Waghri Booli Bible
ವಿಮೋ 26
ಯೆಹೋವನು ಝ಼ಗೋನು ಡೇರೊ
(ವಿಮೋ 36:8-38)
ಮನ ರ‍್ಹವಾನಖ್ಹಾಜೆ ಎಕ್ ಡೇರಾನ ಘರ್‌ನ ದಖ್ಹ್‌ ಪಡ್ದೇಥಿ ಕರಾವ್ಣು. ಯೊ ಕವ್‌ಳು ಕೋರು ಲುಂಗ್ಡ ಹುಯಿರ‍್ಹೇಣು. ಇನಾಮ ನೀಲಿ, ರಾಯ್‌ಜಾ಼ಮಣ್ಣೊ ರಂಗ್ ಅಜು಼ ಲಲೇಲಾಲ್ ರಂಗ್‌ನ ಉಲ್ಲನ್ನ ಧಾಗೇಥಿ ಕೆರೂಬಿಯೇವ್ನ ವಣ್‌ಖರ್‌ಥಿ ಬಣಾವಟ್ ಕರ‍್ನು. ಹರೇಕ್ ಲುಂಗ್‌ಡೂಬಿ ಆಟ್ ಉಪ್ಪರ್ ವೀಖ್ಹ್‌ ಹಾತ್ ಲಾಂಬುಬಿ ಚಾರ್ ಹಾತ್ ಚೌ಼ಡುಬಿ ರ‍್ಹೇವ್ಣು. ಅಖ್ಖುಸ್ ಪಡ್‌ದೊಖ್ಹಾರು ಎಕ್ಕಸ್ ಆಳ್ತಿನು ರ‍್ಹೇಣು. ಪಾಚ಼್-ಪಾಚ಼್ ಲುಂಗ್ಡಾನು ಪಡ್‌ದಾವ್ನ ಎಕೇಕೆ ಜೋ಼ಡ್‌ಕರ‍್ನು. ಆ ಭೇ ಬಿಡ್ಕಿಮ ಎಕೇಕೆನು ಕಡ್‌ಶಿನ ಲುಂಗ್ಡಾನ ಪಡ್ದಾನಿ ನೋಕ್‌ಮ ನೀಲಿ ಧಾಗೇಥಿ ಫುಂದಾವ್ನ ಕರಾವ್ಣು. ಯೊ ಫುಂದೊ ಅಢೈಖ್ಹ್ ಅಢೈಖ್ಹ್‌ನಿ ಪರಕ್ಮ ಏಕ್‌ಥಿಏಕ್‌ ಆಮಖ್ಹಾಮೆ ರ‍್ಹೇಣು. ಆಸ್ ಕಾಹೆತೆ ಅಢೈಖ್ಹ್ ಖ್ಹೊನ್ನಾನು ಅಖುಟಾವ್ನ ಕರೈನ್ ಯೊ ಪಡ್‌ದಾವ್ನ ಏಕ್‌ಥಿಏಕ್‌ ಮಳಾವ್ಣು. ಅಮ್ ಎಕ್ಕಸ್ ಡೇರಾನುಘರ್ ಬಣ್‌ಷೆ.
ಆ ಡೇರಾನ ಘರ್‌ಪರ್ ಹೋಡಾವನಖ್ಹಾಜೆ ಬೋಕ್ಡಾನು ರುಯ್‌ನು ಗ್ಯಾರ‍್ಹ ಲುಂಗ್ಡಾವ್ನ ಕರಾವ್ಣು. ಏಕೇಕ್‌ ಪಡ್ದೊ ಡೋಡಿಖ್ಹ್‌ಹಾತ್‌ ಲಾಂಬುಬಿ ಚಾ಼ರ್‌ಹಾತ್‌ ಚೌ಼ಡುಬಿ ರ‍್ಹೇವ್ಣು. ಅಖ್ಖೂಸ್ ಪಡ್‌ದೊಖ್ಹಾರು ಎಕ್ಕಸ್ ಆಳ್ತಿ ರ‍್ಹೇವ್ಣು. ಪಾಚ಼್ ಪಡ್‌ದಾವ್ನ ಎಕ್ಟು ಜೋ಼ಡ್‌ಕರಿನ್ ಛೋ಼ನ ಪಡ್ದಾನ ಡೇರಾನ ಘರ್‌ನು ಖ್ಹಾಮ್ಣೆ ಬಿಡ್ಕಿಕರಿನ್‌ ಠಂಗಿರ‍್ಹಾವನಿತರ ಮ್ಹೇಲ್ನು. ಅಮ್ ಮಳೈನ್ ವಣಿಹುಯು ಲುಂಗ್ಡಾವ್ನ ನೋಕ್‌ಮ ಅಢೈಖ್ಹ್ ಅಢೈಖ್ಹ್ ಫುಂದಾವ್ನ ಕರಾವ್ಣು. ತಾಂಬಾನಿ ಅಢೈಖ್ಹ್ ಅಖುಟಾವ್ನ ಕರೈನ್ ಫುಂದಾವ್ಮ ಅಟ್‌ಕೈನ್ ತಮಾಮ್‌ಬಿ ಮಳಿನ್ ಎಕ್ಕಸ್ ಡೇರಾನುಘರ್ ಹುವಾನಿತರ ಜೋ಼ಡ್‌ಕರ‍್ನು. ಹೋಡಾನ ಲುಂಗ್ಡಾವ್ಮ ಆಧೊ ಪಡ್ದೊ ಜಾ಼ಖ್ಹತ್‌ರ‍್ಹಿಷೆ, ಯೊ ಜಾ಼ಖ್ಹತ್ನು ಭಾಗ್ನ ಡೇರಾನ ಘರ್‌ನ ಪೀಠೆನಭಾಗ್‌ಮ ಬಿಡ್‌ಕಿ ಕರಿನ್ ಠಂಗಿರ‍್ಹಾವನಿತರ ಮ್ಹೇಲ್ನು. ಢಾಪನ ಲುಂಗ್ಡಾವ್‌ನು ಲಾಂಬಮ ಹೈಕಡ್ ಎಕ್ ಹಾತ್‌ಬಿ, ಹಿಕಡ್ ಎಕ್ ಹಾತ್‌ಬಿ ಜಾ಼ಖ್ಹತ್ ರ‍್ಹಿಶೆ. ಯೊ ಮಹಿನು ಭಾಗ್‌ನು ಡೇರಾನ ಘರ್‌ನ ಮೂಚ಼ವನಿತರ ಹೈಕಡ್‌ಬಿ ಹಿಕಡ್‌ಬಿ ಠಂಗಿರ‍್ಹಾವನಿಘೋಣಿ ರ‍್ಹೇಣು.
ಆ ಹೋಡ್‌ಣಿನ ಢಾಪನಖ್ಹಾಜೆ ಹದಕರಿರಾಖನು ಲಾಲ್‌ರಂಗ್ನು ಮೇಂಢಾನ ಚಾ಼ಂಬ್ಡಾವ್‌ಥಿ ಏಕ್‌ ಪರ್‌ಖೊಂಡನಾಬಿ ದರ‍್ಯಾವ್ನ ಜಾನ್ವರ್‌ನ ಚಾ಼ಂಬ್ಡಾವ್‌ಥಿ ಅಜೇಕ್ ಪರ್‌ಖೊಂಡನಾಬಿ ಕರಾವ್ಣು. ಡೇರಾನ ಘರ್‌ನ ಹೋಣುತೆ ಚೌಕಟ್ನ ಬಾವಳ್ಯನ ಝಾ಼ಡ್‌ಥಿ ಕರಾವ್ಣು. ಹರೇಕ್ ಚೌಕಟ್‌ ದಖ್ಹ್‌ಹಾತ್‌ ಲಾಂಬುಬಿ ಡೋಡ್‌ಹಾತ್‌ ಚೌ಼ಡುಬಿ ರ‍್ಹೇಣು. ಹರೇಕ್ ಚೌಕಟ್‌ ಆಡುಪಟ್ಟೀಥಿ ಮಳಿರ‍್ಹಯುಹುಯು ಬೇ ಭಿರಾವನ ಖಂಬ ಹುಯಿರ‍್ಹೇಣು. ಡೇರಾನ ಘರ್‌ನು ಅಖ್ಖು ಚೌಕಟ್‌ಬಿ ಇಮ್ಮಸ್ ಕರಾವ್ಣು. ಘರ್‌ನ ದಕ್ಷಿಣ್ ದಿಕ್ಮ ವೀಖ್ಹ್‌ ಚೌಕಟ್ನ ಭೀರಾಕ್ಣು. ಚಾ಼ಳಿಖ್ಹ್ ರೂಪಾನು ಹುದಿನೊ ಬಂಡೊಕರೈನ್ ಯೊ ವೀಖ್ಹ್‌ ಚೌಕಟ್ನ ಹೇಟ್ ಮ್ಹೇಲ್ನು. ಏಕೇಕ್‌ ಚೌಕಟ್‌ಮ ಛಾ಼ತೆ ಬೇ ಪಟ್ಟಿಯೇವ್ನ ಏಕೇಕ್‌ ಹುದಿನೊ ಬಂಡೊರ‍್ಹೇಣು. ಇಮ್ಮಸ್ ಡೇರಾನ ಉತ್ತರ್ ದಿಕ್‌ಭಣಿಬಿ ವೀಖ್ಹ್‌ ಚೌಕಟ್‌ಖ್ಹಾರು, ಅಜು಼ ಹರೇಕ್ ಚೌಕಟ್ನ ಬೆಬ್ಬೆ ರೂಪಾನೊ ಹುದಿನೊ ಬಂಡೊಖ್ಹಾರು ರ‍್ಹೇಣು. ಡೇರಾನ ಪಚ್‌ಕೊಡೆ ಕತೊ ಪಶ್ಚಿಮ್ ದಿಕ್ಮ ಛೋ಼ ಚೌಕಟ್ನ ಕರಾವ್ಣು. ಡೇರಾನಿ ಪೀಠೆನು ಬೇ ಕೋಣಾವ್ನ ಅಲಕ್ ಬೇ ಚೌಕಟ್ನ ಕರಾವ್ಣು. ಯೊಖ್ಹಾರನ ಹೇಟ್‌ಥು ಧರಿನ್ ಉಪ್ಲಿ ನೋಕ್ ಲಗೂಬಿ ಮಳೈರಾಕ್‌ಣು. ಉಪ್ಲಿ ಬಾಜು಼ಬಿ ಎಕ್ಕಸ್ ಕಾಕ್ಣಿಮ ಮಳೈರಾಕ್‌ಣು. ಇಮ್ಮಸ್ ಭೇ ಕೋಣಾವ್ನಬಿ ಕರಾವ್ಣು. ಅಮ್ ಪೀಠೆನಿ ಬಾಜು಼ಮ ಆಟ್ ಚೌಕಟ್‌ಬಿ ಅಜು಼ ಹರೇಕ್ ಚೌಕಟ್ನ ರೂಪಾನೊ ಹುದಿನೊ ಬಂಡೋಬಿ ಬೋಲ್ನುಕತೊ ಖ್ಹೋಳ ಹುದಿನೊ ಬಂಡೊಖ್ಹಾರು ರ‍್ಹೇಣು. ಬಾವಳ್ಯನ ಝಾ಼ಡ್‌ಥಿ ಗಡಾವ್ನ ಕರಾವ್ಣು. ಘರ್‌ನು ಭೇಬಾಜು಼ನು ಚೌಕಟ್‌ನಬಿ, ಇನು ಪೀಠೆನು ಕತೊ ದನ್ ನಿಕ್‌ಳಭಣಿನು ಚೌಕಟ್‌ನಬಿ ಪಾಚ಼್-ಪಾಚ಼್ ಗಡಾವ್ನ ಕರಾವ್ಣು. ಚೌಕಟ್‌ಅಖ್ಖಾನು ಇಚ಼್ಮ ರ‍್ಹವಾನು ಗಡಾ ಎಕ್ ನೋಕ್‌ಥು ಬಿಜೇಕ್ ನೋಕ್‌ಲಗುಬಿ ಛಿಮಾವನಿಘೋಣಿ ರ‍್ಹೇಣು. ಯೊ ಚೌಕಟ್ನ ಖ್ಹೊನ್ನಾನ ತಗ್‌ಡಾವ್‌ಥಿ ಮೂಚಿನ್ ಇನಾಮ ಯೊ ಗಡಾನಖ್ಹಾಜೆ ಖ್ಹೊನ್ನಾನಿ ಕಾಕ್ಣಿನ ಕರಾವ್ಣು. ಯೊ ಅಖುಟಾವ್ನಬಿ ಖ್ಹೊನ್ನಾನ ತಗ್‌ಡಾವ್‌ಥಿ ಮೂಚ಼್‌ಣು. ಮೇ ಪಹಾಡ್‌ಮ ತುನ ವತಾಳಿದಿದೊತೆ ಪರಕ್ಮಾಸ್ ಡೇರಾನ ಘರ್‌ನ ಭೀರಾಕ್ಣು.
