Waghri Booli Bible
ವಿಮೋ 38
ಬಾಳನು ಬಲಿನು ಚಾ಼ಚ಼ರ್‌ ಭಾಂದ್ಯುತೆ
(ವಿಮೋ 27:1-8)
ಇನೆ ಬಳಾನಿ ಬಲಿನಿ ಚಾ಼ಚ಼ರ್‌ನ ಬಾವಳ್ಯನ ಝಾ಼ಡೇಥಿ ಬಣಾಯೊ. ಯೊ ಪಾಚ಼್‌ಹಾತ್‌ ಲಾಂಬುಬಿ ಪಾಚ಼್‌ಹಾತ್‌ ಚೌ಼ಡುಬಿ ಚಾರ್‌ಖೂಟಿ ಥು; ಇನು ಊಚು಼ ತೀನ್‌ಹಾತ್‌ ಥು. ಇನ ಚಾರ್ ಕೋಣನಾಬಿ ಚಾರ್ ಶಿಂಗ್‌ಡಾವ್ನ ಕರಾಯೊ; ಯೊ ಬಳಾನಿ ಚಾ಼ಚ಼ರ್‌ ಸಮಥು. ಯೊ ಚಾ಼ಚ಼ರ್‌ನ ತಾಂಬಾನ ತಗ್‌ಡಾವ್ನ ಢಪಾಯೊ. ಚಾ಼ಚ಼ರ್‌ನ ರಾಛ಼ವ್‌ನ ಕತೊ ಇನ ಕಟೋರಿಖ್ಹಾರು, ಪಲೋಟ್ಣುಅಖ್ಖು, ಅಖೂಟಅಖ್ಖು, ಕುಂಡು, ಕಾಟಾನಿ ಡೋಯ್‌, ಡಿಖ್ಹ್‌ಟೆಅಖ್ಖು, ಅನಅಖ್ಖು ತಾಂಬೇಖ್ಹು ಬಣಾಯೊ. ಚಾ಼ಚ಼ರ್‌ನ ವಣ್ಕರ್‌ನ ಕಾಮ್‍ಥಿ ತಾಂಬಾನಿ ಖಾಂಜ್ರಿನ ಕರಾಯೊ. ಯೊ ಚಾ಼ಚ಼ರ್‌ನ ಅಶ್‌ಪಿಶ್‌ನ ಕಟ್ಟಾನ ಹೇಟ್‌ ಚಾ಼ಚ಼ರ್‌ನ ಹೇಟ್‌ಥು ಬೀಚ್ಮ ರ‍್ಹವಾನಿಘೊಣಿ ಘಲಾಯೊ. ಚಾ಼ಚ಼ರ್‌ನ ಪಾಡನು ಲಠ್ಠಾನ ಘಾಲನಖ್ಹಾಜೆ ಯೊ ತಾಂಬಾನು ಖಾಂಜ್ರಿನ ಚಾರ್ ಕೋಣನಾಬಿ ಚಾರ್ ಕಾಕ್ಣಿನ ಲಗಾಡ್ಯೊ. ಚಾ಼ಚ಼ರ್‌ನ ಪಾಡಾನು ಲಠ್ಠಾವ್ನ ಬಾವಳ್ಯನ ಝಾ಼ಡ್‌ಥಿ ಕರಿನ್‌ ತಾಂಬಾನ ತಗ್‌ಡಾವ್ನ ಢಪಾಯೊ. ಇನ ಭೇ ಬಾಜೂ಼ಬಿ ಕಾಕ್ಣಿನ ಘಲಾಯೊ. ಯೊ ಚಾ಼ಚ಼ರ್‌ನ ಪಲ್ಗಾವ್‌ಥಿ ಪಿಟಾರನಿಘೊಣಿ ಕರ‍್ಯೊ.
ಕಂಚ಼್‌ನು ಬಾನೆನ ಕರ‍್ಯುತೆ
(ವಿಮೋ 30:18)
ದೇವ್ನದರ್ಶನ್ನ ಡೇರಾನ ದರ‍್ವಾಜ಼ಕನ ಸೇವೆ ಕರುಕರ್ತಿಥಿತೆ ತಯೇಡಖ್ಹಾರು ದಿದೀತೆ ತಾಂಬಾನು ಐನೇಥಿ ಬಾನೇನ ಇನಿ ಝ಼ಗ್ಲಿನ ಕರ‍್ಯೊ.
