ದೇವ್ನಿ ಖ್ಹಾಚಿ ವಚನ್
ರೋಮ 5
ದೇವ್ನಿ ಜೋ಼ಡ್ಮ ನೀತಿ
ಅಮ್‌ರ‍್ಹವಾಪರ್ ವಿಶ್ವಾಸ್‍ಥಿ ನೀತಿವಾಳುಕರಿ ತೀರ್ಪ್ ಲೀಲಿದಾತೆ ಅಪ್ಣುನ ಅಪ್ಣೊ ಪ್ರಭು ಯೇಸುಕ್ರಿಸ್ತಥಿ ದೇವ್ನಿ ಜೋ಼ಡ್ಮ ಸಮಾಧಾನ್‍ ರ‍್ಹೇಸ್. ಇನೆ ಅಪ್ಣುನ ವಿಶ್ವಾಸ್‍ಥಿ ದೇವ್ನಿ ಕೃಪೆನ ಆಖ್ಹ್‌ರಾಮ ಲಾಯೊ. ಹಮ್ಕೆ ಅಪ್ಣೆ ಇನಮಹಿ ಜಿವುಕರಿಯೇಸ್. ಇನಖ್ಹಾಜೆ ದೇವ್ನಿ ಮಹಿಮೆಮ ಅಪ್ಣೆ ಭಾಗ್‍ಹುಯಿರ‍್ಹಾಸ್‍ಕರಿ ನಂಬಿನ್ ಇನಮಹಿ ಅಪ್ಣೆ ಹುಮ್ಮಖ್ಹ್‌ ಲಿಯೇಸ್. ಎತ್ರೇಸ್ ಖಲಿಕಾಹೆ, ಅಪ್ಣುನ ಆವಸ್ತೆ ಖ್ಹತಾಪ್ಣಿಮಾಬಿ ಖುಷಿಥಿ ಛಿಯೆ. ಕತೋಬಿ ಖ್ಹತಾಪ್ಣಿ ಖ್ಹಮಾಳಿ ರ‍್ಹವಾನ ಶಿಕಾಡಸ್‌ಕರಿ ಅಪ್ಣುನ ಮಾಲುಮ್‌ ಛಾ಼. ಖ್ಹಮಾಳಿಲ್ಯವಾನು ಹುಯಿರ‍್ಹುತೆ ಅಪ್ಣುನ ದೇವ್‌ಮ ಘಟ್‍ಥಿ ರ‍್ಹವಾಖ್ಹರ್‌ಕು ಕರಸ್, ಅಜು಼ ದೇವ್‌ಮ ಘಟ್‍ಥಿ ರ‍್ಹಿಯಾತೊ ಅಪ್ಣಾಮ ಭರೋಖ್ಹಾನ ಉಬ್‌ಜಾ಼ವಸ್. ಆ ಭರೋಖ್ಹೊ ಕದೇಬಿ ನಿರಾಶ್‍ ಕೋಕರ್‌ಶೇನಿ, ಶನಕತೊ ದೇವ್ನಿ ಪ್ಯಾರ್‌ ಅಪ್ಣುನ ಇನಿ ವರಹುಯಿರ‍್ಹಿತೆ ಪವಿತ್ರಾತ್ಮಥಿ ಅಪ್ಣ ದಿಲ್ಮ ರಂಚಿರಾಖ್ಯೊಸ್. ಅಪ್ಣೆ ಪಾಪ್‌ಥಿ ಬಿಣ್‍ ಶಕತ್‌ವಾಳ ಹುಯಿರಾತೆ ತದೇಸ್‌ ದೇವ್ನೆ ಚೂ಼ಣಿಲಿದೊತೆ ವೇಳ್ಮ ಕ್ರಿಸ್ತನೆ ಖರಾಬ್ ಅದ್ಮಿವೋನಖ್ಹಾಜೆ ಮರ‍್ಯೊ. ಏಕ್ ನೀತಿವಾಳನಖ್ಹಾಜೆ ಜಾನ್‍ದ್ಯವಾನು ಘಣು ಮುಶ್ಕಿಲ್. ಅಛ಼್ಛೊ ಏಕ್‍ಜ಼ಣಾನಖ್ಹಾಜೆ ಜಾನ್‍ದ್ಯವಾನು ಹಿಮ್ಮತ್‍ ಕರ‍್ಯುತೋಬಿ ಕರೆಜಾ಼ಯ್. ಕತೋಬಿ ಅಪ್ಣೆ ಪಾಪಿ ಹುಯಿರ‍್ಹವಾನಿ ವಖ್ಹ್‌ತೇಸ್ ಕ್ರಿಸ್ತನೆ ಅಪ್ಣಖ್ಹಾಜೆ ಮರೀನ್ ದೇವ್ನೆ ಅಪ್ಣಪರ್ ಇನಛಾ಼ತೆ ಪ್ಯಾರ್‌ನ ವತಾಳಿರಾಖ್ಯೊಸ್. ಕ್ರಿಸ್ತನ ಲ್ಹೋಯಿಥಿ ಅಪ್ಣೆ ಹಮ್ಕೆ ದೇವ್ನಿಜೋ಼ಡ್ಮ ನೀತಿವಾಳಕರಿ ಚೂ಼ಣೈರ‍್ಹಾಸ್. ದೇವ್ನ ಚ಼ಂಢಾಳ್‌ಥಿ ಇನಭಣಿಥು ಅಜೂ಼ಬಿ ಕೆತ್ರೆ ಘಣೇಥಿ ಬಚಿಜಾವಾಳ ಹುಯಿರ‍್ಹಿಶು? ಅಪ್ಣೆ ದೇವ್ನ ವಹೇರ‍್ಯ ಹುಯಿರ‍್ಹವಾನಿ ವಖ್ಹ್‌ತೇಸ್. ಅಪ್ಣುನ ಇನ ಛಿಯ್ಯಾನಿ ಮರಣ್‍ಥಿ ಅಪ್ಣುನ ಇನ ದೋಸ್ತಿಖ್ಹಾರ ಕರಿ ಬಣೈರಾಖ್ಯೊಸ್. ಹಮ್ಕೆ ಅಪ್ಣೆ ದೇವ್ನ ದೋಸ್ತಿಹುಯಿರಾತೆ ಇನಖ್ಹಾಜೆ ದೇವ್ ಇನ ಛಿಯ್ಯಾನ ಜಾನ್‌ಥಿ ಅಪ್ಣುನ ಕೆತ್ರೆ ಜಾ಼ಖ್ಹತ್ ರಕ್ಷಣೆ ನಾಮಳ್‍ನು? ಕತೋಬಿ ಅಪ್ಣುನ ದೇವ್ನ ದೋಸ್ತಿ ಹುವಾಖ್ಹರ್ಕು ಕರ‍್ಯೊತೆ ಅಪ್ಣೊ ಪ್ರಭು ಯೇಸುಕ್ರಿಸ್ತಥಿ ದೇವ್ ಕರ‍್ಯೊತೆ ಕಾಮ್ನಖ್ಹಾಜೆ ಅಪ್ಣೆ ಖುಷಿ ಕರ್ಯೆಸ್.