ನೀಲಿ, ರಾಯ್‌ಜಾ಼ಮಣ್ಣೊ ರಂಗ್, ಲಲೇಲಾಲ್ ರಂಗ್‌ನು ಖ್ಹುತ್ತರ್‌ನ ಧಾಗೇಥಿ ಕೆರೂಬಿಯೇವ್ನ ಚಮತ್ಕಾರ್‌ನಿತರ ವಣ್‌ಖರ್ ನಖಾವ್ಣು. ಬಾವಳ್ಯನ ಝಾ಼ಡ್‌ಥಿ ಚಾರ್ ಖಂಬಾವ್ನ ಕರೈನ್, ಖ್ಹೊನ್ನಾನ ತಗಡ್‌ನ ಮೂಚಿನ್, ಚಾರ್ ರೂಪಾನ ಹುದಿನ ಬಂಡಾವ್ನ ಉಪ್ಪರ್ ಭಿರಾಖಿನ್ ಖ್ಹೊನ್ನಾನಿ ಕಣ್ಣಿಯೆವ್‌ಥಿ ಯೊ ಪಡ್‌ದಾವ್ನ ಯೊ ಚಾರ್ ಖಂಬಾವ್ನ ಅಟ್‌ಕಾವ್ಣು. ಯೊ ಪಡ್ದಾನ ಕಣ್ಣಿಯೆಮ ಅಟ್‌ಕಾವನಿ ವಖ್ಹ್‌ತೆ ಇನಾಮಹಿ ಹುಕುಮ್‌ನ ಪಲ್ಗಾವ್ನ ಪಿಟಾರನ ಮಂಗೈ ಮ್ಹೇಲ್ನು. ಯೊ ಪಡ್ದೊ ಪವಿತ್ರಝ಼ಗೊಕರಿಬಿ ಮಹಾಪವಿತ್ರಝ಼ಗೊಕರಿಬಿ ಭಾಗ್‌ಕರಾಸ್. ಮಹಾನ್ ಪವಿತ್ರಝ಼ಗೋಮ ಹುಕುಮ್‌ನು ಪಲ್ಗಾವ್ನ ಪಿಟಾರನಪರ್ ಕೃಪಾಸನ್‌ನ ಲಯಿನ್‌ಮ್ಹೇಲಾವ್ಣು. ಪಡ್ದಾನ ಭಾರ್‌ಮ ಖುಡ್‌ಷಿನಬಿ ಖುಡ್‌ಷಿನ ಖ್ಹಾಮ್ಣೆಕರಿ ಘರ್‌ನು ದಕ್ಷಿಣ್ ದಿಕ್ಮ ದಿವ್ವಾನ ಖಂಬಾನ ಮ್ಹೇಲ್ನು. ಖುಡ್‌ಷಿ ಉತ್ತರ್ ಬಾಜು಼ಭಣಿ ರ‍್ಹೇಣು.
ಡೇರಾನು ದರ್ವಾಜ಼ನ ಆಡು ಖ್ಹಾಜ಼್‌ನಿ ಬಣಾವಟ್ ಕರ‍್ಯಹುಯ ಖ್ಹುತ್ತರ್‌ನ ಧಾಗಾನ ಪಡ್ದೇಥಿ ನೀಲಿ, ರಾಯ್‌ಜಾ಼ಮಣ್ಣೊ ರಂಗ್, ಲಲೇಲಾಲ್ ರಂಗ್‌ನ ಉಲ್ಲನ್‌ಥಿ ವಣ್‌ಖರ್ ನಖೈನ್ ಪಡ್ದೊ ಕರಾವ್ಣು. ಯೊ ಪಡ್ದೊ ಠಂಗಾವನಖ್ಹಾಜೆ ಬಾವಳ್ಯನು ಝಾ಼ಡ್‌ಥಿ ಪಾಚ಼್ ಖಂಬಾವ್ನ ಕರೈನ್ ಖ್ಹೊನ್ನಾನ ತಗ್‌ಡಾವ್‌ಥಿ ಮೂಚಾ಼ವ್ಣು. ಇನ ಅಖ್ಖ ಅಖುಟಾವ್ನ ಖ್ಹೊನ್ನೇಥಿ ಕರೈನ್ ಯೊ ಅಖ್ಖಾನಖ್ಹಾಜೆ ಪಾಚ಼್ ತಾಂಬಾನು ಹುದಿನ ಬಂಡಾವ್ನ ಕರಾವ್ಣು.
Waghri Booli Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.