Waghri Booli Bible
ಆದಿಕಾಂಡ 9
ನೋಹಾನಿ ಜೋಡ್ಮ ದೇವ್ನಿ ಒಪ್ಪಂದ
ದೇವ್ನೆ ನೋಹಾನಬಿ, ಇನ ಛಿಯ್ಯಾವ್‌ನಬಿ ಆಶೀರ್ವದ್ ಇವ್ಣುನ, “ತುಮೆ ಘಣು ಪಿಳ್ಗಿವಾಳ ಹುಯಿನ್ ಭಡೊ. ಅಜು ಧರ್ತಿ ಅಖ್ಖಾಪರ್ ಫೈಲೈಜಾ಼ವೊ ಕರಿಬೋಲ್ಯೊ. ಧರ್ತಿಪರ್‌ಛಾ಼ತೆ ಖ್ಹಾರುಸ್ ಜಾನ್ವರ್‌ಬಿ, ಖ್ಹಾರುಸ್ ಜಿನಾವರ್‌ಬಿ ಜ಼ಮೀನ್‌ಪರ್‌ ವ್ಹವವಾಳು ಖ್ಹಾರುಸ್ ಕೀಡುಕಮ್‌ಟುಬಿ, ದರ‍್ಯಾವ್ನು ಮಾಚ್ಲತುಮಾರೆಥಿ ಡರ್‌ಶೆ. ಯೊ ಅಖ್ಖಾಸ್ನ ತುಮಾರ ಕಬ್‌ಜಾ಼ಮ ದೀರಾಖ್ಯೊಸ್. ಧರ್ತಿಪರ್ ವ್ಹವವಾಳು ಖ್ಹಾರುಸ್ ಕೀಡುಕಮ್‌ಟುಬಿ ತುಮೂನ ಖಾಣು ಹುಯಿರ‍್ಹಿಶೆ. ಮೇ ತುಮಾರ ಖಾಣನಖ್ಹಾಜೆ ಭಾಜಿಪಾಲನ ತುಮೂನ ದಿದೋತೆ ಇಮ್ಮಸ್ ಆ ಅಖ್ಖಾನಬಿ ತುಮೂನ ದೀರಾಖ್ಯೋಸ್. ಕತೋಬಿ ಬೋಟಿನ ಇನು ಜಾನ್‌ ಹುಯಿರುತೆ ಲೋಹಿನ ಜೋ಼ಡೆ ತುಮೆ ನಾಖಾವ್ಣು. ಶನಕತೊ ಲೋಹಿಮ ಜಾನ್‌ ಛಾ಼. ಆ ನಾಹುಯಿನ್ ತುಮಾರು ಜಾನ್‌ ಕಾಡವಾಳಾನ ಮೇ ಮರಣ್ಣಿ ದಂಡ್‌ನೆ ದಿಶ್. ಜಾನ್ವರ್‌ ಉಷೇತೊ ಇನಾಬಿ ಮಾರಿನಾಖಿಶ್. ಅದ್ಮಿ ಉಷೇತೊ, ಮರಿಗಯೊಹುಯೊ ಇನೊ ಭೈ ಹುಯಿರೋತೆ ಇನಖ್ಹಾಜೆ ಇನಾಬಿ ಮರಣ್ಣಿ ದಂಡ್‌ನೆ ದಿಶ್. ಅದ್ಮಿನ ಖೂನ್‌ಕರವಾಳ ಭೈನ ಮಾರದಾಖ್ಹಲ್‌ ಕಾಹೆಕಿಶು? ದೇವ್ನೆ ಅದ್ಮಿವೋನ ಇನ ಶೊಂತ್‌ ರೂಪ್‌ಮ ಉಬ್‌ಜಾ಼ಯೊತೆ ಇನಖ್ಹಾಜೆ ಕೋಣ್‌ ಅದ್ಮಿನ ಲ್ಹೋಯಿನ ರಂಚ಼ಸ್‌ಕಿ ಇನ ಖೇವತೋಬಿ ಏಕ್‌ಅದ್ಮಿಸ್‌ ಇನ ಲ್ಹೋಯಿನ ರಂಚ಼್‌ಶೆ. ತುಮುನ ಕೈಯೇಕ್ ಲಡ್ಕಖ್ಹಾರು ಹುವಾದೆ ಶನಕತೊ ಧರ್ತಿಪರ್ ತುಮಾರು ಪಿಳ್ಗಿ ಬಚ಼್‌ವಾದೆ” ಕರಿ ಬೊಲ್ಯೊ.
