ದೇವ್ನಿ ಖ್ಹಾಚಿ ವಚನ್
ರೋಮ 4
ಅಬ್ರಹಾಮ್‌ನಿ ಉದಾಹರಣೆ
ಇಮ್‍ಕತೊ ಅಗ್ಲಿ ಪಿಳ್ಗಿವಾಳಾನ ಅಪ್ಣುನ ಗುರುಗುರಬ್‌ಲ್ಯೊ ಅಬ್ರಹಾಮ್‌ನೆ ಅನಿ ಬಾರೇಮ ಶಾತ್‍ಲೀಲಿದೊಕರಿ ಅಪ್ಣೆ ಬೋಲಿಯೆ? ಅಬ್ರಹಾಮ್ ಇನ ಅಛ಼್ಛಕಾಮ್‌ಥಿ ನೀತಿವಾಳೊಕರಿ ತೀರ್ಪ್‌ಲ್ಯವಾಳೊ ಹುಯಿರೊಹೊತ್ತೊ ಖ್ಹರಾವ್ಣಿ ಕರೈಲ್ಯಾವಾನ ಇನ ಮೋಕ ರ‍್ಹಿಯುಹೊತ್. ಕತೋಬಿ ದೇವ್ನ ಖ್ಹಾಮ್ಣೆ ಕಾಹೆ, “ಧರ್ಮಶಾಸ್ತ್ರ ಅಮ್‍ಬೋಲಾಸ್, ಅಬ್ರಹಾಮ್‌ನೆ ದೇವ್ನ ವಿಶ್ವಾಸ್ ಕರ‍್ಯೊ; ಯೋ ವಿಶ್ವಾಸ್ ಇನಿ ಗಣ್ತಿಮ ನೀತಿಕರಿ ಗಣ್ತಿ ಹುಯೊ”. ಕಾಮ್‍ಕರಾವಾಳನ ಮಳಾತೆ ಮಜ಼್‌ದೂರಿ ಕೃಪೆಥಿ ಕಾಹೆ. ಯೋ ಇನ ಮಳ್ನುಥೂತೇಸ್ ಕರಿ ಗಣ್ತಿ ಹುವಾಸ್. ಕತೋಬಿ ಏಕ್‌ ಜ಼ಣೊ ಇನು ಶೊಂತ್ ಕಾಮ್ನ ಉಪ್ಪರ್ ವಿಶ್ವಾಸ್ ಕರಾನು ಮ್ಹೇಲಿನ್, ಗಲ್ತಿವಾಳಾನ ನೀತಿವಾಳೊಕರಿ ಕರಾವಾಳ ದೇವ್ನ ಉಪ್ಪರ್ ಇನಿ ವಿಶ್ವಾಸ್ ಕರಾನುರ‍್ಹಿಯುತೊ ಆ ಇನೊ ಭರೋಖ್ಹೊ ಇನ ನೀತಿವಾಳೊಕರಿ ಗಣ್ತಿಕರಸ್‍. ದೇವ್ ಕಿನು ಅಛ್ಛು಼ ಕಾಮ್ನ ದೇಖಸ್ ಕೊಯ್ನಿತೆ ನೀತಿವಾಳೊ ಕರಿ ಗಣ್ತಿ ಕರಸ್ಕಿ ಯೋಸ್ ಧನ್ಯಕರಿ, ದಾವೀದಜಿನು ಅಮ್ ಬೋಲಸ್. ಕಿಮ್‌ಕತೊ, 1“ಕಿನು ಗಲತ್‍ಖ್ಹಾರು ಪರಿಹಾರ್ ಹುಯಿರ‍್ಹುಸ್ಕಿ, ಕಿನು ಪಾಪ್‌ಖ್ಹಾರು ಕ್ಷಮಾಪಣ್ ಹುಯಿರ‍್ಹುಸ್ಕಿ ಯೋಸ್ ಧನ್ಯ ಹುಯಿರ‍್ಹೋಸ್. ಪ್ರಭು ಕಿನ ಪಾಪ್‍ನ ಗಣ್ತಿಮ ಲೇಯ್‍ಕೊಯ್ನಿಕಿ ಯೋ ಅದ್ಮಿ ಖ್ಹಾಚ಼ಮಸ್ ಧನ್ಯ!” ಯೋ ಆಶೀರ್ವಾದ್‍ನಿ ವಚನ್ ಖಲಿ ಖ್ಹತ್ನ ಹುಯಿರ‍್ಹವಾಳನಕೀ ನತರ್ ಖ್ಹತ್ನ ಕರೈರಾಖಕೊಂತೆ ಇವ್ಣುನಾಬಿ ಛಾ಼ಕಿ ಶು? ಶನಖ್ಹಾಜೆಕತೊ ಪವಿತ್ರ ದಪ್ತರ್‌ಮ ಅಮ್ ಬೋಲೈರ‍್ಹುಸ್, “ಅಬ್ರಹಾಮ್ ಇನಿ ವಿಶ್ವಾಸ್‌ಥೀಸ್ ನೀತಿವಾಳೊಕರಿ ಗಣ್ತಿ ಹುಯೊ”. ಯೋ ಕದೆ ಹುಯುತೆ? ಇನ ಖ್ಹತ್ನ ಹುಯಿಗುತೆ ತದೇಕಿ ಖ್ಹತ್ನಹುವಾನ ಪಹಿಲೆ? ಯೋ ಖ್ಹತ್ನ ಹುಯುತೆ ತದೆಕಾಹೆ, ಖ್ಹತ್ನಹುವಾನ ಅಗಾಡಿಸ್. ಒಹೊ, ಖ್ಹತ್ನಹುವಾನ ಪಹಿಲೇಸ್ ಇನಥೂತೆ ವಿಶ್ವಾಸ್‍ನು ಖ್ಹಣೇದ್ ಹುಯಿನ್, ನೀತಿನು ಮುದ್ರಾನ ಲೀಲಿದೊ. ಅಮ್‍ರ‍್ಹವಾಪರ್ ಯೊ ವಿಶ್ವಾಸ್‍ಕರವಾಳ ಅಖ್ಖಾನಾಬಿ, ಇವ್ಣುನ ಖ್ಹತ್ನ ನಾ ಹುಯುತೋಬಿ ಅಬ್ರಹಾಮ್ ಅಖ್ಖಾಸ್ನ ಆತ್ಮೀಕ ಬಾಹುಯೊ. ಇನಖ್ಹಾಜೆ ಇವ್ಣೆ ನೀತಿವಾಳಕರಿ ಗಣ್ತಿಮಹುಯು. ಎತ್ರೇಸ್ ಕಾಹೆ ಖ್ಹತ್ನ ಹುಯಿರ‍್ಹವಾಳನಾಬಿ ಯೊ ಬಾ ಹುಯಿರೊಸ್, ಇವ್ಣುನಖಲಿ ಖ್ಹತ್ನ ಹುಯಿರ‍್ಹಿತೆ ಇನಖ್ಹಾಜೆ ಕಾಹೆ ಕತೋಬಿ ಅಪ್ಣೊ ಗುರುಗುರಬ್‌ಲ್ಯೊ ಹುಯಿರ‍್ಹೋತೆ ಅಬ್ರಹಾಮ್‌ನ ಖ್ಹತ್ನಹುವಾನ ಪಹಿಲೆ ಥೂತೆ ವಿಶ್ವಾಸ್‌ನ ಮಾರಗ್‌ಪರ್ ಇವ್ಣೇಬಿ ಚಾ಼ಲಸ್ ಇನಖ್ಹಾಜೆ ಇವ್ಣುನ ಯೊ ಬಾ ಹುಯಿರೊಸ್.
