Waghri Booli Bible
ವಿಮೋ 27
ಬಲಿಪೀಠ್ (ಚಾ಼ಚ಼ರ್‌)
(ವಿಮೋ 38:1-7)
ಚಾ಼ಚ಼ರ್‌ನ ಬಾವಳ್ಯನ ಝಾ಼ಡ್‌ಥಿ ಪಾಚ಼್‌ಹಾತ್‌ ಲಾಂಬುಬಿ, ಪಾಚ಼್‌ಹಾತ್‌ ಚೌ಼ಡುಬಿ ಚಾರ್‌ಖೂಟಿ ಕರಾವ್ಣು. ಅಜು಼ ಯೊ ತೀನ್ ಹಾತ್ ಊಚು಼ ರ‍್ಹೇಣು. ಇನು ಚಾರ್ ಕೋಣಾಮ ಚಾರ್ ಶಿಂಗ್‌ಡಾವ್ನ ಕರಾವ್ಣು. ಯೊ ಶಿಂಗ್‌ಡುಅಖ್ಖು ಚಾ಼ಚ಼ರ್‌ಥಿಸ್ ಆಯುಹುಯು ರ‍್ಹೇವ್ಣು. ಯೊ ಚಾ಼ಚ಼ರ್‌ನ ತಾಂಬಾನ ತಗ್‌ಡಾವ್ನ ಮೂಚ಼್‌ಣು. ಇನಾಮನು ರಾಕ್‌ನ ಕಾಡಾನಖ್ಹಾಜೆ ಪತ್ತರ್‌ಬಿ, ಖಿಲ್ಲಾಬಿ, ಬೋಗುಣಿಯೆಬಿ, ಕಾಟಾನಿ ಡೋಯ್‌ಬಿ, ಅಜು಼ ಖಾಂಜ಼್‌ರಿನೊಛು಼ಲ್ಲೊ ಕರಾವ್ಣು. ಆ ಜಿನಖ್ಹ್‌ಖ್ಹಾರು ತಾಂಬಾನು ಹುಯಿರ‍್ಹೇವ್ಣು. ಚಾ಼ಚ಼ರ್‌ನ ವಣಾನ ಕಾಮ್‍ಥಿ ತಾಂಬಾನಿ ಖಾಂಜ್ರಿನ ಕರಾವ್ಣು, ಯೊ ಖಾಂಜ್ರಿನು ಚಾರ್ ಕೋಣಾವ್ನ ತಾಂಬಾನಿ ಕಾಕ್ಣಿಯೇವ್ನ ಘಲಾವ್ಣು. ಯೊ ಖಾಂಜ್‌ರಿ ಚಾ಼ಚ಼ರ್‌ನು ಅಶ್‌ಪಿಶ್ ಛಾ಼ತೆ ಕಟ್ಟಾನ ಹೇಟ್‌ಲಗು ರ‍್ಹೀನ್ ಚಾ಼ಚ಼ರ್‌ನ ಹೇಟ್‌ಥು ಬೀಚ್‌ಲಗು ರ‍್ಹವಾನಿತರ ಘಲಾವ್ಣು. ಚಾ಼ಚ಼ರ್‌ನ ಪಾಡಾನು ಲಠ್ಠಾವ್ನ ಬಾವಳ್ಯನ ಝಾ಼ಡ್‌ಥಿ ಕರೈನ್, ತಾಂಬಾನ ತಗ್‌ಡಾವ್ನ ಮೂಚ಼್‌ಣು. ಯೊ ಲಠ್ಠಾವ್ನ ಯೊ ಕಾಕ್ಣಿಯೆಮ ಪೆಖ್ಹಾಡನಿ ವಖ್ಹ್‌ತೆ ಯೊ ಹೈರುತೆ ಚಾ಼ಚ಼ರ್‌ನ ಪಾಡನಖ್ಹಾಜೆ ಇನು ಭೇ ಬಾಜು಼ಬಿ ರ‍್ಹೇವ್ಣು. ಯೊ ಚಾ಼ಚ಼ರ್‌ನ ಪಲ್ಗಾವ್‌ಥಿ ಪೋಲ ಪಿಟಾರನಿಘೊಣಿ ಕರಾವ್ಣು. ಮೇ ಪಹಾಡ್‌ಮ ತುನ ವತಾಳನಿಘೋಣಿಸ್ ಇನ ಕರಾವ್ಣು.
