Waghri Booli Bible
ವಿಮೋ 37
ಒಪ್ಪಂದಾನು ಪಿಟಾರನಿ ತಯಾರ್
(ವಿಮೋ 25:10-22)
ಬೆಚಲೇಲನೆ ಬಾವಳ್ಯನ ಝಾ಼ಡ್‌ಥಿ ಒಪ್ಪಂದಾನ ಪಿಟಾರನ ಕರ‍್ಯೊ. ಯೊ ಅಢೈಹಾತ್ ಲಾಂಬು, ಡೋಡ್ ಹಾತ್ ಚೌ಼ಡುಬಿ ಅಜು಼ ಡೋಡ್‌ಹಾತ್‌ ಊಚು಼ಬಿ ಹುಯಿರ‍್ಹುಥು. ಅಫುಟ್ ಖ್ಹೊನ್ನಾನ ತಗ್‌ಡಾವ್ನ ಇನ ಭಾರ್‌ಬಿ ಅಜು಼ ಮಹಿಬಿ ಢಪಾಯೊ. ಇನ ಉಪ್ಪರ್ ಅಶ್‌ಪಿಶ್‌ಬಿ ಖ್ಹೊನ್ನಾನು ತೋರಣ್ ಭಂದಾಯೊ. ಚಾರ್‌ ಖ್ಹೊನ್ನಾನು ಕಾಕ್ಣಿಯೆ ಘಡೈನ್‌ ಇನ ಚಾರ್‌ ಕೋಣಾನ ಕತೊ, ಏಕೇಕ್‌ ಬಾಜು಼ಬಿ ಬೆಬ್ಬೆ ಕಾಕ್ಣಿಯೆನ ಮ್ಹೇಲಾಯೊ. ಅಜು಼ ಬಾವಳ್ಯನ ಝಾ಼ಡ್‌ನು ಖಂಬು ಕರಿನ್‌ ಇನ ಖ್ಹೊನ್ನಾನ ತಗ್‌ಡಾವ್ನ ಢಪೈನ್, ಪಿಟಾರೊ ಢೋವಾನಖ್ಹಾಜೆ ಖಂಬಾವ್ನ ಪಿಟಾರನಿ ಭೇಬಾಜು಼ ಕಾಕ್ಣಿಮ ಪೆಖ್ಹಾಡ್ಯೊ. ಆನಾಹುಯಿನ್ ಅಫುಟ್ ಖ್ಹೊನ್ನೇಥಿ ಕೃಪಾಸನ್ನ ಕರ‍್ಯೊ. ಯೊ ಅಢೈಹಾತ್ ಲಾಂಬುಬಿ, ಡೋಡ್ ಹಾತ್ ಚೌ಼ಡುಬಿ ಹುಯಿರ‍್ಹುಥು. ಕೃಪಾಸನ್ನ ಬೇ ಕೋಣನಾಬಿ ಕೆರೂಬಿನು ಬೇ ಖ್ಹೊನ್ನಾನು ರೂಪ್‌ನು ನಕ್ಷಾನ ಕಾಮ್‍ಥಿ ಬಣಾಯೊ. ಕೃಪಾಸನ್ನ ಏಕೇಕ್‌ ಕೋಣನಾಬಿ ಏಕೇಕ್‌ ಕೆರೂಬಿನ ಕರಿನ್‌ ಇನ ಬರೋಬರ್‌ ಮ್ಹೇಲಾಯು. ಯೊ ಕೆರೂಬಿಖ್ಹಾರು ಉಪ್ಪರ್ ಪಾಕ್‌ಢಿಯೇನ ಫಖ್ಹಾರಿರಾಖನಿಘೊಣಿ ಕೃಪಾಸನ್ನ ಇವ್ಣಿ ಪಾಕ್‌ಢಿಯೇಥಿ ಢಾಪಿರಾಖನಿತರಬಿ ಥೂ. ಇನ ಮ್ಹೋಡಾನ ಆಮೆಖ್ಹಾಮೆ ಕೃಪಾಸನ್ನ ದೇಖುಕರ್ತುಥು.