ಆನಾಹುಯಿನ್ ದೇವ್ನೆ ನೋಹನಾಬಿ ಇನ ಛಿಯ್ಯಾವ್‌ನಾಬಿ, “ಖ್ಹಮ್‌ಜೊ಼ ಮೇ ತುಮಾರಿ ಜೋಡ್ಮಾಬಿ ತುಮಾರ ವಾರ್‌ ತುಮಾರ ಪಿಳ್ಗಿವಾಳನಿ ಜೋ಼ಡ್ಮಾಬಿ ಒಪ್ಪಂದ ಕರಿಲೇವುಸ್‌, ಅಜು ತುಮಾರಿ ಜೋ಼ಡ್ಮ ಜ಼ಹಾಜ್‌ಮಾಥು ಆಯೂತೆ ಜೀನ್‌-ಜಿನಾವರ್‌, ಜ಼ಂಗ್ಳಿಜಾನ್ವಾರ್‌ ಹರೇಕ್ ಧರ್ತಿನು ಜ಼ಂತ್‌ನಿ ಜೋ಼ಡ್ಮಾಬಿ ಮಾರಿ ಒಪ್ಪಂದ ಕರಿಲೆವುಸ್‌, ಯೊ ಒಪ್ಪಂದ ಖಿವುಕತೊ; ಅನಪಾರ್‌ ಖಿವು ಜಾನ್ವರ್‌ಬಿ ವರ್ಖ್ಹಾತ್ನ ತೋಫಾನ್‌ಥಿ ನಾಶ್ ಕೋಉಷೇನಿ ಕರಿ ಆಣ್‌ಕರಿನ್, ದೇವ್ನೆ ಪಾಛೊ಼ ಬೋಲ್ಯೊತೆ ಶಾತ್‌ಕತೊ “ಮೇ ತುಮೂನಾಬಿ ತುಮಾರಿ ಜೋ಼ಡ್ಮಛಾ಼ತೆ ಜೀವಿನು ರಾಶಿನಾ ಬಾರೇಮ ಪಿಢಿನ್‌ಪಿಢೀಬಿ ಕರಾನು ಆ ಒಪ್ಪಂದಾನ ಮೆ ವಾದ್‌ಳಾಮ ಮ್ಹೇಲಿರಾಖ್ಯೋತೆ ಆ ವಾದ್‌ಳಾನು ಧೂಣಸ್ ಖ್ಹಣೇದ್ ಹುಯಿರ‍್ಹಿಶೆ. ಆ ಮೇ ಜಗತ್‌ನಿ ಜೋಡ್ಮ ಕರಿರಾಖ್ಯೊತೆ ಒಪ್ಪಂದಾನ ಆಸ್ ಖ್ಹಣೇದ್ ಹುಯಿರ‍್ಹಿಶೆ. ಮೇ ಆಬ್‌ಪರ್ ವಾದ್‌ಳು ಢಾಪಾನಿವಖ್ಹ್‌ತೆ ಯೊ ಆಬ್‌ನು ಧೂಣ್‌ ವಾದ್‌ಳಾಮ ದೆಖಾವ್‌ಶೆ. ತದೆ ಮೇ ತುಮೂನಾಬಿ ಖ್ಹಾರುಸ್ ಜೀವಿನಿರಾಶಿನಿ ಬಾರೇಮ ಕರ‍್ಯೊತೆ ಒಪ್ಪಂದಾನ ಯಾದ್‌ಕರಿಲಿಶ್. ಅನಪಾರ್‌ ಪಾಣಿ ಜಾ಼ಖ್ಹತ್‌ಹುಯಿನ್ ಖ್ಹಾರುಸ್ ಧರ್ತಿನಿ ಜೀವಿನ ಬರ್‌ಬಾತ್‌ ಕರಾನು ಪಾಣಿನು ತೋಫಾನ್ ಉಷೆಕೊಯ್ನಿ. ಯೊ ಆಬ್‌ನು ಧೂಣ್‌ ಅಜು ವಾದ್‌ಳಾನ ದೇಖವಾನಿ ವಖ್ಹ್‌ತೆ ಮೇ ಇನ ದೇಖಿನ್ ದೇವ್‌ ಹುಯಿರ‍್ಹೋತೆ ಮನಾಬಿ ಧರ್ತಿಪರ್ ಛಾ಼ತೆ ಖ್ಹಾರುಸ್ ಜಾನ್ನು ಜ಼ಂತ್‌ನಾಬಿ ಹುಯುತೆ ಹಮೇಶಾನು ಒಪ್ಪಂದಾನ ಯಾದ್ ಕರಿಲಿಶ್‌. ಅಜು಼ ದೇವ್ನೆ ನೋಹಾನ “ಮನಾಬಿ ಖ್ಹಾರುಸ್ ಧರ್ತಿನ ಜೀವಿನ ಹುಯುತೆ ಒಪ್ಪಂದಾನ ಆಸ್ ಖ್ಹಣೇದ್” ಕರಿಬೋಲ್ಯೊ.