ಯೆಹೋವನಿ ಸನ್ನಿದಿನ ಡೇರಾನೊ ಬಲ್ಡೊ
(ವಿಮೋ 27:9-19)
ಡೇರಾನ ಬಲ್ಡಾನ ಕರ‍್ಯೊ. ಯೊ ಬಲ್ಡಾನ ದಕ್ಷಿಣ್‌ ದಿಕ್ಮ ಥೂತೆ ಪಡ್ದೊಅಖ್ಖು ಖ್ಹಾಜ಼್‌ಥಿ ಖ್ಹುತ್ತರ್‌ನ ವಣ್‌ಖರ‍್ನ ಲುಂಗ್ಡೇಥಿ ಕರ‍್ಯುಹುಯು ಖ್ಹೊಹಾತ್‌ ಲಾಂಬುಥು. ಯೋಅಖ್ಖಾನ ವೀಖ್ಹ್‌ ಖಮ್‌ಬಿ ಇನ ವೀಖ್ಹ್‌ ತಾಂಬಾನು ಹುದಿನ ಬಂಡೋಬಿ ಥು; ಖಂಬಾನು ಅಖುಟೊಅಖ್ಖು ಖ್ಹಬ್ಬಳ್‌ಬಿ ರೂಪಾನು ಹುಯಿರ‍್ಹುಥು. ಉತ್ತರ್ ದಿಕ್‌ಮಾಬಿ ಖ್ಹೊಹಾತ್‌ ಲಾಂಬುಹುಯಿರ‍್ಹುತೆ ಪಡ್ದೊಅಖ್ಖು ವೀಖ್ಹ್‌ ಖಂಬಖ್ಹಾರು ವೀಖ್ಹ್‌ ತಾಂಬಾನು ಹುದಿನು ಬಂಡೊಖ್ಹಾರು ಹಿಜ್ಜಾ಼ಥು; ಖಂಬಅಖ್ಖು ಅಖುಟೊಅಖ್ಖು ಖಿಲ್ಲಾಅಖ್ಖು ರೂಪಾನು ಹುಯಿರ‍್ಹುಥು. ಪಶ್ಚಿಮ್‌ನಿ ಬಾಜು಼ಮ ಅಢೈಖ್ಹ್ ಹಾತ್ ಲಾಂಬು ಪಡ್ದೊಅಖ್ಖುಬಿ ದಖ್ಹ್‌ ಖಂಬಾಬಿ ದಖ್ಹ್‌ ಹುದಿನೊ ಬಂಡೋಬಿ ಥು; ಖಂಬಾನು ಅಖುಟೊಅಖ್ಖುಬಿ ಖಿಲ್ಲಾಅಖ್ಖುಬಿ ರೂಪಾನು ಹುಯಿರ‍್ಹುಥು. ಪೂರಬ್‌ದಿಕ್‌ಮಾಬಿ ಬಲ್ಡಾನು ಚೌ಼ಡುಬಿ ಅಢೈಖ್ಹ್ ಹಾತ್‌ಹುಯಿರುಥು. ಹಿಜ಼್ಜ ದರ್ವಾಜ಼ನಿ ಭೇಬಾಜು಼ಬಿ ಪಂಧ್ರ ಹಾತ್ ಲಾಂಬು ಪಡ್ದೊಬಿ, ಇನ ತೀನ್-ತೀನ್ ಖಂಬಅಖ್ಖುಬಿ ತೀನ್-ತೀನ್ ಹುದಿನೊ ಬಂಡೋಬಿ ಥು. ಬಲ್ಡಾನ ಅಶ್‌ಪಿಶ್‌ನ ಪಡ್ದಾನಅಖ್ಖು ಕವ್‌ಳು ವಣಿಹುಯು ಖ್ಹುತ್ತರ್‌ನು ಲುಂಗ್ಡುಹುಯಿರ‍್ಹುಥು. ಖಂಬಾನು ಹುದಿನೊ ಬಂಡೊ ಅಖ್ಖು ತಾಂಬಾನು ಹುಯಿರುಥು; ಖಂಬಾನು ಅಖುಟೊಖ್ಹಾರುಬಿ ಘುಳೊಅಖ್ಖು ರೂಪಾನು ಹುಯಿರುಥು; ಇನು ಬಣಾವಟ್‌ಅಖ್ಖು ರೂಪಾನ ತಗ್‌ಡೇಥಿ ಢಪೈರ‍್ಹುಥು. ಬಲ್ಡಾನ ಅಖ್ಖಾ ಖಮ್‌ನಾಬಿ ರೂಪಾನು ಘುಳೊಥು. ಬಲ್ಡಾನ ದರ್ವಾಜ಼ಕನಥೂತೆ ಪಡ್ದೊ ಖ್ಹುತ್ತರ್‌ನ ಲುಂಗ್ಡೇಥಿಬಿ ನೀಲಿ, ರಾಯ್‌ಜಾ಼ಮಣ್ಣೊ ರಂಗ್‌ಬಿ ಲಲೇಲಾಲ್‌ ರಂಗ್‌ನ ಧಾಗೇಥಿಬಿ ವಣ್‌ಖರ್‌ನು ಕಾಮ್‌ಕರವಾಳನ ಹಾತೇಥಿ ಬಣೈರ‍್ಹುಥು. ಯೊ ದರ್ವಾಜ಼ನ ಚಾರ್ ಖಮ್‌ನಾಬಿ ಚಾರ್ ತಾಂಬಾನು ಹುದಿನೊ ಬಂಡೊ ಅಖ್ಖು ಥು; ಖಮ್‌ನಿ ಅಖುಟೊಅಖ್ಖುಬಿ ಘುಳಾವ್ನು ಬಣಾವಟ್ನ ಢಪೈರ‍್ಹುತೆ ತಗ್‌ಡುಅಖ್ಖು ರೂಪಾನು ಹುಯಿರ‍್ಹುಥು. ಡೇರಾನು ಖಿಲ್ಲಾಅಖ್ಖು ಬಲ್ಡಾನ ಖಿಲ್ಲಾಬಿ ಅಖ್ಖು ತಾಂಬಾನು ಹುಯಿರುಥು.