ದೇವ್ನಖ್ಹಾಜೆ ಸಮರ್ಪಣ್‌ಕರಾನ ರೋಟನು ಮೇಜ್‌ ಕರಾಯೋತೆ
(ವಿಮೋ 25:23-30)
ಇನೆ ಬಾವಳ್ಯನ ಝಾ಼ಡೇಥಿ ಮೇಜ್‌ನ ಕರಾಯೊ. ಯೊ ಬೇ ಹಾತ್ ಲಾಂಬುಬಿ, ಏಕ್ಹಾತ್ ಚೌ಼ಡುಬಿ, ಡೋಡ್‌ಹಾತ್‌ ಊಚು಼ಬಿ ಹುಯಿರ‍್ಹುಥು. ಇನ ಅಫುಟ್ ಖ್ಹೊನ್ನಾನು ತಗ್‌ಡೇಥಿ ಢಪೈನ್ ಅಶ್‌ಪಿಶ್‌ ಖ್ಹೊನ್ನಾನು ತೋರಣ್ ಭಂದಾಯೊ. ಮೇಜ್‌ನ ಅಶ್‌ಪಿಶ್‌ ಹತೇಳಿಯೆತ್ರೆ ಚೌ಼ಡು ಆಡಿಪಟ್ಟಿನ ಕರಿನ್‌ ಇನಾಬಿ ಖ್ಹೊನ್ನಾನು ತೋರಣ್ ಭಂದಾಯೊ. ಮೇಜ್‌ನ ಪಾಡಾನು ಲಠ್ಠಾವ್ನ ಪೆಖ್ಹಾಡನಖ್ಹಾಜೆ ಇನ ಚಾರ್‌ ಖ್ಹೊನ್ನಾನು ಕಾಕ್ಣಿನ ಬಣಾವಟ್ ಕರೈನ್‌ ಇನ ಚಾರ್‌ ಗೋಡಾನಾಬಿ ಜೋ಼ಡ್‌ಶಾಯೊ. ಯೊ ಕಾಕ್ಣಿಅಖ್ಖು ಆಡಿಪಟ್ಟಿನ ಘಲೈರ‍್ಹುಥು. ಮೇಜ್‌ನ ಢೋವಾನ ಲಠ್ಠಾವ್ನ ಬಾವಳ್ಯನ ಝಾ಼ಡೇಥಿ ಕರೈನ್‌ ಇನ ಖ್ಹೊನ್ನಾನು ತಗ್‌ಡಾನ ಢಪಾಯೊ. ಮೇಜ್‌ನ ಉಪ್ಪರ್ ಮ್ಹೇಲಾನು ಜಿನಖ್ಹ್‌ನ ಕತೊ ಕಾಠುಕ್, ಢಾಕ್ಣಿ, ತಾಂಬ್ಯೊ, ಪಿಯ್ಯಾನ ಹೋಣುತೆ ಕಟೋರಿಯೆ ಯೊ ಅಖ್ಖೂಬಿ ಅಫುಟ್ ಖ್ಹೊನ್ನೇಥಿ ಕರ‍್ಯೊ.
ದೀವಾನು ಖಂಬುನ ತಯಾರಿ ಕರ‍್ಯುತೆ
(ವಿಮೋ 25:31-40)
ಅಜು಼ ಅಫುಟ್ ಖ್ಹೊನ್ನೇಥಿ ದಿವೋನು ಖಂಬಾನ ಕರ‍್ಯೊ. ಇನ ಬಡ್ಡೇಮ ಖಂಬಾನಬಿ ನಕ್ಷಾನ ಕಾಮ್‍ಥಿ ಬಣಾಯೊ. ಯೊ ದಿವೋನು ಖಮ್‌ಅಖ್ಖು ಫೂಲ್‌ನಿ ಬಣಾವಟ್‌ನಿಘೊಣಿ ಫೂಲ್ನಿಘೊಣಿಬಿ ಶನ್‌ಗಾರ್‌ಥಿ ಕೆತ್ತಿರಾಖ್ಯುಥು. ಖಂಬಾನು ಏಕೇಕ್‌ ಬಾಜು಼ಬಿ ತೀನ್ತೀನ್ ಡಾಳಿಯೆ ಕತೊ ಛೋ಼ ಡಾಳಿಯೇಥಿ. ಹರೇಕ್ ಡಾಳಿಯೇನಾಬಿ ಬಾದಾಮ್‌ನ ಫೂಲ್ನಿಘೊಣಿನು ತೀನ್ತೀನ್ ಫೂಲ್ನು ಬಣಾವಟ್ನಿ ಶನ್‌ಗಾರ್‌ಥು; ಏಕೇಕ್‌ ಬಣಾವಟ್ನಾಬಿ ಏಕ್‌ ಫೂಲ್‌ಬಿ ಥೂ. ಛೋ಼ ಡಾಳಿಯೇನಾಬಿ ಇಮ್ಮಸ್‌ ಥು. ದಿವೋನು ಖಂಬ್‌ನಿ ಫೂಲ್ನು ಪತ್ತರ್‌ಬಿ ಫೂಲ್‌ಬಿ ಗೋಂಡಿಬಿ ಬಾದಾಮ್ನು ಫೂಲ್ನಿಘೊಣಿ ಚಾರ್‌ ಫೂಲ್ನು ಬಣಾವಟ್ ಥು. ಬೆಬ್ಬೇ ಡಾಳಿಯೇನಿ ಫಾಕೆಮ್ಹೆಲಿರಾಖಾನಿ ಝ಼ಗೊಮ ಏಕೇಕ್‌ ಗೋಂಡಿ, ಡಾಳಿಯೆನ ಹೇಟ್ ಫಾಕೆರ‍್ಹವಾನ ಝ಼ಗೊಮಾಬಿ ಏಕೇಕ್‌ ಗೋಂಡಿ ಅಮ್‌ ಡಾಳಿಯೇನು ಛೋ಼ ಬಾಜು಼ಬಿ ಗೋಂಡಿಖ್ಹಾರುಥು. ಗೋಂಡಿಯೆಬಿ ಡಾಳಿಯೇಬಿ ಮಳಿನ್ ದಿವೋನು ಖಂಬ್‌ಖ್ಹಾರುಸ್ ಅಫುಟ್ ಖ್ಹೊನ್ನೇಥಿ ನಕ್ಷಾನು ಬಣಾವಟ್‌ಥಿ ಕರ‍್ಯೊ. ಇನ ಖ್ಹಾತ್ ದಿವಳ್ಗಿನಾಬಿ ಇನಿ ಕತರ‍್ನಿನಾಬಿ ದಿವೋನು ಬತ್ತಿ ಕಾಡಾನು ಕಟೋರಿಯೇನಾಬಿ ಅಫುಟ್ ಖ್ಹೊನ್ನೇಥಿ ಕರ‍್ಯೊ. ದಿವೋನು ಖಂಬು ಇನ ಅಖ್ಖು ರಾಛು಼ಬಿ ಚಾರ್‌ಉಪ್ಪರ್ ಡೋಡಿಖ್ಹ್‌ ಕಿಲೊ ಅಫುಟ್ ಖ್ಹೊನ್ನೇಥಿ ಹುಯಿರ‍್ಹುಥು.
