ದೇವ್ನಿ ಖ್ಹಾಚಿ ವಚನ್
ರೋಮ 13
ಅಧಿಕಾರಿನ ಬಾರೇಮ ಅಪ್ಣು ಕಾಮ್
ಹರೇಕ್‍ಜ಼ಣುಬಿ ಇನ ಉಪ್ಪರ್‌ಲ್ಯ ಅಧಿಕಾರಿಯೇನ ಅಧೀನ್ ಹುಯಿರ‍್ಹೇಣು; ಶನಕತೊ ದೇವ್‍ಥಿ ಪಣ್ಕಿ ಏಕ್‍ಜ಼ಣಾನಬಿ ಅದಿಕಾರ್ ರ‍್ಹೇಯಿಕೊಯ್ನಿ; ಛಾ಼ತೆ ಅದಿಕಾರ್ ದೇವ್‍ಥೀಸ್‍ ಆಯಿರ‍್ಹುಸ್. ಇನಖ್ಹಾಜೆ ಅದಿಕಾರ್‌ನ ವಿರೋದ್ ಹುವವಾಳು ಅದ್ಮಿ ಖ್ಹಾಚಮಾಸ್ ದೇವ್ನಿ ನಿಯಮ್ನಾಸ್ ವಿರೋದ್ ಹುಯಿರ‍್ಹುಸ್. ಖ್ಹರ್ಕಾರ್‌ನ ಖ್ಹಾಮ್ಣೆ ಹುವವಾಳು ಇನುಯೋಸ್ ನ್ಯಾಯತೀರ್ಪ್‌ ಲೀಲೇಸ್. ಶನಕತೊ ಖರಾಬ್ನ ಕರಾವಾಳನ ಅದಿಕಾರಿಯೇವ್‍ನು ಡರ್‌ರ‍್ಹೇಸ್ ಪಣ್ಕಿ, ಅಛ಼್ಛು ಕರವಾಳನ ಕಾಹೆ. ಅದಿಕಾರಿಯೇಥಿ ತೂ ಡರ್‌ಕೊಂತೆ ರ‍್ಹವಾನು ಆಖ್ಹ್‌ಕರಸ್‍ಕಿ ಶು? ಅಛ಼್ಛನಕರ್. ತದೆ ಇವ್ಣೇಥಿ ತುನ ಖ್ಹರಾವ್ಣಿ ಮಳ್‍ಶೆ. ಶನಕತೊ ಯೋ ತುನ ಅಛ಼್ಛು ಕರಾನಖ್ಹಾಜೆ ಛಾ಼ತೆ ದೇವ್‌ನೊ ಸೇವಕ್ ಹುಯಿರ‍್ಹೋಸ್. ಕತೋಬಿ ತೂ ಖರಾಬ್ನ ಕರಾವಾಳೊ ಹುಯಿರ‍್ಹೋತೆ ಡರಿನ್ ರ‍್ಹೇಣು. ಕತೋಬಿ ಯೋ ಚುಪ್ಕೆ ಅದಿಕಾರ್ ಅದಿಕಾರ್‌ನೊ ಡಂಡೊ ಧರಿರಾಖ್ಯೊಕೊಯ್ನಿ. ಯೋ ದೇವ್‌ನೊ ಸೇವಕ್ ಹುಯಿರ‍್ಹಿನ್ ಖರಾಬ್ನ ಕರವಾಳಾನ ದೇವ್ನಿನಿಶತ್‍ ದೇಸ್. ಇನಖ್ಹಾಜೆ ಖಲಿ ದೇವ್ನಿ ನಿಶತ್ನಖ್ಹಾಜೆಕರಿ ಕಾಹೆ, ದಿಲ್ನಿಸಾಕ್ಷಿನಖ್ಹಾಜೇಬಿ ಅಧಿಕಾರಿಯೇನ ಅಧೀನ್ ಹುಯಿರ‍್ಹವಾನು ಜ಼ರೂರತ್ ರ‍್ಹೇಸ್, ಅನಖ್ಹಾಜೆಥೀಸ್ ತುಮೆ ಶುಂಕ ದೆವ್‌ಕರಾಸ್. ಶನಕತೊ ಅಧಿಕಾರಿಖ್ಹಾರು ದೇವ್ನ ಸೇವಕ್ ಹುಯಿರ‍್ಹಿನ್ ಯೋ ಕಾಮಸ್‌ ಕರಾವಾಳ ಹುಯಿರೇಸ್. ತುಮೆ ಕಿನಶಾತ್‍ ದೇವ್ಣುಕಿ ಯೋ ದೇವೊ, ಕಿನ ಕಂದಾಯಕಿ ಇನ ಕಂದಾಯ ದೇವೊ, ಕಿನ ಶುಂಕಕಿ ಇವ್ಣುನ ಶುಂಕದೆವೊ. ಅಜು಼ ಕಿನ ಡರ‍್ನುಕಿ ಇನ ಡರೊ, ಕಿನ ಅಧೀನ್‌ಕಿ ಇನ ಅಧೀನ್ ರ‍್ಹವೊ, ಕಿನ ಮರ್ಯಾದಿಕಿ ತಿನ ಮರ್ಯಾದಿ ದೆವೊ.
