Muⱪeddes Kalam (yǝngi yeziⱪ)
Zǝbur 32
32-küy •••• Gunaⱨni etirap ⱪilip, Hudadin kǝqürüm sorax; •••• Huda jawabǝn bexarǝt beridu
Dawut yazƣan «Masⱪil»: —
Itaǝtsizlikliri kǝqürüm ⱪilinƣan,
Gunaⱨliri yepilƣan kixi bǝhtliktur! 1 2
Pǝrwǝrdigar rǝzillikliri bilǝn ⱨesablaxmaydiƣan,
Roⱨida ⱨeqⱪandaⱪ ⱨiylilik yoⱪ kixi bǝhtliktur!
Mǝn gunaⱨimni iⱪrar ⱪilmay, süküttǝ turuwalƣanidim,
Kün boyi aⱨu-piƣan iqidǝ,
Sɵngǝklirim qirip kǝtti;
Qünki meni basⱪan ⱪolung manga keqǝ-kündüz eƣir boldi;
Yazdiki ⱪurƣaⱪqiliⱪtǝk yilikim ⱪaƣjirap kǝtti.
Selaⱨ! 3
Əmdi gunaⱨimni Sening aldingda etirap ⱪildim,
Ⱪǝbiⱨlikimni Sǝndin yoxuruwǝrmǝydiƣan boldum;
Mǝn: «Pǝrwǝrdigarƣa asiyliⱪlirimni etirap ⱪilimǝn» — dedim,
Xuning bilǝn Sǝn mening rǝzil gunaⱨimni kǝqürüm ⱪilding.
Selaⱨ! 4
Xunga Seni tapalaydiƣan pǝyttǝ,
Ⱨǝrbir ihlasmǝn Sanga dua bilǝn iltija ⱪilsun!
Qong topanlar ɵrlǝp, texip kǝtkǝndǝ,
Sular xu kixigǝ ⱨǝrgiz yeⱪinlaxmaydu. 5
Sǝn mening dalda jayimdursǝn;
Sǝn meni zulumdin saⱪlaysǝn;
Ətrapimni nijatliⱪ nahxiliri bilǝn ⱪaplaysǝn!
Selaⱨ. 6
— «Mǝn sǝn mengixⱪa tegixlik yolda seni yetǝklǝymǝn ⱨǝm tǝrbiylǝymǝn;
Mening kɵzüm üstüngdǝ boluxi bilǝn sanga nǝsiⱨǝt ⱪilimǝn. 7
Əⱪli yoⱪ bolƣan at yaki exǝktǝk bolma;
Ularni qǝklǝxkǝ tizginlǝydiƣan yügǝn bolmisa,
Ular ⱨǝrgiz sanga yeⱪin kǝlmǝydu». 8
Rǝzillǝrgǝ qüxüdiƣan ⱪayƣu-ⱨǝsrǝtlǝr kɵptur,
Biraⱪ meⱨir-xǝpⱪǝtlǝr Pǝrwǝrdigarƣa tayanƣan kixini qɵridǝydu;
I ⱨǝⱪⱪaniylar, Pǝrwǝrdigar bilǝn xadlinip hursǝn bolunglar;
Kɵngli duruslar, huxalliⱪtin tǝntǝnǝ ⱪilinglar!
Source notes (8)
- Footnote ◼ «Dawut yazƣan «Masⱪil»» — «Masⱪil» degǝn sɵzning mǝnisi bizgǝ namǝlum; bǝzi alimlar uni «tǝrbiyilik» bildüridu, dǝp ⱪaraydu; yǝni bǝzilǝr uni «maⱨirliⱪ bilǝn eytilsun» degǝnni bildüridu, dǝp ⱪaraydu. «Itaǝtsizlikliri kǝqürüm ⱪilinƣan, gunaⱨliri yepilƣan kixi bǝhtliktur!» — ibraniy tilida «Aⱨ, itaǝtsizlikliri kǝqürüm ⱪilinƣan, gunaⱨliri yepilƣan kixining bǝhtlikliri!». Bu bǝhtliklǝr bir-birlǝp tɵwǝndǝ tǝswirlinidu.
- Cross-reference ◘ Rim. 4:6, 7
- Footnote ◼ «Selaⱨ!» — mǝnisi eniⱪ ǝmǝs. Zǝburdiki ⱨǝrbir küy nahxa ⱪilip eytilƣan waⱪitta, «Selaⱨ» bǝlkim pǝdidiki birdǝm tohtaxni (pauz) kɵrsitip, «tohta, oylan» degǝn mǝnidǝ ixlitilixi mumkin.
- Cross-reference ◘ Zǝb. 38:18; 51:3; Pǝnd. 28:13; 1Yuⱨ. 1:9
- Footnote ◼ «Xunga seni tapalaydiƣan pǝyttǝ, ⱨǝrbir ihlasmǝn Sanga dua bilǝn iltija ⱪilsun!» — «xunga» degǝn muxu muⱨim sɵz Hudaning kǝqürümini izdigǝn adǝmgǝ ümid berixi kerǝk (5-ayǝtni kɵrüng). «Qong topanlar ɵrlǝp texip kǝtkǝndǝ, sular xu kixigǝ yeⱪinlaxmaydu» — muxu sɵzlǝr oⱪurmǝnlǝrgǝ Nuⱨ pǝyƣǝmbǝrning dǝwridiki topanni ǝslitidu. Topan kelixtin burun Hudani izdigǝnlǝr üqün «Hudani tapalaydiƣan pǝyt» bolidu; lekin topan besip kǝlgǝndin keyin Hudani izdǝydiƣan ⱨeqⱪandaⱪ pursǝt ⱪalmaydu.
- Cross-reference ◘ Zǝb. 27:5; 31:20
- Footnote ◼ «Mening kɵzüm üstüngdǝ boluxi bilǝn...» — (1) Huda Ɵzini sɵygǝnlǝrni ⱨǝrdaim kɵzidǝ tutidu; (2) ⱪǝdimdǝ padixaⱨlar hizmǝtqilirigǝ pǝⱪǝt kɵz ixariti bilǝnla yol kɵrsitǝtti.
- Cross-reference ◘ Pǝnd. 26:3; Yaⱪ. 3:3
Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.