ಆದಾಮ್ ಅಜು಼ ಕ್ರಿಸ್ತ
ಇನಖ್ಹಾಜೆ, ಏಕ್‍ಜ಼ಣೇಥಿ ಜಗತ್‌ಮ ಪಾಪ್‍ಆಯು ಅಜು಼ ಯೋಪಾಪ್ ಇನಿಜೋ಼ಡ್ಮ ಮರಣ್ಣಾಬಿ ಲಾಯು. ಅನಖ್ಹಾಜೇಥಿ ಮರಣ್ ಅಖ್ಖಾ ಅದ್ಮಿವೋನ ಉಪ್ಪರ್ ಫೈಲಾಯು ಶನಖ್ಹಾಜೆಕತೊ ಅಖ್ಖುಜ಼ಣು ಪಾಪ್‍ಕರ‍್ಯು. ಧರ್ಮಶಾಸ್ತ್ರ ದೆವವಾನ ಅಗಾಡಿಸ್ ಪಾಪ್ ಜಗತ್‌ಮಾ ಥು. ಕತೋಬಿ ಧರ್ಮಶಾಸ್ತ್ರ ಕೊಯ್ನಿತೆ ತದೆ ಪಾಪ್ ಗಣ್ತಿಮ ಕೋ ಆಯುಹೋತ್ನಿ. ಕತೋಬಿ ಮರಣ್ ಅದಾಮ್‍ಥಿ ಮೋಶೆಲಗು ರಾಜ಼್ ಚ಼ಲವ಼್ಕರ್ತುಥು. ಆದಾಮನೆ ಕರ‍್ಯೊತೆ ಅಪರಾದ್‌ನಖ್ಹಾಜೆ ಪಾಪ್‍ಕೊಕರಾಂತೆ ಇವ್ಣ ಉಪ್ಪರ್‌ಬಿ ಯೋ ರಾಜ಼್ ಚ಼ಲವ಼್ಕರ್ತುಥು. ಯೊ ಆದಾಮ್ ಅಗಾಡಿ ಆವಾಳೊಥೋತೆ ಏಕ್‍ಜ಼ಣಾನ ಖ್ಹಣೇದ್ ಹುಯಿರ‍್ಹೋಸ್. ಕತೋಬಿ ಬೇಜ಼ಣಾಮ ಫರಕ್ ಛಾ಼. ಶನಕತೊ ದೇವ್ನಿ ಫುಗಟ್ ಇನಾಮ್ ಆದಾಮ್‍ನಿ ಪಾಪ್‍ನಿಘೊಣಿ ಕಾಹೆ. ಆ ಏಕ್‍ಜ಼ಣಾನಿ ಪಾಪ್ನಖ್ಹಾಜೆ ಕೈಯೇಕ್‌ಜ಼ಣು ಮರ‍್ಯುತೆ ಖ್ಹಾಚಿಸ್, ಕತೋಬಿ ದೇವ್ನಿ ವಾರ್‌ಖ್ಹೇಥಿ ಮಳಾತೆ ವರ ಯೇಸುಕ್ರಿಸ್ತ ಕರಿ ಆ ಏಕ್ ಜ಼ಣಾನ ಗೋರ್‌ಥಿ ಕೈಏಕ್ ಜ಼ಣಾನ ಮಳಾನುಬಿ ಖ್ಹಾಚಿಸ್. ದೇವ್ನಿ ಇನಾಮ್ ಅಜು಼ ಏಕ್ ಅದ್ಮಿನ ಪಾಪ್‌ಮ ಪರಕ್ ಛಾ಼. ಏಕ್‍ಜ಼ಣಾನ ಪಾಪ್ನ ನ್ಯಾವ್‌ನು ತೀರ್ಪ್‌ಹುಯಿನ್ ನಿಶತ್ ಮಳ್ಯು. ಕತೋಬಿ ಕೈಯೇಕ್ ಜ಼ಣಾನ ಪಾಪ್ನಪೀಠೆ ಗಲ್ತಿವಾಳೊ ಕಾಹೆಕರಿ ಬೋಲಾನು ಊಚು಼ ಇನಾಮ್ ಆಯು. ಏಕ್‍ಅದ್ಮಿನೆ ಕರ‍್ಯುತೆ ಅಪರಾದ್‍ಥಿ ಮರಣ್ ರಾಜ಼್ ಚ಼ಲಾಯುಕರಿ ಬೋಲಾನು ಖ್ಹಾಚು಼ಹುಯು. ಕತೋಬಿ ಕಾಮ್ನು ಪ್ರತಿಫಲ್ ಕೆತ್ರೆ ಮಹಾನ್ ಹುಯಿರ‍್ಹುಸ್ ಯೋಸ್‍ಯೇಸು ಕ್ರಿಸ್ತಹುಯಿರ‍್ಹೊಸ್. ದೇವ್ನಿ ಚೆಹೆಳ್ ವಾರ್‌ಖ್ಹಾನಾಬಿ ನೀತಿನಿ ವರನಾಬಿ ಲೀಲ್ಯಾವಾಳ ಖ್ಹಾರಸ್ ಅಜು಼ ಫುಗಟ್‍ಥಿ ನೀತಿವಾಳಕರಿ ಬೋಲೈಲ್ಯವಾಳುಬಿ ಹುಯಿನ್ ಯೇಸುಕ್ರಿಸ್ತಕರಿ ಆ ಏಕ್‍ಜ಼ಣಾನಿ ಜೋ಼ಡ್ಮ ಜಾನ್‌ಭರೈನ್ ರಾಜ಼್‌ಭಾರ್‌ ಕರಾನು ಹುಯು. ಅಮ್‌ರ‍್ಹವಾಪರ್ ಆದಾಮ್‍ನಿ ಏಕ್ ಅಪರಾದ್‍ಥಿ ಖ್ಹಾರಾಸ್ ಅದ್ಮಿಪರ್ ಮರಣ್‌ಕರಿ ಅಪರಾದ್ನಿ ತೀರ್ಪ್ ಕಿಮ್‌ನಾಖ್ಯುಕಿ ಇಮ್ಮಸ್ ಕ್ರಿಸ್ತನಿ ಎಕ್ಕಸ್‌ನೀತಿನ ಕಾಮ್‍ಥಿ ಖ್ಹಾರಾಸ್ ಅದ್ಮಿನ ನೀತಿವಾಳುಕರಿ ಛುಟ್ಕಾರ್‌ಹುಯು ಅಜು಼ ಜಾನ್‌ ದೆವಾಯು. ಕಿಮ್ ಏಕ್ ಅದ್ಮಿನಿ ಅವಿಧೇಯತೆಥಿ ಕೈಯೇಕ್‌ಜ಼ಣು ಪಾಪಿಕರಿ ಗಣ್ತಿ ಹುಯುಕಿ ತಿಮ್ಮಸ್, ಏಕ್ ಅದ್ಮಿನಿ ವಿಧೇಯಾಥಿ ಕೈಯೇಕ್‌ಜ಼ಣು ನೀತಿವಾಳುಕರಿ ಗಣ್ತಿಉಶೆ. ಗಲತ್‌ ಅಖ್ಖು ಜಾ಼ಖ್ಹತ್ ಹೋತುಆಯು ಕಿಮ್ಕಿ ಧರ್ಮಶಾಸ್ತ್ರಬಿ ಇನಜೋ಼ಡೆಸ್‌ ಆಯು. ಕತೋಬಿ ಪಾಪ್ ಜಾ಼ಖ್ಹತ್ ಕಿಮ್‍ಹುಯುಕಿ, ವಾರ್‌ಖ್ಹೊಬಿ ಬಿಜೂ಼ಬಿ ಜಾ಼ಖ್ಹತ್ ಹುಯು. ಕಿಮ್ ಪಾಪ್ ಮರಣ್‍ಥಿ ರಾಜ಼್ ಚ಼ಲಾಯುಕಿ ಇಮ್ಮಸ್ ದೇವ್ನಿ ವಾರ್‌ಖ್ಹೊ ಅಪ್ಣೊ ಪ್ರಭು ಯೇಸುಕ್ರಿಸ್ತಥಿ ಹರ್‌ಹಮೇಶಾನಿ ಜಿ಼ಂದ್‌ಗಿ ದ್ಯವಾನ ನೀತಿಥಿ ರಾಜ಼್ ಚ಼ಲಾವಸ್.
ದೇವ್ನಿ ಖ್ಹಾಚಿ ವಚನ್. Copyright © 2023 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.