ಡೇರಾನ ತಯಾರ್ ಕರಾನಿ ವಖ್ಹ್‌ತೆ ಜಿನಖ್ಹ್‌ನಿ ಗಣ್ತಿ
ದೇವ್ನು ದರ್ಶನ್ನ ಡೇರಾನ ಕರಾನ ಲಾಗ್ತುಥುತೆ ರಾಛ಼ನಿ ಗಣ್ತಿ. ಮೋಶೆನಿ ಹುಕುಮ್ನಿಘೋಣಿ ಮಹಾಯಾಜಕ ಹುಯಿರೋತೆ ಆರೋನನೊ ಛಿಯ್ಯೊ ಈತಾಮಾರನೆ ಲೇವಿನ ಹಾಥ್ಥಿ ಗಣ್ತಿ ಕರಾಯೋತೆ. ಯೆಹೋವದೇವ್ನೆ ಮೋಶೆನ ಹುಕುಮ್‌ಕರ‍್ಯೊತೆ ಅಖ್ಖು ಕರ‍್ಯುತೆ ಕೋಣ್‌ಕತೊ, ಯೆಹೂದ ಖೂಮ್ನೊ ಹೂರನೊ ನಾತ್ಯೊಬಿ ಊರಿಯನೊ ಛಿಯ್ಯೊಬಿ ಹುಯಿರೋತೆ ಬೆಚಲೇಲಸ್‌; ಇನಿ ಜೋಡ್ಮ ದಾನ್‌ ಖೂಮ್ನೊ ಅಹೀಸಾಮಾಕನೊ ಛಿಯ್ಯೊಹುಯಿರೊತೆ ಒಹೋಲೀಯಾಬಬಿ ಮಳಿರ‍್ಹೊಥೊ; ಯೊ ಕೆತ್ತಾನ ಕಾಮ್ಮ ಪುರ್‌ಗುಲ್‌ ಹುಯಿರ‍್ಹೊಥೊ. ಖ್ಹುತ್ತರ್‌ನ ಲುಂಗ್ಡಾಮ ನೀಲಿ ರಾಯ್‌ಜಾ಼ಮಣ್ಣು ರಂಗ್ನು ಲಲೇಲಾಲ್‌ ರಂಗ್ನು ಹುಯಿರುತೆ ಧಾಗೇಥಿ ವಣ್ಕರ್‌ನು ಕಾಮ್ನ ಕರವಾಳೊ ಹುಯಿರ‍್ಹೊಥೊ. ದೇವ್ನ ಮಂದಿರ‍್ನ ಹರೇಕ್ ಕಾಮ್ನಬಿ ಹೋಣುತೆ ಕಾಣ್ಕೆನು ಖ್ಹೊನ್ನಾನ ದೇವ್ನ ಸೇವೆನ ಅರ್ಪಣ್‌ ಕರ‍್ನುತೆ ಶೆಕೆಲ್‌ನ ಗಣ್ತಿಮ ಎಕ್ಕಮ್‌ಡೋಡಿಖ್ಹ್‌ ತೋಲ ಖ್ಹಾತ್ ಖ್ಹೊ ಡೋಡಿಖ್ಹ್‌ ಶೆಕೆಲ್‌ ಹುಯಿರ‍್ಹುಥು. ಟೋಳ್‌ವಾಳಾನಿ ಗಣ್ತಿಮ ಚೂ಼ಣಯುತೆ ಅದ್ಮಿವೋಥಿ ದೇವ್ನ ಸೇವೆನಖ್ಹಾಜೆಕರಿ ಜ಼ಮಾಹುಯುತೆ ರೂಪಾನು ತೋಲ್‌ಹುಯಿರುತೆ ದೇವ್ನ ಸೇವೆನ ಜ಼ಮಾಹುಯುತೆ ಶೆಕೆಲ್‌ನಿ ಗಣ್ತಿಮ ಖ್ಹೋತೋಲ ಅಜು಼ ಏಕ್‌ಹಜ಼ಾರ್‌ ಖ್ಹಾತ್‌ಖ್ಹೊ ಪಾಚ಼್‌ಉಪ್ಪರ್‌ ಖ್ಹಡ್‌ತೀನಿಖ್ಹ್‌ ಶೆಕೆಲ್‌. ದೇವ್ನ ಸೇವೆನ ನೇಮಕ್‌ಹುಯುತೆ ಶೆಕೆಲ್‌ನಿ ಏಕೇಕ್‌ “ಬೆಕಾ” ಕತೊ ಆಧು ಶೆಕೆಲ್‌ ಹುಯಿರುಥು. ಅದ್ಮಿವೋನಿ ಗಣ್ತಿವೊಮ ವೀಖ್ಹ್‌ ವರಖ್ಹ್‌ವಾಳು ಅಜು಼ ಇನೇಥಿಬಿ ಘಣಿ ಉಂಬರ್‌ವಾಳಾನಿ ಇಶಾಬ್‌ಹುಯುತೆ ಇನಾಮ, ವೀಖ್ಹ್‌ ವರಖ್ಹ್‌ವಾಳುಬಿ ಇನೇಥಿ ಘಣಿ ಉಂಬರ್‌ವಾಳನಿ ಗಣ್ತಿ ಛೋ಼ ಲಾಕ್‌ ತೀನ್‌ಹಜಾ಼ರ್‌ ಪಾಚ಼್‍ಖ್ಹೊ ಅಢೈಖ್ಹ್ ಜ಼ಣು ಥು. ದೇವ್ನು ಮಂದಿರ್‌ನು ಹುದಿನ ಬಂಡಾನಬಿ ಪಡ್ದಾನ ಖಂಬಾವ್ನ ಹುದಿನ ಬಂಡಾನಬಿ ಬಣಾವಟ್‌ಕರಾಮ ಏಕೇಕ್‌ ಹುದಿನ ಬಂಡಾನ ಏಕೇಕ್‌ ತೋಲಾನಿ ಗಣ್ತಿಮ ತೀನ್‌ಹಜಾ಼ರ್‌ ಚಾರ್‌ಖ್ಹೊ ವೀಖ್ಹ್‌ ಕಿಲೊ ಅಫುಟ್‌ ರೂಪುಬಿ ಉಪಯೋಗ್‌ ಹುಯು. ಉಭ್‌ರ‍್ಯುತೆ ಏಕ್‌ಹಜಾ಼ರ್‌ ಖ್ಹಾತ್‌ಖ್ಹೊ ಪಾಚ಼್‌ಉಪ್ಪರ್‌ ವೀಖ್ಹ್‌ ತೋಲೆಥಿ ಖಂಬಾವ್ನ ಅಖೂಟೊಬಿ ಖಿಲ್ಲಾವ್‌ನ ಕರಿನ್‌ ಇನ ಬಣಾವಟ್ನ ತಗ್‌ಡಾನ ಢಪಾಯು. ಅದ್ಮಿಖ್ಹಾರು ಕಾಣ್ಕೆ ದಿದೂತೆ ತಾಂಬಾನಿ ಗಣ್ತಿ ಖ್ಹಡ್‌ತೀನ್‌ಖ್ಹ್‌ ತೋಲ ಬೇ ಹಜಾ಼ರ್‌ ಚಾರ್‌ಖ್ಹೊ ಪಾಚ಼್‌ಉಪ್ರಿಖ್ಹ್‌ ಶೆಕೆಲ್‌. ಅನೇಥಿ ದೇವ್ನ ದರ್ಶನ್ನು ಡೇರಾನ ದರ್ವಾಜ಼ನ ಹುದಿನ ಬಂಡಾನಾಬಿ ತಾಂಬಾನಿ ಖಾಂಜ್ರಿನಾಬಿ ಬಲ್ಡಾನ ಅಶ್‌ಪಿಶ್‌ನ ಹುದಿನ ಬಂಡಾನಾಬಿ ಬಲ್ಡಾನ ದರ್ವಾಜ಼ನ ಹುದಿನ ಬಂಡಾನಾಬಿ ಡೇರಾನ ಅಜು಼ ಬಲ್ಡಾನ ಅಖ್ಖಾ ಖಿಲ್ಲಾನಾಬಿ ಕರಾಯೊ.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.