ನೋಹಾಬಿ ಇನ ಛಿಯ್ಯಾ
ಜ಼ಹಾಜ್‌ಮಾಥು ನಿಕ್ಳಿಆಯಾತೆ ನೋಹಾನ ಛಿಯ್ಯಾ ಕೋಣ್‌ಕತೊ ಶೇಮ್‌, ಹಾಮ್‌, ಯೆಫೆತ್‌. ಹಾಮ್‌ ಕಾನಾನ್ನೊ ಬಾ. ಅವ್ಣೇಸ್ ತೀನ್‌ಜ಼ಣ ನೋಹಾನ ಛಿಯ್ಯಾ ಅವ್ಣೆಥೀಸ್ ಉಬ್‌ಜಿನ್ ಧರ್ತಿಪರ್ ಜಿವವಾಳನ ಗುರುಗುರುಬ್‌ಲ್ಯ ಹುಯಿರ‍್ಹಾಸ್. ನೋಹ ಖೆತರ್‌ ನಾಗ್ರವಾಳೊ ಹುಯಿರೊಥೊ; ದ್ರಾಕ್ಷಿನಬಗೀಚಾ಼ನ ಪಹಿಲೆ ಬಣಾವನ ಶುರುಕರ‍್ಯೊತೆ ಅನೇಸ್. ಏಕ್‌ದನ್ ಅನೆ ದ್ರಾಕ್ಷಿನ ರಖ್ಹ್‌ಪೀನ್‌ ಕೈಯೇಪ್ಛ಼ಡೀನ್ ಇನ ಡೇರಾನ ಘರ್ಮ ಉಘಾಡೊ ಹುಯಿನ್ ಪಡ್ಯೊಥೊ. ಕಾನಾನ್ನೊ ಬಾ ಹುಯಿರ‍್ಹೋತೆ ಹಾಮನೆ ಬಾ ಉಘಾಡೊ ಹುಯಿರೋತೆ ದೇಖಿನ್ ಭಾರ್‌ಥಾತೆ ಇನ ಭಯ್ಯೆ ಶೇಮ್‌ ಅಜು಼ ಯೆಫೆತ್‌ನ ಖ್ಹಮ್‌ಜಾ಼ಡ್ಯೊ. ತದೆ ಶೇಮ್‌ ಅಜು಼ ಯೆಫೆತ್‌ನೆ ಘುಂಗ್ಡಿನ ಪಾಡಿನ್ ಇವ್ಣ ಬೇಜ಼ಣಾನ ಖಾಂದೆ ನಾಖಿಲೀನ್‌ ಪೀಠೆಪೀಠೆ ಜೈ಼ನ್ ಉಘಾಡೊ ಥೋತೆ ಬಾನ ಹೋಡಾಯ. ಇವ್ಣೆ ಪೀಠೆಥಾತೆ ಇನಖ್ಹಾಜೆ ಬಾ ಉಘಾಡೊ ಹುಯಿರ‍್ಹವಾನು ದೇಖ್ಯಕೊಯ್ನಿ. ನೋಹ ಕಯೇಪ್‌ಥಿ ಹೋಷಾರಿ ಹುಯಿನ್ ನ್ಹಾನ ಛಿಯ್ಯಾನೆ ಕರ‍್ಯೊತೆ ಇನ ಮಾಲುಮ್‌ ಕರಿಲೀನ್, “ಕಾನಾನನ ಶಾಪಹುವಾದೆ ಯೊ ಇನ ಭಯ್ಯೇನ ದಾಸ ಹುವಾದೆ” ಕರಿಬೋಲ್ಯೊ. ಇನೆ ಬಿಜೂ಼ಬಿ ಶಾತ್‌ಬೋಲ್ಯೊ ಕತೊ, “ಶೇಮ್‌ನೊ ದೇವ್‌ ಯೆಹೋವನ ಧನ್ಯವಾದ್‌ ಹುವಾದೆ; ಕಾನಾನ ಇವ್ಣುನ ದಾಸಹುವಾದೆ” ಕರಿ ಬೊಲ್ಯೊ. ಯೆಫೆತ್‌ನ ಛಾ಼ತೆ ಅಖ್ಖಾಸ್ನ ದೇವ್‌ ಘಣು ಭಡಾವದೆ, ಯೊ ಶೇಮ್‌ನ ಡೇರಾನ ಘರ್ಮ ರ‍್ಹೀನ್ ಜಿವ್ಣು ಕರಾದೆ, ಕಾನಾನ ಇವ್ಣುನ ದಾಸ ಹುಯಿರ‍್ಹವಾದೆ” ಕರಿಬೋಲ್ಯೊ. ತೋಫಾನ್ ಹುಯಿಜಾ಼ವಾದಿನ್ ನೋಹ ತೀನ್‌ಖ್ಹೊ ಅಢೈಖ್ಹ್‌ ವರಖ್ಹ್‌ ಬಚೀರ‍್ಹೊ. ನೋಹ ಒಟ್‌ ನೌಖ್ಹೋ ಅಢೈಖ್ಹ್‌ ವರಖ್ಹ್‌ ಬಚಿರ‍್ಹೀನ್‌ ಮರ‍್ಯೊ.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.