ಅಪ್ಣಿ ಜೋ಼ಡ್ಮ ಏಕ್‌ಥಿಏಕ್ ಜಿಮ್ಮೇದಾರ್
ಏಕ್‌ಥಿಏಕ್ ಪ್ಯಾರ್‌ಕರ‍್ನುಕರಿ ಬೋಲಾನು ಕರಜ಼ಸ್ ಪಣ್ಕಿ ತುಮೂನ ಬಿಜು಼ ಖೆವು ಕರಜ಼್ ನಾರ‍್ಹೇವ್ಣು. ಶನಕತೊ ಬಿಜೇಕ್‍ಜ಼ಣಾನ ಪ್ಯಾರ್ ಕರಾವಾಳೊ ಧರ್ಮಶಾಸ್ತ್ರನಸ್ ಚ಼ಲೈರಾಖ್ಯೊಸ್. ಶನಕತೊ “ವ್ಯಬಿಚಾರ್‌ನಾಕರ‍್ನು, ಖೂನ್‌ನಾಕರ‍್ನು, ಚೋ಼ರ್‌ನಾಕರ‍್ನು, ಬಿಜೇಕ್‌ಜ಼ಣಾನಿ ಶೊತ್ನ ಆಖ್ಹ್‌ನಾಕರ‍್ನು” ಆ ಅಖ್ಖಿ ಹುಕುಮ್ ಅಖ್ಖು, “ತಾರ ಭೀಡೆವಾಳಾನ ತಾರಿನಿತರಸ್‍ ಪ್ಯಾರ್ ಕರ‍್ನು!” ಕರಿ ಬೋಲಾನಿ ಎಕ್ಕಸ್ ಹುಕುಮ್ಮ ಲಪಿರ‍್ಹೂಸ್. ಪ್ಯಾರ್ ಇನ ಭೀಡೆವಾಳನ ಖಿವು ಕೇಡ್ ಕರಾಕೊಯ್ನಿ. ಇನಖ್ಹಾಜೆ ಪ್ಯಾರ್ ಧರ್ಮಶಾಸ್ತ್ರನ ಭರ್‌ಪೂರ್‌ ಹುಯಿರ‍್ಹುಸ್. ಹಮ್ಕೇನ ಹಗಾಮ್ನ ಖ್ಹಮ್‌ಜಿನ್‌ ಆ ಅಖ್ಖು ಕರ‍್ನು. ತುಮೆ ನಿಂದರ್‌ಥಿ ಹೊಷಾರ್‌ಹುವಾನಿ ಘಡಿಹುಯಿರ‍್ಹೀಸ್. ಶನಕತೊ ಅಪ್ಣಿ ರಕ್ಷಣೆ, ಅಪ್ಣೆ ಪಹಿಲೆ ಕ್ರಿಸ್ತನ ವಿಶ್ವಾಸ್‍ಕರ್‌ಥಾತೆ ಇಂಥೀಬಿ ಹಮ್ಕೆ ಛುಟ್ಕಾರ್‌ನ ಹಗಾಮ್‌ ಖನ್ನೆ ಹುಯಿರ‍್ಹೀಸ್. ಘಣೇಥಿ ರಾತ್ ನಿಕ್ಳಿಜೈ಼ನ್ ವ್ಹಾಣು ಖನ್ನೆ ಅಯಿಗು. ಇನಖ್ಹಾಜೆ ಅಪ್ಣೆ ಅಂಧಾರನು ಖ್ಹಾರು ಕಾಮ್ನ ಫೇಕಿನ್ ಉಜಾ಼ಳಾಮ ಜಂಗ್ ಭೀಡಾನು ಕಫ್ಫನ್ನ ಫೆರ‍್ಹಿಲಿಯೆ. ಫಾಯಿದೊಕೊಂತೆ ಮಿಝ಼್‌ವಾನ್, ಪೀನ್ ನಿಶಾಚ಼ಡೈಲ್ಯವಾನು ಅಪ್ಣ ಶರೀರ್ ಸಂಬದ್‌ಥಿ ಕರಾನು ಪಾಪ್, ಲಡೈಝ಼ಗ್‍ಡೊ, ಪೇಟ್ನೊ ಬಳಾಪೊ ಆ ಖ್ಹಾರೇಥಿ ದೂರ್‌ಹುಯಿನ್ ಉಜಾ಼ಳಮ ರ‍್ಹಾವಾಳನಿತರ ಚಾ಼ಲಿಲಿಯೆ. ಶರೀರ್‌ನ ಆಖ್ಹ್‌ನ ಚ಼ಲಾವನಖ್ಹಾಜೆ ನಕೊಸೋಚೊತೆ. ಪ್ರಭು ಕ್ರಿಸ್ತ ಯೇಸುನ ಕಫ್ಪನ್ನ ಫೆರಿಲೆವೊ.
ದೇವ್ನಿ ಖ್ಹಾಚಿ ವಚನ್. Copyright © 2023 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.