ದೇವ್ನಿ ಖ್ಹಾಚಿ ವಚನ್
ರೋಮ 14
ಬಿಜೇಕ್‍ಜ಼ಣಾನ ತೀರ್ಪ್‌ನಕೊ ಕರೊ.
ವಿಶ್ವಾಸ್‌ಮ ಕಮ್‍ಜೋ಼ರಿ ರ‍್ಹವಳಾನ ತುಮಾರಿ ಝೂ಼ಂಡ್‌ಮ ಮಳೈಲೇವೊ. ಕತೋಬಿ ಇವ್ಣಿ ಶೊಂತ್‍ ಖ್ಹೂಜ಼್‌ನಿ ಬಾರೇಮ ಅಬ್ಬಾಜ಼ಬ್ಬಿ ನಕೊ ಕರೊ. ಅಜು಼ ಏಕ್‍ಜ಼ಣಾನಿ ವಿಶ್ವಾಸ್ ಖ್ಹಾರುಸ್ ಥರಾನು ಖಾಣುಖಾವಾನಿತರ ಕರಸ್. ಕತೋಬಿ ವಿಶ್ವಾಸ್‌ಮ ಕಮ್‍ಜೋ಼ರಿ ರ‍್ಹವಾಳು ಭಾಜಿಪಾಲೊ ಖಾವಾಳೋಸ್ ಹುಯಿರ‍್ಹೇಸ್. ಇನಖ್ಹಾಜೆ ಬೋಟಿ ಖಾವವಾಳೊ ಖಾಯಿಕೊಂತೆ ಇನ ನಕ್ಲೆ ನಕೊ ಕರಾದೆ. ಭಾಜಿಪಾಲೊ ಖಾವಾಳೊ ಬೋಟಿ ಖಾವವಾಳನ ತೀರ್ಪ್‌ನಕೊಕರಾದೆ. ಶನಕತೊ ದೇವ್ ಇವ್ಣ ಭೇಜ಼ಣಾನ ಮಳೈರಾಖ್ಯೊಸ್. ಬಿಜೇಕ್‍ಜ಼ಣ ಸೇವಕ್‌ನ ತೀರ್ಪ್‌ಕರಾನ ತೂ ಕೋಣ್? ಯೋ ಘಟ್‍ಥಿ ಭಿಯೋತೋಬಿ ರಡ್‍ಕ್ಯೊತೋಬಿ ಯೋ ಇನ ಯಜಮಾನ್ನ ಶೇರಾಸ್. ಶನಕತೊ ಇನ ಘಟ್ ಭೀರಾವಾನಿತರ ಕರಾನ ಪ್ರಭು ಶಕತ್‌ವಾಳೊ ಹುಯಿರೋಸ್. ಏಕ್‍ಜ಼ಣೊ ಏಕ್‍ದನ್ನ ಬಿಜೇಕ್ ದನ್‍ಥಿ ವಿಶೇಷ್‍ಕರಿ ಗಣ್ತಿ ಕರಸ್. ಬಿಜೇಕ್‍ಜ಼ಣೊ ಖ್ಹಾರಾಸ್‍ದನ್ನ ಎಕ್ಕಸ್‍ಕರಿ ಖ್ಹೂಜ಼್‌ ಕರಸ್. ಹರೇಕ್ ಜ಼ಣುಬಿ ಇನಶೊಂತ್ ದಿಲ್ಮ ಕಲಾವ್ಣಿನಾ ಕರ್ನುತೆ ತಿಮ್ ರ‍್ಹವಾದೆ. ಏಕ್‍ದನ್ನ ವಿಶೇಷ್‍ಕರಿ ಸೋಚವಾಳು ಯೋ ಪ್ರಭುನ ಮರ್ಯಾದಿನಖ್ಹಾಜೆ ಕರಿ ಲಾಝ಼ದೆ. ಅಖ್ಖೂಸ್ ಖಾವವಾಳೊ ದೇವ್ನ ಧನ್ಯವಾದ್‍ಕರೀನ್ ಪ್ರಭುನ ಮರ್ಯಾದಿನ ಖ್ಹಾಜೆಸ್ ಖಾಸ್‌. ಅಖ್ಖೂಸ್ ನಾ ಖಾವವಾಳೊಬಿ ದೇವ್ನ ಧನ್ಯವಾದ್ ಕರಸ್. ಅಪ್ಣಾಮ ಕೋಣ್‌ಬಿ ಇನಖ್ಹಾಜೆ ಬಚಾ಼ಕೊಯ್ನಿ. ಅಜು಼ ಇನಖ್ಹಾಜೆ ಮರಾಬಿಕೊಯ್ನಿ. ಏಕ್‌ ವೇಳ್ ಬಚಿರ‍್ಹಾತೊ ಪ್ರಭುನಖ್ಹಾಜೆ ಅಪ್ಣೆ ಜಿವಿಯೇಸ್. ಮರ‍್ಯಾತೊ ಪ್ರಭುನಖ್ಹಾಜೆ ಮರ್‌ಯೇಸ್. ಅಮ್ ಅಪ್ಣೆ ಮರ‍್ಯಾತೊಬಿ ಜಿವ್‍ಯತ್ಯೊಬಿ ಪ್ರಭುನ ಮಳ್ಯಹುಯ ಹುಯಿರ‍್ಹಿಯೇಸ್. ಶನಖ್ಹಾಜೆ ಕತೊ, ಜಿವ್ತು ರ‍್ಹವಳಾನಾಬಿ, ಮರಾವಳನಾಬಿ ಪ್ರಭು ಹುಯಿರ‍್ಹೇವ್ಣುಕರಿ ಕ್ರಿಸ್ತ ಮರೀನ್ ಜಿವಿಉಠ್ಯೊ. ಅಮ್‍ರ‍್ಹವಾಪರ್, ನಾಖಾವಳೊ ತೂ ಶನ ತಾರ ಭೈನ ತೀರ್ಪ್‌ಕರಸ್? ಅಖ್ಖಾಸ್ನ ಖಾವಾಳೊ ತು ತಾರ ಜೋ಼ಡ್ಮ ರ‍್ಹವಾಳ ವಿಶ್ವಾಸಿನ ಶನ ಚಾ಼ವ್‌ಣ್ಯ ಕಾಡಸ್‌? ಅಪ್ಣೆ ಖ್ಹಾರುಸ್ ದೇವ್ನು ನ್ಯಾವ್‍ನಿ ಝ಼ಗೋನಖ್ಹಾಮ್ಣೆ ಭೀರಿಶು. ಶನಕತೊ ಪವಿತ್ರ ದಪ್ತರ್‌ಮ ಅಮ್ ಬೋಲಾವಸ್, “ಮೇ ಖ್ಹಾಚಮಾಬಿ ಜಿವಿರ‍್ಹೋಸ್ತೆ ದೇವ್ ಹುಯಿರ‍್ಹೋಸ್ ಇನಖ್ಹಾಜೆ ಹರೇಕ್ ಜ಼ಣುಬಿ ಮಾರಖ್ಹಾಮ್ಣೆ ಢುಕ್‍ಣ್ಯಮಾಂಡ್‍ಶೆ. ಅಜು಼ ಹರೇಕ್ ಮ್ಹೋಡು ಮನ ದೇವ್‌ಕರಿ ಸ್ತುತಿಕರಿನ್ ಕಬೂಲ್‍ಶೆ. ಕರಿ ಪ್ರಭು ಬೋಲಸ್”.1 ಅಮ್‍ರ‍್ಹವಾಪರ್ ಅಪ್ಣಾಮ ಹರೇಕ್ ಜ಼ಣುಬಿ ಇವ್ಣಿ ಬಾರೇಮ ದೇವ್ನ ಗಣ್ತಿ ದೇವ್ಣು ಪಡಸ್.
ಏಕ್‍ಜ಼ಣು ಬಿಜೇಕ್‍ಜ಼ಣಾನ ರಡ್ಕಾನ ಕಾರಣ್ ನಕೊಹುವೊ
ಇನಖ್ಹಾಜೆ ಅಪ್ಣೆ ಏಕ್‌ನ ಉಪ್ಪರ್ ಏಕ್‌ ತೀರ್ಪ್‌ನಕೊ ಕರಿಯೆ. ಇನ ಬದಲ್ ಬಿಜೇಕ್ ಭೈನ ಖ್ಹಾಮೆ ಅಡ್ಡಿ ಹುವಾನು ಅಜು಼ ಪಾಪ್ನ ಕಾಮ್ಮ ನಾ ರಡ್ಕಾವ್ಣುತೆ ತಿಮ್ ಹುಯಿರಿಯೇ. ಅಜು಼ ಖಿವೂಬಿ ರಾಛು಼ ಇನುಯೋಸ್ ಅಶುದ್ಧ ಕಾಹೆಕರಿ ಪ್ರಭು ಯೇಸುಮ ರ‍್ಹೀನ್ ಖ್ಹಚ್ಚೆಂಬಿ ಬೋಲುಸ್. ಕತೋಬಿ ಕೋಣ್‌ತೋಬಿ ಅಶುದ್ದಕರಿ ದಿಲ್ಮ ಕರ‍್ಯೊತೊ ಯೋ ಇನ ಅಶುದ್ಧ ಹುಯಿರ‍್ಹೂಸ್. ತೂ ಖಾಣೇಥಿ ತಾರ ಭೈ ಭೇನ್ನ ಕಚಿಂಡ್ ಕರಾಯೋತೆ ತೂ ಪ್ಯಾರ್‌ಥಿ ಚಾ಼ಲಿಲೇಶ್‍ಕೊಯ್ನಿ. ತೂ ಖಾವಾಥಿ, ಕ್ರಿಸ್ತ ಕಿನಖ್ಹಾಜೆ ಮರ‍್ಯೋಕಿ ಇನ, ತೂ ಖಾವಾನ ಖಾಣಾನಖ್ಹಾಜೆ ಧೋಕ ನಾದೇವ್ಣು. ಅಮ್ ತಾರ ಅಛ್ಛಾ಼ನಖ್ಹಾಜೆ ಕಾಹೆತೆ ಬಿಜೇಕ್‍ಜ಼ಣಾಥಿ ಖರಾಬ್ ಕರಿ ಬೋಲೈಲಿನ್ ಚಿಂಘಾವ್ಣಿ ನಕೊ ಕಡೈಲಿಶ್. ಶನಕತೊ ಖಾವಪೀಯಾನು ದೇವ್ನು ರಾಜ್ಯ ಕಾಹೆ. ನೀತಿ, ಸಮಾಧಾನ್, ಪವಿತ್ರಾತ್ಮಮ ಛಾ಼ತೆ ಖ್ಹುಶಿಸ್ ಹುಯಿರ‍್ಹಿಸ್. ಶನಕತೊ ಅಮ್ನಿ ಪರಕ್ಮ ಕ್ರಿಸ್ತನ ಸೇವೆಕರವಾಳೊ ದೇವ್‍ಥಿ ಪಸಂದ್‌ ಕರೈಲ್ಯವಾಳೋಬಿ, ಅದ್ಮೆವ್‍ನ ಅಛ್ಛು಼ ಕರವಾಳೊಬಿ ಹುಯಿರ‍್ಹವಾದೆ. ಇನಖ್ಹಾಜೆ ಖೆವು ಅಪ್ಣುನ ಸಮಾಧಾನ್ನಾಬಿ ಏಕ್‌ಥಿಏಕ್ ಭಾಲ್ ದೆವಾಮ ಭಡಾವಮಾಬಿ ಅಗಾಡಿ ಚ಼ಲಾವಸ್ಕಿ ಇನಾಸ್ ಕರಿಯೆ. ಇನಖ್ಹಾಜೆ ಖಾಣಾನಖ್ಹಾಜೆ ದೇವ್ನ ಕಾಮ್ನ ನಾಶ್ ನಕೊಕರೊ. ಖ್ಹಾರು ಜಿನಖ್ಹ್‌ಬಿ ಶುದ್ಧಾಸ್ ಹುಯಿರ‍್ಹೂಸ್. ಕತೋಬಿ ಏಕ್‍ಜ಼ಣೊ ಖೈನ್ ಬಿಜೇಕ್‍ಜ಼ಣಾನ ಪಾಪ್‌ಮ ರಡ್ಕಾವನು ಗಲ್ತಿ. ಬೋಟಿ ಖಾವಾನುರ‍್ಹವೊ, ದ್ರಾಕ್ಷಿನೊ ರಖ್ಹ್‌ನ ಪೀಯಾನು ರ‍್ಹವೊ ನತರ್ ಬಿಜು಼ ಖೆವೂಬಿರ‍್ಹವೊ ತಾರ ಭೈ ಭೇನ್ನ ಪಾಪ್‌ಮ ರಡ್ಕವಾನು ರ‍್ಹಯೂತೊ ಇನ ಮ್ಹೇಲಿದ್ಯವಾನುಸ್ ಅಛ್ಛು಼. ಅನಿಬಾರೇಮ ತುನಛಾ಼ತೆ ವಿಶ್ವಾಸ್ ದೇವ್ನಖಲಿ ದೆಖೈನ್, ಯೊ ತಾರಲಗುಸ್ ಮಾಲುಮ್‌ರ‍್ಹವಾದೆ. ಇನು ಯೊ ಮಾನಿಲೇಯ್ತೆ ಇನಿ ಬಾರೇಮ ಗುಮಾನಿ ಕರಾಕೊಂತೆ ಯೋ ಧನ್ಯ. ಕತೋಬಿ ಏಕ್‌ ವಖ್ಹ್‌ತೆ ಗುಮಾನಿ ರ‍್ಹೀನ್ ಖಾವವಾಳೊ ಹುಯಿರ‍್ಹೋತೆ ದೇವ್ನ ಖ್ಹಾಮ್ಣೆ ಅಪರಾದಿ ಹುಯಿರ‍್ಹೇಸ್, ಯೋ ವಿಶ್ವಾಸ್‌ಪರ್ ಆಧಾರ್ ಕೊಯ್ನಿ ಇನಖ್ಹಾಜೆ ಯೋ ದೋಷಿ ಹುಯಿರ‍್ಹೇಸ್. ಅಜು಼ ವಿಶ್ವಾಸ್‍ನು ಆಧಾರ್ ನಾರ‍್ಹಯಾತೊ ಯೋ ಪಾಪಸ್.
Source notes (1)
- Cross-reference ಯೆಶಾಯ 45:23—49:18
ದೇವ್ನಿ ಖ್ಹಾಚಿ ವಚನ್. Copyright © 2023 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.