ್ಹಯೇರ್ಖ್ಹಾರು ಹುಯಿರ್ಹುಥು. ಆಹೈರೋತೆ ಯೊ ದೇಖ್ಹ್ಥೊ ನಿಕ್ಳಿನ್ ಅಶ್ಯೂರ್ ದೇಖ್ಹ್ನ ಅಯಿನ್ ನಿನೆವೆ, ರೆಹೋಬೋತೀರ್, ಕೆಲಹ ಕರಿ ಅಖ್ಖಾಖ್ಹಯೇರ್ನಾಬಿ, ಅನೆ ನಿನೆವೆನಾಬಿ, ಕೆಲಹನಾಬಿ ಇಚ಼್ಮಛಾ಼ತೆ ರೆಸೆನ್ಕರಿ ಮೊಟು ಖ್ಹಯೆರ್ಮ ಭಂದಾಯೊ. ಈಜಿಪ್ಟ್ವಾಳಥು ಲೂದ್ಯವಾಳು, ಅನಾಮ್ಯವಾಳು, ಲೆಹಾಬ್ಯವಾಳು, ನಫ್ತುಹ್ಯವಾಳು ಪೈದಹುಯು. ಪತ್ರುಸ್ಯವಾಳು, ಕಸ್ಲುಹ್ಯವಾಳು, ಕಫ್ತೋರ್ಯವಾಳು ಫಿಲಿಷ್ಟಿಯವಾಳಥಿ ಪೈದಹುಯು. ಕಾನಾನ್ ಖಾನ್ದಾನ್ಮ ಪಹಿಲೆ ಪೈದಹುಯೋತೆ ಸೀದೋನ್; ಇನಪಾರ್ ಹೇತ್ ಪೈದಹುಯೊ. ಆನಾಹುಯಿನ್ ಯೆಬೂಸಿಯವಾಳು, ಅಮೋರಿಯವಾಳು, ಗಿರ್ಗಾಷಿಯವಾಳು, ಹಿವ್ವಿಯವಾಳು, ಅರ್ಕಿಯವಾಳು, ಸೀನಿಯವಾಳು, ಅರ್ವಾದಿಯವಾಳು, ಚೆಮಾರಿಯವಾಳು, ಹದೋರಾಮವಾಳು, ಹಮತಿಯವಾಳು, ಕಾನಾನ್ಥಿ ಪೈದಹುಯಿನ್ ಇವ್ಣು ಖಾನ್ದಾನ್ ಫೈಲಾಯು. ಕಾನಾನ್ಯವಾಳನು ತಬರ್ಖೊ ಸೀದೋನ್ ಖ್ಹಯೇರ್ಥು ಗೆರಾರ್ನ ಜಾ಼ವಾನಿ ವಾಟ್ಪರ್ಛಾ಼ತೆ ಗಾಜಾ ಖ್ಹಯೇರ್ಲಗೂಬಿ ಅಜು಼ ಸೊದೋಮ್, ಗೊಮೋರ್, ಅದ್ಮಾ, ಚೆಬೋಯಿಮ್ಕರಿ ಖ್ಹಯೇರ್ನ ಜಾ಼ವಾನಿ ವಾಟ್ಪರ್ ಛಾ಼ತೆ ಲೆಷಾ ಗಾಮ್ಲಗೂಬಿ ಫೈಲಾಯು. ಖೂಮ್, ಬೋಲಿ, ದೇಖ್ಹ್, ಜಗ್ಜಾತ್ನಿ ಪರಕ್ಮ ಅವ್ಣೇಸ್ ಹಾಮ್ನು ಪಿಳ್ಗಿವಾಳು. ಇಬ್ರಿಯವಾಳಾನ ಶುರುನೊ ಪರ್ಖ್ಹೊಬಿ, ಯೆಫೆತ್ನೊ ಮೋಟೊ ಭೈಬಿ ಹುಯಿರ್ಹೋಥೊತೆ ಶೇಮ್ನಾಬಿ ಲಡ್ಕ ಪೈದಹುಯ. ಶೇಮ್ನ ಛಿಯ್ಯಾ, ಏಲಾಮ್, ಅಶ್ಯೂರ್, ಅರ್ಪಕ್ಷದ್, ಲೂದ್, ಅರಾಮ್ ಕರಿ ಬೋಲೈಲ್ಯಾವಾಳು. ಅರಾಮ್ನಿ ಖಾನ್ದಾನ್ವಾಳು, ಊಸ್, ಹೂಲ್, ಗೆತೆರ್, ಮಷ್ ಕರಿಬೋಲೈಲ್ಯವಾಳು. ಅರ್ಪಕ್ಷದಥಿ ಶೆಲಹಬಿ, ಶೆಲಹ ಎಬರನೊ ಬಾ ಹುಯಿರ್ಹೋಥೊ. ಎಬರನ ಬೇ ಛಿಯ್ಯಾ ಪೈದಹುಯ. ಏಕ್ಜ಼ಣಾನ ಪೆಲೆಗ ಕರಿ ನಾಮ್; ಶನಕತೊ ಇನ ಹಗಾಮ್ಮ ಧರ್ತಿ ಭಾಗ್ಪಡೈಗಿ. ಇನ ನ್ಹಾನ ಭೈನು ನಾಮ್ ಯೊಕ್ತಾನ್. ಯೊಕ್ತಾನ್ನು ಪಿಳ್ಗಿವಾಳು, ಅಲ್ಮೋದಾದ್, ಶೆಲೆಪ್, ಹಚರ್ಮಾವೆತ್, ಯೆರಹ, ಹದೋರಾಮ್, ಊಜಾಲ್, ದಿಕ್ಲಾ, ಓಬಾಲ್, ಅಬೀಮಯೇಲ್, ಶೆಬಾ, ಓಫೀರ್, ಹವೀಲ, ಯೋಬಾಬ್ಕರಿ ಅವ್ಣೆ ಯೊಕ್ತಾನಥಿ ಪೈದಹುಯು. ಅವ್ಣೆ ಜಿವ್ಕರ್ತುಥುತೆ ಝ಼ಗೊ ಮೇಶಾ ತಬರ್ಖಾಥು ಧರೀನ್ ಪೂರಬ್ ದಿಕ್ಮಛಾ಼ತೆ ಸೆಫಾರ್ಕರಿ ಪಹಾಡ್ಲಗೂಬಿ ಫೈಲೈರ್ಹೂಥು. ಖೂಮ್, ಬೋಲಿ, ಜಗ್ಜಾತ್ನಿ ಪರಕ್ಮ ಅವ್ಣೇಸ್ ಶೇಮ್ನು ಪಿಳ್ಗಿವಾಳು. ಜಗ್ಜಾತ್ನಿ ಪಿಳ್ಗಿನಿ ಪರಕ್ಮ ಅವ್ಣೇಸ್ ನೋಹಾನು ಖೂಮ್ವಾಳು. ಪಾಣಿನು ತೋಫಾನ್ಹುಯುತೆ ಇನವಾರ್ ಧರ್ತಿಪರ್ ಫೈಲೈಗಯೂತೆ ಖಾನ್ದಾನ್ವಾಳು ಅವ್ಣೇಸ್.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.