ಢಪ್ಕಾರನ ಬಳಾನಖ್ಹಾಜೆ ಬಲಿನಿ ಚಾ಼ಚ಼ರ್‌ನ ಕರ‍್ಯುತೆ
(ವಿಮೋ 30:1-5)
ಇನೆ ಬಾವಳ್ಯನ ಝಾ಼ಡೇಥಿ ಖ್ಹಾಲರ‍್ಯನಿ ಚಾ಼ಚ಼ರ್‌ನ ಕರ‍್ಯೊ. ಯೊ ಏಕ್ಹಾತ್ ಲಾಂಬುಬಿ ಏಕ್ಹಾತ್ ಚೌ಼ಡುಬಿ ರ‍್ಹೀನ್ ಚಾರ್‌ಖೂಟಿಥು; ಇನು ಊಚು಼ ಬೇಹಾತ್ ಹುಯಿರ‍್ಹುಥು. ಇನು ಶಿಂಗ್‌ಡು ಅಖ್ಖು ಇನಿ ಜೋ಼ಡೆ ಬರೊಬರಸ್‌ಥು. ಇನು ಉಪ್ಲಿಬಾಜು಼ಬಿ ಚಾರ‍್ಹೆ ಬಾಜು಼ಬಿ ಶಿಂಗ್ಡನಾಬಿ ಅಫುಟ್ ಖ್ಹೊನ್ನೇಥಿ ಢಪಾಯೊ. ಅಶ್‌ಪಿಶ್‌ಬಿ ಖ್ಹೊನ್ನಾನು ಶನ್‌ಗಾರ್‌ನಿ ಪಟ್ಟಿ ಭಂದಾಯೊ. ಇನ ಪಾಡನ ಲಠ್ಠಾವ್ನ ಪೆಖ್ಹಾಡನ ಯೊ ಪಟ್ಟಿನ ಹೇಟ್ ಚಾ಼ಚ಼ರ್‌ನ ಭೇಬಾಜು಼ಬಿ ಬೆಬ್ಬೇ ಖ್ಹೊನ್ನಾನು ಕಾಕ್ಣಿನ ಕರಾಯೊ. ಚಾ಼ಚ಼ರ್‌ನ ಪಾಡಾನ ಲಠ್ಠಾವ್ನ ಬಾವಳ್ಯನ ಝಾ಼ಡೇಥಿ ಕರಿನ್‌ ಇನ ಖ್ಹೊನ್ನಾನ ತಗ್‌ಡಾವ್ನ ಢಪಾಯೊ.
ಅಬಿಷೇಕ್ ತೇಲ್‌ಬಿ ಅಜು಼ ಖ್ಹಾಲರ‍್ಯೊ ತಯಾರ್‌ಕರಾನು
(ವಿಮೋ 30:22-38)
ಆ ನಾಹುಯಿನ್ ಇನೆ ದೇವ್ನ ಸೇವೆನ ನೇಮಕ್‌ಹುಯಿರ‍್ಹುತೆ ಪಟ್ಟಾಭಿಷೇಕನು ತೇಲ್ನಬಿ ವಾಖ್ಹ್‌ನ ತೇಲ್‌ಥಿ ಹುಯುತೆ ಶುದ್‍ ಖ್ಹಾಲರ‍್ಯನ ತೇಲ್ನಬಿ ವಾಖ್ಹ್‌ನ ತೇಲ್ನ ಕರವಾಳಾನ ಪರಕ್ಮಾಸ್ ಬಣಾಯೊ.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.