Zǝbur 31

31-küy •••• Besim astida

1Nǝƣmiqilǝrning bexiƣa tapxurulup oⱪulsun dǝp, Dawut yazƣan küy: —

Sǝn Pǝrwǝrdigarni, mǝn baxpanaⱨ ⱪildim;

Meni ⱨeqⱪaqan yǝrgǝ ⱪaritip ⱪoymiƣaysǝn;

Ɵz ⱨǝⱪⱪaniyliⱪing bilǝn meni azad ⱪilip ⱪutⱪuzƣaysǝn; 1

2Manga ⱪulaⱪ salƣaysǝn, meni tezrǝk ⱪutⱪuzuwalƣaysǝn;

Manga ⱪoram tax,

Ɵzümni ⱪoƣdaydiƣan ⱪorƣanliⱪ ⱪǝl’ǝ bolƣaysǝn.

3Qünki Sǝn mening uyultexim, mening ⱪorƣinimdursǝn;

Xunga Ɵz naming üqün meni yetǝkligǝysǝn, meni baxliƣaysǝn.

4Manga yoxurun selinƣan tuzaⱪtin ⱪǝdǝmlirimni tartⱪaysǝn;

Qünki Sǝn mening baxpanaⱨimdursǝn.

5Mǝn roⱨimni ⱪolungƣa tapxurdum;

Sǝn manga nijatliⱪ ⱪilip ⱨɵrlükkǝ qiⱪarƣansǝn, i Pǝrwǝrdigar, ⱨǝⱪ Tǝngri. 2

6Yalƣan ilaⱨlarƣa qoⱪunidiƣanlardin yirginip kǝldim;

Mǝn bolsam Pǝrwǝrdigarƣa etiⱪad ⱪilimǝn. 3

7Ɵzgǝrmǝs muⱨǝbbiting bilǝn huxal bolup xadlinimǝn;

Qünki mening harliⱪimni kɵrdüngsǝn;

Jenimning azap-oⱪubǝtliridin hǝwǝr tapting.

8Meni düxmǝnlirimning ⱪoliƣa qüxürmiding,

Bǝlki putlirimni kǝngri jayƣa turƣuzdung.

9I Pǝrwǝrdigar, manga rǝⱨim-xǝpⱪǝt kɵrsǝtkǝysǝn,

Qünki beximƣa külpǝt qüxti;

Dǝrd-ǝlǝmdin kɵzüm tügüxǝy dǝp ⱪaldi,

Jenim, wujudummu xundaⱪ. 4

10Ⱨayatim ⱪayƣu-ⱨǝsrǝt bilǝn,

Yillirim ƣǝm-ƣussǝ bilǝn uprawatidu.

Gunaⱨim tüpǝylidin maƣdurum ketǝy dǝp ⱪaldi,

Ustihanlirim sizip kǝtti.

11Mǝn rǝⱪiblirimning iza-aⱨanitigǝ ⱪaldim,

Yeⱪinlirim aldida tehimu xundaⱪ;

Tonuxlirimƣimu bir wǝⱨimǝ boldum;

Koqida meni kɵrgǝnlǝrmu mǝndin dajip ⱪaqidu. 5

12Ⱨǝmmǝylǝn meni ɵlgǝn adǝmdǝk, kɵnglidin qiⱪirip taxlaxti;

Puquⱪ qinidǝk bolup ⱪaldim.

13Qünki nurƣunlarning tɵⱨmǝtlirini anglidim,

Wǝⱨimǝ tǝrǝp-tǝrǝplǝrdǝ turidu;

Ular manga ⱨujum ⱪilixⱪa mǝsliⱨǝtlixiwatidu,

Jenimni elixⱪa ⱪǝst ⱪilixiwatidu.

14Biraⱪ mǝn Sanga tayinimǝn, i Pǝrwǝrdigar;

«Sǝn mening Hudayim!» — dedim.

15Mening künlirim Sening ⱪolungdidur;

Meni düxmǝnlirimning ⱪolidin ⱨǝm manga ziyankǝxlik ⱪilƣuqilardin ⱪutⱪuzƣaysǝn.

16Ⱪulungƣa didaringning jilwisini qüxürgǝysǝn;

Ɵzgǝrmǝs muⱨǝbbiting bilǝn manga nijatliⱪ ata ⱪilƣaysǝn.

17I Pǝrwǝrdigar, meni yǝrgǝ ⱪaritip ⱪoymiƣaysǝn;

Qünki mǝn Sanga iltija ⱪildim;

Rǝzillǝr yǝrgǝ ⱪarap ⱪalsun;

Ularning tǝⱨtisarada zuwani tutulsun;

18Yalƣan lǝwlǝr zuwandin ⱪalsun!

Ular ⱨǝⱪⱪaniylarni haliƣanqǝ mazaⱪ ⱪilip tǝkǝbburluⱪ bilǝn sɵzlimǝktǝ!

19Ɵzüngni baxpanaⱨ ⱪilƣanlar üqün insan balilirining kɵz aldida kɵrsǝtkǝn iltipatliring,

Yǝni Ɵzüngdin ⱪorⱪidiƣanlar üqün, saⱪliƣan iltipat-nemǝtliring nǝⱪǝdǝr moldur! 6

20Sǝn ularni insanlarning suyiⱪǝstliridin Ɵz ⱨuzurungdiki yoxurun dalda jayƣa alisǝn;

Sǝn ularni til-aⱨanǝtlǝrdin sayiwiningdǝ yoxurup ⱪoyisǝn.

21Pǝrwǝrdigarƣa tǝxǝkkür-mǝdⱨiyilǝr yollansun!

Qünki U ɵzgǝrmǝs muⱨǝbbitini zulmǝtlik bir xǝⱨǝrdǝ ajayib nimayǝn ⱪildi! 7

22Qünki mǝn dǝkkǝ-dükkidǝ ⱨoduⱪup: —

Seni, meni kɵzidin qiⱪirip ⱪoydimikin, dǝp ⱪorⱪⱪanidim;

Ⱨalbuki, mǝn nalǝ kɵtürüp yelinƣinimda, pǝryadimƣa ⱪulaⱪ salding.

23Pǝrwǝrdigarni sɵyünglar, i Uning barliⱪ mɵmin bǝndiliri!

Pǝrwǝrdigar Ɵzigǝ sadiⱪlarni ⱪoƣdaydu,

Ⱨǝm tǝkǝbburluⱪ bilǝn ix ⱪilƣuqilarning ⱪilmixlirini ɵz bexiƣa ⱨǝssilǝp ⱪayturidu!

24I Pǝrwǝrdigarni tǝlmürüp kütkǝnlǝr,

Jigǝrlik bol, ⱪǝlbing mǝrdanǝ ⱪilinsun! 8