Zǝbur 56

56-küy •••• Ziyankǝxlikkǝ uqriƣuqining duasi

1Nǝƣmiqilǝrning bexiƣa tapxurulup, «Hilwǝttiki dub dǝrǝhliridiki pahtǝk» degǝn aⱨangda oⱪulsun dǝp, Dawut yazƣan «Mihtam» küy (Filistiylǝr Gat xǝⱨiridǝ uni ǝsirgǝ alƣanda yezilƣan): —

I Huda, manga xǝpⱪǝt kɵrsǝtkǝysǝn,

Qünki insanlarning nǝpsi yoƣinap meni ⱪoƣlimaⱪta;

Kün boyi ular mǝn bilǝn jǝng ⱪilip meni basmaⱪta; 1

2Meni kɵzligǝn rǝⱪiblirimning nǝpsi yoƣinap kün boyi meni ⱪoƣlimaⱪta;

Manga ⱨǝywǝ ⱪilip jǝng ⱪilƣuqilar intayin kɵptur!

3Mǝn ⱪorⱪⱪan künümdǝ,

Mǝn Sanga tayinimǝn.

4Mǝn sɵz-kalamini uluƣ dǝp mǝdⱨiyǝlǝydiƣan Hudaƣa,

Hudaƣila tayinimǝn;

Mǝn ⱪorⱪmaymǝn;

Naⱨayiti bir ǝt igisi meni nemǝ ⱪilalisun?

5Ular kün boyi sɵzlirimni burmilaydu,

Ularning barliⱪ oyi manga ziyankǝxlik ⱪilixtur;

6Ular top-top bolup adǝmni ⱪǝstilixip, yoxurunidu;

Peyimgǝ qüxüp, jenimni elixni kütidu.

7Gunaⱨ bilǝn gunaⱨni yepip ⱪaqsa bolamdu?

Ƣǝziping bilǝn ǝllǝrni yǝrgǝ urƣaysǝn, i Huda!

8Mening sǝrsanliⱪlirimni ɵzüng sanap kǝlgǝn;

Kɵzümdin aⱪⱪan yaxlirimni tulumungƣa toplap saⱪliƣaysǝn;

Bular dǝptiringdǝ pütüklük ǝmǝsmu?

9Xuning bilǝn mǝn Sanga nida ⱪilƣan kündǝ,

Düxmǝnlirim qekinidu;

Mǝn xuni bildimki — Huda mǝn tǝrǝptidur!

10Hudani — Uning sɵz-kalamini uluƣlaymǝn!

Pǝrwǝrdigarni — Uning sɵz-kalamini uluƣlaymǝn!

11Hudanila tayanqim ⱪildim —

Mǝn ⱪorⱪmaymǝn, naⱨayiti xu bir insan meni nemǝ ⱪilalisun? 2

12Sanga ⱪilƣan wǝdilirimgǝ wapa ⱪilimǝn, i Huda;

Sanga tǝxǝkkür ⱪurbanliⱪlirini sunimǝn.

13Qünki Sǝn jenimni ɵlümdin ⱪutuldurƣansǝn;

Sǝn putlirimni putlixixtin saⱪlimamsǝn?

Xuning bilǝn mǝn Hudaning ⱨuzurida, tiriklǝr turidiƣan yoruⱪluⱪta mangimǝn.