ಯೆಹೋವನ ಡೇರಾನ ಘರ್‌ನಿ ಝ಼ಗೋನು ಬಲ್ಡೊ
(ವಿಮೋ 38:9-20)
ಅಜು಼ ಡೇರಾನ ಘರ್‌ನ ಖ್ಹಾಮ್ಣೆನು ಬಲ್ಡಾನ ಕರಾವ್ಣು. ಯೊ ದಕ್ಷಿಣ್ ಬಾಜು಼ನ ಬಲ್ಡಾನ ಪಡ್ದಾವ್‌ಖ್ಹಾರು ರ‍್ಹೇವ್ಣು. ಯೊ ಪಡ್‌ದಾವ್ನ ಖ್ಹಾಜ಼್‌ಥಿ ಖ್ಹುತ್ತರ್‌ನ ಧಾಗಾನ ಲುಂಗ್ಡಾವ್‌ಥಿ ಕರಾವ್ಣು. ಯೊ ಖ್ಹೊ ಹಾತ್ ಲಾಂಬು ಹುಯಿರ‍್ಹೇವ್ಣು. ಯೊ ಬಾಜು಼ಮ ವೀಖ್ಹ್‌ ಖಂಬಖ್ಹಾರು. ಇನ ವೀಖ್ಹ್‌ ತಾಂಬಾನು ಹುದಿನೊ ಬಂಡೊಖ್ಹಾರು ರ‍್ಹೇಣು. ಖಂಬಾವ್ನ ರೂಪಾನೊ ಅಖುಟಾವ್‌ಬಿ ರ‍್ಹೇಣು. ಯೋಸ್ ಪರಕ್ಮ ಉತ್ತರ್ ಭಣಿಬಿ ಖ್ಹೊ ಹಾತ್ ಲಾಂಬು ರ‍್ಹವಾನು ಪಡ್‌ದೊಖ್ಹಾರು, ವೀಖ್ಹ್‌ ಖಂಬಖ್ಹಾರು, ವೀಖ್ಹ್‌ ತಾಂಬಾನು ಹುದಿನು ಬಂಡೊಖ್ಹಾರು ರ‍್ಹೇವ್ಣು ಖಂಬಾನು ಅಖುಟೊಖ್ಹಾರುಬಿ, ಪಟ್ಟಿಖ್ಹಾರುಬಿ ರೂಪಾನು ಹುಯಿರ‍್ಹೇವ್ಣು. ದನ್ ನಿಕ್‌ಳಭಣಿನು ಮಾಳ್‌ನು ಚೌ಼ಡಾಮ ಅಢೈಖ್ಹ್ ಹಾತ್ ಲಾಂಬು ಪಡ್‌ದೊಖ್ಹಾರುಬಿ ದಖ್ಹ್‌ ಖಂಬುಖ್ಹಾರುಬಿ, ದಖ್ಹ್‌ ಹುದಿನೊ ಬಂಡಾವ್‌ಬಿ ರ‍್ಹೇವ್ಣು. ಪೂರಬ್‌ಭಣಿಬಿ ಬಲ್ಡಾನು ಚೌ಼ಡು ಅಢೈಖ್ಹ್ ಹಾತ್ ರ‍್ಹೇಣು. ಎಕ್ ಬಾಜು಼ಮ ಪಂಧ್ರ ಹಾತ್ ಲಾಂಬು ಪಡ್‌ದೊರ‍್ಹೀನ್ ಯೊ ಖ್ಹಾರನ ತೀನ್ ಖಂಬಾವ್‌ಬಿ, ತೀನ್ ಹುದಿನೊ ಬಂಡಾವ್‌ಬಿ ರ‍್ಹೇವ್ಣು. ಅಜೇಕ್ ಬಾಜು಼ಮ ಪಂಧ್ರ ಹಾತ್ ಲಾಂಬುರ‍್ಹವಾನು ಪಡ್‌ದೊ ರ‍್ಹೀನ್ ಯೊ ಖ್ಹಾರನ ತೀನ್ ಖಂಬಾವ್‌ಬಿ, ತೀನ್ ಹುದಿನ ಬಂಡಾವ್‌ಬಿ ರ‍್ಹೇವ್ಣು. ಬಲ್ಡಾನ ಬಾಕಲ್‌ಮಾಸ್ ವೀಖ್ಹ್‌ ಹಾತ್ನು ಪಡ್‌ದೊ ರ‍್ಹೇವ್ಣು. ಇನ ಖ್ಹಾಜ಼್‌ಥಿ ಕಾಡಿಹುಯು ವಾಟ್ಯುತೆ ಖ್ಹುತ್ತರ್‌ನೊ ಧಾಗೊ, ನೀಲಿ, ರಾಯ್‌ಜಾ಼ಮಣ್ಣೊ ರಂಗ್, ಲಲೇಲಾಲ್ ರಂಗ್‌ಥಿ ರ‍್ಹವಾನು ಧಾಗೇಥಿ ವಣ್‌ಖರ್‌ನು ಕಾಮ್‌ಕರವಾಳನ ಹಾತೇಥಿ ಕರಾವ್ಣು. ಬಾಕಲ್‌ನ ಚಾರ್ ಖಂಬಾವ್‌ಬಿ ಚಾರ್ ಹುದಿನೊ ಬಂಡಾವ್‌ಖ್ಹಾರು ರ‍್ಹೇವ್ಣು. ಮಾಳ್‌ನ ಅಶ್‌ಪಿಶ್‌ನು ಖ್ಹಾರು ಖಂಬಾವ್‌ನಬಿ, ರೂಪಾನಿ ಪಟ್ಟಿಯೆಬಿ, ರೂಪಾನು ಅಖುಟೊಖ್ಹಾರುಬಿ, ತಾಂಬಾನು ಹುದಿನೊ ಬಂಡೊಖ್ಹಾರುಬಿ ರ‍್ಹೇವ್ಣು. ಮಾಳ್ ಖ್ಹೊ ಹಾತ್ ಲಾಂಬುಬಿ ಅಶ್‌ಪಿಶ್ ಅಢೈಖ್ಹ್ ಹಾತ್ ಚೌ಼ಡುಬಿ ರ‍್ಹೇಣು. ಇನ ಅಶ್‌ಪಿಶ್‌ನು ಪಡ್‌ದೊ ಖ್ಹಾಜ಼್‌ಥಿ ಕಾಡಿಹುಯು ಖ್ಹುತ್ತರ್‌ನ ಧಾಗಾನ ಲುಂಗ್ಡೇಥಿ ಬಣೈರ‍್ಹಿನ್ ಪಾಚ಼್‌ ಹಾತ್ ಊಚು಼ ರ‍್ಹೇವ್ಣು. ಇನ ತಾಂಬಾನೊ ಹುದಿನೊ ಬಂಡೊ ರ‍್ಹೇವ್ಣು. ಘರ್‌ನು ಹರೇಕ್ ಥರಾನ ಕಾಮ್ನು ರಾಛು಼ ಕಾಮ್ನ ಹೋಣುತೆ ಜಿನಖ್ಹ್‌ಖ್ಹಾರುಬಿ, ಡೇರಾನು ಘರ್‌ನು ಖಿಲ್ಲಾವ್‌ಬಿ, ಮಾಳ್‌ನು ಮರೆಲಾವ್ನ ಖಿಲ್ಲಾ ಖ್ಹಾರುಬಿ ತಾಂಬಾನು ಹುಯಿರ‍್ಹೇಣು.
ದೀವಾನ ಲಗಾಡಾನಿ ಸೇವೆ
(ಯಾಜಕ 24:1-4)
ದೀವೊ ಕೆದೇಬಿ ಲಾಗುಕರನಿತರ ಇಸ್ರಾಯೇಲ್‌ವಾಳು ಒಲಿವ್ ಝಾ಼ಡಾನು ಪಂಡಾವ್ನ ಚ಼ಗ್‌ದಿನ್ ಶುದ್‌ಥಿ ರ‍್ಹವಾನು ಒಲಿವ್ ತೇಲ್ನ ಲೀನ್ ಆವನಿತರ ಇವ್ಣುನ ಹುಕುಮ್‌ ದೇವ್ಣು. ದೇವ್ನ ದರ್ಶನ್ನ ಡೇರಾಮ ಹುಕುಮ್‌ನ ಬಂಡಾನು ಪಲ್ಗಾವ್ನ ಪಿಟಾರನ ಖ್ಹಾಮ್ಣೆನು ಪಡ್ದಾನ ಫಾದರ್ ಆರೋನಬಿ, ಇನ ಲಡ್ಕಾವ್‌ಬಿ ಖ್ಹಾಂಜ಼್‌ಥು ಧರಿನ್ ವ್ಹಾಣಲಗು ಯೆಹೋವನ ಖ್ಹಾಮ್ಣೆ ಯೊ ದೀವೊ ಲಾಗುಕರನಿಘೋಣಿ ಬರೋಬರ್ ಕರುಕರ‍್ನು. ಇಸ್ರಾಯೇಲ್‌ವಾಳು ಇನಿ ಪಿಳ್ಗಿವಾಳು ಆ ನಿಯಮ್ನ ಮುಂಡಿನ್ ಮುಂಡಿಯೆಬಿ ಹಮೇಶಾಥಿ ಪಾಡಿಚಾ಼ಲ್ನು. ಯೊ ಇವ್ಣುನ ನಿಯಮ್‌ ಹುಯಿರ‍್ಹೇಣು.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.