ವಿಶ್ವಾಸ್‍ಥಿ ದೇವ್ನಿವಾಗ್ದಾನ್ ಲಿದೋತೆ
ಜಗತ್‍ನಾಸ್ ಹಕ್ದಾರ್ ಉಷೆಕರಿ ಬೋಲಾನು ವಾಗ್ದಾನ್ ಅಬ್ರಹಾಮ್ ಧರ್ಮಶಾಸ್ತ್ರನ ಪಾಡಿ ಚಾ಼ಲುಕರ್ತೊಥೋತೆ ಇನಖ್ಹಾಜೆ ಕಾಹೆ. ವಿಶ್ವಾಸ್‍ಥಿ ಆವಾತೆ ನೀತಿಹುಯಿರ‍್ಹಿಸ್. ಶನಕತೊ ಧರ್ಮಶಾಸ್ತ್ರಥಿ ಜಿವವಾಳೂಸ್ ಹಕ್ದಾರ್ ರ‍್ಹಯೂತೊ, ವಿಶ್ವಾಸ್‌ನ ಮತ್‌ಲಬ್ ಕೊಂನ್ತೆ ಹುಯಿಜಾ಼ಶೆ. ವಾಗ್ದಾನ್ ಬಿಣ್‌ಫಾಯಿದಾನು ಹುಯಿಗು ಶನಕತೊ ಧರ್ಮಶಾಸ್ತ್ರ ಅದ್ಮಿವೋನ ದೇವ್ನ ಇರಾದಮ ನಾಖಸ್‍, ಕತೋಬಿ ಧರ್ಮಶಾಸ್ತ್ರ ನಾ ರ‍್ಹಿಯುಹೊತ್ತೊ ಇನ ವಿಧೇಯ ದ್ಯವಾನುಬಿ ಕೋ ರ‍್ಹಿಯುಹೊತ್ನಿ. ಇನಖ್ಹಾಜೆ ಯೋ ವಾಗ್ದಾನ ವಾರ್‌ಖ್ಹೇಥಿಸ್ ಮಳಸ್. ಆ ವಾಗ್ದಾನ್ ಧರ್ಮಶಾಸ್ತ್ರನ ಆಧಾರ್ ಹುಯಿರ‍್ಹುತೆ ಇವ್ಣುನಾಸ್ ಕಾಹೆತೆ, ಅಬ್ರಹಾಮ್‌ನಬಿ ಇನಿ ಪಿಳ್ಗಿವಾಳಾನ ಫುಗಟ್‍ಥಿ ಮಳಾಸ್ತೆ ವಾಗ್ದಾನಸ್ ಇನಾಮ್ ಹುಯಿರ‍್ಹುಸ್. ಅಮ್ ಅವ್ಣೆ ಅಬ್ರಹಾಮ್‌ನಿ ಘೋಣಿ ಭರೋಖ್ಹೊ ಕರ್ಶೆ ಶನಕತೊ ಯೋ ಅಪ್ಣಖ್ಹಾರಸ್‍ನ ಬಾ ಹುಯಿರ‍್ಹೋಸ್. “ಮೇ ತುನ ಕೈಏಕ್‌ ಜ಼ಗ್‌ಜಾ಼ತ್‌ನ ಅದ್ಮಿವೋನ ಬಾಕರಿ ದೀರಾಖ್ಯೊಸ್!” ಕರಿ ಪವಿತ್ರ ದಪ್ತರ್‌ಮ ಲಿಖೈರ‍್ಹುಸ್. ದೇವ್ ಮರಾವಾಳನ ಜಾನ್‌ ದ್ಯವಾಳೋಬಿ, ಕೋರ‍್ಹೆಂತೆ ಇನ ರ‍್ಹವಾನಿತರ ಕರವಾಳೋಬಿ ಹುಯಿರೋತೆ ದೇವ್‌ಮ ಅಬ್ರಹಾಮ್‌ನೆ ವಿಶ್ವಾಸ್‍ಕರ‍್ಯೊ. ಇನಖ್ಹಾಜೆ ಆ ವಾಗ್ದಾನ್ನ ದೇವ್‍ಥೀಸ್‍ ಇನೆ ಲಿದೊ. ಭರೋಖ್ಹೊ ರಾಖಾನ ಶನು ಆಧಾರ್ ನಾರ‍್ಹುಯುತೋಬಿ ಅಬ್ರಹಾಮನೆ ನಂಬ್ಯೊ ಅಜು಼ ಭರೋಖ್ಹೊ ಕರ‍್ಯೊ ಅಮ್ಮಸ್ ಕೈಯೇಕ್‌ ದೇಖ್ಹ್‌ನ ಆತ್ಮೀಕ ಬಾಹುಯೊ. ಪವಿತ್ರ ದಪ್ತರ್‌ಮ ತಾರಿ ಪಿಳ್ಗಿ ಆಬ್‌ನ ಶುಕ್ಕರ್‌ನಿತರ ರ‍್ಹಿಶೆ. ಕರಿ ಪವಿತ್ರ ದಪ್ತರ್‌ಮ ಬೋಲ್ಯುತೆ ತಿಮ್. ಯೋ ತದೇಸ್‌ ಖ್ಹುಮಾರ್ ಖ್ಹೋ ವರಖ್ಹ್‌ನೊ ಹುಯಿರ‍್ಹಿನ್ ಇನು ಶರೀರ್ ತದೇಸ್‌ ಕಮ್ಲಯಿಗೈಥಿ, ಇನಿ ಬಾವಣ್‍ ಸಾರನ ಲಡ್ಕಹುವಾನ ದನ್ ಖ್ಹತಮ್ ಹುಯಿಗುತೋಬಿ, ಯೋ ವಿಶ್ವಾಸ್‌ಮ ಕಮ್‍ಜೋ಼ರಿ ಹುಯೊಕೊಯ್ನಿ. ಇನೆ ದೇವ್ನಿ ವಾಗ್ದಾನ್ ಕರ‍್ಯೊತೆ ಬಾರೇಮ. ಯೋ ಅವಿಶ್ವಾಸ್‌ಥಿ ಗುಮಾನಿ ಕರ‍್ಯೊಕೊಯ್ನಿ. ಯೋ ಹಿಮ್ಮಥ್ಥಿ ಭರೈನ್. ಇನೆ ದೇವ್ನ ಮಹಿಮೆ ಕರ‍್ಯೊ. ಯೋ ವಾಗ್ದಾನ್ನ ಚ಼ಲಾವನ ದೇವ್ ಶಕತ್‌ವಾಳೊ ಹುಯಿರ‍್ಹೋಸ್‍ಕರಿ ಪೂರ ಘಟ್‍ಥಿ ಭೀರವಾಳೊ ಹುಯೊ. ಇನಖ್ಹಾಜೆ ಅಬ್ರಹಾಮ್ ಇನಿ ವಿಶ್ವಾಸ್‌ಥೀಸ್ “ನೀತಿಕರಿ ಗಣ್ತಿ ಹುಯೊ”. ಯೋ ನೀತಿವಾಳೊ ಗಣ್ತಿಹುಯು, ಕರಿ ಬೋಲಾನಿ ವಾತೆಖಲಿ ಇನ ಏಕ್‍ಜ಼ಣಾನ ಖ್ಹಾಜೆಸ್ ಕಾಹೆ. ಹೈರುತೆ ಅಪ್ಣಖ್ಹಾಜೇಬಿ ಕತೊ, ಅಪ್ಣೊ ಪ್ರಭು ಯೇಸುಕ್ರಿಸ್ತನ ಮರ‍್ಯಹುಯಮಾಥು ಉಠಾಡ್ಯೋತೆ ದೇವ್ನ ವಿಶ್ವಾಸ್ ಕರಾವಾಳು ಅಜು಼ ನೀತಿವಾಳ ಕರಿ ಬೋಲೈರ‍್ಹಾತೆ ಅಪ್ಣುನಾಬಿ ಲಿಖೈರ‍್ಹುಸ್. ದೇವ್ ಯೇಸುನ ಅಪ್ಣ ಪಾಪ್ನಖ್ಹಾಜೆ ಮರಣ್ಣ ದೀನಾಖಿನ್ ಅಜು಼ ಅಪ್ಣುನ ನೀತಿವಾಳ ಕರಿ ತಿರ್ಮಾನ್‌ ಹುವಾನಖ್ಹಾಜೆಸ್‌ ಜಾನ್‌ಥಿ ಉಠಾಡೈಗಯೊ.
Source notes (1)
- Cross-reference ಕೀರ್ತನೆ 32:1-2
ದೇವ್ನಿ ಖ್ಹಾಚಿ ವಚನ್. Copyright © 2023 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.